ମକର ସଂକ୍ରାନ୍ତି ଉପଲକ୍ଷେ କଟକ ଜିଲ୍ଲାର ଅନ୍ୟତମ ଶୈବ ପୀଠ ବାବା ଧବଳେଶ୍ଵରଙ୍କ ପୀଠରେ ପ୍ରବଳ ଗହଳି ଦେଖିବାକୁ ମିଳିଛି। ଭୋର 4ଟାରେ ପହଡ ଖୋଲାଯାଇ 108 ଗରା ଜଳରେ ବାବା ଙ୍କୁ ସ୍ନାନ କରାଯାଇ ମଙ୍ଗଳା ଆଳତୀ କରାଯିବା ପରେ ଖେଚୁଡି ଭୋଗ ଲାଗି କରାଯାଇଥିଲା। ବାବାଙ୍କୁ ବିଭିନ୍ନ ଫୁଲରେ ସଜ୍ଜିତ କରାଯିବା ପରେ ସର୍ବସାଧାରଣଙ୍କ ଦର୍ଶନ ଜାରି ରହିଛି। । ମଧ୍ୟାହ୍ନରେ ଧବଳେଶ୍ଵରଙ୍କ ନିକଟରେ ମକର ଚାଉଳ ଲାଗି କରାଯିବ। ସୁରକ୍ଷା ଦୃଷ୍ଟିରୁ ୧ପ୍ଲାଟୁନ ପୋଲିସ ଫୋର୍ସ ସହ ଡିଏସପି , ଗୁରୁଡିଝାଟିଆ ଆଇଆଇସି ଉପସ୍ଥିତ ରହି ଭିଡକୁ ନିୟନ୍ତ୍ରଣ କରିଛନ୍ତି।
ମକର ସଂକ୍ରାନ୍ତିକୁ ନେଇ ବ୍ରହ୍ମପୁର ଉତ୍ସବମୁଖର
ମକର ସଂକ୍ରାନ୍ତି ପର୍ବ ତେଲୁଗୁ ସଂପ୍ରଦାୟର ଲୋକଙ୍କ ସବୁଠୁ ବଡ଼ ପର୍ବ। ଚାରିଦିନ ଧରି ଉତ୍ସବ ବେଶ୍ ଧୁମ୍ ଧାମରେ ପାଳନ ହେବାକୁ ଥିବା ବେଳେ ବ୍ରହ୍ମପୁରରେ ଗତକାଲି ମଧ୍ୟରାତ୍ରରୁ ଭୋଗି ଉତ୍ସବ ପାଳନ ହୋଇଯାଇଛି। ଏହାକୁ ନେଇ ରେଶମ ସହର ବ୍ରହ୍ମପୁର ବେଶ ଉତ୍ସବମୁଖର । ଭୋଗି ଜାଳି ନାଚ ଗୀତରେ ବେଶ ମସଗୁଲ ହୋଇଛନ୍ତି ତେଲୁଗୁ ସଂପ୍ରଦାୟର ଲୋକେ । ମକର ସଂକ୍ରାନ୍ତିକୁ ତେଲୁଗୁ ନୂଆବର୍ଷ ଭାବେ ପାଳନ କରାଯାଉଥିବାରୁ ପୁରୁଣା ବର୍ଷକୁ ବିଦାୟ ଦେବା ସହ ନୂଆବର୍ଷକୁ ସ୍ୱାଗତ କରିଛନ୍ତି । ଏହି ଭୋଗୀ ପର୍ବ ପାଳନଙ୍କୁ ନେଇ ବେଶ ଉତ୍ସାହିତ ସମସ୍ତେ ।
ରାଜ୍ୟର ସମସ୍ତ ସରକାରୀ କାର୍ଯ୍ୟାଳୟମାନଙ୍କରେ ହେବ ଓଡ଼ିଆ ଭାଷାରେ ସରକାରୀ କାର୍ଯ୍ୟ
ରାଜ୍ୟର ସମସ୍ତ ସରକାରୀ କାର୍ଯ୍ୟାଳୟମାନଙ୍କରେ ହେବ ଓଡ଼ିଆ ଭାଷାରେ ସରକାରୀ କାର୍ଯ୍ୟ। ସମସ୍ତ ବ୍ଲକ, ଜିଲ୍ଲା ସ୍ତରରୁ ଆରମ୍ଭ କରି ରାଜ୍ୟସ୍ତର ପର୍ଯ୍ୟନ୍ତ ଏଣିକି ଓଡିଆ ଭାଷାରେ ସରକାରୀ କାର୍ଯ୍ୟ ସମ୍ପାଦନ କରାଯିବ। ସରକାରୀ କାର୍ଯ୍ୟାଳୟରୁ ପ୍ରକାଶ ପାଉଥିବା ସମସ୍ତ ନୋଟିସ, ବିଜ୍ଞପ୍ତି, ପତ୍ର ବିନିମୟ ଇତ୍ୟାଦି ଓଡିଆ ଭାଷାରେ ହେବ। ଯେଉଁ ଅଧିକାରୀ ଏହାର ଖିଲାପ କରିବେ ତାଙ୍କୁ ଏହି ବିଷୟରେ ତାଗିଦ କରାଯିବ। ଆବଶ୍ୟକ ହେଲେ କାରଣ ଦର୍ଶାଅ ନୋଟିସ ଜାରି କରାଯିବ। ସମସ୍ତ ବିଭାଗ, ବିଭାଗୀୟ ମୁଖ୍ୟ ଦପ୍ତର, ଜିଲ୍ଲାପାଳଙ୍କ କାର୍ଯ୍ୟାଳୟ, ସମସ୍ତ ଅଧସ୍ତନ କାର୍ଯ୍ୟାଳୟ, ସରକାରଙ୍କ ଦ୍ବାରା ପରିଚାଳିତ ସମସ୍ତ ଅନୁଷ୍ଠାନ ଯେପରିକି ବିଭିନ୍ନ ନିଗମ, ପୌର ସଂସ୍ଥା ଓ ସ୍ବୟଂ ଚାଳିତ ସଂସ୍ଥା ଇତ୍ୟାଦି ଏହି ନିର୍ଦ୍ଦେଶକୁ ପାଳନ କରିବେ। ପ୍ରଶାସନିକ ଭାଷାକୋଷକୁ ନିରନ୍ତର ଭାବେ ଅଦ୍ୟତନ କରାଯିବ। ସରକାରୀ କାର୍ଯ୍ୟାଳୟମାନଙ୍କରେ ଏହାକୁ ଉପଲବ୍ଧ କରାଇବା ନିମନ୍ତେ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରାଯିବ। ଏନେଇ ରାଜ୍ୟର ସମସ୍ତ ବିଭାଗ, ସମସ୍ତ ବିଭାଗୀୟ ମୁଖ୍ୟ ଦପ୍ତର, ସମସ୍ତ ଜିଲ୍ଲାପାଳଙ୍କୁ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ସ୍ୱତନ୍ତ୍ର ଶାସନ ସଚିବଙ୍କ ପକ୍ଷରୁ ଚିଠି କରାଯାଇଛି।
ମକର ସଂକ୍ରାନ୍ତିରେ ଘଟଗାଁ ମା’ ତାରିଣୀଙ୍କ ପୀଠରେ ଭକ୍ତଙ୍କ ସମାଗମ
ମକର ସଂକ୍ରାନ୍ତିରେ ଘଟଗାଁ ମା ତାରିଣୀଙ୍କ ପୀଠରେ ଭକ୍ତଙ୍କ ସମାଗମ ଦେଖିବାକୁ ମିଳୁଛି | ସକାଳୁ ସେବାୟତ ମାନେ ମାଙ୍କୁ ପ୍ରଥମେ ମହାସ୍ନାନ, ମାଜଣା, ବଡ ସିଂହାର ବେଶ, ମଙ୍ଗଳ ଆଳତୀ ସମେତ ଯଥା ରିତିକାନ୍ତିରେ ପୂଜାର୍ଚ୍ଚନା କରିଛନ୍ତି। ମାଙ୍କୁ ସୁନାବେଶରେ ସଜ୍ଜିତ କରାଯାଇଛି। ମକର ସଂକ୍ରାନ୍ତିରେ ମକର ବୁଡ ଦେଇ ମାଙ୍କର ସୁନାବେଶ ଦେଖିବା ପାଇଁ ସକାଳୁ ସକାଳୁ ଭକ୍ତଙ୍କ ସମାଗମ ହୋଇଛି | ଏହା ସହିତ ମକର ସଂକ୍ରାନ୍ତିରେ ମାଙ୍କ ନିକଟରେ ମକର ଚାଉଳ ଭୋଗ ଲାଗିଥାଏ । ଏହି ମକର ଭୋଗ ପାଇଲେ ଭାଗ୍ୟବାନ ହୋଇଥାଏ ବୋଲି ବିସ୍ବାସ ରହିଛି ।
ଶ୍ରୀମନ୍ଦିରରେ ମହାପ୍ରଭୁଙ୍କ ବଡ ମହାସ୍ନାନ: ଦର୍ଶନ ପ୍ରାୟ ଏକଘଣ୍ଟା ବନ୍ଦ
ଶ୍ରୀମନ୍ଦିରରେ ମହାପ୍ରଭୁଙ୍କ ବଡ ମହାସ୍ନାନ। ଦର୍ଶନ ପ୍ରାୟ ଏକଘଣ୍ଟା ବନ୍ଦ। ଜୟ ବିଜୟ ଦ୍ଵାର ପାଖରେ ରକ୍ତ ପଡ଼ିଥିବାରୁ ବଡ ମହାସ୍ନାନ ଅନୁଷ୍ଠିତ ହେଉଛି। ଅବକାଶ ପୂଜା ପରେ ବଡ ମହାସ୍ନାନ କରାଯାଉଛି। ବଡମହାସ୍ନାନ ନୀତି ଏବେ ଆରମ୍ଭ ହୋଇଛି। ଏକ ଘଣ୍ଟା ପରେ ସ୍ୱାଭାବିକ୍ ହେବ ସର୍ବସାଧାରଣ ଦର୍ଶନ
ମାସକର ଶିଶୁକନ୍ୟାକୁ ବିକିଦେଲେ ବାପା-ମାଆ: ଭଦ୍ରକରୁ ଆସିଛି ଏଭଳି ସଂଗୀନ ଅଭିଯୋଗ
ମାସକର ଶିଶୁକନ୍ୟାକୁ ବିକିଦେଲେ ବାପମାଆ । ଭଦ୍ରକ ଭଣ୍ଡାରିପୋଖରୀ ଅଂଚଳରୁ ଆସିଛି ଏଭଳି ସଂଗୀନ ଅଭିଯୋଗ। ପୁଅ ଓ ବହୁ ମିଶି ଶିଶୁ କନ୍ୟାକୁ ବିକ୍ରି କରିଥିବା ଥାନାରେ ଅଭିଯୋଗ ଆଣିଛନ୍ତି ଜେଜେମା। ବୟାବନାପୁର ଗାଁର ବୃଦ୍ଧା ସାବିତ୍ରୀ ଦାସ ଭଣ୍ଡାରିପୋଖରୀ ଥାନାରେ ଏନେଇ ଅଭିଯୋଗ କରିଛନ୍ତି । ତାଙ୍କ ମାସକର ନାତୁଣୀକୁ ପୁଅ ସିପୁ ଦାସ ଓ ବହୁ ମିଶି ଗତ ୧୨ ତାରିଖରେ ମେଡିକାଲ ନେବାକୁ କହି ନେଇ ଯାଇଥିଲେ। ପୁଅ ବୋହୁ ଫେରିଲେ ହେଲେ ନାତୁଣୀ ଫେରି ନଥିଲା। ପଚାରିବାରୁ ପୁଅ ବୋହୁ ପାଟିତୁଣ୍ଡ କରିଥିଲେ। ନାତୁଣୀକୁ ବିକ୍ରି କିମ୍ବା ମାରି ଦେଇଥିବା ସନ୍ଦେହ କରିଛନ୍ତି । ସାବିତ୍ରୀ । ଅଭିଯୋଗ ପରେ ଭଣ୍ଡାରିପୋଖରୀ ପୋଲିସ ଘଟଣାର ତଦନ୍ତ କରିବା ସହିତ କଟକରୁ ଶିଶୁ କନ୍ୟାକୁ ଉଦ୍ଧାର କରିଥିବା ଓ଼ ଶିଶୁ କନ୍ୟାକୁ ସିଡ଼ବ୍ଲ୍ୟୁସିକୁ ହସ୍ତାନ୍ତର କରିଥିବା ସୂଚନା ମିଳିଛି। ଘଟଣାର ଯାଞ୍ଚ କରୁଛି ପୋଲିସ।
ଦେଶୀ ମଦଭାଟି ଉପରେ ପୋଲିସ ଓ ଅବକାରୀ ବିଭାଗର ମିଳିତ ରେଡ
ଦେଶୀ ମଦଭାଟି ଉପରେ ପୋଲିସ ଓ ଅବକାରୀ ବିଭାଗର ମିଳିତ ରେଡ। ବାଲେଶ୍ଵର ଟାଉନ ଥାନା ଅନ୍ତର୍ଗତ ପୁରୁଣା ବାଲେଶ୍ବର ଅଞ୍ଚଳରେ ସ୍ଥାନୀୟ ଅଞ୍ଚଳରେ ବହୁଳ ଭାବରେ ଦେଶୀ ମଦ ବ୍ୟବସାୟ ଜାରି ରହିଥିବା ବେଳେ ଗତକାଲି ରାତିରୁ ଚଢାଉ ଜାରି ରହିଛି। ଘଟଣାସ୍ଥଳରେ ତିନି ପ୍ଲାଟୁନ ଫୋର୍ସ ମୁତୟନ କରାଯାଇଥିବାବେଳେ ଟାଉନ ଥାନା ପୋଲିସ ଓ ଅବକାରୀ ବିଭାଗର ଟିମ୍ ଉପସ୍ଥିତ ରହିଛି। ମାମଲାରେ ୧୫ ଜଣ ଲୋକଙ୍କୁ ଅଟକ ରଖାଯାଇଛି। ମଦ ରାନ୍ଧିବା ପାଇଁ ବ୍ୟବହୃତ ସାମଗ୍ରୀକୁ ଜବତ କରିବା ସହ ବହୁ ପୋଚକୁ ନଷ୍ଟ କରିଛି ଅବକାରୀ ବିଭାଗ।
ଆଜି ପବିତ୍ର ମକର ସଂକ୍ରାନ୍ତି: ଶ୍ରୀମନ୍ଦିରରେ ଶ୍ରୀଜିଉ ମାନଙ୍କର ମକର ଚଉରାସୀ ବେଶ ଅନୁଷ୍ଠିତ ହେବ
ଆଜି ପବିତ୍ର ମକର ସଂକ୍ରାନ୍ତି। ଏହି ଅବସରରେ ଶ୍ରୀମନ୍ଦିରରେ ଶ୍ରୀଜିଉ ମାନଙ୍କର ମକର ଚଉରାସୀ ବେଶ ଅନୁଷ୍ଠିତ ହେବ। ଏକମାସ ବାପ ଘରେ ବିତାଇ ଶ୍ରୀମନ୍ଦିରକୁ ଲକ୍ଷ୍ମୀ ଠାକୁରାଣୀଙ୍କ ପ୍ରତ୍ୟାବର୍ତନ ନେଇ ଆଜି ମକର ସଂକ୍ରାନ୍ତି ଥିବାରୁ ମଙ୍ଗଳବାର ବଡ଼ଦେଉଳରେ ପହଞ୍ଚିଛି ମକର ତାଡ଼। ମହାପ୍ରଭୁଙ୍କ ପାଖରେ ପବିତ୍ର ମକର ସଂକ୍ରାନ୍ତିରେ ମକର ଚାଉଳ ଓ ମକର ଚଉରାଶି ଭୋଗ ଲାଗି ହେବ। ସ୍ୱତନ୍ତ୍ର ମକର ତାଡ଼ରେ ହିଁ ମକର ଚାଉଳ ଭୋଗ କରାଯିବ। ଶ୍ରୀମନ୍ଦିରରେ ଦ୍ୱିପ୍ରହର ଧୂପ ବଢିଲା ପରେ କୁମ୍ଭାର ବିଶୋୟୀ ସେବକମାନେ ବାଘମୁହାଁ ବାନ୍ଧି ମା’ ଆଲାମଚଣ୍ଡୀ ଠାକୁରାଣୀଙ୍କ ପୀଠରୁ ଘଣ୍ଟ ଛତା କାହାଳି ସହିତ ୫ଟି ମକର ତାଡ଼ ଶ୍ରୀମନ୍ଦିରକୁ ବିଜେ କରାଇଛନ୍ତି। ମକର ତାଡ଼ ଶ୍ରୀମନ୍ଦିର ଭିତର ବେଢାରେ ଗୋଟିଏ ଥର ବୁଲାଇ ଅଚିନ୍ତା ପହଣ୍ଡି ରୋଷ ବେହେରଣ ଠାରେ ରଖାଯାଇଛି।
ପବିତ୍ର ମକର ସଂକ୍ରାନ୍ତି ପାଇଁ କଟକର ବିଭିନ୍ନ ମନ୍ଦିରରେ ଆଜି ଶ୍ରଦ୍ଧାଳୁଙ୍କ ଭିଡ
ପବିତ୍ର ମକର ସଂକ୍ରାନ୍ତି ପାଇଁ କଟକର ବିଭିନ୍ନ ମନ୍ଦିରରେ ଆଜି ଶ୍ରଦ୍ଧାଳୁଙ୍କ ଭିଡ ଲାଗିଛି। ତେବେ କଟକରେ ରହୁଥିବା ୩୦ ହଜାର ତେଲଗୁ ସଂପ୍ରଦାୟର ଲୋକମାନେ ଆଜି ଭୋଗି ଉତ୍ସବ ପାଳନ କରୁଛନ୍ତି। ଅଗ୍ନୀ ଜାଳି ସେଥିରେ ପାତ୍ରରେ ପାଣି ଗରମ କରି ସେଥିରେ ସ୍ନାନ କଲେ ଶରୀର ସୁସ୍ଥ ରହେ ବୋଲି ବିଶ୍ଵାସ ରହିଛି। ଏଥି ସହିତ ଆସନ୍ତାକାଲି ତେଲଗୁ ଲୋକମାନେ ପବିତ୍ର ପୋଙ୍ଗଲ ପାଳନ ପାଇଁ ମନ୍ଦିର କୁ ସାଜ୍ଜସଜା କରି ପୂଜାପାଠ ଓ ଆଳତି ଅର୍ପଣ କରୁଛନ୍ତି।
ଅଭାବନୀୟ ଘଟଣା, ନିଆଁରେ ପଡି ଦୁଇ ମାସର ଶିଶୁ ଗୁରୁତର
ନିଆଁରେ ପଡି ଦୁଇ ମାସର ଶିଶୁ ଗୁରୁତର । ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ଚାଲନ୍ତି ଗାଁରେ ଅଭାବନୀୟ ଘଟଣା। ଚୁଲି ନିଆଁରେ ପଡି ଦୁଇ ମାସର ଶିଶୁ ଗୁରୁତର ହୋଇଥିବା ସୂଚନା ମିଳିଛି। ପ୍ରବଳ ଶୀତ ଦାଉରୁ ରକ୍ଷା ପାଇବା ପାଇଁ ଗାଁର ତାରନ ହେମ୍ବ୍ରମଙ୍କ ପରିବାର ଚୁଲିରେ ନିଆଁ ଲଗାଇ ନିଆଁ ପାଖରେ ବସିଥିଲେ। ଅସାବଧାନତା ଯୋଗୁଁ ମାଆ ହାତରୁ ଶିଶୁଟି ଚୁଲିରେ ପଡି ଯାଇଥିଲା । ତେବେ ତୁରନ୍ତ ଚୁଲି ଭିତରୁ ଶିଶୁକୁ ପରିବାର ଲୋକେ ଉଦ୍ଧାର କରିଥିବା ବେଳେ ଅଧିକାଂଶ ଅଂଶ ପୋଡି ଯାଇଥିବା ଜଣାପଡିଛି । ଗୁରୁତର ଶିଶୁକୁ ପ୍ରଥମେ ବସ୍ତା ମେଡିକାଲ ଓ ପରେ ଅଧିକ ଗୁରୁତର ହେବାରୁ ବାଲେଶ୍ୱର ମେଡିକାଲକୁ ପଠାଯାଇଛି ।