ନନ୍ଦିଘୋଷ ବ୍ୟୁରୋ: ପ୍ରବଳ ବିରୋଧ ପରେ ବାତିଲ ହେଲା ଇସ୍କନ ରଥଯାତ୍ରା। ଆମେରିକାର ହଷ୍ଟନରେ ହେବାକୁ ଥିବା ରଥଯାତ୍ରାକୁ ବାତିଲ କରିଛି ଇସ୍କନ। କହିଛି, ରଥଯାତ୍ରା ବଦଳରେ ଗୌର ନିତାଇ ସଙ୍କୀର୍ତ୍ତନ ଯାତ୍ରା କରାଯିବ। ଏନେଇ ସୂଚନା ଦେଇଛନ୍ତି ଇସ୍କନର ରାଷ୍ଟ୍ରୀୟ ଜନସମ୍ପର୍କ ନିର୍ଦ୍ଦେଶକ ଯୁଧିଷ୍ଠିର ଗୋବିନ୍ଦ ପ୍ରଭୁ। ଓଡ଼ିଆଙ୍କ ଭାବାବେଗକୁ ସମ୍ମାନ ଦେଇ ରଥଯାତ୍ରା ବଦଳରେ ସଙ୍କୀର୍ତ୍ତନ ଯାତ୍ରା କରିବାକୁ ନିଷ୍ପତ୍ତି ନିଆଯାଇଛି। ଅଦିନିଆ ରଥଯାତ୍ରା ବାତିଲ କରିବା ନେଇ ପୁରୀ ଗଜପତି ମହରାଜ ଇସ୍କନକୁ ଚରମବାଣୀ ଶୁଣାଇଥିଲେ। ଯଦି ଇସ୍କନ କର୍ତ୍ତୃପକ୍ଷ ନିଷ୍ପତ୍ତି ପରିବର୍ତ୍ତନ ନକରନ୍ତି, ତେବେ ଆଇନଗତ ଲଢ଼େଇ କରାଯିବ ବୋଲି କହିଥିଲେ ଗଜପତି। ଏପରିକି ଜଗନ୍ନାଥ ପ୍ରେମୀ ମଧ୍ୟ ଇସ୍କନର ଏହି ନିଷ୍ପତ୍ତିକୁ ବିରୋଧ କରିବାକୁ ଆହ୍ବାନ ଦେଇଥିଲେ ଗଜପତି ମହାରାଜ।
ଲମତାପୁଟ: ସ୍ବାମୀ ସାମନାରେ ସ୍ତ୍ରୀକୁ ହତ୍ୟା ଘଟଣା : ତଦନ୍ତରୁ ଜଣା ପଡ଼ିଲା ସ୍ବାମୀର ଷଡ଼ଯନ୍ତ୍ର
ନନ୍ଦିଘୋଷ ବ୍ୟୁରୋ: ସ୍ତ୍ରୀକୁ ହତ୍ୟା ପାଇଁ ସ୍ବାମୀ ରଚିଥିଲା ସାଂଘାତିକ ଷଡ଼ଯନ୍ତ୍ର । ସସପେନ୍ସ ଉପରୁ ପରଦା ହଟାଇଲା କୋରାପୁଟ ନନ୍ଦପୁର ପୋଲିସ । ଘଟଣାକୁ ୨୪ ଘଣ୍ଟା ନ ପୁରୁଣୁ ଗୁମର ଖୋଲିବାରେ ପୋଲିସ ସମର୍ଥ ହୋଇଛି । ମୁଖ୍ୟଅଭିଯୁକ୍ତ ତଥା ସ୍ବାମୀ ମହେନ୍ଦ୍ର ଖରା ସହ ଦୁଇ ସହଯୋଗୀକୁ ଗିରଫ କରିଛି ପୋଲିସ । ମାଳିଖୁଡିବି ଗାଁର ମହେଶ ମାଳି ଏବଂ ସୋମନାଥ ଭୋଇକୁ ଗିରଫ କରିଛି ପୋଲିସ l ଏମାନେ ୮ ଦିନ ପୂର୍ବରୁ ସାବିଙ୍କୁ ହତ୍ୟା କରିବା ପାଇଁ ଯୋଜନା କରିଥିଲେ l ଗତକାଲି ହତ୍ୟା କରିବା ପରେ ଲୁଟର ଅଭିନୟ କରି ନିଜକୁ ଗଛରେ ବାନ୍ଧି ଘଟଣାକୁ ଚାପିଦେବା ପ୍ଲାନ କରିଥିଲା ମୁଖ୍ୟଅଭିଯୁକ୍ତ ତଥା ସ୍ବାମୀ ମହେନ୍ଦ୍ର ଖରା। କୋରାପୁଟ ନନ୍ଦପୁର ଥାନା କୁମାର ଗାନ୍ଧଣା ଗ୍ରାମ ପଂଚାୟତ ହାରିଆମୁଣ୍ଡା ଗାଁରେ ଗତକାଲି ଘଟିଥିଲା ଏହି ବର୍ବରକାଣ୍ଡ l ସୋମବାର ସକାଳୁ ସୁଭଦ୍ରା ଯୋଜନାରେ ଆଧାର ଅପଡେଟ କରିବାକୁ ସ୍ବାମୀ ମହେନ୍ଦ୍ର ଖରା ଓ ସ୍ତ୍ରୀ ସାବି ଖରା ଆଧାର କେନ୍ଦ୍ରକୁ ଆସିଥିଲେ l ଆଧାର କେନ୍ଦ୍ରରେ କାମ ସାରି ବାଇକରେ ଘରକୁ ଫେରୁଥୁବା ସମୟରେ ରାସ୍ତାକଡ଼ରେ କିଛି ଯୁବକ ଆଗରୁ ଛିଡା ହୋଇ ରହିଥିଲେ। ଦୁର୍ବୃତ୍ତମାନେ ସ୍ବାମୀ-ସ୍ତ୍ରୀଙ୍କୁ ଅକସ୍ମାତ ଠେଙ୍ଗାରେ ପିଟି ଥିଲେ । ପରେ ସ୍ବାମୀକୁ ଗଛରେ ବାନ୍ଧି ସ୍ତ୍ରୀକୁ ହତ୍ୟା କରାଯାଇଥିବା ଅଭିଯୋଗ ହୋଇଥିଲା । ହେଲେ ସମସ୍ତ ଘଟଣା ଉପରୁ ପରଦା ହଟାଇ ସତ ପଦାକୁ ଆଣିଛି ନନ୍ଦପୁର ପୋଲିସ । ଘଟଣାରେ ସ୍ବାମୀର ମୁଖ୍ୟ ଭୂମିକା ବୋଲି ତଦନ୍ତରୁ ଜଣାପଡିଥିବା ପୋଲିସ କହିଛି ।
କିଏ ହେବେ ଓଡ଼ିଶା ପିସିସି ସଭାପତି ?
ନନ୍ଦିଘୋଷ ବ୍ୟୁରୋ: କିଏ ହେବେ ଓଡ଼ିଶା ପିସିସି ସଭାପତି। ସରିଛି ଚୟନ ପ୍ରକ୍ରିୟା। ଏଆଇସିସି ଦ୍ବାରା ନିଯୁକ୍ତ ଦୁଇ ପର୍ଯ୍ୟବେକ୍ଷକ ଶୁଣିଛନ୍ତି ନେତାଙ୍କ ପ୍ରସ୍ତାବ। ଖୁବଶୀଘ୍ର ହାଇକମାଣ୍ଡଙ୍କୁ ରିପୋର୍ଟ ଦେବା ସହ ପିସିସି ସଭାପତିଙ୍କ ନାଁ ଘୋଷଣା କରାଯିବ। ତେବେ ରେସରେ ଦୁଇ ବରିଷ୍ଠ ନେତା ଭକ୍ତଚରଣ ଦାସ ଓ ମହମ୍ମଦ ମୋକିମଙ୍କ ନାଁକୁ ନେଇ ଆରମ୍ଭ ହୋଇଛି ଚର୍ଚ୍ଚା। କାହା ମୁଣ୍ଡରେ ହାଇକମାଣ୍ଡ ସୁନା କଳସ ଢାଳିବେ ତାହାକୁ ଅପେକ୍ଷା କରିଛନ୍ତି ରାଜ୍ୟ କଂଗ୍ରେସ ନେତା ଓ କର୍ମୀ।
ସରିଲା ମାନସ ମଂଥନ, ଆସିଲା ନାଁ । ନେତା ବି କହିଲେ ମୁଖିଆ କେମିତି ହେବା ଦରକାର। ରେସର ଆଗରେ ଭକ୍ତ ଓ ମୋକିମ । ପର୍ଯ୍ୟବେକ୍ଷକଙ୍କ ରିପୋର୍ଟରେ ହାଇକମାଣ୍ଡ ମାରିବେ ମୋହର । କଂଗ୍ରେସ ନେତା ଭକ୍ତ ଚରଣ ଦାସ କିମ୍ବା ମହମ୍ମଦ ମୋକିମ । ଏହି ଦୁଇ ନେତାଙ୍କ ମଧ୍ୟରୁ ଜଣେ ଧରିବେ ଓଡ଼ିଶା କଂଗ୍ରେସ ମଙ୍ଗ । ଏଆଇସିସି ଦ୍ବାରା ନିଯୁକ୍ତ ପର୍ଯ୍ୟବେକ୍ଷକ ଚରଣ ଦାସ ମହନ୍ତ ଓ ମିନାଷୀ ନଟରାଜନ ଓଡ଼ିଶା ନେତାଙ୍କ ଠାରୁ ମୁଖୀଆ ଚୟନ ମତ ନେଇ ଫେରିବା ପରେ କଂଗ୍ରେସ ଅନ୍ଦର ମହଲରେ ଏଲହି ଦୁଇନେତାଙ୍କୁ ନେଇ ଜୋରଦାର ଚର୍ଚ୍ଚା ।
ବିଧାୟକ ତାରା ପ୍ରସାଦ ବାହୀନପତୀ ଖୋଲାଖୋଲି ଭାବେ ଭକ୍ତ ଚରଣ ଦାସଙ୍କୁ ପରବର୍ତ୍ତୀ ପିସିସି ସଭାପତି କରିବାକୁ ଚୟନ କମିଟି ସଦସ୍ୟକୁ ପ୍ରସ୍ତାବ ଦେଇଛନ୍ତି । ତାରାଙ୍କ ସହ ଅଧିକାଶ ବିଧାୟକ ଓ ନେତାଙ୍କ ପ୍ରସ୍ତାବ ବି ଭକ୍ତ ଦାସଙ୍କୁ ପିସିସି ସଭାପତି କରିବା ସପକ୍ଷରେ ପ୍ରସ୍ତାବ ଦେଇଛନ୍ତି । ଦିଲ୍ଳୀରେ ମଧ୍ୟ ଭକ୍ତଙ୍କ ଦବଦବା ଥିବାରୁ ପିସିସି ସଭାପତି ରେସରେ ସେ ଅଧିକ ଶକ୍ତିଶାଳୀ ହୋଇଛନ୍ତି । ଅନ୍ୟପଟେ ପୂର୍ବତନ ବିଧାୟକ ମହମ୍ମଦ ମୋକିମଙ୍କୁ ପିସିସି ସଭାପତି କରିବା ଲାଗି ମଧ୍ୟ ଅନ୍ୟଲକ ଗୋଷ୍ଠୀ ଜୋରଦାର ପ୍ରସ୍ତାବ ଦେଇଛନ୍ତି ଚୟନ କମିଟି ପାଖରେ । ପିସିସି ରେସରେ ଆଗରେ ଥିବା ଦୁଇନେତା ଭକ୍ତ ଚରଣ ଦାସ ଓ ମହମ୍ମଦ ମୋକିମ କିନ୍ତୁ କହିଛନ୍ତି ହାଇକମାଣ୍ଡ ସଭାପତି ଦାୟିତ୍ବ ନେଇ ଯାହା ନିଷ୍ପତି ନେବେ । ଆମେ କଂଗ୍ରେସ ପାଇଁ କାମ କରୁଛୁ ।
ବରିଷ୍ଠ ନେତା ଭକ୍ତ ଚରଣ ଦାସ ଦଳର ବରିଷ୍ଠ ନେତା ସହ ବିଭିନ୍ନ ରାଜ୍ୟର ପର୍ଯ୍ୟବେକ୍ଷକ ଦାୟିତ୍ବ ତୁଲାଇ ଆସିଛନ୍ତି । ଜଣେ ଆଦିବାସୀ ଚେହେରା। ସେହିପରି ସଂଖ୍ୟାଲଘୁ ସମ୍ପଦ୍ରାୟର ସହ କଂଗ୍ରେସର ସଙ୍କଟ ସମୟରେ ପୂର୍ବତନ ବିଧାୟକ ମହମ୍ମଦ ମୋକିମ ହାଇକମାରଣ୍ଡ ଦେଇଥିବା ଦାୟିତ୍ବକୁ ସଫଳତାର ସହ ତୁଲାଇଛନ୍ତି । ଯୁବ ଚେହେରା ଭାବରେ ତାଙ୍କ ଦଳ ଭିତରେ ଦବଦବା ବି କିଛି କମ ନାହିଁ । ଦଳରି ବରିଷ୍ଠ ନେତାମାନେ ତଥା ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି ଯେ ଭକ୍ତ ଚରଣ ଦାସ ଓ ମହମ୍ମଦ ମୋକିମ ଯିଏ ବି ପିସିସି ସଭାପତି ହୁଅନ୍ତୁ ଆମେ ତାଙ୍କୁ ସହଯୋଗ କରିବୁ ।ସେହିପରି ବରିଷ୍ଠ ନେତା ଶ୍ରୀକାନ୍ତ ଜେନା କହିଛନ୍ତି ହାଇକମାଣ୍ଡ ଚୁଡ଼ାନ୍ତ ନିଷ୍ପତି ନେବ ।
୨୪ ବର୍ଷ ଭିତରେ ଓଡ଼ିଶା କଂଗ୍ରେସ ୬ଜଣ ପିସିସି ସଭାପତି ପାଇଛି । ହେଲେ ଦଳର ଭୋଟ ପ୍ରତିଶତ ୩୩ ପ୍ରତିଶତରୁ ହ୍ରାସ ପାଇଁ ୧୩ ପ୍ରତିଶତରେ ପହଞ୍ଚିଛି । ଓଡ଼ିଶା କଂଗ୍ରେସର ଏପରି ସଙ୍କଟ ପରିସ୍ଥିତିରେ ଭକ୍ତ ନାଁ ମୋକିମ କିଏ ସଂଞ୍ଜିବନୀ ଦେଇ କଂଗ୍ରେସକୁ ଓଡ଼ିଶାରେ ଶକ୍ତିଶାଳୀ କରିବେ ସେ ଚିନ୍ତାରେ ହାଇକମାଣ୍ଡ ।
ଆସିଲା ବାତ୍ଯା ଦାନା କ୍ଷୟକ୍ଷତିର ଚୂଡ଼ାନ୍ତ ରିପୋର୍ଟ
ନନ୍ଦିଘୋଷ ବ୍ୟୁରୋ: ଆସିଲା ବାତ୍ଯା ଦାନା କ୍ଷୟକ୍ଷତିର ଚୂଡ଼ାନ୍ତ ରିପୋର୍ଟ । ବାତ୍ୟା ପ୍ରଭାବରେ ୬୧୬ କୋଟି ୧୯ ଲକ୍ଷ ୩୦ ହାଜର ଟଙ୍କା କ୍ଷତି ହୋଇଛି । ୧୪ ଜିଲ୍ଲାର ୧୬୬ବ୍ଲକ ଭିତରୁ ୧୩୧ଟି ପ୍ରଭାବିତ ହୋଇଛି । ୧୧ ହଜାର ୬୩୭ ଗାଁ ପ୍ରଭାବିତ ହୋଇଛି । ୪୧ ଲକ୍ଷ ୪ ହଜାର ଲୋକ ପ୍ରଭାବିତ ହୋଇଥିଲେ । ୩୬୨୯୩୫.୩୭ ହେକ୍ଟର ଜମି ପ୍ରଭାବିତ ହୋଇଛି । ଫସଲ ପ୍ରଭାବିତ ଅଞ୍ଚଳ ୧୭୨୩୫୬.୮୧ ହେକ୍ଟର ଜମି । ୮୨୯୨.୮୨ ଲକ୍ଷ ହେକ୍ଟର ଜମିରେ ଫସଲ କ୍ଷତିଗ୍ରସ୍ତ ହୋଇଛି । ୩୩ ପ୍ରତିଶତରୁ ଅଧିକ କ୍ଷତି ହୋଇଥିଲେ କ୍ଷତି ପୂରଣ ଇନପୁଟ ସବସିଡି ଭିତରକୁ ଆସିବ । ୮୭୮୫୫.୪୭ ହେକ୍ଟର ଜମିରେ ୩୩ ପ୍ରତିଶତ ଫସଲ ନଷ୍ଟ ହୋଇଛି । ୮୨ କୋଟି ୯୨ ଲକ୍ଷ ୮୨ ହଜାର ଟଙ୍କାର ଫସଲ ନଷ୍ଟ । ୧୬୪୧୭ ଘର ଆଂଶିକ ବା ସଂପୂର୍ଣ୍ଣ ପ୍ରଭାବିତ ହୋଇଛି । ୨୧ କୋଟି ୩୨ ଲକ୍ଷ ଟଙ୍କାର ଘର କ୍ଷତି ହୋଇଛି । କୃଷି, ଶକ୍ତି, ପଞ୍ଚାୟତିରାଜ, ସ୍କୁଲ ଏବଂ ଗଣ ଶିକ୍ଷା ବିଭାଗ , ଗ୍ରାମ୍ୟ ଉନ୍ନୟନ ବିଭାଗ, ପାନୀୟ ଜଳ ବିଭାଗର କ୍ଷତି ହୋଇଛି । ଏହି ସବୁ ବିଭାଗରେ ୫୧୨ କୋଟି ୨୬ ଲକ୍ଷ ୧୬ ହଜାର ଟଙ୍କା କ୍ଷତି ହୋଇଛି । ବାତ୍ୟା ସମୟରେ ରିଲିଫ, ଖାଇବା, ମେଡିକାଲ ସେବା ଓ ଅନ୍ୟ ଆନୁଷଙ୍ଗିକ କାର୍ଯ୍ୟ ପାଇଁ ୨୩ କୋଟି ୭୩ ଲକ୍ଷ ୭୬ ହଜାର ଟଙ୍କା ଖର୍ଚ୍ଚ ହୋଇଛି । ମୋଟ ୬୧୬ କୋଟି ୧୯ ଲକ୍ଷ ୩୦ ହଜାର ଟଙ୍କା କ୍ଷତି ହୋଇଛି । ମୁଖ୍ୟମନ୍ତ୍ରୀଙ୍କ ଅନୁମୋଦନ ପରେ ଦିନେ ଦୁଇ ଦିନ ଭିତରେ ଜିଲ୍ଲା ଗୁଡ଼ିକୁ କ୍ଷତି ପୂରଣ ରାଶି ଯିବ । ପ୍ରଭାବିତ ଲୋକଙ୍କୁ କ୍ଷତିପୂରଣ ରାଶି ତୁରନ୍ତ ଦେବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି । ବିଭାଗ ମାନଙ୍କୁ ମଧ୍ୟ କ୍ଷତି ପୂରଣ ରାଶି ଦିଆଯିବ । ପ୍ରଭାବିତ ଲୋକଙ୍କୁ କ୍ଷତିପୂରଣ ରାଶି ତୁରନ୍ତ ଦେବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି । ବିଭାଗମାନଙ୍କୁ ମଧ୍ୟ କ୍ଷତି ପୂରଣ ରାଶି ଦିଆଯିବ ବୋଲି କହିଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ ।
ଜନଜାତିଙ୍କ ପାଖରେ ପହଞ୍ଚୁନି ପ୍ରଶାସନ, ଜନଜାତିଙ୍କୁ ପ୍ରତିନିଧିତ୍ବ କରୁଥିବା ମୁଖ୍ୟମନ୍ତ୍ରୀଙ୍କ ରାଜ୍ୟରେ ଏ କି ଦଶା ?
ନନ୍ଦିଘୋଷ ବ୍ୟୁରୋ: ବନ୍ଦ ହେଲାଣି ଜନଜାତି ବୁଣାକାରଙ୍କ ଜୀବିକା । ଆଉ ଦେଖିବାକୁ ମିଳୁନି ଡଙ୍ଗରିଆଙ୍କ କପଡ଼ାଗନ୍ଦା ଶାଲ । ନବୀନ ସରକାର ଅମଳରେ ମିଳୁଥିବା ସହାୟତା ଆଉ ମିଳୁନି । ବୁଣାକାର ଏବେ ରୋଜଗାର ପାଇଁ ବାହାର ରାଜ୍ୟକୁ ଗଲେଣି । ଏଭଳି ସ୍ଥିତି ଦେଖିବାକୁ ମିଳିଛି ରାୟଗଡ଼ା ଓ ଗଞ୍ଚାମ ଜିଲ୍ଲାରେ । ଖାଲି ସେତିକି ନୁହେଁ, ଅଭିଯୋଗ ହୋଇଛି ୩ ମାସ ହେଲାଣି ମୋହନ ସରକାର ବନ୍ଦ କରିଦେଇଛନ୍ତି ଆଦିମ ଜନଜାତି ସଶକ୍ତିକରଣ ଓ ଜୀବିକା ଉନ୍ନତିକରଣ କାର୍ଯ୍ୟକ୍ରମ । ଜନଜାତିଙ୍କ ପାଖରେ ପହଞ୍ଚୁନି ପ୍ରଶାସନ । ହେଲେ ବିଭାଗୀୟ ମନ୍ତ୍ରୀଙ୍କ ଉତ୍ତର କିଛି ବି ଯୋଜନା ବନ୍ଦ ହୋଇନି । କଣ ପାଇଁ ଏଭଳି ସ୍ଥିତି ହୋଇଛି ବିଭାଗ ସ୍ତରରେ ଅନୁଧ୍ୟାନ କରାଯିବ ବୋଲି କହିଛନ୍ତି।
କ୍ଷମତାକୁ ଆସିଲ ରଙ୍ଗ ବଦଳାଇଲ, ଯୋଜନାର ନାମ ବଦଳାଇଲ । କ୍ଷମତାକୁ ଆସୁ ଆସୁ ବନ୍ଦ କଲେ ଜନଜାତିଙ୍କ ଜୀବିକା । ଜନଜାତିଙ୍କୁ ପ୍ରତିନିଧିତ୍ବ କରୁଥିବା ମୁଖ୍ୟମନ୍ତ୍ରୀଙ୍କ ରାଜ୍ୟରେ ଏ କି ଦଶା ? ସୂତା ମିଳୁନି । ପ୍ରୋତ୍ସାହନ ରାଶି ନାହିଁ । ବନ୍ଦ ହୋଇଛି ଓଡ଼ିଶା ଆଦିମ ଜନଜାତି ସଶକ୍ତିକରଣ ଓ ଜୀବିକା ଉନ୍ନତିକରଣ କାର୍ଯ୍ୟକ୍ରମ-OPELIP । ଏ ହେଉଛି ରାୟଗଡ଼ା ଜିଲ୍ଲାର ଅବସ୍ଥା । ଆଉ ଦେଖିବାକୁ ମିଳୁନି ଡଙ୍ଗରିଆ ପ୍ରସ୍ତୁତ କପଡ଼ାଗନ୍ଦା ଶାଲ । ଏବେ ନବୀନ ଶାସନକୁ ଝୁରୁଛନ୍ତି ଡଙ୍ଗରିଆ ଜନଜାତି । ଆଦିମ ଜନଜାତିଙ୍କ ଜୀବନ ଜୀବିକା ବିକାଶ ପାଇଁ ପୂର୍ବ ସରକାର ୨୦୧୭ ମସିହା ଜୁନରେ ଆରମ୍ଭ କରିଥିଲେ OPELIP କାର୍ଯ୍ୟକ୍ରମ । କିନ୍ତୁ ମୋହନ ସରକାର ଆସିବା ପରଠୁ ଜନଜାତିଙ୍କ ବିକାଶରେ ବି ପୂରାଇଛନ୍ତି କେଁ । ଗଞ୍ଚାମ ଜିଲ୍ଲାରେ ବି ସ୍ଥିତି ସଙ୍ଗୀନ । ବୁଣାକାରଙ୍କୁ ମିଳୁଥିବା ୬ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ସହାୟତା ମିଳୁନଥିବାରୁ ସେଠାକାର ହସ୍ତତନ୍ତ ଏବେ ଠପ୍ ହେବାକୁ ବସିଲାଣି । ମାସ କେଇଟା କ୍ଷମତା ଦଖଲ କରୁ କରୁ କ୍ଷମତାସୀନ ବିଜେପି ସରକାର ପୂର୍ବ ସରକାରଙ୍କ ଦ୍ବାରା ପ୍ରଚଳିତ ବୁଣାକାର ସହାୟତା ରାଶି ଓ ଭତ୍ତାରେ ରାଜନୀତି ପୂରାଇଛନ୍ତି । ଆଉ ବୁଣାକାରଙ୍କ ପେଟକୁ ଲାତ ମାରିଛନ୍ତି ବୋଲି ଅଭିଯୋଗ ହୋଇଛି । ଏବେ ତନ୍ତ କାମ ବନ୍ଦ ଯୋଗୁ ଜୀବନ ଜୀବିକା ପାଇଁ ଗଞ୍ଜାମ ଅଞ୍ଚଳର ଭେଣ୍ଡିଆ ଏବେ ବାହାର ରାଜ୍ୟ ମୁହାଁ ହେଲେଣି ।
ରାଜ୍ୟରେ ଜନଜାତିଙ୍କ ବିକାଶକୁ ନୂଆ ଦିଗନ୍ତ ଦିଆଯିବ । ଏପରି ନାରା ଦେଇ କ୍ଷମତାକୁ ଆସିଛି ଡବଲ ଇଞ୍ଜିନ ସରକାର । ହେଲେ ବାସ୍ତବ ସ୍ଥିତି ଓଲଟା । ଏବେ ବୁଣାକାର ଓ ଜନଜାତିଙ୍କ ବାସ୍ତବ ସ୍ଥିତି ସାମନାକୁ ଆସିବା ପରେ ହସ୍ତତନ୍ତ, ବୟନ ଓ ହସ୍ତକାରିଗରୀ ବିଭାଗ ମନ୍ତ୍ରୀ ରଖିଛନ୍ତି ଏମିତି ଉତ୍ତର । କହିଛନ୍ତି, ପୂର୍ବ ସରକାରଙ୍କ କୌଣସି ଯୋଜନା ବନ୍ଦ ହୋଇନି । କଣ ପାଇଁ ପ୍ରଶାସନ ଜନଜାତିଙ୍କ ପାଖରେ ପହଞ୍ଚିନି । ସେ ନେଇ ଅନୁଧ୍ୟାନ କରାଯିବ ।…
ବିଡ଼ମ୍ବନାର ବିଷୟ । ପୂର୍ବ ସରକାର ଅମଳରେ ଜନଜାତିଙ୍କୁ ମୁଖ୍ୟ ସ୍ରୋତରେ ସାମିଲ ପାଇଁ ମାଳ ମାଳ ଯୋଜନା ପ୍ରସ୍ତୁତ ହୋଇଥିଲା । ସ୍ବତନ୍ତ୍ର ବିକାଶ ପରିଷଦଠୁ ଆରମ୍ଭ କରି ବହୁବିଧ ଜୀବିକା ଉପାର୍ଜନ ପାଇଁ ସ୍ବତନ୍ତ୍ର ଆର୍ଥିକ ସହାୟତାର ବ୍ୟବସ୍ଥା କରାଯାଇଥିଲା । ବାସ୍ତବରେ ଜନଜାତିଙ୍କ ଦଶାଦିଶା ଏ ସରକାର ଅମଳରେ କଣ ହେବ ତାକୁ ନେଇ ବୁଦ୍ଧିଜୀବୀ ସନ୍ଦିହାନ ।
କଟକ ଏସସିବି ମେଡିକାଲକୁ ଘାରିଛି ଡାକ୍ତର ଚିନ୍ତା
ନନ୍ଦିଘୋଷ ବ୍ୟୁରୋ: କଟକ ଏସସିବି ମେଡିକାଲକୁ ଘାରିଛି ଡାକ୍ତର ଚିନ୍ତା । ମେଡିକାଲର ବିଭିନ୍ନ ବିଭାଗରେ ଖାଲି ପଡିଛି ମାଳ ମାଳ ଡାକ୍ତରୀ ପଦବୀ । ସମସ୍ୟାକୁ ମାସ ମାସ ବିତିଯାଇଥିଲେ ସୁଦ୍ଧା ନା ସ୍ୱାସ୍ଥ୍ୟ ବିଭାଗ ନା ଏସସିବି ପ୍ରଶାସନ, ସମସ୍ୟାର ସମାଧାନ କରିପାରୁ ନାହାନ୍ତି । ଫଳରେ ଦୂରଦୂରାନ୍ତ ଆସୁଥିବା ରୋଗୀ ଆବଶ୍ୟକ ସେବା ନପାଇ ଘରୋଇ ହସପିଟାଲ ମୁହାଁ ହେଉଛନ୍ତି । ସେପଟେ ଏହାକୁ କତୃପକ୍ଷ ସ୍ୱୀକାର କରିଥିଲେ ସୁଦ୍ଧା ରୋଗୀ ସମସ୍ୟାକୁ ଏଡାଇ ଯାଇଛନ୍ତି ।
ସମସ୍ଯାରେ ଏସସିବି ମେଡିକାଲ । ଡାକ୍ତର ଅଭାବ ଯୋଗୁଁ ସମସ୍ଯା ଭୋଗୁଛନ୍ତି ରୋଗୀ । ସେବା ନପାଇ ଘରୋଇ ଡାକ୍ତଖାନା ମୁହାଁ ରୋଗୀ । ପୂର୍ବଭାରତର ରିଫେରାଲ ହସ୍ପିଟାଲ ଭାବରେ ପରିଚିତ କଟକ ଏସସିବି ମେଡାକାଲ । ହେଲେ ଡାକ୍ତର ଅଭାବ ଏବେ ହସପିଟାଲ ପାଇଁ ସାଜିଛି ମୁଖ୍ଯ ସମସ୍ଯା । ମାଳ ମାଳ ପ୍ରଫେସର ଆସୋସିଏଟ ପ୍ରଫେସର ଆସିଷ୍ଟାଣ୍ଡ ପ୍ରଫେସର ପଦବୀ ଖାଲି ପଡିଛି । ଏପରିକି ମେଡିକାଲ ପରିଚାଳନା ପାଇଁ ନାହାନ୍ତି ସ୍ଥାୟୀ ଅଧିକ୍ଷକ । ଯିଏ କଲେଜ ଅଧକ୍ଷ ସିଏ ଚଳାଉଛନ୍ତି ମେଡିକାଲ । ଫଳରେ ମେଡିକାଲରୁ ଫେରି ଘରୋଇ ହସପିଲରେ ଶୋଷଣର ଶିକାର ହେଉଛନ୍ତି ରୋଗୀ ଓ ତାଙ୍କ ସମ୍ପର୍କୀୟ । ଯାହାକୁ ନେଇ ବଢୁଛି ଅସନ୍ତୋଷ ।
ଏସସିବି ମେଡିକାଲର ବିଭିନ୍ନ ବିଭାଗ, ଆଇସିୟୁ, କାଜୁଏଲଟି ତଥା ମେଡିକାଲ ଶିକ୍ଷାଦାନ ପାଇଁ ୪୦୬ ପୋଷ୍ଟ ରହିଛି । କିନ୍ତୁ ଏଠାରେ ୬୩ ସ୍ୱୀକୃତି ପ୍ରାପ୍ତ ପ୍ରଫେସର ଥିବା ବେଳେ ଅଛନ୍ତି ୪୧ ଜଣ । ୧୨ ପଦବୀ ଖାଲି ଥିବା ବେଳେ ୧୦ ଜଣ ଅବସରପ୍ରାପ୍ତ ପ୍ରଫେସରଙ୍କୁ ଥଇଥାନ କରାଯାଇଛି । ସେହିପରି ୧୦୬ ଆସୋସିଏଟ ପ୍ରଫେସର ପଦବୀରୁ ଅଛନ୍ତି ମାତ୍ର ୬୧ ଜଣ । ୨୩୭ ଜଣ ଆସିଷ୍ଟାଣ୍ଡ ପ୍ରଫେସରରୁ ଅଛନ୍ତି ୧୯୭ ଜଣ । କର୍ତ୍ତୃପକ୍ଷ ଏହାକୁ ସ୍ୱୀକାର କରୁଥିଲେ ସୁଦ୍ଧା ଚିକିତ୍ସା ସେବା ବିଗିଡ଼ିବା ପ୍ରସଙ୍ଗକୁ ଏଡାଇ ଯାଇଛନ୍ତି । କିନ୍ତୁ ଯେତେ ଲୁଚାଇଲେ ବି ଏହି ସଂଖ୍ୟା ହିଁ ଏସସିବିରେ କିପରି ଚାଲିଛି ଚିକିତ୍ସା ସେବା ତାହା ବୟାନ କରୁଛି ।
ଦାରିଙ୍ଗବାଡ଼ି ମାଙ୍କିପଡ଼ା ଆମ୍ବ ଟାକୁଆ ମୃତ୍ଯୁ ଘଟଣା : ଆରଡିସି ସ୍ତରୀୟ ତଦନ୍ତ ନିର୍ଦ୍ଦେଶ
ନନ୍ଦିଘୋଷ ବ୍ୟୁରୋ: ଦାରିଙ୍ଗବାଡ଼ି ମାଙ୍କିପଡ଼ା ଆମ୍ବ ଟାକୁଆ ମୃତ୍ଯୁ ଘଟଣା । ଅଘଟଣର ୬ ଦିନ ପରେ ଚେତିଲେ ସରକାର । ଆରଡିସି ସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ଯମନ୍ତ୍ରୀ ମୋହନ । ଟାକୁଆ ଟ୍ରାଜେଡିର ତଦନ୍ତ କରିବେ ଆରଡିସି । ଆମ୍ବ ଟାକୁଆ ଜାଉ ଖାଇ ୨ ମହିଳାଙ୍କର ମୃତ୍ଯୁ ହୋଇଥିବାବେଳେ ଆଉ ଦୁଇ ମହିଳା ଏସସିବିରେ ଜୀବନ ସହ ସଂଘର୍ଷ କରୁଛନ୍ତି । ୩ ମାସ ହେଲା ଚାଉଳ ନମିଳିବାରୁ ଭୋକ ବିକଳରେ ଲୋକ ଆମ୍ବ ଟାକୁଆ ଖାଇଥିଲେ ବୋଲି ଅଭିଯୋଗ କରିଛନ୍ତି । ଚାଉଳ ମିଳିଥିବା ନେଇ ମନ୍ତ୍ରୀ ବାରମ୍ବାର ଅଭିଯୋଗ କରୁଥିବା ଅଭିଯୋଗ ହୋଇଛି । ଯାହାକୁ ନେଇ ସରକାରଙ୍କ ଉପରକୁ ଅଙ୍ଗୁଳି ଉଠିଛି । ଏଭଳି ସମୟରେ ମୁଖ୍ଯମନ୍ତ୍ରୀ ଆରଡିସି ତଦନ୍ତ ନିର୍ଦ୍ଦେଶ ଦେଇଛନ୍ତି ।
ପଲିଥିନ ତଳେ କଟୁଛି ଦମ୍ପତିଙ୍କ ଜୀବନ
ନନ୍ଦିଘୋଷ ବ୍ୟୁରୋ: ଗରିବ ମାନଙ୍କୁ ଘର ଯୋଗାଇଦେବା ପାଇଁ ସରକାରଙ୍କ ମୋ କୁଡିଆ, ଇନ୍ଦିରା ଆବାସ ଏବଂ ପ୍ରଧାନମନ୍ତ୍ରୀ ଆବାସ ଯୋଜନା ଭଳି ଅନେକ ଯୋଜନା ରହିଛି । ହେଲେ ଆଜି ବି ଅସହାୟ ଦମ୍ପତିଙ୍କ ପାଖରେ ପହଞ୍ଚିପାରିନି ଘର ଖଣ୍ଡିଏ । ଫଳରେ ଭଙ୍ଗା ଦଦରା ଘରେ ପଲିଥିନ ତଳେ ଜୀବନ ବିତାଉଛନ୍ତି ଅସହାୟ ଦମ୍ପତି ।
ଭାଙ୍ଗି ଯାଇଛି ଘର । ବାହାର ଅବସ୍ଥା ଯେମିତି ଭିତର ଅବସ୍ଥା ତାଠୁ ଅଧିକ ଖରାପ । ଘର ଭିତରୁ ଦିଶୁଛନ୍ତି ସୂର୍ଯ୍ୟ ଆଉ ଚନ୍ଦ୍ର । ଏହାରି ଭିତରେ ଦୟନୀୟ ଭାବେ ଜୀବନ ବିତାଉଛନ୍ତି ଅସହାୟ ଦମ୍ପତି । ସୁବର୍ଣ୍ଣପୁର ଜିଲ୍ଲା ତରଭା ବ୍ଲକ କଟାପାଲି ଗାଁର ଅସହାୟ ବୃଦ୍ଧ ସମରୁ ଗୁରୁଙ୍କ ଘର । ଏଇଠି ରୋଷେଇ,ଏଇଠି ଖାଇବା ଆଉ ଏଇଠି ଶୋଇବା । ବହୁ କଷ୍ଟରେ ଦୁଇ ଅସହାୟ ଦମ୍ପତି ଚଳୁଥିଲେ ମଧ୍ଯ ଏପର୍ଯ୍ଯନ୍ତ ଏମାନଙ୍କ ପାଖେ ପହଞ୍ଚି ପାରିନି ସରକାରୀ ଯୋଜନାରେ ଘର ଖଣ୍ଡେ । ଯେଉଁ ଖଣ୍ଡେ ଘର ଥିଲା ତାହା ଏବେ ବର୍ଷାରେ ଭାଙ୍ଗିରୁଜି ଯିବାରୁ ବଡ ଦୟନୀୟ ଭାବେ ଜୀବନ କାଟୁଛନ୍ତି ଦୁହେଁ ।
ଏବେ ବୟସର ଅହରାହ୍ନରେ ସମରୁ । ତାଙ୍କର ନା ଅଛି ପୁଅ ନା ଝିଅ । ପରିବାର କହିଲେ କେବଳ ସ୍ତ୍ରୀ । ସେବି ଦିବ୍ୟାଙ୍ଗ । ନା ଚାଲି ପାରୁଛନ୍ତି ନା କୌଣସି କାମ କରିପାରୁଛନ୍ତି । ନା ପାଖରେ ଅଛି ଜମିବାଡି ନା କାମ କରିବାକୁ ଦେହରେ ବଳ ଅଛି । ଯେଣ ତେଣ ପ୍ରକାରେ ପରିବାର ତ ଚଳାଇ ନେଉଛନ୍ତି କିନ୍ତୁ ଘର ଖଣ୍ଡିଏ କରିବାକୁ ବଳନାହିଁ । ଏଣୁ ସରକାରୀ ଯୋଜନାରେ ଘରଖଣ୍ଡେ ପାଇଁ ବାରମ୍ବାର ବିଭିନ୍ନ ଅଫିସକୁ ଧାଇଁଲେଣି । ହେଲେ ଏଯାଏଁ ସରକାରୀ ଯୋଜନା ତାଙ୍କ ପାଇଁ ସାତସପନ ପାଲଟିଛି । ଫଳରେ ଆଜିବି ଘରେ ପଲିଥିନ ଢାଙ୍କି ଦୟନୀୟ ଭାବେ ଜୀବନ ବିତାଉଛନ୍ତି ଦୁହେଁ । ତେଣୁ ସମରୁଙ୍କୁ ଆବାସ ଯୋଜନାରେ ଘର ଖଣ୍ଡେ ଯୋଗାଇଦେବାକୁ ସରକାର ପାଖରେ ଦାବି କରିଛନ୍ତି ଗ୍ରାମବାସୀ । ସେପଟେ ଖୁବଶୀଘ୍ର ସମରୁଙ୍କୁ ଆବାସ ଯୋଜନାରେ ଘର ଯୋଗାଇ ଦିଆଯିବ ବୋଲି କହିଛନ୍ତି ଜିଲ୍ଲାପାଳ ।
ଅସହାୟ ବିଧବା ମହିଳାଙ୍କ ଭତ୍ତା ଟଙ୍କା ହଡପ
ନନ୍ଦିଘୋଷ ବ୍ୟୁରୋ: ଅସହାୟ ବିଧବା ମହିଳାଙ୍କ ଭତ୍ତା ଟଙ୍କା ହଡପ । ୧୫ ମାସ ଧରି ମହିଳାଙ୍କୁ ମିଳିନି ଭତ୍ତା । ଭୋଗରାଇ ବ୍ଳକ ମହିଷପୁର ଗାଁର ପାର୍ବତୀଙ୍କୁ ଭତ୍ତା ଟଙ୍କା ମିଳିନଥିବାରୁ ଦୁର୍ଦ୍ଦିନରେ ବିତାଉଛନ୍ତି ଜୀବନ । ପ୍ରଶ୍ନ ଉଠୁଛି ପାର୍ବତୀଙ୍କ ଭତ୍ତା ଟଙ୍କା ଖାଇଛି କିଏ ?
ଅସହାୟ ବିଧବା ମହିଳାଙ୍କ ଭତ୍ତା ଟଙ୍କା ହଡପ । କାହିଁକି ମିଳୁନି ବିଧବା ମହିଳାଙ୍କ ଭତ୍ତା ଟଙ୍କା ? । ୧୫ ମାସର ଭତ୍ତା ଗାଏବ ପଛରେ କାହାର ହାତ ? ଏ ହେଉଛନ୍ତି ଭୋଗରାଇ ବ୍ଲକ ମହିଷପୁର ଗାଁର ପାର୍ବତୀ ଦଳାଇ । ସ୍ଵାମୀଙ୍କ ମୃତ୍ଯୁ ପରେ ବିଧବା ଭତ୍ତା ପାଇଁ ଆବେଦନ କରିଥିଲେ ପାର୍ବତୀ । ପରିବାର ପ୍ରତିପୋଷଣ ପାଇଁ ଭତ୍ତା ଟଙ୍କା ସାହାର ସାଜିବ ବୋଲି ଭାବିଥିଲେ । ୨୦୨୩ ଅଗଷ୍ଟ ମାସରୁ ପାର୍ବତୀଙ୍କୁ ଭତ୍ତା ମିଳିବା ପାଇଁ ଟଙ୍କା ମଞ୍ଜୁର ହୋଇଥିଲା । ଭତ୍ତା ଆଣିବା ପାଇଁ ପଞ୍ଚାୟତ ଅଫିସକୁ ଯାଇଥିଲେ ପାର୍ବତୀ । ହେଲେ ସେଠାରେ ଅଧିକାରୀ ପାର୍ବତୀଙ୍କୁ ଭତ୍ତା ଟଙ୍କା ମଞ୍ଜୁର ହୋଇନାହିଁ ବୋଲି କହିଥିଲେ । କିନ୍ତୁ ଏବେ ତଥ୍ୟ କହୁଛି ବାସନ୍ତୀଙ୍କ ୨୦୨୩ ଅଗଷ୍ଟରୁ ଭତ୍ତା ଟଙ୍କା ମଞ୍ଜୁର ହୋଇଛି । ହେଲେ ସେ ଏପର୍ଯ୍ଯନ୍ତ ଭତ୍ତା ଟଙ୍କା ପାଇପାରିନଥିବା ନେଇ ଅଭିଯୋଗ କରିଛନ୍ତି ହିତାଧିକାରୀ ।
ଏଠି ପ୍ରଶ୍ନ ଉଠୁଛି ପାର୍ବତୀଙ୍କ ଭତ୍ତା ଟଙ୍କା ଖାଇଛି କିଏ ? ଦୀର୍ଘ ୧୫ ମାସ ଧରି ଭତ୍ତା କାହିଁକି ପାଉ ନଥିଲେ ପାର୍ବତୀ? ଏହା ସରକାରୀ କର୍ମଚାରୀ ଓ ପଞ୍ଚାୟତ ନିର୍ବାଚିତ ପ୍ରତିନିଧିଙ୍କ ଦାୟିତ୍ବହୀନତା କି ? ନା ଯୋଜନାବଦ୍ଧ ଭାବେ ଟଙ୍କା ଆତ୍ମସାତ କରାଯାଇଛି ? । ଏମିତି ପୁଳାପୁଳା ପ୍ରଶ୍ନ ଉଠୁଛି । ଘଟଣା ସମ୍ପର୍କରେ ଭୋଗରାଇ ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ପଚାରିବାରୁ ସେ କହିଛନ୍ତି ଘଟଣା ସମ୍ବନ୍ଧରେ ତଦନ୍ତ ଚାଲିଛି ଖୁବଶୀଘ୍ର କାର୍ଯ୍ଯାନୁଷ୍ଠାନ ନିଆଯିବ । ଦୀର୍ଘ ୧୫ ମାସର ଭତ୍ତା ଟଙ୍କାକୁ କିଏ କରିଛି ଆତ୍ମସାତ ? ଘଟଣାର ତଦନ୍ତ କରି ବାସନ୍ତୀଙ୍କୁ ଟଙ୍କା ପ୍ରଦାନ କରିବା ସହିତ ଦୋଷୀଙ୍କ ବିରୋଧରେ ଦୃଢ କାର୍ଯ୍ଯାନୁଷ୍ଠାନ ନେବାକୁ ସାଧାରଣରେ ଦାବି ଜୋର ଧରିଛି ।
ବର୍ଷା ଅଭାବରୁ ଜମି ଫାଟି ଆଁ କରିଛି, ଚିନ୍ତାରେ ଚାଷୀ
ନନ୍ଦିଘୋଷ ବ୍ୟୁରୋ: ପାଣି ଅଭାବରୁ ଜମି ଫାଟି ଆଁ । ଗଞ୍ଜାମ ଜିଲ୍ଲା ଆସିକା ବ୍ଲକରେ ୭ ହଜାର ୨ ଶହ ହେକ୍ଟର ଚାଷ ଜମିରେ ବିଭିନ୍ନ କିସମର ଧାନ ଫସଲ ଚାଷ ହୋଇଥିଲା । ହେଲେ ବର୍ଷା ଅଭାବରୁ କେଉଁଠି ଧାନ ପାଚିନି ତ ଆଉ କେଉଁଠି ଜମି ଫାଟି ଆଁ କରିଛି । ଯାହାକୁ ଦେଖି ଚିନ୍ତାରେ ଚାଷୀକୂଳ ।
ଆଶ୍ଵିନ ଯାଇ କାର୍ତ୍ତିକ ମାସ ଅଧା ହେଲାଣି । ଚାଷ ଜମିରେ ସୁନାର ଫସଲ ଚହଟି ଉଠିବା କଥା । ହେଲେ କେଉଁଠି ଧାନ ପାଚିନି ତ ଆଉ କେଉଁଠି ଜମି ଫାଟି ଆଁ କରିଛି । ଏଭଳି ଦୃଶ୍ଯ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଆସିକା ବ୍ଲକ ସମେତ ଶେରଗଡ଼, ଧରାକୋଟ ଓ ହିଞ୍ଜିଳି ବ୍ଲକରେ । ଗତ ଦୁଇ ମାସ ହେଲା ବର୍ଷା ହୋଇନଥିବାରୁ ଢ଼େପ ଜମି ଗୁଡିକରେ ଜମି ଫାଟି ଆଁ କରିଛି । ଆସିକା ବ୍ଲକରେ ମୋଟ ୭ ହଜାର ୨ ସହ ହେକ୍ଟର ଚାଷ ଜମିରେ ବିଭିନ୍ନ କିସମର ଧାନ ଚାଷ ହୋଇଥିଲା । ହେଲେ ଜମିକୁ ଜଳସେଚିତ ହୋଇ ପାରୁନଥିବାରୁ ଫସଲ ନଷ୍ଟ ହେବାକୁ ବସିଲାଣି । ଯାହାକୁ ନେଇ ଚିନ୍ତାରେ ଚାଷୀ ।
ବର୍ଷା ଅଭାବ କାରଣରୁ ହେକ୍ଟର ହେକ୍ଟର ଧାନ ଫସଲ ନଷ୍ଟ ହେବାକୁ ବସିଛି । କିଛି ଚାଷୀ କେନାଲରୁ ପାଇପ ଯୋଗେ ଜମିକୁ ପାଣି ମଡାଉଥିବା ନେଇ ଦେଖିବାକୁ ମିଳିଛି । ଧାର କରଜ କରି ଚାଷ କରିଥିବା ଚାଷୀଙ୍କ ମୁଣ୍ଡରେ ଚଡକ ପଡିଛି । ସେପଟେ ଚାଷ ଜମିକୁ ଜଳସେଚନ କରିବା ନିମନ୍ତେ କୌଣସି ସୁବିଧା ନଥିବା ନେଇ ଚାଷୀ ଅଭିଯୋଗ କରିଛନ୍ତି ।