ସୁନ୍ଦରଗଡ଼: ଗର୍ଭବତୀଙ୍କୁ ଗୁଳି କରି ହତ୍ୟା । ଏଭଳି ଜଘନ୍ୟ ହତ୍ୟାକାଣ୍ଡ ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା ବଣାଇ ଅଞ୍ଚଳ ଟିକାୟତପାଲି ଥାନା ଅନ୍ତର୍ଗତ ଝିର୍ଡାପାଲୀ ଗାଁରେ । ଗତକାଲି ରାତିରେ କିଛି ଲୁଟେରା ଲୁଟ କରୁଥିଲେ । ଏହି ସମୟରେ ମହିଳା ଜଣକ ଜୋରରେ ପାଟି କରିବାରୁ ମହିଳାଙ୍କୁ ଗୁଳି କରିଥିଲେ ଲୁଟେରା। ଏହି ଗୁଳିକାଣ୍ଡରେ ମହିଳାଙ୍କ ମୃତ୍ୟୁ ଘଟିଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଚଳାଇଛି ।
ସୂଚନା ଅନୁଯାୟୀ, ଟିକାୟତପାଲି ଥାନା ଅନ୍ତର୍ଗତ ଝିର୍ଡାପାଲୀ ଗ୍ରାମରେ ଦେବେନ ବେହେରା ଓ ତାଙ୍କ ପତ୍ନୀ ସମ୍ୟା ଶୋଇଥିବା ବେଳେ ଲୁଟେରାମାନେ ଘର କବାଟ ବାଡେଇଥିଲେ । କବାଟ ବାଡେଇବା ଶବ୍ଦ ଶୁଣି ପତ୍ନୀ ସମ୍ୟା କବାଟ ଖୋଲିଥିଲେ । ଏହାପରେ ସମ୍ୟା ଚିତ୍କାର କରିବାରୁ ଦୃର୍ବୃତ୍ତମାନେ ତାଙ୍କ ଉପରକୁ ଗୁଳି ଚଳାଇଥିଲେ । ଗୁଳି ଫୁଟିବା ଶବ୍ଦ ଶୁଣି ସ୍ଵାମୀ ଦେବେନ ବାହାରି ଦୌଡିକି ଆସି ଦେଖିଲାବେଳକୁ ପତ୍ନୀ ସମ୍ୟା ତଳେ ପଡି ଛଟପଟ ହେବା ସହ ପ୍ରବଳ ରକ୍ତସ୍ରାବ ହେଉଥିବା ଦେଖି ପାଖ ପଡୋଶୀଙ୍କୁ ଡାକିଥିଲେ । ସମ୍ୟାଙ୍କୁ ବଣାଇଁ ଉପଖଣ୍ଡ ଚିକିତ୍ସାଳୟ ଭର୍ତ୍ତି କରାଯାଇଥିଲା ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଛି । ମୃତ ମହିଳା ସମ୍ୟା ୭ ମାସର ଗର୍ଭବତୀ ଥିଲେ ଓ ଏହା ପ୍ରଥମ ଗର୍ଭ ଥିଲା ।
