ଭୁବନେଶ୍ବର: ନବୀନଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ଯମ କରୁଛି ବିଜେପି ସରକାର । ଏଥିପାଇଁ ନବୀନଙ୍କ ସୁରକ୍ଷା ବ୍ଯବସ୍ଥାକୁ କମାଇ ଦିଆଯାଇଥିବା ନେଇ ସଙ୍ଗୀନ ଅଭିଯୋଗ କରିଛି ବିଜେଡି । ବିଜେଡି ମୁଖପାତ୍ର ଅମର ପଟ୍ଟନାୟକ କହିଛନ୍ତି, ନବୀନ କେବଳ ବିରୋଧୀ ଦଳ ନେତା ନୁହଁନ୍ତି, ସେ ୨୪ ବର୍ଷ ଧରି ଓଡ଼ିଶାର ମୁଖ୍ଯମନ୍ତ୍ରୀ ରହିଥିଲେ । ଦେଶର ଦ୍ବିତୀୟ ସର୍ବାଧିକ ସମୟ ମୁଖ୍ଯମନ୍ତ୍ରୀ ଦାୟିତ୍ବ ତୁଲାଇଥିବା ନେତା ହେଉଛନ୍ତି ନବୀନ । ଓଡ଼ିଶାବାସୀ ତାଙ୍କୁ ସବୁବେଳେ ଭଲ ପାଉଛନ୍ତି ଆଉ ଆଗକୁ ମଧ୍ଯ ପାଇବେ । ବିକାଶମୂଳକ କାମ ପାଇଁ ନବୀନଙ୍କୁ ଓଡ଼ିଶାବାସୀ ହୃଦୟରେ ବସାଇଛନ୍ତି । ହେଲେ ବିଜେପି ସରକାର ନବୀନଙ୍କ ସୁରକ୍ଷା କମାଇ ଦେବା ସହ ତାଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ୟମ କରୁଛି । ସୁରକ୍ଷା ହଟାଇବା ଆଇନତଃ ରାଜ୍ୟ ସରକାରଙ୍କ କ୍ଷମତା ପରିସରଭୁକ୍ତ । କିନ୍ତୁ ନବୀନଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ୟମ କଲେ ରାଜ୍ୟବାସୀ କେବେ ବି କ୍ଷମା ଦେବେନାହିଁ ବୋଲି ଅମର କହିଛନ୍ତି ।
ଦୁଇ ପ୍ରେମିକା ସହ ମିଶି ସ୍ତ୍ରୀକୁ ହତ୍ୟା ଘଟଣା, ରିମାଣ୍ଡରେ ଯିବ ଜହ୍ଲାଦ ସ୍ବାମୀ
ଭୁବନେଶ୍ବର: ରାଜଧାନୀ ଭୁବନେଶ୍ବରରେ ଦୁଇ ପ୍ରେମିକା ସହ ମିଶି ସ୍ତ୍ରୀଙ୍କୁ ଆନାସ୍ଥେସିଆ ଦେଇ ହତ୍ୟା ଘଟଣା । ରିମାଣ୍ଡରେ ଆସିବ ଜହ୍ଲାଦ ସ୍ୱାମୀ ପ୍ରଦ୍ୟୁମ୍ନ । ୩ ଦିନିଆ ରିମାଣ୍ଡ ପାଇଁ କୋର୍ଟରେ ଆବେଦନ କରିଛି କମିଶନରେଟ ପୋଲିସ୍ । ରିମାଣ୍ଡ ବେଳେ ଅଭିଯୁକ୍ତକୁ ନେଇ ହତ୍ୟା କରାଯାଇଥିବା ଘରେ କ୍ରାଇମସିନ ରିକ୍ରିଏସନ କରିବ ପୋଲିସ । ସେପଟେ ହତ୍ୟାରେ ବ୍ୟବହୃତ ସିରିଞ୍ଜ ଓ ଆନାସ୍ଥେସିଆ ମେଡିସିନ ଯାଞ୍ଚ ପାଇଁ ରାଜ୍ୟ ଫରେନସିକ ଲ୍ୟବକୁ ପଠାଯାଇଛି ।
ଡେମୋ ଦେଖାଇବ ପତ୍ନୀହନ୍ତା ସ୍ବାମୀ । ସାଁପୁର ଘରେ କେମିତି ଦେଇଥିଲା ଇଞ୍ଜେକସନ୍ । କ’ଣ ଥିଲା ୨୮ ତାରିଖ ଅପରାହ୍ନ ୨ ଟାର ଘଟଣା । ସିସିଟିଭରେ ରହିଛି ନାଟକର ମୁଖ୍ୟ ଅଂଶ । ଅଭିଯୁକ୍ତ ରୋଜିପାତ୍ର ରୁମକୁ କିଏ କିଏ ଆସିଥିଲେ । ରାଜଧାନୀରେ ଦୁଇ ପ୍ରେମିକା ସହ ମିଶି ସ୍ତ୍ରୀଙ୍କୁ ଇଞ୍ଜେକ୍ସନ ଦେଇ ହତ୍ୟା କରିବା ଘଟଣାରେ ରିମାଣ୍ଡରେ ଆସିବ ସ୍ୱାମୀ ପ୍ରଦ୍ୟୁମ୍ନ । ୩ ଦିନିଆ ରିମାଣ୍ଡ ପାଇଁ କୋର୍ଟରେ ଆବେଦନ କରିଛି କମିଶନରେଟ୍ ପୋଲିସ । ରିମାଣ୍ଡ ବେଳେ ଅଭିଯୁକ୍ତ ପ୍ରଦ୍ୟୁମ୍ନକୁ ନେଇ ହତ୍ୟା କରାଯାଇଥିବା ଘରେ କ୍ରାଇମସିନ ରିକ୍ରିଏସନ କରିବା ସହ ଆନେସ୍ଥେସିଆ ଇଞ୍ଜେକସନ୍ କେଉଁଠୁ ଆଣିଥିଲେ ସେ ନେଇ ଖୋଳତାଡ ହେବ ।
ହତ୍ୟାରେ ବ୍ୟବହୃତ ସିରିଞ୍ଜ ଓ ଅନାସ୍ଥେସିଆ ମେଡିସିନିକୁ ରାଜ୍ୟ ଫରେନସିକ ଲ୍ୟାବ୍କୁ ପଠାଇଛି ତଦନ୍ତକାରୀ ଟିମ୍ । ସିରିଞ୍ଜରେ କେତେ ଜଣଙ୍କର ଫିଙ୍ଗର ପ୍ରିଣ୍ଟ ରହିଛି ଓ ଆନାସ୍ଥେସିଆ ମେଡିସିନରେ ଆଉ କିଛି ବିଷ ମିଶା ଯାଇଥିଲା କି ନାହିଁ, ସେ ସବୁର ତଥ୍ୟ ମିଳିବ । ସେପଟେ ଆନେସ୍ଥେସିଆ ନେଇ ବରିଷ୍ଠ ଡାକ୍ତର ସୂର୍ଯ୍ୟପ୍ରକାଶ ଚୌଧୁରୀ କହିଛନ୍ତି, ଅପରେସନ ସମୟରେ ରୋଗୀମାନଙ୍କୁ ବିଭିନ୍ନ ପ୍ରକାର ଆନେସ୍ଥେସିଆ ଦିଆଯାଏ । ସାଧାରଣ ରୋଗୀକୁ କିଲୋଗ୍ରାମ ପିଛା ୧ ଦଶମିକ ୫ ମିଲିଗ୍ରାମ୍ ଡୋଜ ଦିଆଯାଏ । ସର୍ବାଧିକ ୧୫୦ ମିଲିଗ୍ରାମ୍ ଆନେସ୍ଥେସିଆ ଦେଲେ ରୋଗୀ ସହ୍ୟ କରିପାରିବ । ତଥାପି କିଛି କେସରେ ରୋଗୀମାନଙ୍କୁ ହାର୍ଟଟାଟାକ୍, ବିପି ହାଇ ଭଳି ସମସ୍ୟା ଦେଖାଯାଏ । କିନ୍ତୁ ଏହି ନିର୍ଦ୍ଦିଷ୍ଟ ମାମଲାରେ ହୁଏତ ଆନେସ୍ଥେସିଆ ସହ ଅନ୍ୟ କିଛି ମାରାତ୍ମକ ଡ୍ରଗ୍ସ ମିଶିଥିବା ଆଶଙ୍କା କରାଯାଉଛି । ଏପରିକି ୧୫୦ ମିଲିଗ୍ରାମରୁ ଅଧିକ ଡୋଜର ଆନେସ୍ଥେସିଆ ଦେଲେ ଜଣେ ମାତ୍ର ୫ ମିନିଟ ବଞ୍ଚିପାରିବ ।
ଗତ ୨୮ ତାରିଖ ଦିନ ପତ୍ନୀ ଶୁଭଶ୍ରୀଙ୍କୁ ଇଞ୍ଜେକ୍ସନ ଦେଇ ହତ୍ୟା କରିଥିଲା ସ୍ୱାମୀ ପ୍ରଦ୍ୟୁମ୍ନ । ହତ୍ୟା ପାଇଁ ସହଯୋଗ କରିଥିଲେ ତାଙ୍କ ଦୁଇ ପ୍ରେମିକା ରୋଜି ଏବଂ ଏଜିତା । ଶୁଭଶ୍ରୀଙ୍କ ମୃତ୍ୟୁ ପରେ ଆତ୍ମହତ୍ୟା ରୂପ ଦେବାକୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ । ପରେ ପୋଲିସ ହତ୍ୟାକାଣ୍ଡ ଉପରୁ ପରଦା ହଟାଇବା ସହ ୩ ଜଣଙ୍କୁ ଗିରଫ କରିଛି ପୋଲିସ ।
ଚାଷୀଙ୍କୁ ବିଜେପି ସରକାରର ଧୋକା, ଭୁଆଁ ବୁଲାବାକୁ କରୁଛନ୍ତି ଚେଷ୍ଟା
ଭୁବନେଶ୍ବର: ସମସ୍ତଙ୍କ ମୁହଁରେ ଆହାର ଦେଉଥିବା ଚାଷୀଙ୍କୁ ବିଜେପି ସରକାରର ଧୋକା । କ୍ଵିଣ୍ଟାଲ ପିଛା ୩୧ ଶହ ଟଙ୍କାରେ ଧାନ କିଣିବାର ଲୋଭ ଦେଖାଇ ଭୋଟ ହାତେଇଛି ବିଜେପି । ଧାନର ସର୍ବନିମ୍ନ ସହାୟକ ମୂଲ୍ୟ କ୍ଵିଣ୍ଟାଲ ପିଛା ୨୩୦୦ ଟଙ୍କା ହୋଇଥିବା ବେଳେ ରାଜ୍ୟ ସରକାର ୩୧ ଶହ ଟଙ୍କା ଦେବ କେମିତି । ବୋନସ ଆକାରରେ ବାକି ୮ ଶହ ଟଙ୍କା ଦେବା କଥା କୁହାଯାଉଛି । କିନ୍ତୁ କେନ୍ଦ୍ର ଏଥିପାଇଁ ଅନୁମତି ଦେବ କି ବୋଲି ଉଠିଛି ପ୍ରଶ୍ନ । କାରଣ ଏମଏସପି ଉପରେ ବୋନସ ଦେବାକୁ ବାରଣ କରୁଛି କେନ୍ଦ୍ର । ତା’ହେଲେ ରାଜ୍ୟ ସରକାର କେମିତି ଦେବ ୩୧ ଶହ ଟଙ୍କା । ଚାଷୀଙ୍କୁ ଏହା ଧୋକା ବୋଲି ଅଭିଯୋଗ ହୋଇଛି ।
ରାଜ୍ୟର ଚାଷୀଙ୍କୁ ଭୁଆଁ ବୁଲାବାକୁ ଚେଷ୍ଟା କରୁଛନ୍ତି କି ରାଜ୍ୟ ସରକାର । ଧାନ କିଣ୍ଟାଲ ପିଛା ୩୧ ଶହ ଟଙ୍କାରେ କିଣିବୁ କହି ବିଜେପି ଚାଷୀଙ୍କ ଭୋଟ ତ ନେଲା । ହେଲେ ଏବେ ୩୧ ଶହ ଟଙ୍କା କିଏ ଦେବ ଓ କେମିତି ଦେବ ? କେନ୍ଦ୍ର ସରକାର ଧାନର ସର୍ବନିମ୍ନ ସହାୟକ ମୂଲ୍ୟ ୨୩ ଶହ ଟଙ୍କା ସ୍ଥିର କରିଛନ୍ତି । ବାକି ୮ ଶହ କିଏ ଦେବ, ରାଜ୍ୟ ସରକାର ନା କେନ୍ଦ୍ର ସରକାର । ଯେହେତୁ ସର୍ବନିମ୍ନ ସହାୟକ ମୂଲ୍ୟ କେନ୍ଦ୍ର ସରକାର ସ୍ଥିର କରନ୍ତି, ରାଜ୍ୟ ସରକାର ତାକୁ ନିଜେ ବୃଦ୍ଧି କରିପାରିବେ ନାହିଁ କିମ୍ଵା ନିଜେ ବର୍ଦ୍ଧିତ ମୂଲ୍ୟ ଦେଇପାରିବେ ନାହିଁ । କେନ୍ଦ୍ର ସରକାର ବି ତ ଏମଏସପି ବୃଦ୍ଧି କରି ନାହାନ୍ତି । ତେବେ ଓଡ଼ିଶାର ଚାଷୀ କେମିତି ପାଇବ ୩୧ ଶହ ଟଙ୍କା ।
କୁହାଯାଉଛି, ରାଜ୍ୟ ସରକାର ବୋନସ୍ ଭାବେ ବାକି ୮ ଶହ ଟଙ୍କା ଦେବେ । କିନ୍ତୁ ଏଥିପାଇଁ କେନ୍ଦ୍ର ସରକାର ଅନୁମତି ଦେବେ କି ବୋଲି ପ୍ରଶ୍ନ କରିଛନ୍ତି ବରିଷ୍ଠ ବିଜେଡି ବିଧାୟକ ପ୍ରସନ୍ନ ଆଚାର୍ଯ୍ୟ । ତାଙ୍କ କହିବା ଅନୁସାରେ ଏମଏସପି ଉପରେ ବୋନସ୍ ଦେବାକୁ ଆଗରୁ ହିଁ ବାରଣ କରିଆସୁଛନ୍ତି କେନ୍ଦ୍ର ସରକାର । ଏବେ ରାଜ୍ୟର ବିଜେପି ସରକାର କେମିତି ବୋନସ ଦେବ । ବରଂ ଚାଷୀଙ୍କୁ ଭୁଆଁ ନ ବୁଲାଇ କେନ୍ଦ୍ର ସରକାର ସ୍ଵାମୀନାଥନ କମିଟି ରିପୋର୍ଟ ଲାଗୁ କରନ୍ତୁ, ଧାନର ଏମଏସପି ବୃଦ୍ଧି କରନ୍ତୁ ବୋଲି ଦାବି କରିଛନ୍ତି ପ୍ରସନ୍ନ ଆଚାର୍ଯ୍ୟ । ଏଥିପାଇଁ ରାଜ୍ୟର ବିଜେପି ସରକାର କେନ୍ଦ୍ର ନିକଟରେ ଦାବି କରନ୍ତୁ ବୋଲି ସେ କହିଛନ୍ତି ।
ଏମଏସପି ଉପରେ ବୋନସ୍ ଦେବାକୁ କେନ୍ଦ୍ର ବାରଣ କରିଥିବାରୁ ୨୦୧୩-୧୪ରେ ନବୀନ ସରକାର ସ୍ଵତନ୍ତ୍ର ମରୁଡ଼ି ସହାୟତା ଭାବେ କ୍ଵିଣ୍ଟାଲ ପିଛା ଶହେ ଟଙ୍କା ଲେଖାଏଁ ଦେବାକୁ ନିଷ୍ପତ୍ତି ନେଇଥିଲେ । ୨୦୧୫ ସୋହେଲା ସମାବେଶରେ ଏହା ଘୋଷଣା କରିଥିଲେ ସେତେବେଳର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଶହେ କ୍ଵିଣ୍ଟାଲରୁ କମ୍ ଧାନ ବିକିଥିବା ଚାଷୀଙ୍କୁ ଏହି ସହାୟତା ମିଳିଥିଲା । ନିଜ ପ୍ରତିଶ୍ରୁତି ଅକ୍ଷରେ ଅକ୍ଷରେ ପାଳନ କରିଥିଲେ ନବୀନ ପଟ୍ଟନାୟକ । କେବଳ ବରଗଡ଼ ଜିଲ୍ଲାରେ ୪୫୫ କୋଟି ଟଙ୍କା ଚାଷୀଙ୍କୁ ଏହି ସ୍ଵତନ୍ତ୍ର ମରୁଡ଼ି ସହାୟତା ଦିଆଯାଇଥିଲା । ହଜାର ହଜାର ଚାଷୀ ଏହା ପାଇଛନ୍ତି । ଚାଷୀମାନେ ଓ ଯୋଗାଣ ଅଧିକାରୀ ବି ଏହା ସ୍ଵୀକାର କରିଛନ୍ତି ।
ଆଉ କିଛି ଦିନ ପରେ ଅମଳ ହେବ ଖରିଫ ଧାନ । ତା’ ପରେ ପରେ ଧାନ କିଣା ବି ଆରମ୍ଭ ହୋଇଯିବ । ସେତେବେଳେ ସତରେ ଚାଷୀଙ୍କୁ ଧାନ କ୍ଵିଣ୍ଟାଲ ପିଛା ୩୧ ଶହ ଟଙ୍କା ମିଳିବ ତ । ନା ଭୋଟ ହାତେଇବା ପରେ କିଛି ନା କିଛି ତଞ୍ଚକତା କରି ଚାଷୀଙ୍କୁ ଭୁଆଁ ବୁଲେଇ ଦେବ ରାଜ୍ୟର ବିଜେପି ସରକାର ।
ହେବନି ଅଧିକ ଶୀତ, ଦିଲ୍ଲୀ ଦଶା ଭୋଗିବ ଓଡ଼ିଶା !
ଭୁବନେଶ୍ବର: ବର୍ଷା, ବାତ୍ଯା ସତ୍ତ୍ବେ ଶୀତ ଆସିବନି । ଲା-ନିନା ଆସିବାରେ ବିଳମ୍ବ ଯୋଗୁଁ ଏବର୍ଷ ଓଡ଼ିଶାରେ ଶୀତ କମ୍ ହେବ । ନଭେମ୍ବର, ଡିସେମ୍ବର ଓ ଜାନୁଆରୀ ମାସରେ ତାପମାତ୍ରାରେ ହ୍ରାସ ହେବନି । ହିମାଳୟ ପଟୁ ଓଡ଼ିଶାକୁ କମ ପବନ ବହିବ । ଏପରି ପୂର୍ବାନୁମାନ କରିଛନ୍ତି ପାଣିପାଗ ବିଜ୍ଞାନୀ । ସେପଟେ ଭାରତୀୟ ପାଣିପାଗ ରିପୋର୍ଟ ଅନୁସାରେ ୧୯୫୧ ପରେ ଚଳିତବର୍ଷ ଅକ୍ଟୋବରରେ ଦିଲ୍ଲୀ ସବୁଠୁ ଉତ୍ତପ୍ତ ସହର ସାବ୍ଯସ୍ତ ହୋଇଛି । ଧୀରେ ଧୀରେ ଦିଲ୍ଲୀ ଦଶା ଓଡ଼ିଶା ଭୋଗି ପାରେ ବୋଲି ଆଶଙ୍କା ପ୍ରକାଶ ପାଇଛି ।
ଶୀତରେ ଥରିବ ମଧ୍ୟ ଭାରତ, ହେଲେ ଓଡ଼ିଶାରେ ହେବନି ଶୀତ । ନଭେମ୍ବର, ଡିସେମ୍ବର ଓ ଜାନୁଆରୀରେ ଓଡ଼ିଶାରେ ତାପମାତ୍ରା ସ୍ବାଭାବିକ ଠାରୁ ଅଧିକ ରହିବ । ଫଳରେ ଏହି ସମୟରେ ଶୀତର ପ୍ରକୋପ କମ୍ ଅନୁଭୁତ ହେବ । ଏପରି ପୂର୍ବାନୁମାନ କରିଛନ୍ତି ବିଶିଷ୍ଟ ପାଣିପାଗ ବିଜ୍ଞାନୀ ସୁରେନ୍ଦ୍ର ନାଥ ପଶୁପାଳକ । ଘନ ଘନ ଲଘୁଚାପ ହେଲା, ବାତ୍ୟା ଯୋଗୁଁ ବର୍ଷିଲା । ଆଶା ଥିଲା ଭଲ ଶୀତ ହେବ । କିନ୍ତୁ ରାଜ୍ୟରେ ସେଭଳି କିଛି ଥଣ୍ଡା ଅନୁଭୁତ ହେବନି ।
ଶୀତ ନହେବାର ୩ଟି କାରଣ
୩ଟି କାରଣ ଯୋଗୁଁ ଓଡ଼ିଶାରେ ଶୀତର ପ୍ରକୋପ ଚଳିତବର୍ଷ ଦେଖିବାକୁ ମିଳିବନି । ସାଧାରଣତଃ ଜୁଲାଇ ପରେ ଲା-ନିନା ଆସିଥାଏ । କିନ୍ତୁ ଅଗଷ୍ଟ, ସେପ୍ଟେମ୍ବର ଓ ଅକ୍ଟୋବର ପରେ ବି ଲା-ନିନା ଆସିନାହିଁ । ଆଶା କରାଯାଉଛି ନଭେମ୍ବରରେ ଆସିପାରେ କିନ୍ତୁ ଶକ୍ତିଶାଳୀ ରହିବନି । ଏହାସହିତ ବହୁତ କମ୍ ସମୟ ପାଇଁ ଓଡ଼ିଶାରେ ରହିବ । ଡିସେମ୍ବର ଓ ଜାନୁଆରୀରେ ବର୍ଷା ହେବା ସମ୍ଭାବନା ରହିଛି । ଫେବ୍ରୁଆରୀ ବେଳକୁ କିଛିଟା ଶୀତ ଅନୁଭୁତ ହେବ । ଏହାସହ ହିମାଳୟ ପଟୁ ଆସୁଥିବା ବାଣିଜ୍ଯିକ ବାୟୁ ବା ଟ୍ରେଡ୍ ଓ୍ବିଣ୍ଡ୍ ପ୍ରବାହିତ ହେବ ଆଶା କମ୍ । ଯାହାଯୋଗୁଁ ତାପମାତ୍ରା କମିବା ପରିବର୍ତ୍ତେ ଜଳବାୟୁ ପରିବର୍ତ୍ତନ ପ୍ରଭାବ ଯୋଗୁଁ ଥଣ୍ଡା କମ୍ ହେବା ନେଇ ଆକଳନ କରାଯାଇଛି ।
ଦିଲ୍ଲୀ ଦଶା ଭୋଗିବ ଓଡ଼ିଶା
ସେପଟେ ଭାରତୀୟ ପାଣିପାଗ ବିଭାଗ ରିପୋର୍ଟ କହୁଛି, ୧୯୫୧ ପରେ ଚଳିତ ଅକ୍ଟୋବରରେ ଦିଲ୍ଲୀ ସବୁଠୁ ଉତ୍ତପ୍ତ ସହର ଭାବେ ଚିହ୍ନଟ ହୋଇଛି । ଏଥର ଓଡ଼ିଶାରେ ମଧ୍ଯ ଅକ୍ଟୋବରରେ ନାହିଁ ନଥିବା ତାତି ଜୀବନକୁ ଅସ୍ତବ୍ଯସ୍ତ କରିଛି । ଦିଲ୍ଲୀ ଦଶା ଓଡ଼ିଶା ଭୋଗିବାକୁ ଯାଉଛି । ଓଡିଶା ଆକାଶରେ ଦିନକୁ ଦିନ ବଢୁଛି ସବୁଜ ଗୃହ ବାଷ୍ପ ପରିମାଣ । ଯାହାଯୋଗୁଁ ଭୂପୃଷ୍ଠର ତାପମାତ୍ରା ନିୟମିତ ଅନ୍ତରରେ ବାୟୁମଣ୍ଡଳକୁ ବିକିରଣ ହେଉନାହିଁ । କଳକାରଖାନା ପ୍ରଦୂଷଣ, ଜୀବାଶ୍ମ ଇନ୍ଧନରେ ଗାଡ଼ି ଚଳାଚଳ ସଂଖ୍ୟା ବଢୁଥିବାରୁ ଏହାର ପ୍ରଭାବ ସମଗ୍ର ଅଞ୍ଚଳରେ ପଡ଼ିବାକୁ ଯାଉଛି । ରାଜଧାନୀ ଭୁବନେଶ୍ବରେ ରାସ୍ତାଘାଟ ସବୁ ଆଡେ କଂକ୍ରିଟ ହେବା ଯୋଗୁଁ ବର୍ଷା ହେଲେ ବି ଭୂତଳକୁ ପାଣି ଯାଉନି । ଏପରିକି ରାସ୍ତା ପାର୍ଶ୍ବରେ ଫେବର ବ୍ଲକ୍ ପଡ଼ିଥିବାରୁ ପାଣି ମାଟି ଭିତରକୁ ପର୍ଯ୍ୟାପ୍ତ ପରିମାଣରେ ଯାଇପାରୁନି । ଏହା ଅତ୍ୟନ୍ତ ବିପଜ୍ଜନକ । ଏଥର ଖାଲି ଓଡ଼ିଶାରେ ଶୀତ କମ୍ ହେବନି ଆନ୍ଧ୍ରପ୍ରଦେଶ, ତାମିଲନାଡୁ ସମେତ ଦକ୍ଷିଣ ଭାରତ ଉପକୂଳ ରାଜ୍ୟଗୁଡ଼ିକ ମଧ୍ୟ ସମାନ ଦଶା ଭୋଗିପାରନ୍ତି ।
ଏଣିକି ଜଳବାୟୁ ପରିବର୍ତ୍ତନ ଯୋଗୁଁ ପ୍ରତିବର୍ଷ ଏକ୍ସଟ୍ରିମ୍ କ୍ଲାଇମେଟ୍ ଦେଖିବାକୁ ମିଳିବ । ପ୍ରତିବର୍ଷ ଅତିବୃଷ୍ଟି, ଅନାବୃଷ୍ଟି, ଘନ ଘନ ଅବପାତ, ବାତ୍ୟା ଦ୍ବାରା ନୂଆ ନୂଆ ଅସ୍ବାଭାବିକ ରେକର୍ଡ ସୃଷ୍ଟି ହେବ ବୋଲି ଆଶଙ୍କା ବ୍ୟକ୍ତ କରିଛନ୍ତି ବୈଜ୍ଞାନିକ ।
କେନ୍ଦ୍ରର ପୂଜା ଛାଟ: ୧୯ କେଜି ଗ୍ୟାସ ସିଲିଣ୍ଡର ଦର ଏକାଥରେ ବଢ଼ିଲା ୬୨ ଟଙ୍କା
ଭୁବନେଶ୍ବର: ପୂଜା ସିଜନରେ ଗ୍ରାହକଙ୍କୁ କୋରଡା ମାଡ । ଦରବୃଦ୍ଧି ସମସ୍ଯା ଭିତରେ ରୁନ୍ଧି ହେଉଥିବା ଲୋକଙ୍କ ଉପରେ କେନ୍ଦ୍ର ସରକାରଙ୍କ ଆଉ ଏକ ଛାଟ । ବଢାଇଲେ କମର୍ସିଆଲ ଗ୍ଯାସ ଦର । ୧୯ କେଜି ସିଲିଣ୍ଡରରେ ୬୨ ଟଙ୍କା ବଢାଇଛନ୍ତି ସରକାର । ସେହିପରି ଫ୍ରିଟ୍ରେଡ ୫ କେଜି ଗ୍ଯାସ ଦର ବି ବଢିଛି ୧୫ ଟଙ୍କା । ଏହାକୁ ନେଇ ସାଧାରଣ ଜନତାଙ୍କ ମଧ୍ଯରେ ପ୍ରକାଶ ପାଇଛି ତୀବ୍ର ପ୍ରତିକ୍ରିୟା ।
ଦୀପାବଳି ସରୁସରୁ ୧୯ କିଲୋ ବ୍ଯାବସାୟିକ ଗ୍ୟାସ ସିଲିଣ୍ଡର ଦର ୬୨ ଟଙ୍କା ବଢାଇଲେ କେନ୍ଦ୍ର ସରକାର । ସମସ୍ତ ଅତ୍ୟାବଶ୍ୟକ ସାମଗ୍ରୀର ଦର ପ୍ରତିଦିନ ବଢି ବଢି ଚାଲିଥିବା ବେଳେ ଏବେ କମର୍ସିଆଲ ଗ୍ୟାସ ଦର ବଢାଇଛନ୍ତି ସରକାର । ଗତ ସେପ୍ଟେମ୍ବର ୧ ରେ ଗ୍ଯାସ ଦର ବଢିଥିଲା ୩୯ ଟଙ୍କା । ସେହିପରି ୧ ଅକ୍ଟୋବରରେ ବଢିଥିଲା ୪୮ ଟଙ୍କା ୫୦ ପାଇସା । ଏହାକୁ ନେଇ ବଢିଛି ଅସନ୍ତୋଷ । ଛୋଟ ହୋଟେଲ, ବ୍ଯବସାୟୀ ଓ ରେଷ୍ଟୁରାଣ୍ଟ ଖାଦ୍ଯ ପ୍ରସ୍ତୁତ କରୁଥିବା ଏହାର ପ୍ରଭାବ ସିଧା ଲୋକଙ୍କ ଉପରେ ହିଁ ପଡିବ । ଏଥିସହ ୫ କିଲୋ ଫ୍ରିଟ୍ରେଡ଼ ଗ୍ୟାସ ଦର ମଧ୍ୟ ୧୫ ଟଙ୍କା ବୃଦ୍ଧି କରାଯାଇଛି । ସରକାରଙ୍କ ଏଭଳି ଆଭିମୁଖ୍ୟକୁ ସର୍ବ ଭାରତୀୟ ବ୍ୟବସାୟୀ ମହାସଂଘ ସମେତ ହୋଟେଲ, ରେଷ୍ଟୁରାଣ୍ଟ ବ୍ୟବସାୟୀ ସମାଲୋଚନା କରିଛନ୍ତି ।
ଗ୍ୟାସ ଦର ବୃଦ୍ଧିକୁ ନେଇ ରାଜ୍ୟ ଗ୍ୟାସ ଡିଲର ସଂଘ ଅସନ୍ତୋଷ ବ୍ୟକ୍ତ କରିଛି । ଏହାଦ୍ୱାରା ତୃଣମୂଳ ସ୍ତରର ଲୋକମାନେ ହିଁ ହଇରାଣ ହେବା ସହ କଳାବଜାରୀ ବଢିବ ବୋଲି ସଂଘ କହିଛି । କମର୍ସିଆଲ ଗ୍ୟାସ କିଣିବା କମିବ ବୋଲି ମଧ୍ୟ କୁହାଯାଇଛି । ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ସାଧାରଣ ଜନତା ଦାୟୀ କରିଛନ୍ତି । ସରକାର ଲୋକଙ୍କ ସହ ବିଶ୍ୱାସଘାତ କରିଛନ୍ତି ଯାହାକି ପରୋକ୍ଷରେ ସାଧାରଣ ଲୋକଙ୍କୁ ଲୁଟିବା ପାଇଁ ଏକ ବ୍ୟବସ୍ଥା ବୋଲି କହିଛି ନାଗରିକ ସୁରକ୍ଷା ମଞ୍ଚ । ଆଗାମୀ ଦିନରେ ଏହାର ତୀବ୍ର ବିରୋଧ କରାଯିବ । ଯେତେ ସରକାର ଓଡ଼ିଶାରେ ଆସିଛନ୍ତି ଏହା ସବୁଠୁ ଖରାପ ସରକାର ବୋଲି କହିଛି ମଞ୍ଚ । ଏବେ ଡବଲ ଇଞ୍ଜିନ ସରକାରରେ ଡବଲ ବିକାଶ ନା ଡବଲ ଦୁର୍ନୀତି ହେଉଛି ବୋଲି ପ୍ରଶ୍ନ କରିଛି ନାଗରିକ ସୁରକ୍ଷା ମଞ୍ଚ ।
ଦୁଇ ଦଶନ୍ଧି ପରେ ଫେରିଲା ଆମ୍ବ ଟାକୁଆ, ନେଲା ଦୁଇ ଜୀବନ; ଗରିବଙ୍କୁ ମନ୍ତ୍ରୀଙ୍କ ଉପହାସ
ଭୁବନେଶ୍ବର: ସ୍ତବ୍ଧ ଓଡ଼ିଶା । ଦୁଇ ଦଶନ୍ଧି ପରେ କନ୍ଧମାଳକୁ ଫେରିଲା ଆମ୍ବ ଟାକୁଆ କଳଙ୍କ । ଆମ୍ବ ଟାକୁଆ କୋଇଲି ଜାଉ ଖାଇ ୨ ମହିଳାଙ୍କର ମୃତ୍ଯୁ ହୋଇଥିବାବେଳେ ୬ ଜଣ ଜୀବନ ସହ ସଂଘର୍ଷ କରୁଛନ୍ତି । ବଡ଼କଥା ହେଲା ମୃତକଙ୍କ ପରିବାରକୁ ଗତ ୩ ମାସ ହେଲା ମିଳିନାହିଁ ଚାଉଳ । ଏନେଇ ଖୋଦ୍ ବ୍ଲକ ଚେୟାରମ୍ଯାନ ଅଭିଯୋଗ କରିଛନ୍ତି । ଘଟଣାକୁ ନେଇ ଚିନ୍ତା କରିବା ବଦଳରେ ଗରିବକୁ ଉପହାସ କରିଛନ୍ତି ସ୍ବାସ୍ଥ୍ଯମନ୍ତ୍ରୀ ମୁକେଶ ମହାଲିଙ୍ଗ । ଏପଟେ କେଉଁ ପରିସ୍ଥିତିରେ ସେମାନେ ଆମ୍ବ ଟାକୁଆ ଜାଉ ଖାଇଲେ ସେନେଇ ବିଭାଗୀୟ ତଦନ୍ତ ଜାରି ରହିଛି ।
ଲେଉଟିଲା ଭୋକ । ଫେରିଲା କଳଙ୍କ । କନ୍ଧମାଳକୁ ଆମ୍ବଟାକୁଆ କୋଇଲି ରିଟର୍ଣ୍ଣସ । କୋଇଲି ଜାଉ ନେଇଗଲା ଦୁଇ ଜୀବନ । ଦିନେ ଯେଉଁ ଭୋକର ଭୁଗୋଳ ପାଇଁ ଓଡ଼ିଶା ସାରା ବିଶ୍ବରେ ନିନ୍ଦିତ ହୋଇଥିଲା ଦୁଇ ଦଶନ୍ଧି ପରେ ସେଇ ଅପଦଶା କଡ଼ ଲେଉଟାଇଛି । ଏଥର ଓଡ଼ିଶାକୁ ଦୁର୍ନାମ ଆଣିଛି କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଳକର ମାଣ୍ଡିପଙ୍କା ଗାଁ । ଏହି ଗାଁରେ ଆମ୍ବ ଟାକୁଆ କୋଇଲି ଜାଉ ଖାଇ ଦୁଇ ମହିଳାଙ୍କ ମୃତ୍ଯୁ ହୋଇଥିବାବେଳେ ୬ ଗୁରୁତର ବ୍ରହ୍ମପୁର ଏମକେସିଜିରେ ଜୀବନ ପାଇଁ ସଂଘର୍ଷ କରୁଛନ୍ତି । ଦୁଇ ମୃତକ ହେଲେ ୩୦ ବର୍ଷୀୟା ଦିବ୍ଯାଙ୍ଗ ଯୁବତୀ ରୁନି ମାଝୀ ଓ ୨୮ ବର୍ଷୀୟା ରନିତା ପାଟମାଝୀ । ଗତ ୨୩ ତାରିଖରେ ୨୦ ପରିବାରର ୩୦ରୁ ଅଧିକ ଲୋକ ଜାଉ କରି ଖାଇଥିଲେ ଆମ୍ବ ଟାକୁଆ । ବଳିପଡ଼ିଥିବା ଟାକୁଆ କୋଇଲିରେ ପୁଣିଥରେ ୨୯ ତାରିଖରେ ଜାଉ କରି ଖାଇବା ପରେ ଏଭଳି ଦଶା ଘଟିଛି ।
ଏପଟେ ସମ୍ବେଦଳନଶୀଳ ଘଟଣାକୁ ଅତି ହାଲୁକା ଭାବେ ନେଇଛନ୍ତି ସ୍ବାସ୍ଥ୍ଯ ମନ୍ତ୍ରୀ ମୁକେଶ ମହାଲିଙ୍ଗ । ଘଟଣାକୁ ନେଇ ଚିନ୍ତା ପ୍ରକାଶ କରିବା ବଦଳରେ ତାତ୍ସଲ୍ଯ କରିବାକୁ ପଛାଇ ନାହାନ୍ତି । ଅନ୍ଯନ୍ତ ବେପରୁଆ ଭାବେ କହିଛନ୍ତି, କନ୍ଧମାଳରେ ଆମ୍ବ ଟାକୁଆ କୋଇଲି ଖାଇବା ସେମାନଙ୍କ ଅଭ୍ୟାସ ।
ଆମ୍ବ ଟାକୁଆ ଜାଉ ମୃତ୍ଯୁ ପ୍ରସଙ୍ଗ ଯେତିକି ଚିନ୍ତାଜନକ ତା’ଠୁ ଅଧିକ ଚିନ୍ତାଜନକ ଖୋଦ ସ୍ବାସ୍ଥ୍ଯମନ୍ତ୍ରୀଙ୍କ ଏଭଳି ବିତଣ୍ଡା ମନ୍ତବ୍ଯ । ସିଧାସଳଖ ଭାବେ ଉପାନ୍ତ ଅଞ୍ଚଳର ଗରିବଙ୍କୁ ଉପହାସ କରିଛନ୍ତି ମନ୍ତ୍ରୀ । ପ୍ରଶ୍ନ ଉଠୁଛି, ଲୋକେ ଆମ୍ବ ଟାକୁଆ ଖାଇ ମରୁଥିବା ବେଳେ ମନ୍ତ୍ରୀଙ୍କ ବେପରୁଆ ବୟାନ କେତେ ଯୁକ୍ତିଯୁକ୍ତ ? ଦୀର୍ଘ ବର୍ଷ ପରେ ଆମ୍ବ ଟାକୁଆ ଖାଇ ମୃତ୍ଯୁ ଅଭିଯୋଗ ଯୋଜନା ପ୍ରତି ପ୍ରଶ୍ନ ଉଠାଉନାହିଁ କି ? ଏପଟେ ଘଟଣାରେ ସଙ୍ଗୀନ ଅଭିଯୋଗ ଆଣିଛନ୍ତି ଖୋଦ୍ ଦାରିଙ୍ଗବାଡ଼ି ବ୍ଲକ ଅଧ୍ଯକ୍ଷ ସୁଶାନ୍ତ କୁମାର ପ୍ରଧାନ । ସୁଶାନ୍ତ କହିଛନ୍ତି, ମୃତକଙ୍କ ପରିବାରକୁ ୩ ମାସ ହେଲା ରାସନ ମିଳିନି । କନ୍ଧମାଳରେ ସବୁ ଜାଗାରେ ନେଟୱର୍କ ନଥିବାରୁ ଇ-କେୱାଇସି ହୋଇପାରୁନି । ଫଳରେ ହିତାଧିକାରୀ ଚାଉଳ ନପାଇ ହନ୍ତସନ୍ତ ହେଉଛନ୍ତି । ଯାହାକୁ ଖଣ୍ଡନ କରିଛନ୍ତି ଜିଲ୍ଲାପାଳ ।
ଘଟଣାର ବିଭାଗୀୟ ତଦନ୍ତ ଚାଲିଛି । ସ୍ବାସ୍ଥ୍ଯ ନିର୍ଦ୍ଦେଶକ ଓ ଜିଲ୍ଲା ମୁଖ୍ଯ ଚିକିତ୍ସାଧିକାରୀଙ୍କ ସମେତ ଜିଲ୍ଲା ପ୍ରଶାସନ ବି ତଦନ୍ତ କରୁଛନ୍ତି । କେଉଁ ପରିସ୍ଥିତିରେ ଆମ୍ବ ଟାକୁଆ ଖାଇଲେ ଲୋକେ ସେ ନେଇ ବିଡିଓ ଜିଲ୍ଲାପାଳଙ୍କୁ ପ୍ରାଥମିକ ରିପୋର୍ଟ ଦେଇଛନ୍ତି । ମୃତକଙ୍କ ଶବ ବ୍ଯବଚ୍ଛେଦ ରିପୋର୍ଟକୁ ଅପେକ୍ଷା କରିଛି ପ୍ରଶାସନ । ରିପୋର୍ଟ ଆସିଲେ ସେମାନଙ୍କ ମୃତ୍ଯୁର ସ୍ପଷ୍ଟ କାରଣ ଜଣାପଡ଼ିବ । ତେବେ ଦୀର୍ଘ ବର୍ଷ ପରେ ଓଡ଼ିଶାରେ ଆମ୍ବ ଟାକୁଆ ଜାଉ ଖାଇ ମୃତ୍ଯୁ ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଛି ।
ନିର୍ବାଚନୀ ପ୍ରତିଶ୍ରୁତି ଅନୁଯାୟୀ ଆସୁନି ଯୋଜନା, ବିଜେପି ସରକାର ଉପରେ ବର୍ଷିଲେ ଗ୍ରାମବାସୀ
କାଶୀନଗର: ଗଜପତି ଜିଲ୍ଲା କାଶୀନଗର ବ୍ଲକ ସୀତାପୁର ପଞ୍ଚାୟତ । ଗ୍ରାମସଭାରେ କାଠଗଡ଼ାରେ ବିଜେପି ସରକାର । ନିର୍ବାଚନୀ ପ୍ରତିଶ୍ରୁତି ଅନୁଯାୟୀ ପଞ୍ଚାୟତକୁ ଯୋଜନା ଆସୁ ନଥିବା ଅଭିଯୋଗ । ମୋହନ ସରକାର ଉପରେ ବର୍ଷିଲେ ଗ୍ରାମବାସୀ । ଅସନ୍ତୋଷ ଜାହିରି କରିବା ସହ ସରକାରୀ ପରିଚାଳନା ଉପରେ ଉଠାଇଲେ ପ୍ରଶ୍ନ ।
ବିଜେପି ସରକାରଙ୍କ ପ୍ରତିଶ୍ରୁତି ପାଲଟିଛି ପାଣିର ଗାର । ଗଜପତି ଜିଲ୍ଲା କାଶୀନଗର ବ୍ଲକ ସୀତାପୁର ପଞ୍ଚାୟତରେ ବସିଥିଲା ଗ୍ରାମସଭା । ବିଭିନ୍ନ ବିକାଶମୂଳକ କାର୍ଯ୍ଯର ତଦାରଖ କରିଥିଲେ ଲୋକେ । ହେଲେ ବିଜେପି ସରକାର ଗଠନର ୪ ମାସ ପରେ ବି ପଞ୍ଚାୟତକୁ କୌଣସି ଯୋଜନା ଆସିନାହିଁ । ନିର୍ବାଚନୀ ଇସ୍ତାହାର ସମୟରେ ବୟସ୍କ ବ୍ଯକ୍ତିଙ୍କୁ ୩ ହଜାର ଟଙ୍କା ଭତ୍ତା ସାଙ୍ଗକୁ ୩ ଶହ ୟୁନିଟ୍ ମାଗଣା ବିଜୁଳି, ଧାନ କୁଇଣ୍ଟାଲ ପିଚ୍ଛା ୩୧୦୦ ଟଙ୍କା ସାଙ୍ଗକୁ ସମସ୍ତଙ୍କୁ ପକ୍କା ଘର ଯୋଗାଇ ଦେବାକୁ ଲୋକଙ୍କୁ ପ୍ରତିଶ୍ରୁତି ଦେଇଥିଲା ବିଜେପି । ସେହିପରି ସମସ୍ତ ମହିଳାଙ୍କୁ ସୁଭଦ୍ରା ଯୋଜନାରେ ଦୁଇଟି କିସ୍ତିରେ ୫୦ ହଜାର ଟଙ୍କା ଦେବାକୁ ଘୋଷଣା କରିଥିଲେ ବି ଏପର୍ଯ୍ଯନ୍ତ କୌଣସି ଯୋଜନା କାର୍ଯ୍ଯକାରୀ ହୋଇ ନଥିବା ନେଇ ଗ୍ରାମସଭାରେ ଆଲୋଚନା ହୋଇଥିଲା । ପଞ୍ଚାୟତ ଅଧିକାରୀ ଲୋକଙ୍କୁ ସ୍ପଷ୍ଟୀକରଣ ଦେବା ପରେ ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିଲା ।
ଏପଟେ ବିଜେପିର ନେତା ଓ କର୍ମୀ ରାଜ୍ୟ ସରକାରଙ୍କ ବହୁ ବିକାଶମୂଳକ ଯୋଜନା ଆସୁଛି ବୋଲି ଗୁଜବ ସୃଷ୍ଟି କରୁଛନ୍ତି । ଗ୍ରାମସଭାରେ ସରପଞ୍ଚ ଓ ୱାର୍ଡ ସଭ୍ଯ ଲୋକଙ୍କୁ ବିଜେପିର ମିଛ ନାଟକ ବିରୋଧରେ ସଚେତନ କରିଥିଲେ । ଏହାକୁ ନେଇ ସାଧାରଣ ଲୋକଙ୍କ ସହ ବିଜେପି କର୍ମୀଙ୍କ ମଧ୍ୟରେ ପ୍ରବଳ ଯୁକ୍ତିତର୍କ ହୋଇଥିଲା । ସ୍ଥିତି ଏପରି ହୋଇଥିଲା ଯେ ଘଟଣାସ୍ଥଳରେ ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲେ । ଅନ୍ଯପକ୍ଷରେ ବର୍ତ୍ତମାନ ସମୟରେ ସବୁ ଜିନିଷର ଦର ବୃଦ୍ଧି ହେଉଥିବା ବେଳେ ଆବାସ ଯୋଜନାରେ ଅନୁଦାନ ବୃଦ୍ଧି ପରିବର୍ତ୍ତେ କମାଇବା ପରିତାପ ବଷିୟ ବୋଲି କହିଛନ୍ତି ଲୋକ ପ୍ରତିନିଧି ।
ରାଜନୈତିକ ଦୃଷ୍ଟିକୋଣରୁ ଏହି ପଞ୍ଚାୟତର ବିକାଶ ଅନେକ ଗୁରୁତ୍ବ ବହନ କରୁଛି । ତେବେ ବିଜେପି ସରକାରଙ୍କ ମିଥ୍ୟା ପ୍ରତିଶ୍ରୁତି ଯୋଗୁଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ ।
ଦୀଗପହଣ୍ଡିରେ ପୁଣି ବୋମାମାଡ଼, ୪ ଦିନରେ ୩ ସ୍ଥାନରେ ୬ଟି ବୋମାମାଡ଼
ଦିଗପହଣ୍ଡି: ଦିପାବଳୀରେ ସମସ୍ତେ ବାଣ ଫୁଟାଇବା ପରେ ଘରେ ଖାଇପିଇ ଶୋଇଥିଲେ । ଦିଗପହଣ୍ଡି କେନାଲ ସାହିର ରାଜେନ୍ଦ୍ର ସେଠୀଙ୍କ ପରିବାର ମଧ୍ୟ ଦିପାବଳୀ ପାଳନ କରିବା ପରେ ଘରେ ଥିଲେ । ହେଲେ ବିଳମ୍ବିତ ରାତିରେ ଘର ଉପରେ ପଡ଼ିଲା ବୋମା । ଯାହାକୁ ନେଇ ପୂରା ପରିବାରରେ କୋକୁଆ ଭୟ ଖେଳିଯାଇଛି । ବୋମାମାଡ଼ର କାରଣ ଅସ୍ପଷ୍ଟ ଥିବାବେଳେ କିଏ ବୋମା ପକାଇଛି ତାହା ମଧ୍ୟ ଜଣାପଡିନାହିଁ ।
ସୂଚନାଯୋଗ୍ୟ, ଦିନକୁ ଦିନ ଅଶାନ୍ତ ହୋଇଯାଉଛି ଦିଗପହଣ୍ଡି । ଗତ ୪ଦିନ ଭିତରେ ୩ଟି ସ୍ଥାନରେ ୬ଟି ବୋମାମାଡ଼ ହୋଇଛି । ଗତ ୨୬ ତାରିଖ ରାତିରେ ୨ ଜଣ ଯୁବକ ବୁଲେଟରେ ଆସି ବସଷ୍ଟାଣ୍ଡ ନିକଟରେ ୨ଟି ବୋମାମାଡ଼ କରି ଫେରାର ହୋଇଯାଇଥିଲେ । ପଦ୍ମନାଭପୁର ରାସ୍ତାରେ ମଧ୍ୟ ଜଣଙ୍କୁ ଟାର୍ଗେଟ କରି ବୋମା ମାଡ଼ ହୋଇଥିବା ଅଭିଯୋଗ ହୋଇଥିଲା l ୨୮ ତାରିଖରେ ନୂଆ ମୌଳା ଭଣଜାରେ ବିଳମ୍ବିତ ରାତିରେ ଘର ସମ୍ମୁଖରେ ଥିବା ଏକ କାରକୁ କିଛି ଦୁର୍ବୃତ୍ତ ନିଆଁ ଲଗାଇ ଜାଳି ଦେଇଥିଲେ । ଯାହାର ଦୃଶ୍ୟ ସିସିଟିଭିରେ କଏଦ ହୋଇଥିଲା ।
ପୋଲିସର ନୀରବତା ଯୋଗୁଁ ୪ ଦିନ ଭିତରେ ୩ଟି ସ୍ଥାନରେ ୬ଟି ବୋମା ମାଡ଼ ହୋଇଥିବା ଅଭିଯୋଗ ହୋଇଛି । ବାଇକରେ ଆସି ଦୁର୍ବୃତ୍ତମାନେ ବୋମା ପକାଇ ଚାଲିଯାଉଥିବା ଭିଡିଓ ରହିଥିଲେ ମଧ୍ୟ ଦିଗପହଣ୍ଡି ପୋଲିସ ଏଯାଏଁ କାହାକୁ ଗିରଫ କରିପାରିନି । ଅପରାଧୀମାନେ ଖୁଲମଖୁଲା ପୋଲିସକୁ ଚ୍ୟାଲେଞ୍ଜ ଦେଉଥିବା ବେଳେ ପୋଲିସ ହାତବାନ୍ଧି ବସିଥିବା ଅଭିଯୋଗ ହେଉଛି ।
ବ୍ୟବସାୟୀଙ୍କ ସନ୍ଦେହଜନକ ମୃତ୍ୟୁ, ଜିଏସଟି ଚଢ଼ାଉକୁ ଦାୟୀ କଲେ ପରିବାର ଲୋକେ
ଜୟପୁର: କୋରାପୁଟ ଜିଲ୍ଲା ଜୟପୁରର ନ୍ୟୁ ବାସବି ଜୁଏଲାରୀ ମାଲିକ ପି. ହରପ୍ରସାଦ ରାଓଙ୍କ ସନ୍ଦେହଜନକ ମୃତ୍ୟୁ । ଜିଏସଟି ଚଢ଼ାଉ ତାଙ୍କ ମୃତ୍ୟୁର କାରଣ ବୋଲି ହରପ୍ରସାଦଙ୍କ ଭାଇ ଅଭିଯୋଗ କରିଛନ୍ତି ।
ଅଭିଯୋଗ ଅନୁସାରେ, ଜୁଏଲାରୀ ଦୋକାନରେ ଜିଏସଟି ରେଡ୍ ପରେ ହରପ୍ରସାଦଙ୍କ ସନ୍ଦେହଜନକ ମୃତ୍ଯୁ ଘଟିଛି । ଗତକାଲି ରାତିରେ ଦୀପାବଳି ପାଳନ କରି ହରପ୍ରସାଦ ଶୋଇଥିବାବେଳେ ଆଜି ସକାଳୁ ଆଉ ଉଠି ନଥିଲେ । ତୁରନ୍ତ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ହରପ୍ରସାଦଙ୍କ ଭାଇ ପି.ରାଜେଶଙ୍କ ଅଭିଯୋଗ ଅନୁସାରେ, ଗତ ମଙ୍ଗଳବାର ଦିନ ଧନତେରାସରେ ସିଟି ଜିଏସଟି ବିଭାଗ ତାଙ୍କ ଦୋକାନରେ ଚଢାଉ କରିଥିଲା । ସେବେଠୁ ହରପ୍ରସାଦ ଭୟଭୀତ ହୋଇ ଚାପଗ୍ରସ୍ତ ଥିଲେ । ପାର୍ବଣ ଦିନ ୬ରୁ ୭ଘଣ୍ଟା ଧରି ରେଡ୍ ସହ ଘର ସିଜ କରି ସର୍ଚ୍ଚ ଅପରେସନ ଫଳରେ ସେ ଭାଙ୍ଗି ପଡ଼ିଥିଲେ । ପୂର୍ବରୁ ମଧ୍ଯ ବାରମ୍ବାର ଏଭଳି ଚଢାଉ ହୋଇଥିଲା । ଏଣୁ ଲୋକଲଜ୍ଜାକୁ ସହି ନପାରି ସେ ଚିନ୍ତାଗ୍ରସ୍ତ ଥିଲେ । ଜୟପୁର ଚାମ୍ବର ଅଫ କମର୍ସ ମଧ୍ଯ ଜିଏସଟି ବିଭାଗର ଏଭଳି ଚଢାଉକୁ ସମାଲୋଚନା କରିଛି ।
ଦୀପାବଳିରେ ଭାରତ ଆସିଲେ ୩ ଆଫ୍ରିକୀୟ ହାତୀ, ‘ବନତାରା’ ପାଲଟିଲା ନୂଆ ଠିକଣା
ଜାମନଗର: ଜୀବନ ସହ ସଂଘର୍ଷ କରୁଥିବା ୩ ଆଫ୍ରିକୀୟ ହାତୀଙ୍କୁ ଦୀପାବଳୀ ଅବସରରେ ଟ୍ୟୁନିସିଆରୁ ଉଦ୍ଧାର କରାଯାଇଛି । ଆଉ ଏହି ଉଦ୍ଧାର କାର୍ଯ୍ୟ କରିଛି ଅନନ୍ତ ମୁକେଶ ଅମ୍ବାନୀଙ୍କ ବନ୍ୟଜନ୍ତୁ ଉଦ୍ଧାର କେନ୍ଦ୍ର ‘ବନତାରା’ । ଟ୍ୟୁନିସିଆରୁ ଉଦ୍ଧାର କରାଯିବା ପରେ ହାତୀ ୩ଟିକୁ ଭାରତର ଜାମନଗର ସ୍ଥିତ ବନତାରାକୁ ଅଣାଯାଇଛି । ଏହି ୨୮ରୁ ୨୯ ବର୍ଷ ବୟସ୍କ ଆଫ୍ରିକୀୟ ହାତୀ ମଧ୍ୟରେ ଦୁଇଟି ମାଈ ଓ ଗୋଟିଏ ପୁରୁଷ ହାତୀ ଅଛନ୍ତି ।
ବନତାରା ହେଉଛି ଅନନ୍ତ ମୁକେଶ ଅମ୍ବାନୀଙ୍କ ସ୍ୱପ୍ନର ପ୍ରକଳ୍ପ । ଟ୍ୟୁନିସିଆର ଏକ ଘରୋଇ ପ୍ରାଣୀ ଉଦ୍ୟାନ, ଯାହା ଖରାପ ଆର୍ଥିକ ଅବସ୍ଥା ହେତୁ ହାତୀମାନଙ୍କ ଖାଇବା, ଗୃହ ଓ ଚିକିତ୍ସା ଆବଶ୍ୟକତା ପୂରଣ କରିବାରେ ଅସମର୍ଥ ଥିଲା । ଚିଡିଆଖାନା ପକ୍ଷରୁ ଏନେଇ ବନତାରା ସହିତ ଯୋଗାଯୋଗ କରାଯାଇଥିଲା । ଜାତୀୟ ତଥା ଆନ୍ତର୍ଜାତୀୟ ନିୟମ ଅନୁଯାୟୀ ଏକ ଚାର୍ଟାର୍ଡ କାର୍ଗୋ ବିମାନରେ ହାତୀମାନଙ୍କୁ ଭାରତ ଅଣାଯାଇଛି । ବନତାରା ବର୍ତ୍ତମାନ ଏହି ଆଫ୍ରିକୀୟ ହାତୀମାନଙ୍କ ନୂତନ ଘର ହେବ ।
ସୂଚନାଯୋଗ୍ୟ, ଖର୍ଚ୍ଚ କମ କରିବା ପାଇଁ ଟ୍ୟୁନିସିଆର ପ୍ରାଣୀ ଉଦ୍ୟାନ ଫ୍ରିଗୁୟା ପାର୍କ ସମସ୍ତ ୩ଟି ଆଫ୍ରିକୀୟ ହାତୀଙ୍କୁ ହଟାଇବାକୁ ନିଷ୍ପତ୍ତି ନେଇଥିଲା । ଅଚତମ୍, କାନି ଏବଂ ମୀନା ନାମକ ଏହି ହାତୀମାନଙ୍କୁ ଜଙ୍ଗଲକୁ ଫେରାଇ ନେବା ସମ୍ଭବ ନଥିବାରୁ ଏଭଳି ପରିସ୍ଥିତିରେ ସେମାନେ ଏପରି ଏକ ସ୍ଥାନ ଖୋଜୁଥିଲେ ଯେଉଁଠାରେ ସେମାନଙ୍କ ଭଲ ଭାବେ ଯତ୍ନ ନିଆଯାଇପାରିବ । ବହୁ ଅନୁସନ୍ଧାନ ପରେ ସେମାନଙ୍କୁ ଅଚତମ, କାନି ଏବଂ ମୀନାଙ୍କ ପାଇଁ ବନତାରାରେ ଏକ ନୂତନ ଘର ମିଳିଲା ।
ବନତାରାରେ ଆଫ୍ରିକୀୟ ହାତୀମାନଙ୍କର ଡାକ୍ତରୀ ପରୀକ୍ଷାରୁ ଜଣାପଡିଛି ଯେ ଅଚତମ୍, କାନି ଏବଂ ମୀନା ଅନେକ ରୋଗରେ ପୀଡିତ ଅଛନ୍ତି । ସେମାନଙ୍କୁ ଶାରୀରିକ ଓ ମାନସିକ ସହାୟତା ଆବଶ୍ୟକ । କେତେକ କ୍ଷେତ୍ରରେ ଅସ୍ତ୍ରୋପଚାର ମଧ୍ୟ ଆବଶ୍ୟକ ହୋଇପାରେ । ବନତାରାର ପ୍ରାଣୀ ଚିକିତ୍ସକ ଦିନରାତି ସେମାନଙ୍କ ଉପରେ ନଜର ରଖିଛନ୍ତି । ବନତାରା ପକ୍ଷରୁ ଦେଶୀ ଉଦ୍ଭିଦ, ମାଟି ପୋଖରୀ ଓ ଖାଦ୍ୟ ସମୃଦ୍ଧ ବୃହତ ଏନକ୍ଲୋଜର ଗୁଡିକ ସୁଚିନ୍ତିତ ଭାବରେ ଡିଜାଇନ୍ କରାଯାଇଛି । ବନତାରାରେ ସେମାନଙ୍କର ନୂତନ ଘର ଅଚତମ୍, କାନି ଓ ମୀନାଙ୍କୁ ଏଭଳି ଏକ ପରିବେଶ ପ୍ରଦାନ କରିବ ଯାହା ସେମାନଙ୍କ ବନ୍ୟ ବାସସ୍ଥାନ ସଦୃଶ ହୋଇଛି ।