ନନ୍ଦିଘୋଷ ବ୍ୟୁରୋ: ଗୋଟିଏ ଦିନର ବିରତି ପରେ ଆଜିଠୁ ପୁଣି ଆରମ୍ଭ ହେବ ରତ୍ନଭଣ୍ଡାର ମରାମତି କାର୍ଯ୍ୟ। ଗତ ମଙ୍ଗଳବାର ଦିନ ଭିତର ରତ୍ନଭଣ୍ଡାରରେ ବନ୍ଧାଯାଇଥିଲା ଲୁହାଭାରା। ଏଏସଆଇର ୧୫ ରୁ ୨୦ ଜଣ କୁଶଳୀ ଶ୍ରମିକଙ୍କ ଦ୍ବାରା କାର୍ଯ୍ୟ ଆରମ୍ଭ କରାଯାଇଥିଲା। ଆଜି ଡି ପ୍ଲାଷ୍ଟରିଂ ଅର୍ଥାତ ଚୂନ ଛଡାଇ ପରିଷ୍କାର କରାଯିବ। ଦୈନିକ ୫ ଘଣ୍ଟା ମରାମତି କରିବାକୁ ଲକ୍ଷ୍ୟ ରଖାଯାଇଛି। ଛତିଶାନିଯୋଗ ବୈଠକରେ ପ୍ରସ୍ତୁତ ନୀତିନିର୍ଘଣ୍ଟ ଓ ରାଜ୍ୟ ସରକାରଙ୍କ ମାର୍ଗଦର୍ଶିକା ଅନୁଯାୟୀ ଦ୍ୱିତୀୟ ଭୋଗମଣ୍ଡପ ପରେ ଆରମ୍ଭ ହୋଇଥିଲା ଭିତର ଭଣ୍ଡାର ମରାମତି କାର୍ଯ୍ୟ। ଏକ୍ସପର୍ଟ ଟିମ୍ ସହ ଶ୍ରୀମନ୍ଦିର ବୈଷୟିକ ଟିମ୍,ଏଏସଆଇ ପୁରୀ ସର୍କଲ ଅଧିକାରୀ ମାନେ ମରାମତି କାର୍ଯ୍ୟର ଅନୁଧ୍ୟାନ କରିବେ।ମରାମତି କାର୍ଯ୍ୟରେ ଯେଉଁମାନେ ନିଯୁକ୍ତ ହୋଇଛନ୍ତି ସେମାନଙ୍କୁ ଶ୍ରୀମନ୍ଦିର ପ୍ରଶାସନ ତରଫରୁ ପରିଚୟପତ୍ର ପ୍ରଦାନ କରାଯାଇଛି। ମରାମତି ବେଳେ ଫାଟ ସୃଷ୍ଟି ହୋଇଥିବା ପଥର ଓ ବିମ୍ କୁ ଅପସାରଣ କରାଯିବ। ରତ୍ନଭଣ୍ଡାର ଚଟାଣରେ ଗ୍ରାନାଇଟ୍ ପଥର ମଧ୍ୟ ବିଛାଯିବ ବୋଲି ଏଏସଆଇ ଓଡିଶା ମୁଖ୍ୟ ଡି.ବି ଗଡନାୟକ କହିଛନ୍ତି। ଅନ୍ୟପଟେ ମରାମତି ସମୟରେ ଭକ୍ତମାନେ ବାହାରକାଠରୁ ମହାପ୍ରଭୁଙ୍କ ଦର୍ଶନ କରିପାରିବେ।ଆସନ୍ତା ତିନିମାସ ଭିତରେ ଭିତର ରତ୍ନଭଣ୍ଡାର ମରାମତି ଶେଷ କରିବାକୁ ଲକ୍ଷ୍ୟ ରଖାଯାଇଛି। ଗତକାଲି ଦିବା ପହୁଡ଼ ନୀତି ଲାଗି ମରାମତି କାର୍ଯ୍ୟ ବନ୍ଦ ରହିଥିଲା।
ନବୀନ ପଟ୍ଟନାୟକଙ୍କୁ ଭେଟିଲେ ଗଞ୍ଜାମ ବିଜେଡି ନେତା
ଭୁବେନଶ୍ବର : ନବୀନ ନିବାସରେ ନବୀନ ପଟ୍ଟନାୟକଙ୍କୁ ଭେଟିଲେ ଗଞ୍ଜାମ ବିଜେଡି ନେତା । ବ୍ରହ୍ମପୁର ମହାନଗର ନିଗମର ୩୪ କର୍ପୋରେଟର, ମେୟର, ଡେପୁଟି ମେୟର, ପୂର୍ବତନ ବିଧାୟକ ବିକ୍ରମ ପଣ୍ଡା, ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକଙ୍କ ସହ ସାଙ୍ଗଠନିକ ପ୍ରସଙ୍ଗରେ ଆଲୋଚନା ହୋଇଥିବା ସୂଚନା ଦେଇଛନ୍ତି ବିଜେଡି ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ର । ବରିଷ୍ଠ ବିଜେଡି ନେତା ପ୍ରଦୀପ ଅମାତ ମଧ୍ୟ ଉପସ୍ଥିତ ରହିଥିଲେ । ବିକାଶ କାମ କିଭଳି ଆଗକୁ ବଢିବ ଓ ସଭ୍ୟ ସଂଗ୍ରହ କାର୍ଯ୍ୟ କିଭଳି ସମନ୍ୱୟ ରଖି ଆଗକୁ ଯିବ ସେ ନେଇ ଆଲୋଚନା ହୋଇଥିଲା । କୌଣସି ନେତା ନେତା ମଧ୍ୟରେ ମତଭେଦ ନାହିଁ। ସମସ୍ତେ ଏକ ହୋଇ କାମ କରିବେ ବୋଲି କହିଛନ୍ତି ବିକ୍ରମ ପଣ୍ଡା। ନବୀନ ବାବୁଙ୍କ କଥା ଆସିଲେ ସମସ୍ତେ ଏକାଠି ବୋଲି କହିଲେ ବିକ୍ରମ ପଣ୍ଡା। ସଭ୍ୟ ସଂଗ୍ରହ ବୃଦ୍ଧି କରାଯିବା ପ୍ରସଙ୍ଗରେ ଆଲୋଚନା ହୋଇଥିବା କହିଲେ ବ୍ରହ୍ମପୁର ମହାନଗର ନିଗମ କର୍ପୋରେଟର।
ବରିଷ୍ଠ ନାଗରିକଙ୍କ ପାଇଁ ବିଗ୍ ହେଲ୍ଥ ପ୍ଲାନ୍ ଘୋଷଣା କରିଛନ୍ତି କେଜ୍ରିଓ୍ବାଲ
ଦିଲ୍ଲୀ : ଦିଲ୍ଲୀ ନିର୍ବାଚନ ପୂର୍ବରୁ ଆପର ବଡ଼ ଘୋଷଣା । ବରିଷ୍ଠ ନାଗରିକଙ୍କ ପାଇଁ ବିଗ୍ ହେଲ୍ଥ ପ୍ଲାନ୍ ଘୋଷଣା କରିଛନ୍ତି ଅରବିନ୍ଦ କେଜ୍ରିଓ୍ବାଲ । ୬୦ ବର୍ଷରୁ ଊର୍ଦ୍ଧ୍ବ ନାଗରିକଙ୍କୁ ମାଗଣାରେ ସ୍ବାସ୍ଥ୍ୟ ସେବା ଯୋଗାଇ ଦିଆଯିବ । ଧନୀ, ଗରିବ ସମସ୍ତଙ୍କୁ ମିଳିବ ମାଗଣା ଚିକିତ୍ସା ସେବା । ଚିକିତ୍ସା କ୍ଷେତ୍ରରେ କୌଣସି ଲିମିଟ୍ ରହିବ ନାହିଁ । ଚିକିତ୍ସାର ସମସ୍ତ ଖର୍ଚ୍ଚ ଦିଲ୍ଲୀ ସରକାର ବହନ କରିବେ । ସରକାରୀ ଓ ଘରୋଇ ହସ୍ପିଟାଲରେ ହେବ ମାଗଣା ଚିକିତ୍ସା । ସମସ୍ତଙ୍କ ମାଗଣା ଚିକିତ୍ସା ପାଇଁ ସଂଜୀବନୀ ଯୋଜନା ଘୋଷଣା କରିଛନ୍ତି କେଜ୍ରିୱାଲ୍ । ୨ରୁ ୩ ଦିନ ମଧ୍ୟରେ ଆରମ୍ଭ ହେବ ରେଜିଷ୍ଟ୍ରେସନ୍। ସେହିଭଳି କ୍ଷମତାକୁ ପୁଣିଥରେ ଆସିଲେ ସବୁ ବର୍ଗଙ୍କୁ ସନ୍ତୁଷ୍ଟ କରାଯିବ ବୋଲି ଦଳ ପକ୍ଷରୁ କୁହାାଯାଇଛି ।ମହିଳାଙ୍କୁ ମାସିକ ୨୧୦୦ ଟଙ୍କା ଦେବାକୁ ଘୋଷଣା କରିଛି ଦଳ । ମହିଳା ସମ୍ମାନ ଯୋଜନାର ରାଶି ବୃଦ୍ଧି କରାଯିବ । ଅଟୋ ରିକ୍ସା ୱେଲଫେୟାର ସ୍କିମ୍ ଘୋଷଣା କରିଛି ଆପ୍ । ଇଭି ମାଲିକଙ୍କୁ ରିହାତି ସହିତ ଇନସୁରାନ୍ସରେ ସୁବିଧା ଯୋଗାଇ ଦିଆଯିବ ।
ଜର୍ଦ୍ଦା ଗୋଦାମରେ ଚଢ଼ାଉ, ନକଲି ଜର୍ଦ୍ଦା ଜବତ
ପିପିଲି : ନକଲି ଜର୍ଦ୍ଦା ଗୋଦାମରେ ଚଢ଼ାଉ । ପୁରୀ ସତ୍ୟବାଦୀ ବଜାରରେ ଥିବା ପାନ ମସଲା ହୋଲସେଲିଙ୍ଗ ଗୋଦାମରେ ଚଢ଼ାଉ କରି ବିପୁଳ ପରିମାଣର ନକଲି ଜର୍ଦ୍ଦା ଜବତ କରାଯାଇଛି । ପୁରୀ ଏସପିଙ୍କ ନିର୍ଦ୍ଦେଶରେ ଆଜି ସତ୍ୟବାଦୀ ପୋଲିସ ଓ ଦିଲ୍ଲୀରୁ ଆସିଥିବା ଡିଲକ୍ସ ଜର୍ଦ୍ଦା କମ୍ପାନୀ ଅଧିକାରୀମାନେ ଏହି ଚଢାଉ କରିଛନ୍ତି । ଦୀର୍ଘଦିନ ହେବ ସତ୍ୟବାଦୀରେ କିଛି ବ୍ୟବସାୟୀ ଅସଲି ଜର୍ଦ୍ଦା ନାମରେ ନକଲି ଜର୍ଦ୍ଦାକୁ ଚଢ଼ା ଦରରେ ବିକ୍ରି କରୁଥିବା ନେଇ ଅଭିଯୋଗ ହୋଇଥିଲା । ଥାନାରେ କମ୍ପାନୀ ପକ୍ଷରୁ ଅଭିଯୋଗ ପରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ସତ୍ୟବାଦୀ ଥାନା ଅଧିକାରୀ ବିଜୟ କେତନ ବେହେରା ସୂଚନା ଦେଇଛନ୍ତି। ଚଢ଼ାଉରେ ସତ୍ୟବାଦୀ ପୋଲିସ ସହିତ ଡିଲକ୍ସ କମ୍ପାନୀର ୯ଜଣିଆ ଟିମ୍ ସାମିଲ ହୋଇଥିଲେ।
ବୋଟ୍ ବୁଡ଼ି ୧୩ ଜଣଙ୍କ ମୃତ୍ୟୁ, ୧୦୧ ଜଣ ସୁରକ୍ଷିତ ଉଦ୍ଧାର
ମୁମ୍ଵାଇ : ମୁମ୍ଵାଇ ଉପକୂଳରେ ବଡ଼ ଅଘଟଣ। ବୋଟ ବୁଡ଼ିଯିବାରୁ ୧୩ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୩ ଜଣ ନୌସେନା ଅଧିକାରୀ ଥିବା ବେଳେ, ୧୦ ଜଣ ସାଧାରଣ ନାଗରିକ ଅଛନ୍ତି। ୧୦୧ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ରହିଛି। ଆଜି ଏଲିଫେଣ୍ଟା କେଭସ୍ ଦେଖିବାକୁ ଯିବା ବେଳେ ବୋଟକୁ ଧକ୍କା ଦେଇଥିଲା ଅନ୍ୟ ଏକ ସ୍ପିଡ୍ ବୋଟ୍। ବୋଟଟି ବୁଡିଯିବା ପରେ ସ୍ଥାନୀୟ ମତ୍ସ୍ୟଜୀବୀ ଓ କୋଷ୍ଟ ଗାର୍ଡ ସହାୟତାରେ ଉଦ୍ଧାର କାର୍ଯ୍ୟକୁ ଜୋରଦାର କରାଯାଇଥିଲା।
ସୁନୀଲ ପାଲ-ମୁସ୍ତାକ ଖାନଙ୍କ ପରି ସେଲିବ୍ରିଟିଙ୍କୁ ଫାଶରେ ପକାଇଥିଲେ ମେରଟ ଗ୍ୟାଙ୍ଗ
ମେରଟ : ମେରଟରେ ଏମିତି ଏକ ଗ୍ୟାଙ୍ଗର ଖୁଲାସା ହୋଇଛି । ଯିଏ ଇଭେଣ୍ଟ ନାମରେ ମୁମ୍ବାଇର ଅଭିନେତ୍ରୀମାନଙ୍କୁ ଡାକିବା ସହ ପାଇସା ପାଇଁ ଅପହରଣ କରିଆସୁଥିଲା। ପରେ ଟଙ୍କା ନେବା ପରେ ସେମାନଙ୍କୁ ଛାଡି ଦେଉଥିଲେ । ଲଜ୍ଜା ଏବଂ ବଦନାମ ଭୟରେ ଅନେକ ବଲିଉଡ ସେଲିବ୍ରିଟି ଏହି ଗ୍ୟାଙ୍ଗର କବଳରୁ ମୁକ୍ତ ହୋଇଥିଲେ ମଧ୍ୟ ଚୁପ୍ ରହିବା ଭଲ ବୋଲି ଭାବିଥିଲେ। ଏପରିକି ସେମାନେ ପୋଲିସ ନିକଟରେ ଅଭିଯୋଗ ମଧ୍ୟ କରିନାହାଁନ୍ତି। କିନ୍ତୁ ହାସ୍ୟ ଅଭିନେତା ସୁନୀଲ ପାଲ ଏବଂ ଅଭିନେତା ମୁସ୍ତାକ ଖାନଙ୍କୁ ଅପହରଣ କଲାବେଳେ ଏହି ଗ୍ୟାଙ୍ଗର ଖୁଲାସା ହୋଇଥିଲା। ମେରଟର ଅପହରଣକାରୀ ଗ୍ୟାଙ୍ଗର ପ୍ରଥମେ ମୁସ୍ତାକ ଖାନ ଏବଂ ପରେ ସୁନୀଲ ପାଲଙ୍କୁ ଅଲଗା ଅଲଗା ଅପହରଣ କରିଥିଲେ । ଯାହାଫଳରେ ଦୁହେଁ ସେମାନେ ତାଙ୍କ ଘରକୁ ଫେରିବା ପର୍ଯ୍ୟନ୍ତ ଜାଣି ପାରିଲେ ନାହିଁ ।
ହାସ୍ୟ ଅଭିନେତା ସୁନୀଲ ପାଲଙ୍କ ଠାରୁ ବଲିଉଡ ଅଭିନେତା ମୁସ୍ତାକ ଖାନଙ୍କ ପର୍ଯ୍ୟନ୍ତ ଇଭେଣ୍ଟ ନାମରେ, ୟୁପି ଅପହରଣକାରୀମାନେ ଏହି ପ୍ରସିଦ୍ଧ ବ୍ୟକ୍ତିତ୍ୱମାନଙ୍କୁ ଯନ୍ତ୍ରଣା ଦେଇଛନ୍ତି, ଯାହା ସେମାନେ କାହାକୁ ଦେଖାଇବାକୁ କିମ୍ବା ଲୁଚାଇବାକୁ ସକ୍ଷମ ନୁହଁନ୍ତି । ଗତ କିଛି ଦିନ ମଧ୍ୟରେ ପଶ୍ଚିମ ଉତ୍ତରପ୍ରଦେଶର ଅପରାଧୀମାନେ କେବଳ ଏହି ଦୁଇ କଳାକାରଙ୍କୁ ୟୁପି ଡାକି ନଥିଲେ, ବରଂ ଉଭୟଙ୍କୁ ଅପହରଣ କରି ସେମାନଙ୍କଠାରୁ ଲକ୍ଷ ଲକ୍ଷ ଟଙ୍କା ସଂଗ୍ରହ କରିଥିଲେ। ତେବେ ଅପହରଣର ଏହି କାହାଣୀ କେବଳ ଏହି ହାସ୍ୟ ଅଭିନେତା ଏବଂ ଅଭିନେତାଙ୍କ ମଧ୍ୟରେ ସୀମିତ ନାହିଁ । ଗତ ୬ମାସ ମଧ୍ୟରେ ୟୁପିର ଏହି ଗ୍ୟାଙ୍ଗ ପ୍ରାୟ ଅଧ ଡଜନଙ୍କୁ ଅପହରଣ କରି ସେମାନଙ୍କ ଠାରୁ ଲକ୍ଷ ଲକ୍ଷ ଯଙ୍କା ରୋଜଗାର କରିଛନ୍ତି । ଏହି ଅପହରଣର ରାକେଟ ମେରଟରୁ ବିଜନୋର ଏବଂ ବିଜନୋରରୁ ମୁମ୍ବାଇ ପର୍ଯ୍ୟନ୍ତ ଲମ୍ବିଛି ।
୨ ଡିସେମ୍ବର ୨୦୨୪, ନୂଆଦିଲ୍ଲୀ
ଏହି ତାରିଖର କିଛି ଦିନ ପୂର୍ବରୁ ଅଭିନେତା ସୁନୀଲ ପାଲଙ୍କ ସହ ଅନିଲ ନାମକ ଜଣେ ଯୁବକ ଯୋଗାଯୋଗ କରି, ତାଙ୍କୁ ହରିଦ୍ୱାରରେ ଏକ କାର୍ଯ୍ୟକ୍ରମରେ ଯୋଗଦେବାକୁ କହିଥିଲେ । ସୁନୀଲ ତାଙ୍କ ଫି ବିଷୟରେ କହିଥିଲେ ଏବଂ ଆଗରୁ ଏକ ଟୋକେନ୍ ଟଙ୍କା ନେଇଥିଲେ । ନିର୍ଦ୍ଦିଷ୍ଟ ତାରିଖ ଅର୍ଥାତ୍ ୨ ଡିସେମ୍ବରରେ ସେ ମୁମ୍ବାଇରୁ ବିମାନ ଯୋଗେ ଦିଲ୍ଲୀରେ ପହଞ୍ଚିଥିଲେ । ତାଙ୍କୁ ଦିଲ୍ଲୀରେ ସ୍ୱାଗତ କରିବା ପାଇଁ ବିମାନବନ୍ଦରରେ ଇଭେଣ୍ଟ ଆୟୋଜକମାନେ ଉପସ୍ଥିତ ଥିଲେ । ବିମାନରୁ ଓହ୍ଲାଇବା ପରେ ସୁନୀଲ ସିଧା କାରରେ ବସିଥିଲେ ଏବଂ କାରଟି ଦିଲ୍ଲୀରୁ ହରିଦ୍ୱାର ଅଭିମୁଖେ ଯାତ୍ରା ଆରମ୍ଭ କରିଥିଲା । କିନ୍ତୁ ସୁନୀଲଙ୍କ କାରଟି ଅଧା ବାଟରେ ପହଞ୍ଚିବା ପରେ କିଛି ଘଟିଥିଲା । ଚା ’ ପିଇବା ବାହାନାରେ ଆୟୋଜକମାନେ କାରକୁ ଅଧାବାଟରେ ଅଟକାଇ ଅନ୍ୟ ଗାଡିରେ ବସାଇଥିଲେ । ପରେ ତାଙ୍କ ଆଖିରେ ପଟି ବାନ୍ଧି ହରିଦ୍ୱାର ବଦଳରେ ମେରଟର ଏକ ଅଜ୍ଞାତ ସ୍ଥାନକୁ ନେଇ ଯାଇଥିଲେ । ଅର୍ଥାତ୍ ସୁନୀଲ ପାଲଙ୍କୁ ଅପହରଣ କରାଯାଇଥିଲା।
ଅପହରଣକାରୀମାନେ ଯାହା କହିଥିଲେ ତାହା ମାନିବା ଛଡା ସୁନୀଲଙ୍କ ପାଖରେ ଅନ୍ୟ କୌଣସି ବିକଳ୍ପ ନଥିଲା। ଅପହରଣକାରୀମାନେ ତାଙ୍କୁ ଧମକ ଦେଇଥିଲେ ଏବଂ ବିଭିନ୍ନ କିସ୍ତିରେ ତାଙ୍କ ଆକାଉଣ୍ଟକୁ ମୋଟ ୮ ଲକ୍ଷ ଟଙ୍କା ନେଇଯାଇଥିଲେ । ପରିସ୍ଥିତି ଏପରି ହେଲା ଯେ, ଭୟଭୀତ ହୋଇ ସୁନୀଲ ତାଙ୍କ ଅପହରଣ ବିଷୟରେ ପରିବାର ସଦସ୍ୟଙ୍କୁ ମଧ୍ୟ ଜଣାଇ ନଥିଲେ ଏବଂ ଅପହରଣକାରୀଙ୍କ ନିକଟକୁ ପଠାଇବା ପାଇଁ ତାଙ୍କ ସାଙ୍ଗମାନଙ୍କଠାରୁ ଟଙ୍କା ମାଗିଥିଲେ । ଅନ୍ୟପକ୍ଷରେ, ସୁନୀଲଙ୍କ ହଠାତ୍ ନିଖୋଜକୁ ନେଇ ତାଙ୍କ ପତ୍ନୀ ନିଖୋଜ ରିପୋର୍ଟ ମୁମ୍ବାଇରେ ଦାଖଲ କରିଥିଲେ । ପରେ ତାଙ୍କ ଅପହରଣକୁ ନେଇ ଏକ ମାମଲା ସାଣ୍ଟାକ୍ରୁଜ ପୋଲିସ ଥାନାରେ ପଞ୍ଜୀକୃତ ହୋଇଥିଲା । ସେପର୍ଯ୍ୟନ୍ତ ମେରଟ ପୋଲିସ ପାଖରେ ଏହି ଘଟଣା ସମ୍ପର୍କରେ କୌଣସି ସୂଚନା ନଥିଲା ।
ଅନ୍ୟପଟେ ସୁନୀଲଙ୍କଠାରୁ ଟଙ୍କା ସଂଗ୍ରହ କରିବା ପରେ ଅପହରଣକାରୀମାନେ ତାଙ୍କଠାରୁ ଉଦ୍ଧାର ହୋଇଥିବା ଟଙ୍କାରୁ ବିମାନ ଟିକେଟ୍ ପାଇଁ ୨୦ ହଜାର ଟଙ୍କା ଦେଇ ମେରଟର ଲାଲକୁର୍ତ୍ତୀ ଅଞ୍ଚଳରେ ଛାଡିଥିଲେ । ପ୍ରତାରଣାର ଶିକାର ହୋଇଥିବା ସୁନୀଲ ପାଲ କୌଣସି ପ୍ରକାରେ ମେରଟରୁ ଗାଜିଆବାଦ ଏବଂ ପରେ ଦିଲ୍ଲୀ ଦେଇ ମୁମ୍ବାଇରେ ପହଞ୍ଚିଥିଲେ । ଏହା ପରେ ସୁନୀଲଙ୍କ ଠାରୁ ମୁମ୍ବାଇ ପୋଲିସ ଅପହରଣର କାହାଣୀ ଜାଣିବାକୁ ପାଇଥିଲା । ମୁମ୍ବାଇ ପୋଲିସ ଯେତେବେଳେ ତଦନ୍ତ କଲା, ସୁନୀଲରୁ ଉଦ୍ଧାର ହୋଇଥିବା ଅର୍ଥର କିଛି ଅଂଶ ମେରଟରେ ଜଣେ ଜୁଏଲର ଆକାଉଣ୍ଟକୁ ସ୍ଥାନାନ୍ତର ହୋଇଥିବା ଜଣାପଡିଛି । ପ୍ରଥମେ ମୁମ୍ବାଇ ପୋଲିସ ଫୋନରେ ଜୁଏଲରକୁ ଚେତାବନୀ ଦେଇଥିଲା ଏବଂ ତା’ପରେ ତାଙ୍କ ଆକାଉଣ୍ଟକୁ ଫ୍ରିଜ୍ କରିଥିଲା ।
ସୁନୀଲ ପାଲଙ୍କ ନାମରେ କିଣାଯାଇଥିଲା ଅଳଙ୍କାର
ଅଳଙ୍କାର କିଣିବା ବିଷୟରେ ସୁନୀଲ କିଛି ଜାଣି ନଥିଲେ, ବରଂ ସେ ଭାବିଥିଲେ ବୋଧହୁଏ ଏହା ଡିଜିଟାଲ ଗିରଫ କିମ୍ବା ଠକେଇର ଖେଳ ଅଟେ । ସେ ମୁମ୍ବାଇ ପୋଲିସର କଲକୁ ଅଣଦେଖା କରିଥିଲେ । କିନ୍ତୁ ପରଦିନ ଯେତେବେଳେ ସେ ଜାଣିବାକୁ ପାଇଲେ ଯେ ତାଙ୍କ ବ୍ୟାଙ୍କ ଆକାଉଣ୍ଟ ଫ୍ରିଜ୍ ହୋଇଯାଇଛି, ସେତେବେଳେ ସେ ମେରଟ ପୋଲିସ୍ ପାଖରେ ପହଞ୍ଚିଥିଲେ । ଏହା ପରେ ମେରଟ ପୋଲିସ ଜାଣିବାକୁ ପାଇଲା ଯେ, ସୁନୀଲଙ୍କଠାରୁ ଟଙ୍କା ସଂଗ୍ରହ କରିବା ପରେ ଅପହରଣକାରୀମାନେ ସେହି ସୁନା ଦୋକାନରୁ ଲକ୍ଷ ଲକ୍ଷ ଟଙ୍କା ଅଳଙ୍କାର କଣିଥିଲେ । ଏଥିପାଇଁ ସୁନୀଲ ପାଲଙ୍କ ନାମରେ ବିଲ୍ ମଧ୍ୟ ହୋଇଥିଲା ।
ଏହା ପରେ ଯେତେବେଳେ ପୋଲିସ ସୁନା ଦୋକାନର ସିସିଟିଭି ଫୁଟେଜ ଯାଞ୍ଚ କଲା, ସେତେବେଳେ ଅପହରଣକାରୀଙ୍କୁ ଜାଣିବାକୁ ପାଇଥିଲା । ଏହି ଅପହରଣକାରୀମାନେ ପଶ୍ଚିମ ଉତ୍ତରପ୍ରଦେଶର କୁଖ୍ୟାତ ଅପରାଧୀ ଲାଭି ପାଲ ଏବଂ ତାଙ୍କ ଗ୍ୟାଙ୍ଗ ବ୍ୟତୀତ ଅନ୍ୟ କେହି ନୁହଁନ୍ତି। ଲାଭି ପାଲ ନିଜେ ଅଳଙ୍କାର ଦୋକାନରେ ସପିଂ କରୁଥିବା ଦେଖିବାକୁ ମିଳିଥିଲା। ବର୍ତ୍ତମାନ ମେରଟ ପୋଲିସ ଲାଭି ପାଲ ଏବଂ ତାଙ୍କ ଗ୍ୟାଙ୍ଗ ଖୋଜିବା ପାଇଁ ତଦାଘନା କରିଥିଲା ପୋଲିସ । ସୁନୀଲ ପାଲଙ୍କ ଅପହରଣର କାହାଣୀ ଏପରି ଥିଲା । ସେହିଭଳି ଅନ୍ୟ ଜଣେ ବଲିଉଡ ଅଭିନେତା ଅଭିନେତା ମୁସ୍ତାକ ଖାନଙ୍କ ସହ ମଧ୍ୟ ଏପରି ଘଟଣା ଘଟିଥିଲା।
୨୦ ନଭେମ୍ବର ୨୦୨୪, ନୂଆଦିଲ୍ଲୀ
ମେରୁଟର ବାସିନ୍ଦା ରାହୁଲ ସାଇନି ନାମକ ଜଣେ ବ୍ୟକ୍ତି ମୁସ୍ତାକ ଖାନଙ୍କ ସହ ଫୋନରେ କଥା ହୋଇଥିଲେ ଏବଂ ତାଙ୍କୁ ଅତିଥି ଭାବରେ ଏକ ଇଭେଣ୍ଟରେ ଯୋଗଦେବାକୁ ନିମନ୍ତ୍ରଣ କରିଥିଲେ । ମୁସ୍ତାକ ପ୍ରଥମେ ଦିଲ୍ଲୀ ଏବଂ ପରେ ଦିଲ୍ଲୀରୁ ମେରୁଟ ଆସିବେ ବୋଲି ୨୦ ନଭେମ୍ବରରେ ନିଷ୍ପତ୍ତି ହେଲା । ନଭେମ୍ବର ୨୦ରେ ମୁସ୍ତାକ ଖାନ ଦିଲ୍ଲୀର ଆଇଜି ବିମାନ ବନ୍ଦରରେ ଅବତରଣ କରିଥିଲେ ଏବଂ ଅପହରଣକାରୀମାନେ ତାଙ୍କୁ ତାଙ୍କ କାରରେ ନେଇଥିଲେ । ସେହିଭଳି ଅପହରଣକାରୀମାନେ ତାଙ୍କୁ ମେରଟ ବଦଳରେ ସିଧା ବିଜନୋରକୁ ନେଇଗଲେ, ଯେଉଁଠାରେ ଚାହତିରି ଅଞ୍ଚଳରେ ଥିବା ଏକ ଘରେ ରଖିଥିଲାେ । ସୌଭାଗ୍ୟବଶତଃ ସକାଳେ ଆଜାନର ଶବ୍ଦ ତାଙ୍କ କାନକୁ ଶୁଭିଲା । ସେ ସାହସ ଜୁଟାଇ କୌଣସି ପ୍ରକାରେ ନିଜକୁ ବଞ୍ସେଚାିବାକୁ ଯାଇ ସେଠାରୁ ଦୌଡ଼ି ପଳାଇଲେ । ସିଧା ମସଜିଦକୁ ଯାଇ ଲୁଚିଗଲେ । ତେବେ ଏହା ପୂର୍ବରୁ ଅପହରଣକାରୀମାନେ ପ୍ରାୟ ୨.୫ ଲକ୍ଷ ଟଙ୍କା ଲୁଟି ନେଇଥିଲେ । ପରେ ମୁସ୍ତାକ ଖାନଙ୍କ ଦ୍ୱାରା ପଠାଯାଇଥିବା ଅଭିଯୋଗ ଉପରେ ବିଜନୋର ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା ।
୮ସେପ୍ଟେମ୍ବର ୨୦୨୪, ନୂଆଦିଲ୍ଲୀ
କାହାଣୀ ଏତିକିରେ ସରିନି । ସେପ୍ଟେମ୍ବର ୮ରେ ସେହି ସମାନ ଗ୍ୟାଙ୍ଗ ବଲିଉଡର ଅନ୍ୟ ଜଣେ ପ୍ରସିଦ୍ଧ ଅଭିନେତା ରାଜେଶ ପୁରୀଙ୍କୁ ମଧ୍ୟ ଅପହରଣ କରି ନେଇଥିଲା । ଅପହରଣକାରୀମାନେ ପ୍ରଥମେ ରାଜେଶ ପୁରୀଙ୍କୁ ଦିଲ୍ଲୀ ଡାକିଥିଲେ ଏବଂ ପରେ ତାଙ୍କୁ ଦିଲ୍ଲୀରୁ ପଶ୍ଚିମ ଉତ୍ତରପ୍ରଦେଶକୁ ନେଇଥିଲେ । କିନ୍ତୁ ରାଜେଶଙ୍କୁ ସନ୍ଦେହ ହେବାରୁ ସେ ନିଜର ବୁଦ୍ଧି ଘଟାଇଥିଲେ । ସେ ଅପହରଣକାରୀଙ୍କ ସହ ସେଲଫି ନେଇ ନିଜ ସାଙ୍ଗମାନଙ୍କ ନିକଟକୁ ପଠାଇ କହିଥିଲେ ଯେ, ସେ ସେମାନଙ୍କ ସହ ଅଛନ୍ତି । ଅପହରଣକାରୀମାନେ ନିଜ ଜାଲରେ ନିଜେ ଫସି ରଯାଇଥିଲେ । ଏବଂ ସେମାନଙ୍କୁ ରାଜେଶଙ୍କୁ ଛାଡିବାକୁ ପଡିଲା । ଏହି ମାମଲାର ତଦନ୍ତ ଆରମ୍ଭ ହେବା ପରେ ପୋଲିସ ମଧ୍ୟ ରାଜେଶଙ୍କ କାହାଣୀ ଜାଣିବାକୁ ପାଇଛି।
ଅଳ୍ପକେ ବର୍ତ୍ତିଲେ ଶକ୍ତି କପୁର । ଅପହରଣକାରୀମାନେ ଶକ୍ତି କପୁରଙ୍କ ପାଇଁ ଯେଉଁ ଚାଲ ବୁଣିଥିଲେ ତାହା କାମରେ ଆସିନଥିଲା । କାରଣ ଇଭେଣ୍ଟରେ ଯୋଗଦେବା ପାଇଁ ଶକ୍ତି କପୁର ଦାବି କରିଥିବା ଟଙ୍କାକୁ ବିନିଯୋଗ କରିବାକୁ ଅପହରଣକାରୀମାନେ ଚାହୁଁନଥିଲେ। ଏଭଳି ପରିସ୍ଥିତିରେ ଅପହରଣକାରୀଙ୍କ ଉଦ୍ୟମ ସତ୍ତ୍ୱେ ଶକ୍ତି କପୁର ସେମାନଙ୍କ ଜାଲରେ ଫସିବା ଆଗରୁ ଅଳ୍ପକେ ବର୍ତ୍ତିଲେ ଶକ୍ତି କପୁର । ଅପହାଣକାରୀଙ୍କ ଏହି ଜାଲରେ ଅନେକ ଅଭିନେତା ସାମିଲ ଥିବା ସନ୍ଦେହ କରାଯାଉଛି। ଦେଖିବାକୁ ବାକି ରହିଲା ଆଗାମୀ ଦିନରେ ଆଉ କେତେ ଘଟଣା ଜଣାପଡିବ ।
ଅପହରଣକାରୀ ଗ୍ୟାଙ୍ଗର ୫ ଜଣ ସଦସ୍ୟଙ୍କୁ ପୋଲିସ ଗିରଫ କରିଥିଲା। ସେମାନେ ଜଣେ କି ଦୁଇ ଜଣ ନୁହେଁ ବଲିଉଡ ସେଲିବ୍ରିଟିଙ୍କୁ ଅପହରଣ କରି ସେମାନଙ୍କଠାରୁ ଲକ୍ଷ ଲକ୍ଷ ଟଙ୍କା ଲୁଟି ନେଇଥିଲେ । କିନ୍ତୁ ବିଜନୋର ଏବଂ ମେରୁଟ ପୋଲିସ ଏହି ଗ୍ୟାଙ୍ଗର ପାଞ୍ଚ ଜଣ ଅପହରଣକାରୀଙ୍କୁ ଗିରଫ କରିବା ସହ ଏହି ଅପହରଣ କାହାଣୀରୁ ପରଦା ହଟାଇଛି । ଏହି ଗ୍ୟାଙ୍ଗର ଲିଡରଙ୍କ ସହ ୫ ଜଣଙ୍କୁ ଖୋଜୁଛି ପୋଲିସ ।
ଦରଦାମ ବୃଦ୍ଧି ପ୍ରତିବାଦରେ ଆସନ୍ତା ଜାନୁଆରୀ ୬ ତାରିଖରେ ରାଜରାସ୍ତାକୁ ଓହ୍ଲାଇବ ବିଜେଡି
ଭୁବନେଶ୍ବର : ଆଳୁ ୭୦ ଟଙ୍କା, ପିଆଜ ୮୦ ଟଙ୍କା, ଡାଲି ଟପିଲାଣି ୧୫୦। ଛଅ ମାସର ସରକାରରେ ଦହଗଞ୍ଜ କଲାଣି ଦରଦାମ। ପଦାରେ ପଡ଼ିଲା ବିଜେପି ସରକାରର ଅର୍ଥନୈତିକ ପରିଚାଳନା ବିଫଳତା । ଦରଦାମ ବୃଦ୍ଧି ପ୍ରତିବାଦରେ ଆସନ୍ତା ଜାନୁଆରୀ ୬ ତାରିଖରେ ଲୋକସେବା ଭବନ ଘେରିବ ବିଜୁ ଜନତା ଦଳ । ଯେଉଁ ପ୍ରତିଶୃତି ଦେଇ ବିଜେପି କ୍ଷମତାକୁ ଆସିଥିଲା, ତାକୁ ପୂରଣ କରିବାରେ କୌଣସି ପଦକ୍ଷେପ ନେଉ ନଥିବା ଅଭିଯୋଗ ହୋଇଛି । ଦରଦାମ ବୃଦ୍ଧି ଯୋଗୁଁ ଜନସାଧାରଣ ଅତିଷ୍ଠ ହେଲେଣି। ଏହାକୁ ନେଇ ଜନସଚେତନତା ସୃଷ୍ଟି କରିବ ବିଜେଡି । ୫୦ ହଜାର ଟଙ୍କା ସୁଭଦ୍ରା ଭେଳିକି, ୩୦୦ ଯୁନିଟ ମାଗଣା ବିଜୁଳି, ୩୧୦୦ ଟଙ୍କା ଏମଏସପି, ଭତ୍ତାକୁ ନେଇ ଚଞ୍ଚକତା ପରି ବିଜେପିର ବିଫଳତା ନେଇ ଲୋକଙ୍କ ପାଖକୁ ଯିବ ଦଳ। ନିତ୍ୟ ବ୍ୟବହାର ସାମଗ୍ରୀ, ଡିଜେଲ, ପେଟ୍ରୋଲ ଓ ଗ୍ୟାସ ଦର ବୃଦ୍ଧି ଯୋଗୁଁ ଲୋକ ତ୍ରାହି ତ୍ରାହି ଡାକିଲେଣି। ଏହା ଭିତରେ ୯ ଥର ବଦଳିଲାଣି ସୁଭଦ୍ରାର ଏସଓପି । କେନ୍ଦ୍ରରେ ବିଜେପି, ରାଜ୍ୟରେ ବି ବିଜେପି । ଡବଲ ଇଞ୍ଜିନ ସରକାର ଥିବା ସତ୍ତ୍ବେ, ଓଡ଼ିଶା ସମେତ ବିଜେପି ଶାସିତ ରାଜ୍ୟରେ ବି ଦରଦାମ ନିୟନ୍ତ୍ରଣରେ ବିଫଳ ହୋଇଛି ବିଜେପି ।
ନୂଆ ସରକାର ଆସିବା ପରେ ଅହେତୁକ ଦର ବୃଦ୍ଧି ଯୋଗୁଁ ହାଣ୍ଡିଶାଳରେ ଚଡ଼କ ପଡିଛି । ଡବଲ ଇଞ୍ଜିନ ସରକାର ବିକାଶ ନାରା ଦେଇଥିଲେ। ହେଲେ ଅର୍ଥନୀତି ପରିଚାଳନାରେ ବିଫଳ ହୋଇଥିବା ବିଜେଡି ଅଭିଯୋଗ କରିଛି । ୨୦୧୪ରୁ ଏନଡିଏ ଆସିବା ପରଠାରୁ ହିଁ ଦର ବୃଦ୍ଧି ହୋଇ ଚାଲିଛି । ଗରିବଙ୍କ ସମେତ କ୍ଷତି ସହୁଛନ୍ତି ଉଭୟ ମଧ୍ୟବିତ୍ତ ଓ ଉଚ୍ଚ ମଧ୍ୟବିତ୍ତ। ଟୋକନ ନ ଆସିବାରୁ ଧାନ ବିକି ପାରୁ ନାହାନ୍ତି ଚାଷୀ । ମିଲରଙ୍କୁ ସୁହାଇବା ପାଇଁ ଯେଉଁ ଆନାଲାଇଜର୍ ଲଗାଯାଇଛି, ସେଥିରେ ୮ରୁ ୯ କିଲୋ କଟନି ଛଟନି ଚାଲିଛି । ଖାଲି ସେତିକୁ ନୁହେଁ, ସରକାର ମିଶନ ଶକ୍ତି ମା’ଙ୍କୁ ଦରମା ନ ଦେବାରୁ, ସେମାନେ ରାଜରାସ୍ତାରେ ବସିଲେ। ଦର ବୃଦ୍ଧିରେ ଏବେ ଓଡ଼ିଶା ଦ୍ଵିତୀୟ ସ୍ଥାନରେ ରହିଛି । ଯାହା କି ଚିନ୍ତାଜନକ ଥିବା ବେଳେ, ବେଫିକର ହୋଇ ବସିଛନ୍ତି ସରକାର। ବିଜେଡିର ଛାମୁଆ ସଙ୍ଗଠନ ସରକାରଙ୍କ ଏଭଳି ମନମାନି ବିରୋଧରେ ରାଜରାସ୍ତାକୁ ଓହ୍ଲାଇ ଆନ୍ଦୋଳନ କରିବାକୁ ଦେଇଛି ଚେତାବନୀ। ଦେଶରେ ୟୁପିଏ ବିରୋଧରେ ଦରଦାମ ବୃଦ୍ଧିକୁ ପ୍ରମୁଖ ମୁଦ୍ଦା କରି କ୍ଷମତାକୁ ଆସିଥିଲା ଏନଡିଏ । କିନ୍ତୁ ଏବେ ସୀମା ବାହାରକୁ ଚାଲିଗଲାଣି ଦରଦାମ। ଓଡ଼ିଶାରେ ବି ବିଜେପି କ୍ଷମତାକୁ ଆସିଲା। କିନ୍ତୁ ସବୁ ପ୍ରତିଶୃତି ଏବେ ପାଲଟିଛି ପ୍ରତାରଣା। ଏଭଳି ହେଲେ ଆଗକୁ ସ୍ଥିତି ସଙ୍ଗୀନ ହେବାର ଆଶଙ୍କା ରହିଛି।
ୱାଲଟିୟର ଲଢେଇ ଜୋରଦାର କଲା ବିଜେଡି, ରେଳମନ୍ତ୍ରୀଙ୍କୁ ଭେଟିଲେ ବିଜେଡିର ୭ଜଣ ସାଂସଦ
ଭୁବନେଶ୍ବର : ୱାଲଟିୟର ଲଢେଇ ଜୋରଦାର କଲା ବିଜେଡି । ରେଳମନ୍ତ୍ରୀଙ୍କୁ ଭେଟିଲେ ବିଜେଡିର ୭ଜଣ ସାଂସଦ । ପୂର୍ବତଟ ରେଳପଥକୁ ସଙ୍କୁଚିତ ନକରିବାକୁ ଦାବି । ସାଂସଦଙ୍କ ଶାଣିତ ସ୍ବରକୁ ସ୍ବାଗତ କଲେ ନେତା । କେନ୍ଦ୍ର ଉପରେ ବର୍ଷିଲା କଂଗ୍ରେସ । ୱାଲଟିୟର ଡିଭିଜନକୁ ବିଶାଖାପାଟଣାରେ ମିଶାଇଦେବା ଷଡ଼ଯନ୍ତ୍ରକୁ ଦୃଢ ବିରୋଧ କରିଛି ବିଜେଡି । ରେଳମନ୍ତ୍ରୀ ଅଶ୍ବିନୀ ବୈଷ୍ଣବଙ୍କୁ ବିଜେଡିର ୭ଜଣ ସାଂସଦ ଭେଟି ୱାଲଟିୟର ଡିଭିଜନ ସାଉଥ ସେଣ୍ଟ୍ରାଲ ରେଲୱେ-ବିଶାଖାପାଟଣା ସହିତ ନମିଶାଇବାକୁ ଦାବି କରିଛନ୍ତି । ରେଳବିଭାଗ ନେଉଥିବା ନିଷ୍ପତ୍ତିକୁ ସାଂସଦମାନେ ବିରୋଧ କରି ରେଳମନ୍ତ୍ରୀଙ୍କ ପାଖରେ ଓଡ଼ିଶାର ଦାବି ରଖିଛନ୍ତି । ଦିଲ୍ଲୀରେ ବିଜେଡି ସାଂସଦଙ୍କ ଓଡ଼ିଶାର ସ୍ବାର୍ଥ ପାଇଁ ଏପରି ଲଢେଇକୁ ବରିଷ୍ଠ ବିଜେଡି ନେତା ଭୂପିନ୍ଦର ସିଂହ ସ୍ବାଗତ କରିଛନ୍ତି । ଯଦି ପୂର୍ବତଟ ରେଳବାଇକୁ ସଙ୍କୁଚିତ କରାଯିବ ତେବେ ୨୦ ହଜାର କୋଟି ଟଙ୍କା ଓଡିଶାର ରାଜସ୍ବ ହାନି ହେବ ବୋଲି ସେ ଅଭିଯୋଗ କରିଛନ୍ତି । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଆଶୀର୍ବାଦରେ ପୂର୍ବତଟ ରେଳପଥ ହୋଇଥିଲା । ତେଣୁ ତୁରନ୍ତ କେନ୍ଦ୍ର ସରକାର ଏହି ନିଷ୍ପତ୍ତିରୁ ଓହରିଯିବାକୁ ବିଜେଡି ଦାବି କରିଛି । ଓଡ଼ିଶା ତାର ହକ ବଜାୟ ରଖିବ ବୋଲି ବିଜେଡି ଆଶା ରଖିଛି । କେନ୍ଦ୍ରରେ ବିଜେପି ସରକାର ଭାଙ୍ଗିଯିବା ଭୟରେ ଯଦି ଓଡ଼ିଶା ସ୍ବାର୍ଥକୁ ବଳିଦେଇ କେନ୍ଦ୍ର ସରକାର ନିଷ୍ପତ୍ତି ନେବେ ତାହାକୁ ଆଗାମୀ ଦିନରେ ଦୃଢ ବିରୋଧ କରାଯିବ ବୋଲି ବିଜେଡି ଚେତାବନୀ ଦେଇଛି ।
ଦିଲ୍ଲୀରେ ବିଜେଡି ସାଂସଦମାନେ ୱାଲଟିୟର ଡିଭିଜନକୁ ଦୃଢ ବିରୋଧ କରିବା ପରେ କଂଗ୍ରେସ ଏହାକୁ ସମର୍ଥନ କରିଛି । ଆନ୍ଧ୍ର ପାଇଁ ୱାଲଟିୟର ଡିଭିଜନକୁ ବିଶାଖାପାଟଣାରେ ମିଶାଇଦେବା ନେଇ କେନ୍ଦ୍ର ସରକାରଙ୍କ ବଡ଼ ଷଡ଼ଯନ୍ତ୍ର ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ଶ୍ରୀକାନ୍ତ ଜେନା । ୱାଲଟିୟର ଡିଭିଜନକୁ ବିଶାଖାପାଟଣାରେ ମିଶାଇଦେବା ନିଷ୍ପତ୍ତିରେ ଓଡ଼ିଶା କେତେ ପାଇବ ଓ କେତେ ହରାଇବ ତାହାର ହିସାବ କେନ୍ଦ୍ର ରେଳମନ୍ତ୍ରୀ ଦିଅନ୍ତୁ ବୋଲି ସେ ଦାବି କରିଛନ୍ତି । ରେଳମନ୍ତ୍ରୀ ଓଡ଼ିଶା ସ୍ବାର୍ଥକୁ ଗୁରୁତ୍ବ ଦିଅନ୍ତୁ ଓ ରାଜନୈତିକ ବୟାନରୁ ନିବୃତ ରୁହନ୍ତୁ ବୋଲି ଶ୍ରୀକାନ୍ତ କହିଛନ୍ତି । ୱାଲଟିୟର ଡିଭିଜନ ଯଦି ଆନ୍ଧ୍ରକୁ ଯାଏ ତାହା ଚିନ୍ତାଜନକ l ଏହା ଓଡ଼ିଶାରେ ଭୟାବହ ପରିସ୍ଥିତି ସୃଷ୍ଟି କରିବ ବୋଲି ଶ୍ରୀକାନ୍ତ କହିଛନ୍ତି । ଅନ୍ୟପଟେ ଓଡିଶାର ଗୋଟେ ଇଞ୍ଚ ମଧ୍ୟ ଅଲଗା ରାଜ୍ୟକୁ ଯିବ ନାହିଁ । ଇଷ୍ଟ କୋଷ୍ଟ ତିନୋଟି ଡିଭିଜନ ନେଇ ଚାଲିବ ବୋଲି ବିଜେପି ପକ୍ଷରୁ ବାରମ୍ବାର ଯୁକ୍ତି ବଢାଯାଉଛି ।ଓଡ଼ିଶାରୁ ଦିଲ୍ଲୀ ଦରବାର ଯାଏ ପୂର୍ବ ତଟ ରେଳବାଇରୁ ୱାଲ୍ଟିୟର ଡିଭିଜନକୁ ବିଚ୍ଛିନ୍ନ କରିବା ପ୍ରସଙ୍ଗରେ ଜୋରଦାର ଲଢେଇ କରିଛି ବିଜେଡି । ବିଧାନସଭାରୁ ସଂସଦ ଯାଏ ଏ ପ୍ରସଙ୍ଗ ଉଠାଇ ଦଳର ବିଧାୟକ ଓ ସାଂସଦମାନେ ଓଡ଼ିଶାର ସ୍ବାର୍ଥ ପାଇଁ ଲଢେଇ କରୁଛନ୍ତି ଦଳୀୟ ଜନପ୍ରତିନିଧି ।
ବାତ୍ୟା ଦାନାର କ୍ଷୟକ୍ଷତିର କ୍ଷତିପୁରଣ ପ୍ରଦାନ ନେଇ ଅନିଶ୍ଚିତତା
ଭୁବନେଶ୍ବର : ବାତ୍ୟା ଦାନାର କ୍ଷୟକ୍ଷତିକୁ ନେଇ, କେନ୍ଦ୍ରର ଅନ୍ତଃ ମନ୍ତ୍ରୀସ୍ତରୀୟ କେନ୍ଦ୍ରୀୟ ଟିମ୍ ଯେଉଁ ରିପୋର୍ଟ ଦେଇଛନ୍ତି, ତାକୁ ନେଇ ଦେଖାଦେଇଛି ଅନିଶ୍ଚିତତା। ଦାନା ପାଇଁ କେନ୍ଦ୍ରୀୟ ସହାୟତା ସଂପର୍କିତ ସୁପାରିଶକୁ ନେଇ ଦ୍ଵନ୍ଦ୍ଵ। ଏଯାଏ ସେହି ଟିମ୍ ରିପୋର୍ଟ ପ୍ରସ୍ତୁତ କରିପାରି ନାହିଁ। ତେଣୁ ପ୍ରଭାବିତ ଲୋକେ କ୍ଷତିପୂରଣ ପାଇବେ କି ନାହିଁ, କେବେ ପାଇବେ, କେତେ ପାଇବେ, ତାକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ। ବାତ୍ୟା ଦାନାର କ୍ଷୟକ୍ଷତି ଆକଳନ କରିବାକୁ ଗତ ନଭେମ୍ବର ୨୪ ରୁ ୨୭ ତାରିଖ ଯାଏ ଓଡ଼ିଶାର ବିଭିନ୍ନ ଜିଲ୍ଲା ଗସ୍ତ କରିଥିଲେ କେନ୍ଦ୍ରୀୟ ଟିମ୍। କେନ୍ଦ୍ର ଗୃହ ମନ୍ତ୍ରାଳୟର ଯୁଗ୍ମ ସଚିବ ପିକେ ରାୟଙ୍କ ନେତୃତ୍ଵରେ ଓଡ଼ିଶା ଆସିଥିଲେ ୭ ଜଣିଆ ଉଚ୍ଚସ୍ତରୀୟ ଟିମ। ଏହି ଟିମ୍ ରେ ଥିଲେ କେନ୍ଦ୍ର କୃଷି, ଜଳସେଚନ, ଶକ୍ତି, ଅର୍ଥ, ସଡ଼କ ପରିବହନ ମନ୍ତ୍ରାଳୟର ବରିଷ୍ଠ ଅଧିକାରୀ। ଟିମ୍ ର ସଦସ୍ୟ ଏବେ କଣ କହୁଛନ୍ତି, ଶୁଣନ୍ତୁ ।
ଅକ୍ଟୋବର ମାସରେ ହୋଇଥିବା ବାତ୍ୟା ଦାନାରେ ବିଶେଷ ଭାବେ ପ୍ରଭାବିତ ହୋଇଥିଲେ ୩ଟି ଜିଲ୍ଲା- ବାଲେଶ୍ବର, ଭଦ୍ରକ ଓ କେନ୍ଦ୍ରାପଡ଼ା। ୧୪ ଉପକୂଳବର୍ତ୍ତୀ ଜିଲ୍ଲାର ଚାଷ, ଜମି, ମତ୍ସ୍ଯ ସମ୍ପଦ ଓ ଭିତ୍ତିଭୂମି ବି ପ୍ରଭାବିତ ହୋଇଥିଲା। ବାତ୍ୟାରେ ୧୬୬ଟି ବ୍ଲକର ୪୧ ଲକ୍ଷ ଲୋକ ପ୍ରଭାବିତ ହୋଇଥିଲେ ବୋଲି ରାଜ୍ଯ ସରକାରଙ୍କ ପକ୍ଷରୁ କୁହାଯାଇଥିଲା । ପ୍ରାରମ୍ଭିକ ଆକଳନ ଅନୁସାରେ ୪୩୨ କୋଟି ଟଂକାର କ୍ଷୟକ୍ଷତି ହୋଇଥିଲା। କେନ୍ଦ୍ରୀୟ ଟିମ୍ ଜିଲ୍ଲା ଗସ୍ତ ପରେ ଭୁବନେଶ୍ବରରେ ମୁଖ୍ଯମନ୍ତ୍ରୀ ମୋହନ ମାଝୀ, ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଓ ମୁଖ୍ୟ ଶାସନ ସଚିବଙ୍କ ସହିତ ଆଲୋଚନା କରିଥିଲେ। ଭୁବନେଶ୍ବରରେ ଏକ ଅତ୍ଯାଧୁନିକ ବିପର୍ଯ୍ଯୟ ପରିଚାଳନା କେନ୍ଦ୍ର ସ୍ଥାପନ ସହ ବିପର୍ଯ୍ୟୟ ପ୍ରତିରୋଧ ସ୍ଥାୟୀ ଭିତ୍ତିଭୂମିର ବିକାଶ ପାଇଁ ଦାବି କରାଯାଇଥିଲା। ସେହି ଦାବି ପୂରଣ କରିବା ତ ଦୂରର କଥା, ଅନ୍ତରୀଣ ଅନୁଦାନ କାହିଁକି ଦିଆଯାଇନି ବୋଲି ଉଠିଲାଣି ପ୍ରଶ୍ନ । ଓଡି଼ଶା ପ୍ରତି ବର୍ଷ ବାତ୍ଯା, ବନ୍ଯା, ମରୁଡ଼଼ି ଭଳି ପ୍ରାକୃତିକ ବିପର୍ଯ୍ଯୟର ସମ୍ମୁଖିନ ହେଉଛି । ପୂର୍ବରୁ ନବୀନ ପଟ୍ଟନାୟକଙ୍କ ନେତୃତ୍ବାଧୀନ ରାଜ୍ଯ ସରକାର ଏସବୁର ସଫଳ ମୁକାବିଲା କରି ଅନ୍ତର୍ଜାତୀୟ ସ୍ତରରେ ସମ୍ମାନିତ ହୋଇଛନ୍ତି। ହେଲେ କେନ୍ଦ୍ରୀୟ ଅନୁଦାନ ନେଇ ଓଡ଼ିଶା ସବୁବେଳେ ପାତର ଅନ୍ତରର ଶିକାର ହୋଇଥିବାର ନଜିର ରହିଛି।
ପ୍ରତିଷ୍ଠା ଦିବସ ଲାଗି ସବୁ ପଦାଧିକାରୀଙ୍କୁ ନବୀନଙ୍କ ଚିଠି
ଭୁବନେଶ୍ବର : ପାଖେଇ ଆସିଲାଣି ପ୍ରତିଷ୍ଠା ଦିବସ । ପ୍ରତି ନିର୍ବାଚନମଣ୍ଡଳିରେ ହେବ ପାଳନ । ବିଜେଡିର ସବୁ ପଦାଧିକାରୀଙ୍କୁ ନବୀନଙ୍କ ଚିଠି । ଜନସେବା କରିବାକୁ ନେବେ ସଂକଳ୍ପ । ଡିସେମ୍ବର ୨୬ ତାରିଖ । ୨୭ ବର୍ଷ ପୂରଣ କରି ୨୮ ବର୍ଷରେ ପଦାର୍ପଣ କରିବ ବିଜୁ ଜନତା ଦଳ । ଏଥିଲାଗି ଆରମ୍ଭ ହୋଇଯାଇଛି ପ୍ରସ୍ତୁତି ପର୍ବ । ପ୍ରତି ନିର୍ବାଚନ ମଣ୍ଡଳୀରେ ପାଳନ କରାଯିବ ପ୍ରତିଷ୍ଠା ଦିବସ । ଏ ନେଇ ଦଳୀୟ ପଦାଧିକାରୀଙ୍କୁ ଚିଠି ଲେଖି ସେବା କାର୍ଯ୍ୟ ଜାରି ରଖିବାକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମୋ ନବୀନ ପଟ୍ଟନାୟକ । ଗତ ୨୭ ବର୍ଷ ଧରି ଉତ୍ସର୍ଗୀକୃତ ଭାବେ ଜନଗଣଙ୍କ ପାଇଁ ନିରବଚ୍ଛିନ୍ନ ଭାବେ କାର୍ଯ୍ୟ କରି ଆସୁଛି ବିଜେଡି । ୨୭ ବର୍ଷର ଏହି ଲମ୍ବା ସମୟରେ ଲୋକଙ୍କ ସେବା ଓ ରାଜ୍ୟର ବିକାଶ କରି ଆସୁଛି ବିଜେଡି । ଯାହା ବିଜେଡିକୁ ଦେଶରେ ଏକ ଶ୍ରେଷ୍ଠ ଆଞ୍ଚଳିକ ଦଳ ଭାବେ ପ୍ରଶଂସନୀୟ ପରିଚିତି ଦେଇଛି । ବିଜେଡି ବର୍ତ୍ତମାନ ଏକ ସାମାଜିକ ଆନ୍ଦୋଳନରେ ପରିଣତ ହୋଇଛି । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଆଦର୍ଶରେ ପରିଚାଳିତ ବିଜେଡି ଜନସାଧାରଣଙ୍କ ଅକୁଣ୍ଠ ସମର୍ଥନ ଓ ଶୁଭେଚ୍ଛା ପାଇ ଆସିଛି । ଦଳର କର୍ମକର୍ତ୍ତା, ଜନପ୍ରତିନିଧ, ଗାଁରୁ ସହର ତଥା ବସ୍ତି ପର୍ଯ୍ୟନ୍ତ ଜନସେବାରେ ନିୟୋଜିତ କର୍ମୀ, ସାଥୀ ମାନଙ୍କ ନିଷ୍ଠା, କଠିନ ପରିଶ୍ରମ ଓ ମନୋଭାବ ଯୋଗୁଁ ବିଜୁ ଜନତା ଦଳକୁ ଲୋକଙ୍କ ନିକଟତର ହୋଇ ପାରିଛି ।
ଗତ ନିର୍ବାଚନରେ ବିରୋଧୀ ଦଳ ଥିବା ବିଜେଡି ଭୋଟ ହାରରେ ଆଗରେ ରହିଛି । ଏକ ଦାୟିତ୍ଵ ସମ୍ପନ୍ନ ବିରୋଧୀ ଦଳ ଭାବେ ବିଜେଡି ବିକାଶର ଆଭିମୁଖ୍ୟକୁ ଆଗେଇ ନେଉଛି । ପ୍ରତିଷ୍ଠା ଦିବସ ଅବସରରେ ବିଭିନ୍ନ ଜନସ୍ବାର୍ଥ ସମ୍ବଳିତ ପ୍ରସଙ୍ଗ ଗୁଡ଼ିକରେ ଜନସାଧାରଣଙ୍କୁ ସଚେତନ କରାଇବ ଦଳ । ନବୀନ ସରକାର ଅମଳରେ ହାତକୁ ନିଆଯାଇଥିବା ସଫଳ କାର୍ଯ୍ୟକ୍ରମ ତଥା ନୂଆ ସରକାରଙ୍କ ଜନବିରୋଧୀ କାର୍ଯ୍ୟକ୍ରମ, ଦରଦାମ ବୃଦ୍ଧି ଠାରୁ ଆରମ୍ଭ କରି ବିଭିନ୍ନ ବର୍ଗର ଜନସାଧାରଣଙ୍କ ପ୍ରତି ପ୍ରତିଶୃତିର ଖିଲାଫ ସମ୍ପର୍କରେ ପ୍ରତିଷ୍ଠା ଦିବସରେ ଆଲୋଚନା ଆଲୋଚନା କରାଯିବ । ଏହି ଅବସରରେ ନବୀନ ପଟ୍ଟନାୟକଙ୍କ ନେତୃତ୍ବରେ ଓଡ଼ିଶାବାସୀଙ୍କ ସ୍ବାଭିମାନକୁ ରକ୍ଷା କରିବାର ସଂକଳ୍ପ ନେବେ ଦଳୀୟ ନେତା ଓ କର୍ମୀ । ବିଜେଡିର ୨୮ତମ ପ୍ରତିଷ୍ଠା ଦିବସ ଅବସରରେ ଓଡ଼ିଶାବାସୀଙ୍କୁ ଶୁଭକାମନା ଜଣାଇଛନ୍ତି ନବୀନ । ଆସନ୍ତା ୨୦୨୫ ନବବର୍ଷ ସମସ୍ତ ପାଇଁ ମଙ୍ଗଳମୟ ହେବା ନେଇ ସେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ପ୍ରାର୍ଥନା କରିଛନ୍ତି ।