ଭୁବନେଶ୍ବର : ନାରୀ ନିର୍ଯାତନା ନେଇ ରାଜ୍ୟ ସରକାରଙ୍କୁ ସମାଲୋଚନା କଲେ କଂଗ୍ରେସ ବିଧାୟକ ସୋଫିଆ ଫିର୍ଦ୍ଦୋସ । ରାଜ୍ୟରେ ମହିଳା ନିର୍ଯାତନା ବଢିବାରେ ଲାଗିଛି । ଯାହାକି ଖୁବ ଦୁଃଖର ବିଷୟ ବୋଲି କହିଛନ୍ତି ସୋଫିଆ । ପୋଲିସ ମହିଳା ନିର୍ଯାତନା ମାମଲାକୁ ହାଲୁକା ଭାବେ ନେଉଛି l ବ୍ରହ୍ମପୁର ଓ କଟକ ଉଦାହରଣ ନେଇ ସରକାରଙ୍କ ଉପରେ ବର୍ଷିଲେ । କଣ ପାଇଁ ମହିଳାଙ୍କୁ ସୁରକ୍ଷା ଦିଆଯାଉ ନାହିଁ । ଧାର୍ଯ୍ୟ ସମୟରେ ତଦନ୍ତ ରିପୋର୍ଟ ଦେବା କଥା ତାହା ଦେଉନାହାନ୍ତି । ଝିଅମାନେ ନିଖୋଜ ହୋଇଯାଉଛନ୍ତି । ପୋଲିସ ସେମାନଙ୍କୁ ପାଉନାହିଁ । ତେଣୁ ଲୋକମାନେ କାହା ପାଖକୁ ଯିବେ ବୋଲି ବିଧାୟିକା ପ୍ରଶ୍ନ କରିଛନ୍ତି । ମହିଳାଙ୍କ ଉପରେ ସାଇବର କ୍ରାଇମ ମଧ୍ଯ ବଢିବାରେ ଲାଗିଛି । ଭରତପୁର ଥାନା କଥା ଉଠାଇ ସରକାରଙ୍କୁ ଘେରିଛନ୍ତି କଂଗ୍ରେସ ବିଧାୟିକା ସୋଫିଆ ଫିର୍ଦ୍ଦୋସ । ଦିନକୁ ଦିନ ରାଜ୍ୟରେ ନାରୀ ନିର୍ଯାତନା ବଢିବା ସହ ଥାନାରେ ମହିଳା ମାନଙ୍କ ଅଭିଯୋଗକୁ ଗୁରୁତ୍ବ ଦିଆଯାଉନଥିବା ବିଧାନସଭା ଷ୍ଟାଣ୍ଡିଂ କମିଟି ବୈଠକରେ ଦଳମତ ନିର୍ବିଶେଷରେ ୱୁ ବିଧାୟିକା ମାନେ ଉଦବେଗ ପ୍ରକାଶ କରିଥିଲେ । ପୋଲିସ ମହିଳା ମାନଙ୍କୁ ନ୍ୟାୟ ଦେବାରେ ତ୍ବରିତ ପଦକ୍ଷେପ ଗ୍ରହଣ କରିବା ପାଇଁ ବିଜେଡି ବିଧାୟକ ସୁଜାତା ସାହୁ ଦାବି କରିଛନ୍ତି । ସେହିଭଳି ମହିଳାମାନେ କିଭଳି ଉପଯୁକ୍ତ ନ୍ୟାୟ ପାଇବେ ଓ ଥାନା ଗୁଡିକରେ ମହିଳା ଓ ଶିଶୁଙ୍କ ପାଇଁ ସ୍ବତନ୍ତ୍ର ଧ୍ୟାନ ଦିଆଯିବ ସେନେଇ ବୈଠକରେ ଆଲୋଚନା କରାଯାଇଥିବା କହିଛନ୍ତି କିମଟିର ଅଧ୍ୟକ୍ଷ ସିମାରାଣୀ ନାୟକ ।
ଆୟୁଷ୍ମାନ ଯୋଜନାକୁ ନେଇ ବର୍ଷିଲା ବିଜେଡି : ଖାଲି ନାମ,ରଙ୍ଗ ବଦଳା ଯାଉଛି, ସାଧାରଣ ଲୋକଙ୍କ ପାଇଁ କିଛି ନାହିଁ
ଭୁବନେଶ୍ବର : ଆୟୁଷ୍ମାନ ଭାରତ ଯୋଜନା ଦ୍ଵିତୀୟ ପର୍ଯ୍ୟାୟର ଆଜି ଶୁଭାରମ୍ଭ ହୋଇଥିବାବେଳେ ରାଜ୍ୟ ସରକାରଙ୍କ ଉପରେ ବର୍ଷିଛି ବିଜେଡି। ଯୋଜନାରେ ରାଜ୍ୟ ସରକାରଙ୍କ କୌଣସି ସ୍ପଷ୍ଟ ସୂଚନା ନାହିଁ ବୋଲି କହିଛି ଦଳ। ବିଜୁ ସ୍ଵାସ୍ଥ୍ୟ କଲ୍ଯାଣ ଯୋଜନା ଲୋକଙ୍କ ଲାଗି ଅମୂଲ୍ଯ ଥିଲା। ବିଏସକେୱାଇର ନାମ ପରିବର୍ତ୍ତନ କଲେ ସରକାର। ଏହାକୁ ଗୋପବନ୍ଧୁ ସ୍ଵାସ୍ଥ୍ୟ ଯୋଜନା କରିଛନ୍ତି। ନାଁ ବଦଳାଇବା ରାଜନୀତିରେ ମାତିଛନ୍ତି ରାଜ୍ଯ ସରକାର। ପୂର୍ବ ସରକାର ସମୟରେ ବିଏସକେୱାଇ ଯୋଜନାରେ ପ୍ରାୟ ୧ କୋଟି ଲୋକ ଲାଭ ପାଉଥିଲେ। ୩୬ ଲକ୍ଷ ହିତାଧିକାରୀ ଏହି ଯୋଜନାର ଲାଭ ପାଇବେ ବୋଲି ପୂର୍ବରୁ କହିଛନ୍ତି ରାଜ୍ୟ ସରକାର। ତେବେ କେଉଁମାନେ ଏହି ଯୋଜନାରୁ ବାଦ ପଡ଼ିବେ ବୋଲି ପ୍ରଶ୍ନ କରିଛି ବିଜେଡି। ଗରିବ, ଖଟିଖିଆ, ଶ୍ରମିକ ଓ ମହିଳାଙ୍କୁ ସ୍ଵାସ୍ଥ୍ୟ ଗ୍ଯାରେଣ୍ଟି ଦେବାକୁ ବିଜୁ ସ୍ଵାସ୍ଥ୍ୟ କଲ୍ଯାଣ ଯୋଜନାର ଆରମ୍ଭ କରିଥିଲେ ନବୀନ ପଟ୍ଟନାୟକ।ଏ ପର୍ଯ୍ୟନ୍ତ ଏ ଯୋଜନାର ସୁବିଧା ମିଳିଆସୁଛି। ଏବେ ନାଁ ପରିବର୍ତନ କରି ଗୋପବନ୍ଧୁ ସ୍ୱାସ୍ଥ୍ୟ ଯୋଜନା କଲେ। ଯାହା ଏପର୍ଯ୍ୟନ୍ତ ଆରମ୍ଭ ହୋଇ ପାରିନାହିଁ। ଯଦି ୩୬ ଲକ୍ଷ ସାମିଲ ହେବେ ତେବେ ଯୋଜନାର ଲାଭ ପାଉଥିବା ବାକି ଲୋକ କୁଆଡେ ଯିବେ ବୋଲି ପ୍ରଶ୍ନ କରିଛି ବିଜେଡି। ଦଳୀୟ ଭିତ୍ତିରେ ଗୋପବନ୍ଧୁ ସ୍ୱାସ୍ଥ୍ୟ ଯୋଜନା ଦେବେ ବୋଲି ଅଭିଯୋଗ କରିଛି ବିଜେଡି। ଏଥିରେ ବି ରାଜନୀତି ଏହା ଲୋକ ବୁଝି ସାରିଲେଣି। ଏ ସରକାର ନାଁ ଓ ରଙ୍ଗ ବଦଳାଇବା ସରକାର।ହେଲେ ସାଧାରଣ ଲୋକଙ୍କ ପାଇଁ ଯୋଜନା କିଛି ନାହିଁ। ବିଜେପିର ଆୟୁଷ୍ମାନ ଭାରତ ଯୋଜନା ନେଇ ଲୋକେ କାନ୍ଦୁଛନ୍ତି। କଣ ଏଥିରେ ସୁବିଧା ଅଛି ଏପର୍ଯ୍ୟନ୍ତ ସ୍ପଷ୍ଟ କରିନାହାନ୍ତି ସରକାର। ରୋଗୀ ପଇସା ଦେବ ନା ଖର୍ଚ୍ଚ କରିବା ପରେ ପାଇବେ। ଏ ମସସ୍ତ ବିଷୟ କିଛି ସ୍ପଷ୍ଟ ନକରି ପ୍ରଚାର ପ୍ରସାରରେ ଲଗାଇବେ ବୋଲି କହିଛି ବିଜେଡି। ସରକାରୀ ଯୋଜନାକୁ ଦଳୀୟ ଯୋଜନା କରିବା ହିଁ ସେମାନଙ୍କ ଉଦେଶ୍ୟ। ସରକାର ଲୋକଙ୍କ ସମସ୍ୟା ବୁଝନ୍ତୁ। ରାଜନୀତି ନକରନ୍ତୁ। ନବୀନ ପଟ୍ଟନାୟକ କଣ କରିଥିଲେ ଓ ଏବେ ସରକାର କଣ କରୁଛନ୍ତି। ଲୋକେ ଏବେଠାରୁ ତୁଳନା କରିବା ଆରମ୍ଭ କଲେଣି। BSKY ପରି ଗୋପବନ୍ଧୁ ସ୍ୱାସ୍ଥ୍ୟ ଯୋଜନା ହେଲେ ଯାଇ ଲୋକ ସୁବିଧା ପାଇବେ ବୋଲି କହିଛି ବିଜେଡି।
‘ବାତ୍ଯା ବିପର୍ଯ୍ୟୟକୁ ପୁଣି ମିଛ କହି ଠକିଲେ ମୁଖ୍ୟମନ୍ତ୍ରୀ’
ବାଲେଶ୍ବର : ବାତ୍ଯା ବିପର୍ଯ୍ୟୟକୁ ପୁଣି ମିଛ କହି ଠକିଲେ ମୁଖ୍ୟମନ୍ତ୍ରୀ । ଏମିତି ଅଭିଯୋଗ ଆଣିଛନ୍ତି ଏଆଇସିସି ସଦସ୍ୟ ନବଜ୍ୟୋତି ପଟ୍ଟନାୟକ । ବାତ୍ଯା ପୂର୍ବରୁ ରାଜ୍ୟ ସରକାର ପ୍ରସ୍ତୁତ ଥିବା ଡ଼ିଣ୍ଡିମ ପିଟୁଥିଲେ । ବାତ୍ଯା ପରେ ରିଲିଫ୍ ଯୋଗାଇବାରେ ସରକାର ବିଫଳ ହେଲେ । ଘରର ଛପର ଉଡ଼ି ଯାଇଛି । ଘର ଭିତରେ ପାଣି ପଶିଯାଇଛି । ଖାଇବାକୁ ଦାନା ନାହିଁ । ସେହି ସମୟରେ ବାତ୍ୟା ଆଶ୍ରୟ ସ୍ଥଳୀରେ ଦୁଇଦିନ ଭାତ ଡ଼ାଲମା ଦେଇଦେଲେ ଲୋକଙ୍କ ସମସ୍ୟାର ସମାଧାନ ହେବନାହିଁ । ଲୋକଙ୍କ ପାଖରେ ପଲିଥିନ୍ ଖଣ୍ଡେ ନାହିଁ । ଚୂଡ଼ା, ଚାଉଳ ନାହିଁ । ଏ ପର୍ଯ୍ୟନ୍ତ ବିଜୁଳୀ ସଂଯୋଗ ସ୍ବାଭାବିକ ହୋଇପାରିଲା ନାହିଁ । କେବଳ କଥାରେ ଚାଲିଛି ଓଡ଼ିଶା ସରକାର । କେନ୍ଦ୍ରରେ ମିଛ କହି ଭଣ୍ଡାଉ ଥିଲେ । ଏବେ ରାଜ୍ୟରେ ମିଛ କହିବା ଆରମ୍ଭ କରିଛନ୍ତି । ତୁରନ୍ତ ରିଲିଫ୍ ଯୋଗାଇ ଦିଆନଗଲେ କଂଗ୍ରେସ୍ ରାଜରାସ୍ତାକୁ ଉହ୍ଲେଇବ ବୋଲି ଚେତାବନୀ ଦେଇଛନ୍ତି ନବଜ୍ୟୋତି।
ଝାଡ଼ଖଣ୍ଡର ୨ ବରିଷ୍ଠ ଅଧିକାରୀଙ୍କ ଘରେ ଇଡ଼ିର ରେଡ୍
ରାଞ୍ଚି : ମଦ ଦୁର୍ନୀତି ମାଧ୍ୟମରେ ଅର୍ଥ ହେରଫେର ମାମଲାରେ ଇଡି ମଙ୍ଗଳବାର ସକାଳୁ ଝାଡ଼ଖଣ୍ଡର ବରିଷ୍ଠ ଆଇଏଏସ୍ ଅଧିକାରୀ ବିନୟ ଚୌବେ ଏବଂ ଏକ୍ସାଇଜ୍ ବିଭାଗର ଯୁଗ୍ମ ସଚିବ ଗଜେନ୍ଦ୍ର ସିଂ ଏବଂ ସେମାନଙ୍କ ନିକଟ ସମ୍ପର୍କୀୟଙ୍କ ଘର ଉପରେ ଚଢ଼ାଉ କରିଛି ଇଡି । ଇଡି ଟିମ୍ ଏହି ଦୁଇ ଅଧିକାରୀଙ୍କ ଚାର୍ଟାର୍ଡ ଆକାଉଣ୍ଟାଣ୍ଟଙ୍କ ନିକଟରେ ମଧ୍ୟ ପହଞ୍ଚିଛନ୍ତି । ମଦ ଦୁର୍ନୀତିର ଏହି ଚେର ଛତିଶଗଡ଼ ସହିତ ଝାଡ଼ଖଣ୍ଡକୁ ଲମ୍ଵିଛି । ଏହା ସହିତ ଛତିଶଗଡ଼ର ଦୁର୍ନୀତି ନିବାରଣ ବ୍ୟୁରୋ ଏବଂ ଇକୋନୋମିକ୍ ଅଫେନ୍ସ ୱିଙ୍ଗ ଗତ ମାସରେ ୭ ଜଣଙ୍କ ବିରୋଧରେ ଏଫ୍ଆଇଆର୍ ଦାୟର କରିଥିଲା । ଏଥିରେ ଝାଡ଼ଖଣ୍ଡର ଏକ୍ସାଇଜ୍ ବିଭାଗର ତତ୍କାଳୀନ ସଚିବ ବିନୟ ଚୌବେ ଏବଂ ଯୁଗ୍ମ ସଚିବ ଗଜେନ୍ଦ୍ର ସିଂଙ୍କ ସମେତ ୭ ଜଣଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା। ଏଫଆଇଆରରେ କୁହାଯାଇଛି ଯେ, ଏହି ଅଧିକାରୀମାନେ ମିଳିତ ଭାବେ ଝାଡ଼ଖଣ୍ଡର ମଦ ନୀତିର ଅପବ୍ୟବହାର କରି ସରକାରୀ ଅର୍ଥ ହଡ଼ପ କରିଥିବା ଅଭିଯୋଗ ହୋଇଛି । ACB ଏବଂ EOW ର ଏହି ଏଫଆଇଆର ଆଧାରରେ କେନ୍ଦ୍ରୀୟ ଅନୁସନ୍ଧାନ ଏଜେନ୍ସି ଇଡି ତଦନ୍ତ ଆରମ୍ଭ କରିଛି । ଏହି ମାମଲାରେ ଅଭିଯୁକ୍ତମାନଙ୍କ ମଧ୍ୟରେ ଛତିଶଗଡ଼ର ପୂର୍ବତନ ଆଇଏଏସ୍ ଅଧିକାରୀ ଅନିଲ ଟୁଟେଜା, ବ୍ୟବସାୟୀ ଅନୱର ଧବର, ଛତିଶଗଡ ରାଜ୍ୟ ମାର୍କେଟିଂ କର୍ପୋରେସନର ପୂର୍ବତନ ପରିଚାଳନା ନିର୍ଦ୍ଦେଶକ ଅରୁଣପତି ତ୍ରିପାଠୀ, ଆଇଏଏସ୍ ଅଧିକାରୀ ଏବଂ ଛତିଶଗଡର ପୂର୍ବତନ ଅବକାରୀ ବିଭାଗ କମିଶନର ନିରଞ୍ଜନ ଦାସ, ଅରବିନ୍ଦ ସିଂ ଏବଂ ନୋଏଡାର ବ୍ୟବସାୟୀ ବିଘୁ ଗୁପ୍ତା ସାମିଲ ଅଛନ୍ତି ।
ବାତ୍ଯାର ମୁକାବିଲା କ୍ଷେତ୍ରରେ ନବୀନ ମଡେଲ ସାଉଁଟିଛି ଜାତୀୟ ଓ ଅନ୍ତର୍ଜାତୀୟ ଖ୍ଯାତି
ଭୁବନେଶ୍ବର : ୨୯ ଅକ୍ଟୋବର, ୧୯୯୯ । ସବୁଦିନ ପରି ନଥିଲା କିନ୍ତୁ ସେଦିନର ସକାଳ। ସବୁଠି ଅଣଚାଷ ପବନର ତାଣ୍ଡବ। ସୁସୁ ଗର୍ଜନ। ଛାତିଥରାଇ ଦେବା ପରି ଦୃଶ୍ଯ। ଜଳ, ସ୍ଥଳ, ଗିରିବନ, ଗାଁ, ସହରରୁ ସମୁଦ୍ର…ସବୁଠି ଧ୍ବଂସର ଲୀଳା। ବେଳକୁ ବେଳ ବଢୁଥିଲା ପବନ। ହେଲେ ଥମିଲାନି ପ୍ରଳୟର ବେଗ। ଶହେରୁ ଦୁଇ ଶହ, ଦୁଇ ଶହରୁ ତିନିଶହ କିମି ବେଗରେ ବହିଲା ପବନ। ମହାବାତ୍ଯାର ଆଁରେ ଲୀନ ହେଉଥିଲା ଜନପଦ। ଗୋଟିଏ ମିନଟ କଟିଲେ ଲାଗୁଥିଲା କଟିଲା ଗୋଟିଏ ଯୁଗ। ସୁପରସାଇକ୍ଲୋନର ରକ୍ତମୁଖୀ ଜିହ୍ବାରେ ନିର୍ବାପିତ ହେବାରେ ଲାଗିଥିଲା ଧନଜୀବନ। ତାହାରି ଭିତରେ ସମୁଦ୍ରର ପ୍ରକାଣ୍ଡ ଜୁଆର ଖେଳାଇଥିଲା ଆତଙ୍କ। ସମଗ୍ର ଉପକୂଳ ଅଞ୍ଚଳରେ ଝଡ଼ର ତାଣ୍ଡବରେ କିଏ ହଜିଥିଲା କୁଆଡ଼େ ତାହାର ରହି ନଥିଲା ହିସାବ। ଭୂପତିତ ହେବାରେ ଲାଗିଥିଲା ବିଶାଳ ଦ୍ରୁମ। ଅକସ୍ମାତ ଉଚ୍ଚ ଜୁଆରରେ ବି ନିଶ୍ଚିହ୍ନ ହୋଇଯାଇଥିଲା ଅନେକ ଗାଁ। ପ୍ରାଣ ହରାଇଥିଲେ ୧୦ ହଜାରରୁ ଅଧିକ ଲୋକ। ଏବେବି ସେ କାଳରାତି କଥା ମନେପଡିଲେ ଥରିଉଠେ ଛାତି। ଉପକୂଳ ଓଡିଶା ସମେତ ରାଜ୍ୟର ମୋଟ ୧୨୮ଟି ବ୍ଲକରେ ବ୍ୟାପକ କ୍ଷତି ଘଟାଇଥିଲା ମହାବାତ୍ଯା । ୨କୋଟି ଲୋକ ହୋଇଥିଲେ ପ୍ରଭାବିତ। ୪ଲକ୍ଷରୁ ଉର୍ଦ୍ଧ୍ବ ଗୃହପାଳିତ ପଶୁଙ୍କ ମୃତ୍ୟୁ ହୋଇଥିଲା । ୯ଲକ୍ଷରୁ ଉର୍ଦ୍ଧ୍ବ ହେକ୍ଟର ଚାଷଜମିରେ ଫସଲ ନଷ୍ଟ ହୋଇଥିଲା ।
ଆକସ୍ମିକ ପ୍ରଳୟ ଲାଗି ପ୍ରସ୍ତୁତ ନଥିଲେ ଓଡ଼ିଶାବାସୀ। ଓଡ଼ିଶା ଇତିହାସରେ ଏହି ଲୋମହର୍ଷକ ବାତ୍ଯା ଆଜି ବି ଆଣେ ଛନକା। ମହାବାତ୍ଯା ପରଠାରୁ ସଜାଗ ହୋଇଥିଲା ଓଡ଼ିଶା। ଗତ ୨୫ ବର୍ଷ ମଧ୍ଯରେ ରାଜ୍ଯରେ ଦେଖାଯାଇଛି ଅନେକ ବିପର୍ଯ୍ୟୟ। ୨୦୧୩ରେ ଫାଇଲିନ, ୨୦୧୪ରେ ହୁଡହୁଡ, ୨୦୧୮ରେ ତିତଲି, ୨୦୧୯ରେ ଫନି ଓ ବୁଲବୁଲ୍, ୨୦୨୦ରେ ଅମ୍ଫନ, ୨୦୨୧ରେ ୟାସ, ଗୁଲାବ ଓ ଜବାଦ ଏବଂ ଚଳିତ ବର୍ଷ ଦାନା ରାଜ୍ଯ ଲାଗି ଆଣିଛି ଅନେକ ଚାଲେଞ୍ଜ। ବାତ୍ୟା ମୁକାବିଲା କ୍ଷେତ୍ରରେ ଓଡିଶା ସାରା ଦେଶରେ ଏବେ ରୋଲମଡେଲ। ତତକାଳୀନ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ଅସୀମ ଧୈର୍ଯ୍ୟ, ଜିରୋ କାଜୁଆଲିଟି ମିଶନ ସାରା ବିଶ୍ବକୁ ଦେଖାଇଛି ଆଲୋକବର୍ତ୍ତିକା। ବାତ୍ଯାର ମୁକାବିଲା କ୍ଷେତ୍ରରେ ଓଡିଶା ସାଉଁଟିଛି ଜାତୀୟ ଓ ଅନ୍ତର୍ଜାତୀୟ ଖ୍ଯାତି ।
ମହାନଦୀ ବ୍ରିଜ ଉପରେ ପଲସର : ଯୁବକଙ୍କ ମିଳୁନି ପତ୍ତା !
ବାଙ୍କୀ : ବାରଙ୍ଗ ଥାନା ଗୋଡ଼ିସାହି ଫାଣ୍ଡି ମୁଣ୍ଡଳୀ ମହାନଦୀ ବ୍ରିଜ ଉପରେ ପଲସର ରଖି ଯୁବକ ନିଖୋଜ ଘଟଣା। ବର୍ତ୍ତମାନ ସୁଦ୍ଧା ମିଳୁନି ପତ୍ତା। ମହାନଦୀକୁ ଡେଇଁ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି। ଘଟଣାସ୍ଥଳରେ ସର୍ଚ୍ଚ ଅପରେସନ ଜାରି ରହିଛି। ନିଖୋଜ ଯୁବକ ଢେଙ୍କାନାଳ ଜିଲ୍ଲା ଗଁଦିଆ ଥାନା କାବେରା ଗାଁର ତାରିଣୀ ପ୍ରସାଦ ରାଉତ। ଅନୁଗୁଳୁର ଏକ ଘରୋଇ ବ୍ୟାଙ୍କରେ କାର୍ଯ୍ୟ କରୁଥିବା ବେଳେ ଗତକାଲି ଦିନ୧୨ ଟାରେ ବ୍ୟାଙ୍କରୁ ଚାଲିଆସିଥିଲେ। ଏହାପରେ ତାଙ୍କ ସ୍ତ୍ରୀଙ୍କ ସହ କଥା ହେବା ପରେ ଫୋନ ସୁଇଜ ଅଫ କରିଦେଇଥିଲେ। ଦୀର୍ଘ ସମୟ ଧରି ମୁଣ୍ଡଳୀ ବ୍ୟାରେଜ ଉପରେ ଗାଡି ରହିବାରୁ ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଁଚି ଗାଡ଼ି ଜବତ କରିଥିବା ବେଳେ ଯୁବକଙ୍କ ପତ୍ତା ମିଳିପାରିନାହିଁ । ମହାନଦୀକୁ ଡେଇଁ ଥିବା ସନ୍ଦେହରେ ମହାନଦୀ ଅଗ୍ନିଶମ କର୍ମଚାରୀ ସର୍ଚ୍ଚ ଅପରେସନ ଜାରି ରଖିଛନ୍ତି । ଘଟଣାସ୍ଥଳରେ ପରିବାର ଲୋକେ ପହଞ୍ଚି ଥିବା ବେଳେ ଅନଲାଇନ ଟ୍ରେଡିଂ କରି ମାନସିକ ଚାପ ଥିଲେ ବୋଲି ପରିବାର ଲୋକେ କହିଛନ୍ତି ।
ବିହାର ପାଟନାରେ ମେଟ୍ରୋ ଟନେଲ ଦୁର୍ଘଟଣା , ଘଟଣାସ୍ଥଳରେ ୨ ଓଡ଼ିଆ ଶ୍ରମିକ ମୃତ
ପାଟନା : ବିହାର ପାଟନାରେ ମେଟ୍ରୋ ରେଲୱେ କାମ ଚାଲିଥିବାବେଳେ ଅଘଟଣ। ଶ୍ରମିକଙ୍କ ଉପରେ ଚଢିଗଲା ଲୋକୋ ପିକଅପ୍ । ଏଥିରେ ୨ ଶ୍ରମିକଙ୍କ ମୃତ୍ଯୁ ହୋଇଥିବାବେଳେ ୮ ଶ୍ରମିକ ଗୁରୁତର ହୋଇପଡିଛନ୍ତି । ମୃତକ ଦୁଇ ଶ୍ରମିକ ଓଡ଼ିଶାର ହୋଇଥିବା ସୂଚନା। ମୃତକ ଦୁଇ ଶ୍ରମିକ ହେଲେ ମନୋଜ ଏବଂ ଶ୍ୟାମବାବୁ। ୮ ଆହତ ଶ୍ରମିକଙ୍କ ମଧ୍ୟରେ ଜଣେ ଓଡ଼ିଆ ଶ୍ରମିକ ଅଛନ୍ତି। ସେମାନଙ୍କ ମଧ୍ୟରେ ବିଜୟ ନାମକ ଜଣେ ଓଡ଼ିଆ ଶ୍ରମିକ ଆହତ ଅଛନ୍ତି। ଦୁଇ ଓଡ଼ିଆ ଶ୍ରମିକଙ୍କ ମୃତ୍ଯୁ ନେଇ ସ୍ପଷ୍ଟ କରିଛନ୍ତି ଓଡ଼ିଶା ଶ୍ରମ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ। ଶ୍ରମିକଙ୍କ ସ୍ଥିତି ବୁଝିବା ନେଇ ପାଟନା ଯିବେ ଜିଲ୍ଲା ଶ୍ରମ ଅଧିକାରୀ ସତ୍ୟନାରାୟଣ ଆଚାର୍ଯ୍ୟ। ସେଠାରେ ପହଞ୍ଚି ଆହତ ଶ୍ରମିକଙ୍କ ପରିଚୟ ଓ ଚିକିତ୍ସା ନେଇ ଅଧିକ ତଥ୍ୟ ପ୍ରଦାନ କରିବେ। ମେଟ୍ରୋ ଟନେଲରେ ୨୫ ଜଣ ଶ୍ରମିକ କାମ କରୁଥିଲେ। ଗତକାଲି ରାତିରେ ଘଟିଥିଲା ଏ ଦୁର୍ଘଟଣା। ନିର୍ମାଣସ୍ଥଳରେ ସୁପରଭାଇଜର ନଥିବା ଜଣାପଡିଛି । ପାଟନା ଏନଆଇଟିର ପ୍ରସ୍ଥାନ ଗେଟ୍ ନିକଟ ଟନେଲରେ ଏହି କାମ ଚାଲିଥିଲା। ଘଟଣାରେ ମୃତ୍ଯୁସଂଖ୍ଯା ବୃଦ୍ଧି ପାଇବା ଆଶଂକା କରାଯାଉଛି। ଦୁର୍ଘଟଣା ପରେ ଶ୍ରମିକ ଅସନ୍ତୋଷ ପ୍ରକାଶ କରିଛନ୍ତି। ସୁରକ୍ଷା ପ୍ରତି କର୍ତ୍ତୃପକ୍ଷ ଅବହେଳା ପ୍ରଦର୍ଶନ କରିଥିବା ଅଭିଯୋଗ ହୋଇଛି ।
ମନରେଗାରେ ଦୁର୍ନୀତି ଓ ପିସି କାରବାରର ଗୁମର ଖୋଲିଲେ ଗ୍ରାମ ସଂଯୋଜକ
ଉଦଳା : ଗ୍ରାମ ସଂଯୋଜକ ଖୋଲିଦେଲେ ମନରେଗାରେ ହେଉଥିବା ଦୁର୍ନୀତି ଓ ପିସି କାରବାରର ଗୁମର। ନିଜ ନାମରେ ଆସିଥିବା ୨ଟି ପ୍ରକଳ୍ପ କାମ ସାରିବା ପରେ ମଧ୍ୟ ବିଲ୍ ନ ପାଇବାରୁ କାରଣ ଖୋଜୁ ଖୋଜୁ ବାହାରିଲା ସାଂଘାତିକ ସତ। ୨୦୨୦ ମସିହାରେ କପ୍ତିପଦା ବ୍ଲକ ପଦ୍ମପୋଖରୀ ପଞ୍ଚାୟତର ଗ୍ରାମ ସଂଯୋଜକ ବିଶ୍ୱନାଥ ରାଉଳଙ୍କ ନାମରେ ୭ ଲକ୍ଷ ଲେଖାଏଁ ୨ଟି ଉନ୍ନୟନ କାମ ଆସିଥିଲା। କାମ ସରିବାକୁ ଦେଢ଼ ବର୍ଷରୁ ଅଧିକ ବିତିଯାଇଥିବା ମଧ୍ୟ ଉକ୍ତ କାମର ବକେୟା ଥିବା ବିଲ୍ ମିଳିନାହିଁ । ବାରମ୍ବାର ଯନ୍ତ୍ରୀ, ପିଇଓ ଏବଂ ବିଡିଓଙ୍କ ନିକଟକୁ ଯାଇଥିଲେ ମଧ୍ୟ ଉକ୍ତ ଦୁଇ କାମର ଫାଇଲ ହଜିଯାଇଥିବା କହି ତାଙ୍କୁ ଆଜି ପର୍ଯ୍ୟନ୍ତ ବିଲ୍ ଦିଆଯାଉ ନାହିଁ। ଯାହାକୁ ନେଇ ଗ୍ରାମ ସଂଯୋଜକ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଛନ୍ତି । ଉକ୍ତ କାମ ପାଇଁ ସେ ପିଇଓଙ୍କୁ ପିସି ଟଙ୍କା ଦେଇଥିବାର ପ୍ରମାଣ ମଧ୍ୟ ଦେଖାଇବା ସହିତ ପିଇଓଙ୍କ ସହିତ ହୋଇଥିବା କଥାବାର୍ତ୍ତାର ରେକର୍ଡ ମଧ୍ୟ ଶୁଣାଇଛନ୍ତି । ଯନ୍ତ୍ରୀ ଏବଂ ଅନ୍ୟମାନଙ୍କୁ ମଧ୍ୟ ନଗଦ ଟଙ୍କା ଦେଇଥିବାର ସେ ଅଭିଯୋଗ ଆଣିଛନ୍ତି । କେବଳ ସେତିକି ନୁହେଁ ପଦ୍ମପୋଖରୀ ପଞ୍ଚାୟତରେ ମନରେଗାରେ ବଡ଼ ଦୁର୍ନୀତି ହୋଇଥିବାର ଅଭିଯୋଗ ଆଣିଛନ୍ତି । ଉକ୍ତ ପଞ୍ଚାୟତରେ ଏହିପରି ବିଭିନ୍ନ କାମର ଫାଇଲ ହଜାଇ ଟଙ୍କା ହରିଲୁଟ୍ କରାଯାଉଥିବା କହି ମନରେଗା ଦୁର୍ନୀତିର ଗୁମର ଖୋଲିଦେଇଛନ୍ତି ଗ୍ରାମ ସଂଯୋଜକ । ତେବେ ଏ ନେଇ କପ୍ତିପଦା ବିଡ଼ିଓ ଓ ପିସି ନେଇଥିବା ପିଇଓଙ୍କ ପ୍ରତିକ୍ରିୟା ମିଳିପାରିନାହିଁ ।
ଓଡ଼ିଶାରେ ଲୁଚିଛି ମାଫିଆ ଅତିକ୍ ଅହମ୍ମଦର ପତ୍ନୀ ସାଇସ୍ତା ପରବିନ୍ ?
ନନ୍ଦିଘୋଷ ବ୍ୟୁରୋ: ମିଳିଯାଇଛି ମାଫିଆ ଅତିକ୍ ଅହମ୍ମଦର ପତ୍ନୀ ସାଇସ୍ତା ପରବିନଙ୍କ ଠିକଣା । କିଛି ସମୟ ପୂର୍ବରୁ ସେ ଓଡିଶାରେ ଲୁଚିଥିବା ସୂଚନା ମିଳିଥିଲା ।ଏଥିରେ ତାଙ୍କୁ ଗୁଡୁ ମୁସଲିମ ଏବଂ ଅନ୍ୟ ସହଯୋଗୀ ମାନେ ସାହାଯ୍ୟ କରୁଥିଲେ । ମାଫିଆ ଅତିକର ସ୍ତ୍ରୀ ସାଇସ୍ତା ପରବିନ ଓଡିଶାରେ ଲୁଚିଥିବାର ସୂଚନା ପାଇବା ପରେ ଏସଟିଏଫ ତୁରନ୍ତ ଓଡିଶା ପୋଲିସକୁ ଏହି ବିଷୟ ନେଇ ସତର୍କ କରାଇଥିଲେ । ତଥାପି ହାତରୁ ଖସିଯାଇଥିଲା ସାଇସ୍ତା । ପୋଲିସ ସାଇସ୍ତାକୁ ଗିରଫ କରିପାରିନଥିଲା । କିନ୍ତୁ ସେ ରହୁଥିବା ସ୍ଥାନରୁ ବହୁ ଗୁରୁତ୍ବପୂର୍ଣ୍ଣ ତଥ୍ୟକୁ ଖୋଜି ବାହାର କରିଥିଲା।
ମିଡିଆ ରିପୋର୍ଟ ଅନୁଯାୟୀ ଓଡିଶାକୁ ଛାଡି ଅନ୍ୟ ରାଜ୍ୟଗୁଡିକରେ ମଧ୍ୟ ସାଇସ୍ତା, ଜୈନବ, ଗୁଡୁ ମୁସଲିମ, ଶବିର ଏବଂ ଅରମାନଙ୍କର ସନ୍ଧାନ ଦ୍ରୁତ ଗତିରେ ଚାଲିଛି । ଏହା ସହିତ ୟୁପି ପୋଲିସ ସାଇସ୍ତାକୁ ନେଇ ଅନେକ ପ୍ରଶ୍ନର ଉତ୍ତର ଖୋଜିବାରେ ଲାଗିପଡିଛନ୍ତି । ଯଦି ସାଇସ୍ତା ଦେଶ ବାହାରକୁ ଯାଇଛନ୍ତି ତାହେଲେ କେଉଁ ନାଁରେ ତାଙ୍କର ପାସପୋର୍ଟ ଥିଲା ଏମିତି ଅନେକ କିଛି ।
ଗତ ବର୍ଷ ଉମେଶ ପାଲ ହତ୍ୟା ମାମଲାରେ ଗୁଡୁ ମୁସଲିମ ଏବଂ ତାଙ୍କ ସହଯୋଗୀଙ୍କ ନେଟୱାର୍କ ଏସଟିଏଫ ଏବଂ ୟୁପି ପୋଲିସ ପାଇଁ ଏକ ଚ୍ୟାଲେଞ୍ଜ ପାଲଟିଛି। ଉମେଶ ପାଲ ହତ୍ୟା ମାମଲାର ମୁଖ୍ୟ ସୁଟର ଗୁଡୁ ମୁସଲିମ, ଅରମାନ ଏବଂ ଶବୀରଙ୍କୁ ଧରାପକାଇଲେ ପ୍ରତ୍ୟେକଙ୍କୁ ୫ଲକ୍ଷ ଟଙ୍କା ପୁରସ୍କାର ଦିଆଯିବ ବୋଲି ମଧ୍ୟ ଘୋଷଣା କରାଯାଇଛି। ଗୁଡୁ ମୁସଲିମଙ୍କୁ ଗିରଫ କରିବା ପାଇଁ ୟୁପି ପୋଲିସ ଏବଂ ଏସଟିଏଫ ମୋଟ ୧୪ ଟି ରାଜ୍ୟ ଉପରେ ଚଢାଉ କରିଛନ୍ତି। ଗତ କିଛି ଦିନ ତଳେ ସାଇସ୍ତା ଏବଂ ଗୁଡୁ ମୁସଲିମ ଗିରଫ ହେବାର ଖବର ସୋସିଆଲ ମିଡିଆରେ ଭାଇରାଲ ହୋଇଥିଲା।
ଲିଙ୍ଗରାଜ ମନ୍ଦିର ସୁପରଭାଇଜରଙ୍କୁ କାରଣ ଦର୍ଶାଅ ନୋଟିସ !
ଭୁବନେଶ୍ବର: ଲିଙ୍ଗରାଜ ମନ୍ଦିରରେ ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀଙ୍କ ଭିଡିଓ ଭାଇରାଲ ଘଟଣା । ବିବାଦ ପରେ ଆକ୍ସନ ମୋଡକୁ ଆସିଛି ଲିଙ୍ଗରାଜ ମନ୍ଦିର ପ୍ରଶାସନ । ସଂପୃକ୍ତ ସେବାୟତ ତଥା ସୁପରଭାଇଜର ରାଜକିଶୋର ମହାପାତ୍ରଙ୍କୁ କାରଣ ଦର୍ଶାଅ ନୋଟିସ ଜାରି ହେବ ବୋଲି କହିଛନ୍ତି ମନ୍ଦିର ପରିଚାଳନା ନିର୍ବାହୀ ଅଧିକାରୀ ରୁଦ୍ରନାରାୟଣ ମହାନ୍ତି । ୭ ଦିନ ମଧ୍ୟରେ ଉତ୍ତର ରଖିବାକୁ ନୋଟିସ ଜାରି ହେବ । ଉତ୍ତର ମିଳିବା ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।
ସେବାୟତ ସୁପରଭାଇଜର ରାଜକିଶୋର ମହାପାତ୍ର ଶିଳ୍ପାଙ୍କ ସହ ଭିଡିଓରେ ରହିଛନ୍ତି । ଟ୍ରଷ୍ଟବୋର୍ଡ ବୈଠକରେ ଏନେଇ ଆଲୋଚନା ହେବ ବୋଲି କହିଛନ୍ତି ମନ୍ଦିର ପରିଚାଳନା ଅଧିକାରୀ ରୂଦ୍ରନାରାୟଣ ମହାନ୍ତି । ଅନ୍ଯପଟେ ଏଣିକି ସିଂହଦ୍ବାର ନିକଟରେ କଡା ଚେକିଂ କରାଯିବ । ଭିତରକୁ ଆଣ୍ଡ୍ରଏଡ୍ ଫୋନ ନ ନେବା ପାଇଁ ଚେକିଂ କଡ଼ାକଡି ହେବ । ସେବାୟତମାନେ ଭିତରକୁ ଆଣ୍ଡ୍ରଏଡ୍ ଫୋନ ନ ନେବା ପାଇଁ ପ୍ରସ୍ତାବ ଦିଆଯିବ ବୋଲି କହିଛନ୍ତି ନିର୍ବାହୀ ଅଧିକାରୀ ରୁଦ୍ରନାରାୟଣ ମହାନ୍ତି । ଗତକାଲି ଲିଙ୍ଗରାଜ ମନ୍ଦିରରେ ଫଟୋ ଉଠାଇ ବିବାଦକୁ ଆସିଥିଲେ ବଲିଉଡ ଅଭିନେତ୍ରୀ ଶିଳ୍ପା ସେଟ୍ଟୀ ।
ସୋମବାର ଭୁବନେଶ୍ୱରରେ ଏକ କାର୍ଯ୍ୟକ୍ରମରେ ଯୋଗଦେବାକୁ ଆସିଥିବା ଶିଳ୍ପା ଲିଙ୍ଗରାଜ ମନ୍ଦିର ବେଢ଼ା ଭିତରେ ଉଠାଇଥିବା ଫଟୋ ସୋସିଆଲ ମିଡିଆରେ ଭାଇରାଲ ହେଉଛି । ଲିଙ୍ଗରାଜ ମନ୍ଦିରକୁ ମୋବାଇଲ ବାରଣ କରାଯାଇଥିବା ବେଳେ ବଲିଉଡ ଷ୍ଟାର କିଭଳି ବେଢ଼ା ଭିତରକୁ ମୋବାଇଲ ନେଲେ ଆଉ ଫଟୋ ଉଠାଇଲେ ସେନେଇ ବିବାଦ ଉଠିଛି । ଲିଙ୍ଗରାଜ ମନ୍ଦିର ଭିତରକୁ ଯିବା ବେଳେ ତାଙ୍କର ଯାଞ୍ଚ ହୋଇଥିଲା କି ନାହିଁ ? ନା ସେଲିବ୍ରିଟିଙ୍କ ପାଇଁ ଅଲଗା ନିୟମ ? ଶିଳ୍ପାଙ୍କ ସହ ସେବାୟତ ରହି ଫଟୋ ଉଠାଇବାକୁ କିଏ ପ୍ରଶ୍ରୟ ଦେଲା ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଲିଙ୍ଗରାଜ ମନ୍ଦିରରେ ବାରମ୍ବାର ଏଭଳି ଆଇନର ଉଲ୍ଲଙ୍ଘନ ହେଉଥିବା ବେଳେ ପ୍ରଶାସନ ନିରବଦ୍ରଷ୍ଟା ସାଜିଛି ବୋଲି ଅଭିଯୋଗ ହେଉଛି।