ଭୁବନେଶ୍ବର: ସମ୍ଭାବ୍ୟ ବାତ୍ୟା ‘ଦାନା’କୁ ନେଇ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସମୀକ୍ଷା । ଜିରୋ କାଜୁଆଲିଟି ଉପରେ ଗୁରୁତ୍ଵାରୋପ କରିଛନ୍ତି ସରକାର । ତଳିଆ ଅଞ୍ଚଳରୁ ଶତ ପ୍ରତିଶତ ଲୋକଙ୍କୁ କରାଯିବ ସ୍ଥାନାନ୍ତର । ବାତ୍ଯା ମୁକାବିଲା ପାଇଁ ସରକାର ସମ୍ପୂର୍ଣ୍ଣ ଭାବେ ପ୍ରସ୍ତୁତ ଅଛନ୍ତି । ବାତ୍ଯା ନେଇ ଜନତାଙ୍କୁ ସୂଚନା ଦିଆଯାଉଛି, ଭୟଭୀତ ନହେବାକୁ କହିଛନ୍ତି ମୁଖ୍ୟମନ୍ତ୍ରୀ ।
ବାତ୍ୟା ମୁକାବିଲା ଲାଗି ଅଗ୍ନିଶମ ବାହିନୀ, ଓଡ୍ରାଫ, ଏନଡିଆରଏଫ ପ୍ରସ୍ତୁତ ରହିଛନ୍ତି । ସବୁ ପ୍ରଭାବିତ ଅଞ୍ଚଳ ଚିହ୍ନଟ କରାଯାଇ ଶତ ପ୍ରତିଶତ ଲୋକଙ୍କୁ ସ୍ଥାନାନ୍ତର କରାଯିବ । ବାତ୍ଯା ଆଶ୍ରୟସ୍ଥଳୀକୁ ଆବଶ୍ୟକ ବ୍ୟବସ୍ଥା ଅନୁୟାୟୀ ପ୍ରସ୍ତୁତ ରଖାଯାଇଛି । ଆବଶ୍ୟକ ସାମଗ୍ରୀ ମହଜୁଦ ରଖାଯିବ । ବାତ୍ଯା ପରେ ଅବରୋଧ ଦୂର କରିବାକୁ ଅତ୍ଯାବଶ୍ୟକ ସାମଗ୍ରୀ ମହଜୁଦ ରଖିବା ଉପରେ ଗୁରୁତ୍ଵାରୋପ କରାଯାଇଛି । ହସ୍ପିଟାଲ ଗୁଡିକରେ ନିରବଚ୍ଛିନ୍ନ ବିଦ୍ଯୁତ ସେବା ଯୋଗାଇବାକୁ ନିର୍ଦ୍ଦେଶ ଦିଆଯାଇଛି ।
ସେହିପରି, ଅତ୍ଯାବଶ୍ୟକ ଖାଦ୍ୟ ସାମଗ୍ରୀ ଦର ବୃଦ୍ଧି ଯେପରି ନଘଟେ ସେଥିପ୍ରତି କଳାବଜାରୀ ଉପରେ ନଜର ରକିବାକୁ ବିଭାଗକୁ ନିର୍ଦ୍ଦେଶ ଦିଆଯାଇଛି । ମୁଖ୍ୟମନ୍ତ୍ରୀଙ୍କ ସମୀକ୍ଷା ବୈଠକରେ ରାଜସ୍ବ ମନ୍ତ୍ରୀଙ୍କ ସୁରେଶ ପୂଜାରୀ, ମୁଖ୍ୟ ଶାସନ ସଚିବ, ଏସଆରସି, ଫାୟାର ଡିଜି, କୃଷି ବିଭାଗ ସଚିବ ଅରବିନ୍ଦ ପାଢ଼ୀ, ଆଇନ ଶୃଙ୍ଖଳା ଏଡ଼ିଜି ସଞ୍ଜୟ କୁମାର, ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶିକା ମନୋରମା ମହାନ୍ତିଙ୍କ ସମେତ ବିଭାଗ ବିଭାଗର ବରିଷ୍ଠ ଅଧିକାରୀ ଯୋଗ ଦେଇଥିଲେ ।
