ବ୍ରହ୍ମପୁର: ଆକ୍ସନ ମୋଡରେ ବ୍ରହ୍ମପୁର ମହାନଗର ନିଗମ । ବ୍ରହ୍ମପୁର ସହରର ମଧ୍ଯ ଭାଗରେ ଥିବା ଖଲ୍ଲିକୋଟ କଲେଜର ମୁଖ୍ଯ ରାସ୍ତାରେ ବେଆଇନ ଭାବେ ଦୀର୍ଘବର୍ଷ ଧରି ରହିଆସିଥିବା ଉଠା ଦୋକାନ ଗୁଡିକକୁ ଉଚ୍ଛେଦ କରାଯାଇଛି । ସହରର ଏହା ମୁଖ୍ଯ ରାସ୍ତା ହୋଇଥିବା ବେଳେ ପ୍ରତିଦିନ ହଜାର ହଜାର ଲୋକ ଯାତାୟାତ କରିଥାନ୍ତି । ହେଲେ କିଛି ବ୍ୟବସାୟୀ ବେଆଇନ ଭାବେ ଦୋକାନ ସବୁ ନିର୍ମାଣ କରିଥିଲେ। ଫଳରେ ବହୁ ସମୟ ଧରି ଟ୍ରାଫିକ ସମସ୍ୟା ଲାଗି ରହୁଥିଲା । ଏହାକୁ ନେଇ ବାରମ୍ବାର ଅଭିଯୋଗ ହୋଇ ଆସୁଥିଲା। ସୋମବାର ମହାନଗର ନିଗମ କମିଶନର ପୋଲିସ ଓ ନିଜ କର୍ମଚାରୀମାନଙ୍କୁ ନେଇ ଜେସିବି ସାହାଯ୍ଯରେ ଉଚ୍ଛେଦ କରିଥିଲେ ।
ଶିମିଳିପାଳକୁ ଆସିଲା ନୂଆ ଅତିଥି ଯମୁନା
ମୟୂରଭଞ୍ଜ: ଶିମିଳିପାଳକୁ ଆସିଲା ନୂଆ ଅତିଥି । ମହାରାଷ୍ଟ୍ର ତାଡୋବା ବ୍ୟାଘ୍ର ସଂରକ୍ଷଣ ପ୍ରକଳ୍ପରୁ ଆସିଛି ଏକ ଅଢେଇ ବର୍ଷର ବାଘୁଣୀ ଯମୁନା । ଶିମିଳିପାଳ ଅଭୟାରଣ୍ୟରେ ଯମୁନାକୁ ଛଡାଯାଇଛି । ଶିମିଳିପାଳରେ ବାଘ ସଂଖ୍ୟା ବୃଦ୍ଧି ନିମନ୍ତେ ଏହି ପଦକ୍ଷେପ ନିଆଯାଇଛି। ଯଶିପୁର କାଳିଆଣୀ ତନଖି ଫାଟକ ଦେଇ ପ୍ରବେଶ କରି ବାଘୁଣୀ ଯମୁନାକୁ ଜଙ୍ଗଲରେ ଛଡ଼ାଯାଇଛି ।
ଶିମିଳିପାଳରେ ବାଘ ସଂଖ୍ୟା ବୃଦ୍ଧି ନିମନ୍ତେ ଅଣାଯାଇଥିବା ବାଘୁଣୀକୁ ନେଇ ବୁଦ୍ଧିଜୀବୀ ମହଲରେ ବେଶ୍ ଉତ୍ସାହ ଦେଖିବାକୁ ମିଳିଛି ।
ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ୍ ମୁକୁଟ ପିନ୍ଧିଲେ ରାଚେଲ ଗୁପ୍ତା
ନନ୍ଦିଘୋଷ ବ୍ୟୁରୋ: ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ୍ ମୁକୁଟ ପିନ୍ଧିଲେ ରାଚେଲ ଗୁପ୍ତା । ପ୍ରଥମ ଭାରତୀୟ ଭାବେ ରଚିଲେ ଇତିହାସ । MGI ହଲ୍ରେ ଫିନାଲେ ସମୟରେ ପେରୁର ଲୁସିୟାନା ଫଷ୍ଟର ତାଙ୍କୁ ମୁକୁଟ ପିନ୍ଧାଇଥିଲେ । ବିଦେଶରେ ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ ଟାଇଟଲ୍ ଜିତି ଦେଶ ପାଇଁ ଗୌରବ ଆଣିଛନ୍ତି ରାଚେଲ । ଶୁକ୍ରବାର ଥାଇଲାଣ୍ଡର ବ୍ୟାଙ୍କକ୍ରେ ଆୟୋଜିତ ହୋଇଥିଲା ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ ପ୍ରତିଯୋଗିତା । ଏହି ପ୍ରତିଯୋଗିତାରେ ୭୦ରୁ ଅଧିକ ଦେଶର ପ୍ରତିଯୋଗୀ ଭାଗ ନେଇଥିଲେ । ତେବେ ସବୁ ସୁନ୍ଦରୀଙ୍କୁ ପଛରେ ପକାଇ ବାଜି ମାରିଛନ୍ତି ରାଚେଲ । ଫିଲିପିନ୍ସର କ୍ରିଷ୍ଟିନ୍ ଜୁଲିଆନ୍ ଓପିଆଜା ଫାର୍ଷ୍ଟ ରନର-ଅପ୍ ରହିଥିଲେ ।
ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ ପ୍ରତିଯୋଗିତା ବିଶ୍ୱର ଅଗ୍ରଣୀ ସୌନ୍ଦର୍ଯ୍ୟ ପ୍ରତିଯୋଗିତା ମଧ୍ୟରୁ ଅନ୍ୟତମ । ସାରା ବିଶ୍ୱରେ ଏହାର ୫ ନିୟୁତରୁ ଅଧିକ ଫଲୋଅର୍ସ ଅଛନ୍ତି ।
ରାଚେଲ କିଏ ?
ପଞ୍ଜାବ ଜଳନ୍ଧରର ବାସିନ୍ଦା ହେଉଛନ୍ତି ରାଚେଲ ଗୁପ୍ତା । ରାଚେଲଙ୍କ ଉଚ୍ଚତା ପ୍ରାୟ ୫ ଫୁଟ ୧୦ ଇଞ୍ଚ ହୋଇଥିବା ବେଳେ ବୟସ ୨୦ ବର୍ଷ । ମଡେଲିଂ ଓ ଅଭିନୟ କ୍ଷେତ୍ରରେ ସେ କ୍ୟାରିୟର କରୁଛନ୍ତି । ହିନ୍ଦୀ, ଇଂରାଜୀ ଓ ପଞ୍ଜାବୀ ଭାଷାରେ ତାଙ୍କର ଦକ୍ଷତା ରହିଛି । ମିସ୍ ଗ୍ରାଣ୍ଡ ଇଣ୍ଟରନ୍ୟାସନାଲ୍ ୨୦୨୪ ଟାଇଟଲ୍ ଜିତିବା ପୂର୍ବରୁ ମିସ୍ ଗ୍ରାଣ୍ଡ ଇଣ୍ଡିଆ ୨୦୨୪ର ମୁକୁଟ ଜିତିଥିଲେ । ରାଚେଲ ପୂର୍ବରୁ ପ୍ୟାରିସରେ ସୁପର ଟ୍ୟାଲେଣ୍ଟ ଅଫ୍ ୱାର୍ଲ୍ଡ ପୁରସ୍କାର ଜିତିଥିଲେ ।
ରାଚେଲ ସୋସିଆଲ ମିଡିଆରେ ମଧ୍ୟ ବେଶ ସକ୍ରିୟ । ଇନଷ୍ଟାରେ ୧ ମିଲିୟନରୁ ଅଧିକ ଫୋଲର୍ସ ରେଚଲ ଗୁପ୍ତାଙ୍କର ରହିଛି ।
ଜରାଜୀର୍ଣ୍ଣ ଅବସ୍ଥାରେ ରାୟଗଡାର ପ୍ରେମପାହାଡ
ରାୟଗଡା: ଜରାଜୀର୍ଣ୍ଣ ଅବସ୍ଥାରେ ରାୟଗଡାର ପର୍ଯ୍ଯଟନ ସ୍ଥଳୀ ପ୍ରେମପାହାଡ । ରକ୍ଷଣାବେକ୍ଷଣା ଅଭାବରୁ ଜରାଜୀର୍ଣ୍ଣ ଅବସ୍ଥାରେ ପ୍ରେମପାହାଡ। କେଉଁଠି ଚେୟାର ଭାଙ୍ଗି ପଡିଛି ତ ଆଉ କେଉଁଠି ସୁରକ୍ଷା ପାଚେରୀରେ କଳଙ୍କି ଲାଗି ଭାଙ୍ଗିବାକୁ ବସିଲାଣି । ଯୁଆଡେ ଦେଖିଲେ ସବୁଠି କୁଢକୁଢ ଅଳିଆ ପଡିଛି। ପୂର୍ବତନ ରାଜ୍ଯ ସରକାରଙ୍କ ଉଦ୍ଯମରେ କୋଟିକୋଟି ଟଙ୍କା ଅନୁଦାନରେ ଲଣ୍ଡା ପାହାଡର ସୌନ୍ଦର୍ଯ୍ଯକରଣ ହୋଇ ପ୍ରେମ ପାହାଡ ନାମରେ ପରିଣତ ହୋଇଥିଲା । ଏଠାରେ ରହିଛି ପ୍ରଭୁ ମହାକାଳେଶ୍ୱର, ଗଣେଶ, ହନୁମାନଙ୍କ ମନ୍ଦିର । ଏଥିସହିତ ବ୍ୟାୟାମ କରିବା ପାଇଁ ପାହାଡ଼ ଚାରି ପାଖରେ ପାଖାପାଖି ଏକ କିଲୋମିଟର ଦୂରତା ବିଶିଷ୍ଠ ସୁନ୍ଦର ଚଲାପଥ ରହିଛି। ତା ସହିତ ରହିଛି ବିଭିନ୍ନ ଶାରୀରିକ ବ୍ୟାୟାମ ଉପକରଣ। ଏଠାରେ ପ୍ରତ୍ଯେକ ଦିନ ହଜାର ହଜାର ଲୋକଙ୍କ ଭିଡ ଲାଗେ । ହେଲେ ଏହି ପର୍ଯ୍ଯଟନସ୍ଥଳୀଟି ରକ୍ଷଣାବେକ୍ଷଣା ଅଭାବରୁ ସତ୍ତା ହରାଇବାକୁ ବସିଥିବାରୁ ଏହାର ପୁନଃରୁଦ୍ଧାର ପାଇଁ ଦାବି କରିଛନ୍ତି ଲୋକେ ।
ପ୍ରେମ ପାହାଡରେ ସୁରକ୍ଷା ବ୍ଯବସ୍ଥା ନଥିବାରୁ ଅନେକ ଅସାମାଜିକ ବ୍ଯକ୍ତିଙ୍କ ଆଡ୍ଡାସ୍ଥଳୀ ପାଲଟିଥିବା ନେଇ ଅଭିଯୋଗ ହୋଇଛି । ତେଣୁ ପର୍ଯ୍ଯଟନସ୍ଥଳୀରେ ସୁରକ୍ଷା ବ୍ଯବସ୍ଥାକୁ କଡାକଡି କରିବାକୁ ପ୍ରଶାସନ ନିକଟରେ ଅନୁରୋଧ କରିଛନ୍ତି ବୁଦ୍ଧିଜୀବୀ । ଅପରପକ୍ଷେ ଏହି ପର୍ଯ୍ଯଟନସ୍ଥଳୀର ରକ୍ଷାବେକ୍ଷଣା ପାଇଁ ଜିଲ୍ଲା ପ୍ରଶାସନଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଛନ୍ତି ବିଧାୟକ ଆପଲସ୍ୱାମୀ କାଡ୍ରାକା।
ଦୀପାବଳି ପାଇଁ ଗାଇଡଲାଇନ; ବିପଦଜ୍ଜନକ ବାଣ ଫୁଟାଇବା କିମ୍ବା ବିକ୍ରି ଉପରେ କଟକଣା
ଭୁବନେଶ୍ୱର: ଦୀପାବଳି ପାଇଁ ଗାଇଡଲାଇନ ଜାରି କଲା କମିଶନରେଟ ପୋଲିସ। ସୁପ୍ରିମକୋର୍ଟଙ୍କ ନିୟମ ଅନୁଯାୟୀ ବାଣ ଫୁଟାଯିବ। ବିପଜ୍ଜନକ ବାଣ ଫୁଟାଇବା କିମ୍ବା ବିକ୍ରି ଉପରେ କଟକଣା ଜାରି ହୋଇଛି। ଗ୍ରୀନ କ୍ରାକର ବିକ୍ରି ପାଇଁ କୁହାଯାଇଛି । ବର୍ତ୍ତମାନ ସୁଦ୍ଧା ୨୫ଟି ସ୍ଥାନରେ ବିଏମସି ସହମତିରେ ବାଣ ବଜାର ଖୋଲିବା ପାଇଁ ଅନୁମତି ଦିଆଯାଇଛି । ଲାଇସେନ୍ସ ପାଇଁ ଏଯାଏଁ ୪୬୫ ଜଣ ଦୋକାନୀ ଆବେଦନ କରିଛନ୍ତି । ୨ ଶହ ଜଣଙ୍କୁ ଲାଇସେନ୍ସ ପ୍ରଦାନ ସରିଲାଣି। ଅନ୍ୟମାନଙ୍କୁ ବର୍ତ୍ତମାନ ବିଭିନ୍ନ ସର୍ତ୍ତ ପାଳନ ପାଇଁ ନିର୍ଦ୍ଦେଶ ଦିଆଯାଇଛି । ସେ ସବୁ ସର୍ତ୍ତ ପାଳନ ପରେ ତାଙ୍କୁ ମଧ୍ୟ ଲାଇସେନ୍ସ ପ୍ରଦାନ କରାଯିବ।
ଲାଇସେନ୍ସ ମୁତାବକ ଜଣେ ଦୋକାନୀ ୩ ଶହ କେଜି ବାଣ ରଖିପାରିବେ। ଦୁଇଟି ବାଣ ଦୋକାନ ମଝିରେ ୩ ମିଟର ବ୍ୟବଧାନ ରହିବ। ଦୋକାନ ବାହାରେ ୫୦ ମିଟର ଖାଲି ସ୍ଥାନ ରହିବ। ଅଗ୍ନିଶମ ବିଭାଗ ଓ ବିଏମସିର ସମସ୍ତ ନିୟମ ପାଳନ କରିବାକୁ ଦୋକାନୀ ବାଧ୍ୟ। କୌଣସି ନିୟମର ଖିଲାପ କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ।
ଅନ୍ୟପଟେ ରାଜଧାନୀ ଉପକଣ୍ଠରେ ବାଣ ତିଆରି ଚାଲିଥିବା ବେଳେ ଚଢ଼ାଉ ହୋଇଛି । ୨୦ ଲକ୍ଷରୁ ଉର୍ଦ୍ଧ୍ବ ଟଙ୍କାର ବାଣ ଜବତ ହୋଇସାରିଛି। ବେଆଇନ ଭାବେ ଗନ ପାଉଡର ଆଣି ବାଣ ତିଆରି କଲେ ବାଣ ସିଜ କରିବା ସହ ସମ୍ପୃକ୍ତ ବାଣୁଆଙ୍କୁ ମଧ୍ୟ ଗିରଫ କରାଯିବ ବୋଲି ଭୁବନେଶ୍ୱର ଡିସିପି ପିନାକ ମିଶ୍ର କହିଛନ୍ତି ।
ଚିକିତ୍ସା ଅବହେଳାରୁ ନବଜାତର ମୃତ୍ୟୁ, ହସ୍ପିଟାଲ ସମ୍ମୁଖରେ ଉତ୍ତେଜନା
କଟକ: ଚିକିତ୍ସା ଅବହେଳାରୁ ନବଜାତ ଶିଶୁର ମୃତ୍ୟୁ ହୋଇଥିବା ଅଭିଯୋଗ। କଟକ ସିଡିଏ ସେକ୍ଟର ୭ରେ ଥିବା ଏକ ଘରୋଇ ହସ୍ପିଟାଲ ବିରୋଧରେ ଏହି ଅଭିଯୋଗ ହୋଇଛି। ଏହାକୁ ନେଇ ସେଠାରେ ଉତ୍ତେଜନା ଦେଖା ଦେଇଥିଲା।
ସୂଚନା ଅନୁଯାୟୀ, ଯାଜପୁର ଡାକ୍ତରଖାନାରେ ରାଜେନ୍ଦ୍ର ସାହୁଙ୍କର ଏକ ଶିଶୁପୁତ୍ର ୨୬ ତାରିଖରେ ଜନ୍ମ ହୋଇଥିଲା। ପିଲାଟିର ସ୍ଵାସ୍ଥ୍ୟବସ୍ଥା ଖରାପ ହେବାରୁ ସେମାନେ କଟକ ଶିଶୁଭବନ ଆଣିଥିଲେ। ସେଠାରେ ଭେଣ୍ଟିଲେଟର ନମିଳିବାରୁ ଶିଶୁଟିକୁ କଟକ ସେକ୍ଟର ୭ରେ ଥିବା ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ। ଶିଶୁର ଅକ୍ସିଜେନ ସ୍ତର କମି କମି ଆସିଥିଲେ ସୁଦ୍ଧା ହସ୍ପିଟାଲରେ କେହି ଶିଶୁର ଚିକିତ୍ସା ପାଇଁ ଆସି ନଥିଲେ ବୋଲି ପରିବାର ଲୋକ ଅଭିଯୋଗ କରିଛନ୍ତି। ଏହି କାରଣରୁ ପିଲାଟର ଜୀବନ ଯାଇଥିବା ରାଜେନ୍ଦ୍ର ସାହୁ କହିଛନ୍ତି। ମର୍କତ ନଗର ଥାନାରେ ସେମାନେ ଏନେଇ ଅଭିଯୋଗ କରିଛନ୍ତି।
ବିଜେଡିର ବିଜେପିକୁ ଚେତାବନୀ, ସ୍ବାସ୍ଥ୍ଯ କ୍ଷେତ୍ରରେ ହଇରାଣ ନ ହୁଅନ୍ତୁ ଗରିବ ଲୋକ
ଭୁବନେଶ୍ୱର: କ୍ଷମତାକୁ ଆସିଲେ ଶହେ ଦିନ ଭିତରେ ଆୟୁଷ୍ମାନ ଯୋଜନା ଲାଗୁ କରିବାକୁ କହିଥିଲେ ବିଜେପି ସରକାର । ହେଲେ ଶହେ ଦିନ ବିତିବା ସତ୍ତ୍ବେ ଏପର୍ଯ୍ୟନ୍ତ ମୋଡାଲିଟି ପ୍ରସ୍ତୁତ ହୋଇପାରିନାହିଁ । ମଙ୍ଗଳବାର ସାରାଦେଶରେ ପ୍ରଧାନମନ୍ତ୍ରୀ ଆୟୁଷ୍ମାନ ଯୋଜନା ପାର୍ଟ-୨ ଲଞ୍ଚ ହେବ । ଯାହାକୁ ଓଡ଼ିଶା କେବଳ ଗ୍ରହଣ କରିବ କିନ୍ତୁ ଓଡିଶାରେ ଏବେ ଲାଗୁ କରାଯାଇପାରିବ ନାହିଁ ବୋଲି କହିଛନ୍ତି ସ୍ବାସ୍ଥ୍ଯ ମନ୍ତ୍ରୀ ମୁକେଶ ମହାଲିଙ୍ଗ। କାରଣ ମୋଡାଲିଟି ପ୍ରସ୍ତୁତ ହୋଇନାହିଁ। ଖୁବ ଶୀଘ୍ର ମୋଡାଲିଟି ପ୍ରସ୍ତୁତ କରି ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ଏହାକୁ ଲାଗୁ କରାଯିବ ବୋଲି ସ୍ଵାସ୍ଥ୍ୟ ମନ୍ତ୍ରୀ କହିଛନ୍ତି ।
ସେପଟେ ଗରିବ ଲୋକଙ୍କ ସ୍ବାସ୍ଥ୍ଯ ଓ ଜୀବନ ସହ ନ ଖେଳିବାକୁ ଚେତାଇ ଦେଇଛି ବିଜେଡି । ବିଜୁ ସ୍ଵାସ୍ଥ୍ୟ କଲ୍ୟାଣ କାର୍ଡ ଦ୍ବାରା ଗରିବ ଲୋକ ବେଶ ଉପକୃତ ହେଉଥିଲେ l ଯାହା ସ୍ଵାସ୍ଥ୍ୟ କ୍ଷେତ୍ରରେ ବୈପ୍ଲବିକ ପରିବର୍ତ୍ତନ ଆଣିଥିଲା l ନୂଆ ସରକାର ସ୍ଵାସ୍ଥ୍ୟ କାର୍ଡର ନାଁ ପରିବର୍ତ୍ତନ କରନ୍ତୁ କି ନୂଆ ଯୋଜନା କରି ମିଶ୍ରଣ କରନ୍ତୁ l କିନ୍ତୁ ଗରିବ ଲୋକମାନେ ଯେମିତି ଅସୁବିଧାରେ ନ ପଡ଼ିବେ ସେଥିପ୍ରତି ସରକାର ଦୃଷ୍ଟି ଦିଅନ୍ତୁ ବୋଲି କହିଛନ୍ତି ବରିଷ୍ଠ ବିଜେଡି ନେତା ପ୍ରଶାନ୍ତ ମୁଦୁଲି। ବିଜୁ ସ୍ୱାସ୍ଥ୍ୟ କାର୍ଡ ସୁବିଧା ଲୋକେ ଯେମିତି ପାଉଥିଲେ ସେମିତି ପାଆନ୍ତୁ ବୋଲି ସେ ଦାବି କରିଛନ୍ତି ।
ପିସିସି ସଭାପତି ଚୟନରେ ଆଉ ଚଳିବନି ଲବି : ସୋଫିଆ ଫିରଦୋଶ
ଭୁବନେଶ୍ୱର : ପିସିସି ସଭାପତି ଚୟନରେ ଆଉ ଚଳିବନି ଲବି। ଦିଲ୍ଲୀ ଲବିରେ ସଭାପତି ଚୟନ ହେବ ନାହିଁ । ଗ୍ରାଉଣ୍ଡରୁ ସଠିକ୍ ରିପୋର୍ଟ ନେଇ ସଭାପତି ଚୟନ କରାଯିବ ବୋଲି କହିଛନ୍ତି କଂଗ୍ରେସ ବିଧାୟକ ସୋଫିଆ ଫିରଦୋଶ । ଦୀପାବଳୀ ପରେ ଏଆଇସିସି ନିଯୁକ୍ତ କରିଥିବା ୨ଜଣ ନେତା ଚରଣ ଦାସ ମହନ୍ତ ଓ ମିନାକ୍ଷୀ ନଟରାଜନ ଆସିବେ । ସେମାନେ ଦଳୀୟ ନେତାଙ୍କ ସହ ଆଲୋଚନା କରି ଏଆଇସିସି ଅଧ୍ୟକ୍ଷ ଙ୍କୁ ରିପୋର୍ଟ ଦେବେ । ତେଣୁ ଆଶା ଉପଯୁକ୍ତ ଲୋକ ହିଁ ପିସିସି ସଭାପତି ହେବେ । ସେଥିପାଇଁ କଂଗ୍ରେସ ଶିବିର ଉତ୍ସାହିତ ଥିବା କହିଛନ୍ତି ସୋଫିଆ ଫିରଦୋଶ।
ସ୍ଵାମୀ ଦେଲା ନାହିଁ ୮ କୋଟି ଟଙ୍କା, ପ୍ରେମିକ ସହିତ ମିଶି ସ୍ଵାମୀକୁ ମାରି ଦେଲା ସ୍ତ୍ରୀ
ବେଙ୍ଗାଲୁରୁ : କର୍ଣ୍ଣାଟକର ରୋଡ଼ାଗୁ ଜିଲ୍ଲାର ଏକ କଫି ପ୍ଲାଣ୍ଟରୁ ୩ ସପ୍ତାହ ତଳୁ ମିଳିଥିବା ଏକ ଅଜଣା ଦରପୋଡ଼ା ମୃତଦେହ ମିଳିବା ଘଟଣାକୁ ପୋଲିସ ପର୍ଦ୍ଦାଫାସ୍ କରିଛି । ଏହା ଏକ ହତ୍ୟା ଷଡ଼ଯନ୍ତ୍ର ବୋଲି ପୋଲିସ ଜାଣିବାକୁ ପାଇଛି । ମୃତକ ଜଣଙ୍କ ୫୪ ବର୍ଷୀୟ ରମେଶ ଓ ସେ ସପ୍ତାହେ ତଳୁ ନିଖୋଜ ଥିଲେ । ଏହି ହତ୍ୟା ଘଟଣାରେ ପଛରେ ତାଙ୍କ ପତ୍ନୀ ନିହାରିକା, ତାର ପ୍ରେମିକା ନିଖିଲ ଏବଂ ଅନ୍ୟ ଜଣେ ଅଭିଯୁକ୍ତ ଅଙ୍କୁର ସଂପୃକ୍ତ ଥିବା ପୋଲିସ ଜାଣିବାକୁ ପାଇଛି । ଟଙ୍କା ପାଇଁ ବ୍ୟବସାୟୀ ରମେଶଙ୍କୁ ହତ୍ୟା କରାଯାଇଥିବା ଜଣାପଡ଼ିଛି । ହତ୍ୟା କରିବା ପରେ ମୃତଦେହକୁ ନଷ୍ଟ କରିବାକୁ ୮୦୦ କିଲୋମିଟର ଗାଡ଼ିରେ ନେଇ ସୀମାପାର କରିଥିଲେ । ହତ୍ୟାକାଣ୍ଡରେ ସମ୍ପୃକ୍ତ ୩ ଜଣଙ୍କୁ ଗିରଫ କରିଛି ପୋଲିସ ।
ଗତ ଅକ୍ଟୋବର ୮ ତାରିଖରେ କୋଡାଗୁର ସୁଣ୍ଟିକୋପ୍ପା ନିକଟରେ ଥିବା ଏକ କଫି ପ୍ଲାଣ୍ଟରୁ ପୋଲିସ ଏକ ଏକ ଦରପୋଡ଼ା ମୃତଦେହ ଜବତ କରିଥିଲା । ମୃତଦେହକୁ ଚିହ୍ନିଟ କରିବାରେ ପୋଲିସ ବିଫଳ ହେବା ପରେ ଉକ୍ତ ଅଞ୍ଚଳ ଦେଇ ଯାଇଥିବା ଗାଡ଼ି ଯାଞ୍ଚ କରିବା ପାଇଁ ସିସିଟିଭି ଫୁଟେଜ ସ୍କାନ କରିବା ଆରମ୍ଭ କରିଥିଲା । ଏକ ଲାଲ୍ ମର୍ସିଡିଜ୍ ବେଞ୍ଜ୍ ପୋଲିସର ସଦେହଘେରକୁ ଆସିଥିଲା । ଏହି କାରଟି ରମେଶ ନାମରେ ପଞ୍ଜୀକୃତ ହୋଇଥିବା ଜଣାପଡ଼ିଥିଲା । ରମେଙ୍କ ପତ୍ନୀ କିଛିଦନ ତଳେ ଥାନାରେ ଏକ ନିଖୋଜ ଅଭିଯୋଗ କରିଥିଲେ। ଏହା ପରେ ପୋଲିସ ତେଲେଙ୍ଗାନା ପୋଲିସ ସହିତ ଯୋଗାଯୋଗ କରିଥିଲା ଯେଉଁଠାରେ କାର ପଞ୍ଜିକୃତ ହୋଇଥିଲା।
ଅନୁସନ୍ଧାନରୁ ରମେଶଙ୍କ ପତ୍ନୀ ୨୯ ବର୍ଷୀୟ ପି. ନିହାରିକାଙ୍କ ଉପରେ ପୋଲିସର ସନ୍ଦେହ ବଢ଼ିଥିଲା । ପୋଲିସ ନିହାରିକାଙ୍କୁ ଗିରଫ କରି ପଚରାଉଚରା କରିବାରୁ ରମେଶଙ୍କୁ ହତ୍ୟା କରିଥିବା ସେ ସ୍ଵିକାର କରିଥିଲା । ନିହାରିକା ହତ୍ୟାକାଣ୍ଡରେ ତାର ସହଯୋଗୀ ନିଖିଲ ଓ ଅଙ୍କୁର କୁ ସାମିଲ୍ କରିଥିଲା । ନିହାରିକା ତାର ପ୍ରଥମ ସ୍ଵାମୀଠାରୁ ଠାରୁ ଅଲଗା ହୋଇ ହରିୟାଣାରେ ରହୁଥିଲା । ସେହି ସମୟରେ ସେ ଏକ ଟଙ୍କା ଠକେଇ ଘଟଣାରେ ଜେଲ ଯାଇଥିଲା । ସେ ଜେଲରେ ଅଙ୍କୁରକୁ ଭେଟିଥିଲେ।
ଜେଲରୁ ବାହାରିବା ପରେ ନିହାରିକା ରମେଶକୁ ଦ୍ଵିତୀୟ ବିବାହ କରିଥିଲା । ବ୍ୟବସାୟୀ ରମେଶ ନିହାରିକାକୁ ଏକ ବିଳାସପୂର୍ଣ୍ଣ ଜୀବନ ଶୈଳି ଯୋଗାଇଦେଇଥିଲେ । ଏହିସମୟରେ ନିହାରିକା ରମେଶଙ୍କୁ ୮ କୋଟି ଟଙ୍କା ଡିମାଣ୍ଡ କରିଥିଲା । ରମେଶ ଟଙ୍କା ଦେବାକୁ ମନା କରିଦେବାକୁ ନିହାରିକା କ୍ରୋଧିତ ହୋଇ ନିଖିଲ ଓ ଅଙ୍କୁର ସହ ମିଶି ରମେଶକୁ ହତ୍ୟା କରିଥିଲା । ଗତ ଅକ୍ଟୋବର ୧ ତାରିଖରେ ହାଇଦ୍ରାବାଦର ଅପପାଲରେ ବ୍ୟବସାୟୀ ରମେଶଙ୍କୁ ହତ୍ୟା କରିବା ପରେ ବେଙ୍ଗାଲୁରୁକୁ ନେଇ ଯାଇଥିଲେ। ଗାଡ଼ିରୁ ତେଲ ସରିଯିବାରୁ ସେମାନେ ଉପପାଲଠାରୁ ୮୦୦ କିଲୋମିଟର ଦୂରରେ କୋଡାଗୁ ଯାଇ ସେଠାରେ ସେମାନେ ଏକ କଫି ପ୍ଲାଣ୍ଟକୁ ନେଇ ମୃତଦେହକୁ କମ୍ବଳରେ ଘୋଡ଼ା ନିଆଁରେ ପୋଡ଼ି ଦେଇଥିଲେ । ଏହା ପରେ ତିନିଜଣ ହାଇଦ୍ରାବାଦକୁ ଫେରିଥିଲେ ଏବଂ ନିହାରିକା ରମେଶଙ୍କ ପାଇଁ ଏକ ନିଖୋଜ ରିପୋର୍ଟ ଦାଖଲ କରିଥିଲା
ରାଜରାସ୍ତାରେ ଓଡ଼ିଶା ସରକାରୀ ଆଉଟସୋର୍ସିଙ୍ଗ ପାରାମେଡିକାଲ କର୍ମଚାରୀ ସଂଘ
ଭୁବନେଶ୍ୱର : ରାସ୍ତାକୁ ଓହ୍ଲାଇଲେ ଓଡ଼ିଶା ସରକାରୀ ଆଉଟସୋର୍ସିଙ୍ଗ ପାରାମେଡିକାଲ କର୍ମଚାରୀ ସଂଘ। ସ୍ୱାସ୍ଥ୍ୟ ବିଭାଗ ଅଧୀନରେ କାର୍ଯ୍ୟରତ ଶହ ଶହ କର୍ମଚାରୀଙ୍କୁ ଛଟେଇ କରିବାକୁ ସରକାର ନେଇଥିବା ନିଷ୍ପତିକୁ ବିରୋଧ । ଏହାର ପ୍ରତିବାଦ କରି ଗଣ ଧାରଣା ଦେଇଛନ୍ତି କର୍ମଚାରୀମାନେ । କରୋନା ବିପତ୍ତି ସମୟରେ ଏମାନେ ରାଜ୍ୟର ସମସ୍ତ ଜିଲ୍ଲାରେ ରୋଗୀମାନଙ୍କୁ ସ୍ବାସ୍ଥ୍ୟ ସେବା ଯୋଗାଉଥିଲେ। ହେଲେ ଡିଉଟି ବାବଦକୁ ମିଳୁଛି ଦିନ ମଜୁରିଆ ଠାରୁ କମ ପାରିଶ୍ରମିକ ।
ନର୍ସ, ଲ୍ୟାବ ଟେକ୍ନିସିଆନ, ସ୍ୱାସ୍ଥ୍ୟ କର୍ମୀ ଭାବେ ରାଜ୍ୟରେ ପ୍ରାୟ ୪ ହଜାର କର୍ମୀ ତୃତୀୟ ପକ୍ଷ ଦ୍ୱାରା ନିଯୁକ୍ତ ହୋଇ କାମ କରୁଥିବା ବେଳେ ଏମାନଙ୍କୁ ଛଟେଇ କରାଯାଉଛି । ୬ ଟି ଜିଲ୍ଲାରେ ଛଟେଇ ହୋଇଥିବା ବେଳେ ଅନ୍ୟ ଜିଲ୍ଲାରେ ପର୍ଯ୍ୟାୟ କ୍ରମେ ଛଟେଇ କରିବାକୁ ସରକାର ନିଷ୍ପତି ନେଇଛନ୍ତି । ଅର୍ଥର ଅଭାବ ଦେଖାଇ ଏମାନଙ୍କୁ ଛଟେଇ କରିବା ନିଷ୍ପତି ଦୁର୍ଭାଗ୍ୟ ଜନକ ବୋଲି କହିଛି ସଙ୍ଘ । ସରକାରଙ୍କୁ ଏହାର ପୁନର୍ବିଚାର କରିବାକୁ ଦାବି କରିଛି ଆଉଟସୋର୍ସିଙ୍ଗ ପାରାମେଡିକାଲ କର୍ମଚାରୀ ସଂଘ।