spot_img
Home Blog Page 1455

ଖୁବ୍‌ଶୀଘ୍ର ଭଙ୍ଗାହେବ ଖଣ୍ଡଗିରି ବୈକୁଣ୍ଠ ଧାମ ଆଶ୍ରମ: ହାଇକୋର୍ଟଙ୍କ ରହିତାଦେଶ ହଟିବା ପରେ ହେଲା ସ୍ପଷ୍ଟ

ଭୁବନେଶ୍ବର: ଖୁବ୍‌ଶୀଘ୍ର ଭଙ୍ଗାହୋଇପାରେ ଖଣ୍ଡଗିରି ବୈକୁଣ୍ଠ ଧାମ ଆଶ୍ରମ । ଗତ କାଲି ହାଇକୋର୍ଟ ରହିତାଦେଶ ହଟାଇବା ପରେ ଏବେ ଯେ କୌଣସି ସମୟରେ ବିଡିଏ ବୁଲାଇପାରେ ବୁଲଡୋଜର । ସାଧାରଣ ପ୍ରଶାସନ ବିଭାଗର ସତ୍ୟପାଠ ପରେ ହାଇକୋର୍ଟ ବୈକୁଣ୍ଠଧାମ ଆଶ୍ରମ ଭଙ୍ଗାଯିବା ଉପରେ ଜାରି ରହିତାଦେଶକୁ ଶୁକ୍ରବାର ହଟାଇ ଦେଇଛନ୍ତି । ରହିତାଦେଶ ହଟିଯିବା ଫଳରେ ବୈକୁଣ୍ଠନାଥ ଆଶ୍ରମ ଭାଙ୍ଗିବା ଏକରକମ ସ୍ପଷ୍ଟ ହୋଇଯାଇଛି। ମାମଲାର ଶୁଣାଣି କରି ହାଇକୋର୍ଟର ବିଚାରପତି ଜଷ୍ଟିସ୍‌ ବି.ପି. ରାଉତରାୟ ରହିତାଦେଶ ଉଠାଇ ଦେଇଥିବାବେଳେ ପ୍ରତିଜବାବ ଦାଖଲ ପାଇଁ ଆବେଦନକାରୀ ବୈକୁଣ୍ଠନାଥ ସେବାଶ୍ରମ କର୍ତ୍ତୃପକ୍ଷଙ୍କୁ ମହଲତ ଦେଇଛନ୍ତି।

ସାଧାରଣ ପ୍ରଶାସନ ପକ୍ଷରୁ ଦିଆଯାଇଥିବା ସତ୍ୟପାଠର ପ୍ରତିଜବାବ ରଖିବା ଲାଗି ବୈକୁଣ୍ଠଧାମ ସେବାଶ୍ରମ ଟ୍ରଷ୍ଟ ପକ୍ଷରୁ ଅଦାଲତଙ୍କଠାରୁ ସମୟ ଲୋଡ଼ାଯାଇଥିଲା । ଅଦାଲତ ଏଥିପାଇଁ ଅନୁମତି ପ୍ରଦାନ କରିବା ସହ ମାମଲାର ଶୁଣାଣି ଫେବ୍ରୁଆରୀ ୩ ତାରିଖକୁ ଧାର୍ଯ୍ୟ କରିଛନ୍ତି । ଘାଟିକିଆ ମୌଜାରେ ବେଆଇନ ଭାବେ ତିଆରି ହୋଇଥିବା ବୈକୁଣ୍ଠଧାମ ଆଶ୍ରମକୁ ଭାଙ୍ଗିବାକୁ ବିଡିଏ କର୍ତ୍ତୃପକ୍ଷ ଗତବର୍ଷ ନଭେମ୍ବର ୨୦ ତାରିଖରେ ନିଷ୍ପତ୍ତି ନେଇଥିଲେ । ବିଡିଏର ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ବୈକୁଣ୍ଠଧାମ ସେବାଶ୍ରମ ଟ୍ରଷ୍ଟ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା । ହାଇକୋର୍ଟ ଏହି ମାମଲାର ଶୁଣାଣି କରି ରାଜ୍ୟ ସରକାରଙ୍କୁ ନୋଟିସ୍‌ କରିଥିଲେ । ଏଥିସହ ଉକ୍ତ ବିବାଦୀୟ ଜମି ଉପରେ କୌଣସି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ନାହିଁ ବୋଲି ଅନ୍ତରୀଣ ଆଦେଶ ଦେଇଥିଲେ ।

ମାମଲାର ଶୁଣାଣି ଅବସରରେ ଏହି ଟ୍ରଷ୍ଟ ପକ୍ଷରୁ ହାଇକୋର୍ଟରେ ବିଦ୍ୟାଳୟ ଏବଂ ଗଣଶିକ୍ଷା ବିଭାଗ ପକ୍ଷରୁ ସାଧାରଣ ପ୍ରଶାସନ ବିଭାଗକୁ ଲେଖାଯାଇଥିବା ଏକ ଚିଠିକୁ ଦାଖଲ କରାଯାଇଥିଲା । ଉକ୍ତ ଚିଠିରେ ଗଣଶିକ୍ଷା ବିଭାଗ ଏହି ଜମିକୁ ଟ୍ରଷ୍ଟ ନାମରେ କରିବା ଲାଗି ସୁପାରିସ୍‌ କରିଛି ବୋଲି କୁହାଯାଇଥିଲା । ହାଇକୋର୍ଟ ଏହି ଚିଠି ଆଧାରରେ ଆଶ୍ରମ ଭଙ୍ଗାଯିବା ଉପରେ ରୋକ୍‌ ଲଗାଇଥିଲେ । କିନ୍ତୁ ଏହା ଉପରେ ହାଇକୋର୍ଟ ସାଧାରଣ ପ୍ରଶାସନ ବିଭାଗକୁ ଜବାବ ମାଗିବା ପରେ ବୈକୁଣ୍ଠନାଥ ଆଶ୍ରମର ଜାଲିଆତି ଜଣାପଡ଼ିଯାଇଥିଲା । ସାଧାରଣ ପ୍ରଶାସନ ଜବାବରେ ଦର୍ଶାଇଥିଲା ଯେ, ବିଦ୍ୟାଳୟ ଏବଂ ଗଣଶିକ୍ଷା ବିଭାଗ ପକ୍ଷରୁ ଏଭଳି କୌଣସି ଚିଠି ଲେଖାଯାଇନାହିଁ । ଏହା ଏକ ଜାଲ୍‌ ଚିଠି । ଏନେଇ ଅବଗତ ହେବା ପରେ ହାଇକୋର୍ଟ ଶୁକ୍ରବାର ରହିତାଦେଶ ଉଠାଇ ଦେଇଛନ୍ତି ।

ବସ୍ତି ଉଚ୍ଛେଦ ବେଳେ କାନ୍ଦିଲେ ଲୋକେ: ସରକାର ଦୁଃଖ ଶୁଣୁ ନଥିବା କଲେ ଅଭିଯୋଗ

ବାଲେଶ୍ଵର: ବସ୍ତି ଉଚ୍ଛେଦ ବେଳେ ବାଲେଶ୍ଵରରେ ପ୍ରବଳ ଉତ୍ତେଜନା। ଲୋକଙ୍କ ଘର ଉପରେ ବୁଲଡୋଜର ଚଢ଼ିବା ଦେଖି ଲୋକେ କାନ୍ଦି ପକାଇଲେ। କିଛି ମହିଳା ବୁଲଡୋଜର ଆଗରେ ଠିଆ ହୋଇ ଯାଇଥିଲେ। ସେମାନେ ଦାବି କରିଛନ୍ତି, ଆମକୁ କିଛି ସମୟ ଦିଆଯାଉ। ନିଜ ଜିନିଷ ପତ୍ର ନେବେ। ସମୟ ନ ଦେଇ ଘର ଭଙ୍ଗା ଯାଉଥିବାରୁ କୁଆଡ଼େ ଯିବେ ବୋଲି ସେମାନେ ପ୍ରଶ୍ନ କରିଥିଲେ। ସେଠାରେ ପ୍ରବଳ ଉତ୍ତେଜନା ଦେଖା ଦେଇଥିଲା। ଏପରିକି କିଛି ମହିଳା ଜେସିବିକୁ ଆକ୍ରମଣ କରିବାକୁ ମଧ୍ୟ ଉଦ୍ୟତ ହୋଇଥିଲେ। ଏହା ପରେ ସେଠାରେ ପୋଲିସ ପ୍ରଶାସନ ପହଞ୍ଚିିଥିଲା। ଲୋକଙ୍କ ସହିତ ଆଲୋଚନା ପରେ ଜେସିବି ଓ ବୁଲଡୋଜର ଫେରି ଯାଇଛି। ରେଳ ଲାଇନ ସଂପ୍ରସାରଣ ପାଇଁ ବସ୍ତି ଉଚ୍ଛେଦ କରାଯାଉଛି। ଏଥିପାଇଁ ବାଲେଶ୍ଵର ଅରଡବଜାର ଠାରୁ ପରିବା ମାର୍କେଟ ଅଞ୍ଚଳରେ ଜାରି କରାଯାଇଛି କର୍ଫ୍ୟୁ । ଲୋକେ ଅଭିଯୋଗ କରିଛନ୍ତି, ଏବର ବିଜେପି ସରକାର ସେମାନଙ୍କ ଦୁଃଖ ଶୁଣୁ ନାହାନ୍ତି। ସେଠାକାର ସ୍ଥାନୀୟ କାଉନସିଲର ମଧ୍ୟ ବିଜେପିର । ତଥାପି କେହି କିଛି ବୁଝୁ ନାହାନ୍ତି। ନବୀନ ସରକାର ବେଳେ ଏପରି ହେଉନଥିଲା ବୋଲି ବସ୍ତି ବାସିନ୍ଦା କହିଛନ୍ତି।

ଅର୍ଦ୍ଧ ନିର୍ମିତ ଘରୁ ବୋମା ଜବତ ଘଟଣା: ଜଣେ ଅଭିଯୁକ୍ତ ଅଟକ

ବ୍ରହ୍ମପୁର: ବ୍ରହ୍ମପୁର ବୈଦ୍ୟନାଥପୁର ଥାନା ଅଞ୍ଚଳ ଖଜୁରିଆ ନିକଟ ଏକ ଅର୍ଦ୍ଧ ନିର୍ମିତ ଘରୁ ବୋମା ଜବତ ଘଟଣା। ମାମଲାରେ ଜଣେ ଅଭିଯୁକ୍ତଙ୍କୁ ଧରି ପଚରାଉଚରା କରୁଛି ବ୍ରହ୍ମପୁର ପୋଲିସ। କେତେ ଦିନ ଧରି ସେହି ଅର୍ଦ୍ଧ ନିର୍ମିତ ଘରେ କଣ ଯୋଜନା ଚାଲିଥିଲା ଏହାର ତନାଘନା କରୁଛି ପୋଲିସ। ଘଟଣାରେ ମୋଟ ୪ ଅଭିଯୁକ୍ତ ସାମିଲ ଥିବା ଜଣାପଡିଛି। କିଛି ଅପରାଧ ଘଟାଇବା ନେଇ ଯୋଜନା କରୁଥିବା ସନ୍ଦେହ କରୁଛି ପୋଲିସ। ଅନ୍ୟ ଅଭିଯୁକ୍ତଙ୍କୁ ଖୁବଶୀଘ୍ର ଧରାଯିବ ବୋଲି କହିଛି ପୋଲିସ। ସେପଟେ ଉଦ୍ଧାର ବୋମା ଗୁଡିକୁ ନିଷ୍କ୍ରିୟ କରିଛି ବ୍ରହ୍ମପୁର ପୋଲିସ। ପ୍ରଥମେ ବୋମା ନିଷ୍କ୍ରିୟ କରିବାକୁ ଫୁଲବାଣୀରୁ ସ୍ଵତନ୍ତ୍ର ଟିମ ଡକାଯାଇଥିଲା। ତେବେ ନିଷ୍କ୍ରିୟ କରିବାରେ ବିଫଳ ହେବାରୁ ବ୍ରହ୍ମପୁର ବୋମା ନିଷ୍କ୍ରିୟକାରୀ ଟିମ ବୋମାଗୁଡିକୁ ନିଷ୍କ୍ରିୟ କରିଥିଲେ। ବ୍ରହ୍ମପୁର ପୋଲିସର ପାଟ୍ରୋଲିଂ ଚାଲିଥିବାବେଳେ ଘଟଣାସ୍ଥଳରୁ ଫେରାର ମାରିଥିଲେ କିଛି ଅଭିଯୁକ୍ତ। ଏହାପରେ ସେଠାରୁ ୭ ବୋମା ଉଦ୍ଧାର କରାଯାଇଥିଲା ।

୫ ହଜାର ଲାଞ୍ଚ ମାଗୁଥିଲେ ପୋଲିସ ASI: ଭାଇରାଲ୍ ହେଲା ଭିଡିଓ

ଆରଡି: ପୋଲିସ ASI ୫ହଜାର ଲାଞ୍ଚ ମାଗୁଥିବା ଭିଡିଓ ଭାଇରାଲ୍ । କେସ କ୍ଲୋଜ କରିଦେବି, କୋର୍ଟ କଚେରୀ ଯିବାକୁ ପଡ଼ିବ ନାହିଁ, ହେଲେ ମୋତେ ପାଞ୍ଚ ହଜାର ଦେବାକୁ ପଡିବ ବୋଲି କହୁଛନ୍ତି ASI । ଧାମନଗର ଥାନାର ASI ଏଲ.କେ ପଟ୍ଟନାୟକଙ୍କ ଏକ ଭିଡିଓ ଏବେ ସୋସିଆଲ ମିଡିଆରେ ଭାଇଆରାଲ ହେବାରେ ଲାଗିଛି । ଧାମନଗର ଥାନା ଅନ୍ତର୍ଗତ ବାଘୁଆରି ଗ୍ରାମର ଭବାନୀ ଦାସ ଓ ପ୍ରସାନ୍ତ ବେହେରାଙ୍କ ମଧ୍ୟରେ ପାଟି ତୁଣ୍ଡ ହୋଇଥିଲା। ଏନେଇ ଉଭୟଙ୍କୁ ପକ୍ଷରୁ ଥାନାରେ ଏତଲା ହୋଇଥିଲା। ପରେ ଉଭୟଙ୍କ ଭିତରେ ବୁଝା ମଣା ହୋଇ ସମାଧାନ ପରେ ୩ ତାରିଖ ଥାନାରେ ଏକ ବୁଝାମାଣା ପତ୍ର ଦିଆଯାଇଥିଲା। କେସ ନେଇଥିବା ଧାମନଗର ଥାନାର ASI- ଏଲ.କେ ପଟ୍ଟନାୟକ ଏହାର ଫାଇଦା ନେବା ପାଇଁ ପରଦିନ ଗ୍ରାମରକ୍ଷୀଙ୍କୁ ସାଥିରେ ନେଇ ବାଘୁଆରୀ ଗାଁରେ ପହଞ୍ଚିଥିଲେ। ଗୋଟେ ଡାଏରି ଧରି ଗାଁର ଘର ଓ ଜମିବାଡ଼ି କାହାର ଓ କେଉଁ ପଟେ କିଏ ରହୁଛି ପଚାରି ବୁଝିଥିଲେ। ଶେଷରେ ପ୍ରସାନ୍ତ ବେହେରାଙ୍କୁ ୫ହଜାର ଟଙ୍କା ଦେଲେ ତାଙ୍କ ନାମରେ କୌଣସି କେସ ହେବ ନାହିଁ କି ତାଙ୍କୁ କୋର୍ଟ କଚେରୀ ଯିବାକୁ ପଡ଼ିବ ନାହିଁ ବୋଲି ASI କହିଥିବା ଅଭିଯୋଗ ହୋଇଛି, ଯାହାର ଭିଡିଓ ଏବେ ଭାଇରାଲ ହେଉଛି। ଘଟଣାର ତଦନ୍ତ ସହ ସରକାର ଉପଯୁକ୍ତ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି।

କଟକ-ବାଙ୍କୀରେ ଗୋଷ୍ଠୀ ସଂଘର୍ଷ: ପଥର ମାଡ଼ରେ ୪ ଜଣ ଆହତ

କଟକ ବାଙ୍କୀ: କଟକ ବାଙ୍କୀ ଭଗିପୁରରେ ଗୋଷ୍ଠୀ ସଂଘର୍ଷ। ଏଥିରେ ୪ ଜଣ ଆହତ ହୋଇଛନ୍ତି। ଅଭିଯୋଗ ଅନୁସାରେ ଗତକାଲି ରାତିରେ କଟକ ବାଙ୍କୀ ରାସ୍ତାରେ ଯାଉଥିବା ସମସ୍ତ ଗାଡିକୁ ଢେଲା ପଥରରେ ମାଡ଼ କରିଥିଲେ ଭଗିପୁରର କିଛି ଯୁବକ। ଆଜି ଗାଁ ଲୋକେ ସେଠାକୁ ଯାଇ ଏ ସଂପର୍କରେ ପଚାରିବାକୁ ସେଠାରେ ଉତ୍ତେଜନା ଦେଖା ଦେଇଥିଲା। ପୁଣି ପଥର ମାଡ଼ କରାଯାଇଛି। କଟକ – ବାଙ୍କୀ ରାସ୍ତାରେ ପଥର ମାଡ଼ ହୋଇଛି। ଏଥିପାଇଁ ଏହି ରାସ୍ତାରେ ଯିବା ଆସିବା ବନ୍ଦ ଥିଲା। ସେଠାରେ ପୋଲିସ ପହଞ୍ଚି ସ୍ଥିତିକୁ ନିୟନ୍ତ୍ରଣ ନେବା ସହ ଲୋକଙ୍କୁ ବୁଝା ସୁଝା କରିଥିବା ଜଣାପଡ଼ିଛି ।

ନବୀନ ପଟ୍ଟନାୟକଙ୍କୁ ଭେଟିଲେ ଦୀପାଳି ଦାସ: ନିଜ ପରିବାର ସହ ଠିଆ ହୋଇଥିବାରୁ ଧନ୍ୟବାଦ ଜଣାଇଲେ ପୂର୍ବତନ ବିଧାୟିକା

ଭୁବନେଶ୍ବର: ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଭେଟିଲେ ବିଜେଡି ନେତ୍ରୀ ତଥା ପୂର୍ବତନ ବିଧାୟିକା ଦୀପାଳି ଦାସ। ନବୀନଙ୍କୁ ଭେଟିବା ପରେ ସେ କହିଛନ୍ତି, ନବୀନ ପଟ୍ଟନାୟକ ଆମ ପରିବାର ସହ ଠିଆ ହୋଇଥିବାରୁ ତାଙ୍କୁ ଧନ୍ୟବାଦ। ନବୀନ କହିଲେ, ଷ୍ଟ୍ରଙ୍ଗ ରୁହ । ଦୀପାଳି ଆହୁରି କହିଛନ୍ତି, dirty politics ରୁ ଆଗକୁ ଯିବାକୁ ବାଟ ଦେଖାଇଲେ ନବୀନ। ଆଗାମୀ ଦିନରେ ତାଙ୍କ ମାର୍ଗଦର୍ଶନରେ କାମ କରିବୁ।

କେଜ୍ରିଓ୍ବାଲଙ୍କୁ ଟକ୍କର ଦେବେ ଦୁଇ ପୂର୍ବତନ ମୁଖ୍ୟମନ୍ତ୍ରୀଙ୍କ ପୁଅ

ନନ୍ଦିଘୋଷ ବ୍ୟୁରୋ: ଏଥରେ ନୂଆଦିଲ୍ଲୀ ଆସନରେ ସବୁଠାରୁ ବଡ଼ ଲଢ଼େଇ।  ଜଣେ ପୂର୍ବତନ ମୁଖ୍ଯମନ୍ତ୍ରୀଙ୍କୁ ଟକ୍କର ଦେଉଛନ୍ତି ଦୁଇଜଣ ପୂର୍ବତନ ମୁଖ୍ଯମନ୍ତ୍ରୀଙ୍କ ଦୁଇ ପୁଅ। ପୂର୍ବତନ ମୁଖ୍ଯମନ୍ତ୍ରୀ ଅରବିନ୍ଦ କେଜରିୱାଲ ଆପରୁ ପ୍ରାର୍ଥୀ ହୋଇଥିବାବେଳେ କଂଗ୍ରେସରୁ ପ୍ରାର୍ଥୀ ହୋଇଛନ୍ତି ପୂର୍ବତନ ମୁଖ୍ଯମନ୍ତ୍ରୀ ଶୀଲା ଦୀକ୍ଷିତଙ୍କ ପୁଅ ସନ୍ଦୀପ। ତେଣେ ମଇଦାନକୁ ଓହ୍ଲାଇଛନ୍ତି ପୂର୍ବତନ ବିଜେପି ମୁଖ୍ଯମନ୍ତ୍ରୀ ସାହିବ ସିଂ ବର୍ମାଙ୍କ ପୁଅ ପରବେଶ ବର୍ମା। ନୂଆଦିଲ୍ଲୀ ବିଧାନସଭା ଆସନ କଂଗ୍ରେସ ଗଡ଼ ଥିଲା। ୧୯୯୮ରୁ ୨୦୧୩ ଯାଏ ଶୀଲା ଦୀକ୍ଷିତ ଥିଲେ ମୁଖ୍ଯମନ୍ତ୍ରୀ। ତେବେ ୨୦୧୩ରୁ ବିଜୟୀ ହୋଇଆସୁଛନ୍ତି କେଜରିଓ୍ବାଲ। ପୂର୍ବ ଦିଲ୍ଲୀରୁ ୨ ଥର ସାଂସଦ ହୋଇଛନ୍ତି ସନ୍ଦୀପ ଦୀକ୍ଷିତ। ସାମାଜିକ ବିକାଶ କାର୍ଯ୍ୟକ୍ରମରେ ଜଡ଼ିତ ଅଛନ୍ତି ସନ୍ଦୀପ। ଶୀଲା ଦୀକ୍ଷିତଙ୍କ ଲିଗାସୀ ନେଇ ସନ୍ଦୀପଙ୍କ ଉପରେ ଆଶା ରଖିଛି ଦଳ। ସେପଟେ ପୂର୍ବତନ ମୁଖ୍ଯମନ୍ତ୍ରୀ ସାହେବ ସିଂ ବର୍ମାଙ୍କ ପୁଅ ପରବେଶ ବର୍ମା। ସେ ପଶ୍ଚିମ ଦିଲ୍ଲୀରୁ ୨ ଥର ସାଂସଦ ହୋଇଛନ୍ତି। ଗତ ଲୋକସଭା ନିର୍ବାଚନରେ ପରବେଶଙ୍କୁ ମିଳି ନଥିଲା ଟିକେଟ। ତେଣେ ଦିଲ୍ଲୀର ବିଭିନ୍ନ ସ୍ଥାନରେ ପ୍ରଚାର କରିଛନ୍ତି ସନ୍ଦୀପ ଦୀକ୍ଷିତ।

ଆସନ୍ତା ୧୮ରେ ଶୁକ୍ର ଓ ଶନି ଗ୍ରହର ମିଳନ: ଖାଲି ଆଖିରେ ଦେଖାଯିବ ଶୁକ୍ର ଓ ଶନି ଗ୍ରହର ଦୌଡ ମିଳନ

ନନ୍ଦିଘୋଷ ବ୍ୟୁରୋ: ଆସନ୍ତା ୧୮ରେ ଶୁକ୍ର ଓ ଶନି ଗ୍ରହର ମିଳନ। ୨୦୨୫ ମସିହା ଜାନୁଆରୀ ଦ୍ବିତୀୟ ଅର୍ଶର ସବୁଦିନ ସଂଧ୍ୟା ଆକାଶରେ ୪ ଟି ଗ୍ରହକୁ ଖାଲି ଆଖିରେ ଦେଖିବା ପାଇଁ ଏକ ଉତ୍କୃଷ୍ଟ ସୁଯୋଗ ଆସିବ । ଏଥି ସହ ଆକାଶରେ ଖାଲି ଆଖିରେ ଦେଖାଯିବ ଶୁକ୍ର ଓ ଶନି ଗ୍ରହର ଦୌଡ ମିଳନ ।  ଶୁକ୍ରକୁ ଟପି ଶନି ଗ୍ରହ ଆଗକୁ ବଢିବାର ଅପୂର୍ବ ଦୃଶ୍ୟ ଦେଖିବାକୁ ମିଳିବ। ବର୍ତ୍ତମାନ ଠାରୁ ଜାନୁଆରୀ ମାସରେ ସୂର୍ଯ୍ୟାସ୍ତ ପରେ ଚାରିଟି ଗ୍ରହ ଖାଲି ଆଖିରେ ଦେଖିହେବ । ଏବେ ପଶ୍ଚିମ ଦିଗବଳୟର କିଛି ଉପରେ ଦେଖାଯିବ ଉଜ୍ବଳ ଶୁକ୍ର ଗ୍ରହ, ତାର କିଛି ଉପରକୁ ଇଷତ୍ ହଳଦି ରଙ୍ଗର ଶନି ଗ୍ରହ ଓ ପୂର୍ବ ଦିଗବଳୟରେ ମଙ୍ଗଳ ଗ୍ରହ ଓ କିଛି ଉପରେ ଥିବ ଉତ୍କଳ ବୃହଷ୍ପତି ଗ୍ରହ। ରାତି ବଢିବା ସଙ୍ଗେ ଏହି ଗ୍ରହ ଗୁଡିକ ପୂର୍ବରୁ ପଶ୍ଚିମ ଆଡକୁ ଗତି କରି କ୍ରମାନ୍ବୟରେ ଅସ୍ତ ହେବେ। ରାତି ୮.୩୦ଟା ବେଳକୁ ପ୍ରଥମେ ଶୁକ୍ର ଓ ଶନି ଗ୍ରହ ଅସ୍ତ ହେବ। ସୂର୍ଯ୍ୟ ଚାରିପଟେ ବୁଲୁଥିବା ୮ଟି ଗ୍ରହ ଭିତରୁ ୫ଟି ଗ୍ରହ ବୁଧ, ଶୁକ୍ର, ମଙ୍ଗଳ, ବୃହସ୍ପତି ଏବଂ ଶନିକୁ ଖାଲି ଆଖିରେ ଦେଖିହୁଏ । ପାଞ୍ଚଟି ଗ୍ରହ – ପ୍ରତି ୧୯ ବର୍ଷରେ ଥରେ ଏବଂ ସମସ୍ତ ଆଠଟି ଗହ – ପ୍ରାୟ ଶହେ ସତୁରି ବର୍ଷରେ ଥରେ ଏକା ସମୟରେ ଦେଖାଯାଏ ।

ଗଣତନ୍ତ୍ରକୁ ହତ୍ୟା କରିବାରେ କୌଣସି ସୁଯୋଗ ଛାଡେନି ବିଜେପି : ସସ୍ମିତ ପାତ୍ର

ନନ୍ଦିଘୋଷ ବ୍ୟୁରୋ: ବିଜେପି ଗଣତନ୍ତ୍ରକୁ ହତ୍ୟା କରିବାରେ କୌଣସି ସୁଯୋଗ ଛାଡେନି । ଝାରସୁଗୁଡା କିର୍ମିରାରେ ତାହା ପ୍ରମାଣିତ ହୋଇଯାଇଛି ବୋଲି କହିଛନ୍ତି ବିଜେଡି ସାଂସଦ ସସ୍ମିତ ପାତ୍ର । ପଂଚାୟତ ପ୍ରତିନିଧି ଓ ବିଶାଳ ଦାସଙ୍କୁ ବେଆଇନ ଭାବେ ଛତିଶଗଡ ପୋଲିସ ଦ୍ୱାରା ଅଟକ ରଖାଗଲା । ଏଥିରୁ ସ୍ପଷ୍ଟ ଯେ ବ୍ଲକରେ ଅନାସ୍ଥା ନେଇ ବିଜେପି ବିବ୍ରତ ଓ ଭୟଭୀତ । ଦୁଇଟି ରାଜ୍ୟର ପୋଲିସ ଲଗାଇ ପଞ୍ଚାୟତ ପ୍ରତିନିଧି ଓ ବିଶାଳ ଦାସଙ୍କୁ ଅଟକାଉଛି । ନବୀନ ପଟ୍ଟନାୟକଙ୍କ ଚିଠି ପରେ ଭୟଭୀତ ହୋଇ ଦୁଇ ରାଜ୍ୟ ପୋଲିସର ବେଆଇନ କାମର ପର୍ଦାଫାସ ହେଲା ।

ବିଜେଡି ସଭାପତି ନବୀନ ପଟ୍ଟନାୟକଙ୍କ ଚିଠି ସମ୍ପର୍କରେ DG ଅବଗତ ଅଛନ୍ତି । ନବୀନ ପଟ୍ଟନାୟକ ଏକ ଫ୍ଯାକ୍ଟ ଫାଇଣ୍ଡିଂ ଟିମ ଗଠନ କରିଛନ୍ତି । ବିଜେଡିର ବରିଷ୍ଠ  ନେତା ନିରଞ୍ଜନ ପୂଜାରୀଙ୍କ ନେତୃତ୍ୱରେ ୭ ଜଣିଆ ଟିମ ଗଠନ କରିଛନ୍ତି । ଅନ୍ଯ ସଦସ୍ଯମାନେ ହେଲେ ପ୍ରତାପ ଜେନା, ଅତନୁ ସବ୍ୟସାଚୀ ନାୟକ, ଯୋଗେଶ ସିଂ, ଦେବେଶ ଆଚାର୍ଯ୍ୟ, ରୋମାଞ୍ଚ ରଞ୍ଜନ ବିଶ୍ୱାଳ ଓ ସୁଦର୍ଶନ ହରିପାଲ । ସେମାନେ ଝାରସୁଗୁଡା ଯାଇ ଅନୁସନ୍ଧାନ କରି ନବୀନଙ୍କୁ ରିପୋର୍ଟ ଦେବେ । ଓଡ଼ିଶା ପୋଲିସ ବିଜେପି ଦ୍ୱାରା ଏମିତି ବ୍ୟବହାର ହେଉଛି ଯେ ରାଜ୍ୟରେ ଆଇନ ଶୃଙ୍ଖଳା ପ୍ରତି ଧ୍ୟାନ ନାହିଁ । ଯେଉଁଥିପାଇଁ ପୋଲିସ ମିତ୍ରଙ୍କ ହତ୍ୟା ହେଲା । ୮୦ ପ୍ଲାଟୁନ ଫୋର୍ସ ଲଗା ଗଲା । ହେଲେ ପ୍ରଧାନମନ୍ତ୍ରୀ ଆସିବା ଦିନ ରସୁଲଗଡ଼ ଫ୍ଲାଏ ଓଭରରେ ପୋଲିସ ନଥିଲେ । ଗଣତନ୍ତ୍ରକୁ ହତ୍ୟା କରୁଥିବା ବିଜେପିକୁ କେବେ ରାଜ୍ୟବାସୀ କ୍ଷମା ଦେବେନି । ଲୋକେ ଜାଣିଲେଣି ଯେ ବିଜେପିକୁ ଭୋଟ ଦେଇ ଭୁଲ ହୋଇଯାଇଛି ।

ବିଜେପି ସରକାରଙ୍କ କର୍ମଚାରୀ ଓ ସହଯୋଗୀ ପାଲଟିଛି ଓଡିଶା ପୋଲିସ : ଦୀପାଳି ଦାସ

ନନ୍ଦିଘୋଷ ବ୍ୟୁରୋ: କିର୍ମିରାରେ ଗଣତନ୍ତ୍ରକୁ ହତ୍ଯା । ଆଇନର ଉଡିଛି ଧଜ୍ଜିଆ । ବିଜେପି ସରକାରଙ୍କ କର୍ମଚାରୀ ଓ ସହଯୋଗୀ ପାଲଟିଛି ଓଡିଶା ପୋଲିସ । ବିନା କାରଣରେ ବିନା ସର୍ଚ୍ଚ ୱାରଣ୍ଟରେ ବିନା ଦୋଷରେ ୨୪ ଘଣ୍ଟା ଧରି କିର୍ମିରା ପିଆରଆଇ ସଦସ୍ଯଙ୍କୁ ଅଟକ ରଖି ଦେଇଛି ମାନସିକ ନିର୍ଯାତନା । ଝାରସୁଗୁଡ଼ା କିର୍ମିରା ବ୍ଲକ ଅନାସ୍ଥା ପ୍ରସ୍ତାବ ଭୋଟ ପ୍ରସଙ୍ଗରେ ଏପରି ସାଂଘାତିକ ଅଭିଯୋଗ ଆଣି ଏମିତି ବର୍ଷିଛନ୍ତି ବିଜେଡି ନେତ୍ରୀ ତଥା ପୂର୍ବତନ ବିଧାୟିକା ଦୀପାଳି ଦାସ । କିର୍ମିରାରେ ଗଣତନ୍ତ୍ରକୁ ହତ୍ଯା କରାଯାଇଛି । ଅନାସ୍ଥା ପାଇଁ ପୋଲିସକୁ ଗୁଣ୍ଡା ଭାବେ ବ୍ୟବହାର କରାଯାଉଛି ବୋଲି କହିବା ସହିତ ସାହାସ ଅଛି ଯଦି କାଲି ଭୋଟ କରିବାକୁ ସେ ଚ୍ଯାଲେଞ୍ଜ ଦେଇଛନ୍ତି । ହେଲେ ହାରିଯିବା ଭୟରେ ସେମାନେ କରିବେନି । ପ୍ରେସମିଟ କରି ଦୀପାଳି କହିଛନ୍ତି, ଗତ ୧୩ ସେପ୍ଟେମ୍ବରରେ କିର୍ମିରାର ଦୁଇ ତୃତୀୟାଂଶ ପଞ୍ଚାୟତ ପ୍ରତିନିଧି ଜିଲ୍ଲାପାଳଙ୍କୁ ଅନାସ୍ଥା ଭୋଟ ନେଇ ପ୍ରସ୍ତାବ ଦିଆଗଲା । ହେଲେ ତାକୁ ଗଡ଼ାଇ ଚାଲିଲେ ପ୍ରଶାସନ । ବିଜେଡି ଆନ୍ଦୋଳନ କଲା ।

ଶେଷରେ ଆମେ ହାଇକୋର୍ଟ ଗଲୁ । କୋର୍ଟ ଏସବୁ ଦେଖି ଅନାସ୍ଥା ପାଇଁ ନିର୍ଦ୍ଦେଶ ଦେଲେ । ଆଇନ ଅନୁସାରେ ୭ ଦିନ ଭିତରେ ତାରିଖ ଦେବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଲେ । ହେଲେ ଜିଲ୍ଲାପାଳ ଜାଣିଶୁଣି ୧୦ ଜାନୁଆରୀ ତାରିଖ ଦେଲେ । ୮ ତାରିଖରେ ବିଜେପି ଗୁଣ୍ଡା ଅନାସ୍ଥା ନେଇ ଧମକାଇଲେ । ପରିବାରକୁ ହଇରାଣ କରିବାକୁ ଧମକ ଦେଲେ । ଯେଉଁଥିପାଇଁ ୧୨ ସମିତି ସଭ୍ୟ ଭିଡିଓ ଜାରି କରି ସୁରକ୍ଷା ମାଗିଲେ । ସେମାନେ ଭୋଟିଂ ପାଇଁ ଆଗ୍ରହୀ ଥିଲେ । ୯ ତାରିଖରେ କାହା ନିର୍ଦ୍ଦେଶରେ ଲାଇକେରା ଆଇଆଇସି ଦିଲ୍ଲୀପ ବେହେରା ସ୍ଥାନୀୟ ଗୁଣ୍ଡାଙ୍କ ସହ ଘରୋଇ ସମ୍ପତ୍ତି ତଲାସୀ କରିବାକୁ ଆସିଲେ ? ଏହା କି ଆଇନ ? ବିଶାଳ ଦାସ ଏ ନେଇ ଆଇଜିଙ୍କୁ ଭେଟିଥିଲେ । ତାଙ୍କ ସହ ରେଙ୍ଗାଳି ବିଧାୟକ ଯାଇଥିଲେ । ବିଧାୟକଙ୍କୁ କେମିତି ୪୫ ମିନିଟ ବାହାରେ ବସାଇଲେ IG ? ସେପଟେ ରାୟପୁର ବୁଲିବାକୁ ଯାଇଥିବା ଦିଲ୍ଲୀପ ବେହେରା ଛତିଶଗଡ ହୋଟେଲ ଯାଇ ପିଆରଆଇ ସଦସ୍ଯଙ୍କୁ ଅଟକ ରଖିଲେ ?

ନିଖୋଜ ମାମଲା ସତ୍ତ୍ବେ ଆଇଆଇସି କାହିଁକି ସେମାନଙ୍କୁ ସାଙ୍ଗରେ ଆଣିଲେନି ? ମୋ ଭାଇ ବିଶାଲ ଦାସଙ୍କୁ ସରେଇପାଲି ନିଆଗଲା । ସମସ୍ତଙ୍କୁ ଅଲଗା ଅଲଗା ରଖାଗଲା । ଛତିଶଗଡ ପୋଲିସ କହିଲେ ଉପରୁ ଅର୍ଡର ଆସିଲେ ଛାଡ଼ିବୁ । କେଉଁ ଅର୍ଡର ଓଡ଼ିଶାର ନା ଛତିଶଗଡର ବୋଲି ପ୍ରଶ୍ନ କରିଛନ୍ତି ଦୀପାଳି । 12 ଘଣ୍ଟା ବିନା ଖାଦ୍ୟ ବିନା ପାଣିରେ ମହିଳା, ଛୁଆ ଓ ବୟସ୍କକୁ ଅଟକ ରଖାଗଲା । ମୋ ଭାଇ ଓ ଅନ୍ୟମାନଙ୍କୁ କାହା ଅର୍ଡରରେ ଅଟକ ରଖାଗଲା ବୋଲି ପଚାରିଛନ୍ତି ଦୀପାଳି । ରାଜନୈତିକ ଚାପରେ ଭୋଟ ବନ୍ଦ କରାଗଲା । ନବୀନ ପଟ୍ଟନାୟକ ଛତିଶଗଡ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ । ତାପରେ ସମସ୍ତଙ୍କୁ ଛଡାଗଲା ବୋଲି କହିଛନ୍ତି ଦୀପାଳି । ସେଥିପାଇଁ ବିଜେଡି ସୁପ୍ରିମୋଙ୍କୁ ଧନ୍ଯବାଦ ଜଣାଉଛି । ମୋ ପରିବାରକୁ ଆଉ ଟାର୍ଗେଟ କରନ୍ତୁ ନାହିଁ ବୋଲି ଦୀପାଳି କହିବା ସହିତ ସେ କାହାକୁ ଡରନ୍ତିନି ବୋଲି କହିଛନ୍ତି । ବାପାଙ୍କ ଆଶୀର୍ବାଦ, ନବୀନ ପଟ୍ଟନାୟକଙ୍କ ଆଶୀର୍ବାଦ ଓ ଝାରସୁଗୁଡାବାସୀଙ୍କ ଭଲ ପାଇବା ତାଙ୍କ ସହ ଅଛି ବୋଲି କହିଛନ୍ତି ଦୀପାଳି ।