ଭୁବନେଶ୍ୱର : ଚଳନ୍ତା ଟ୍ରେନ ଆଗକୁ ଡେଇଁ ଜୀବନ ହାରିଲେ ବ୍ୟବସାୟୀ । ଭୁବନେଶ୍ବରଠାରୁ ଦଶପଲ୍ଲ। ଯାଉଥିବା ଟ୍ରେନ ଆଗକୁ ଧାଇଁ ଆସି ଆତ୍ମହତ୍ୟା କରିଛନ୍ତି ବ୍ୟବସାୟୀ । ଖୋର୍ଦ୍ଧା ରୋଡ ରେଳ ଡିଭିଜନ ଅନ୍ତର୍ଗତ ଖୋର୍ଦ୍ଧା ଟାଉନ ଷ୍ଟେସନ ନିକଟରେ ଘଟିଛି ଏଭଳି ଘଟଣା । ମୃତକ ଖୋର୍ଦ୍ଧା ଭାଲିଆବାଡିର ଶରତ କୁମାର ମହାପାତ୍ର ବୋଲି ଆରପିଏଫ ସୂଚନା ଦେଇଛି । ଜିଆରପି ପୋଲିସ ମୃତଦେହ ଜବତ କରି ଘଟଣାର ତଦନ୍ତ ଜାରି ରଖିଛି।
ଗୋଟିଏ ଦିନର ବିରତି ପରେ ପୁଣି ଫେରିବ ବର୍ଷା, ଡିସେମ୍ବର ୨୪ରୁ ଭିଜିବ ଓଡ଼ିଶା
ଭୁବନେଶ୍ୱର : ଚାଲିଛି ବର୍ଷା ଶୀତର ଲୁଚକାଳି ଖେଳ । ଗୋଟିଏ ଦିନର ବ୍ୟବଧାନ ପରେ ପୁଣି ଡିସେମ୍ବର ୨୪ରୁ ବର୍ଷା । ବର୍ଷା ସହ ଘନ କୁହୁଡି କରିବ କଲବଲ । ପଶ୍ଚିମା ଝଡ ପ୍ରଭାବରେ ବର୍ଷା ସମ୍ଭାବନା ରହିଥିବା ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ୭ ଜିଲ୍ଲାରେ ମଧ୍ୟମ ଧରଣର ବର୍ଷା ଆକଳନ କରାଯାଇଛି । କେନ୍ଦ୍ରାପଡା, ଜଗତସିଂହପୁର,ପୁରୀ,ଖୋର୍ଦ୍ଧା, ଗଞ୍ଜାମ, ଗଜପତି,ରାୟଗଡା ଜିଲ୍ଲାରେ ହେବ ବର୍ଷା ହେବା ସମ୍ଭାବନା ରହିଛି ।
୯ ଜିଲ୍ଲା ବାଲେଶ୍ବର, ଭଦ୍ରକ, ଯାଜପୁର, କଟକ, ଢେଙ୍କାନାଳ, ନୟାଗଡ, କନ୍ଧମାଳ, କୋରାପୁଟ, ମାଲକାନଗିରିରେ ମଧ୍ଯମ ଧରଣର ବର୍ଷା ସମ୍ଭାବନା ରହିଛି । ୨୫ ତାରିଖରେ ୧୧ ଜିଲ୍ଲାରେ ହାଲୁକା ବର୍ଷା ସମ୍ଭାବନା ରହିଛି । ଆଜି ଏବଂ କାଲି ଘନ କୁହୁଡି ନେଇ ୫ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । କେନ୍ଦୁଝର, ସୁନ୍ଦରଗଡ, ଝାରସୁଗୁଡା, ଅନୁଗୁଳ ଓ କଳାହାଣ୍ଡିକୁ ସତର୍କତା ଜାରି କରାଯାଇଛି ।
୫ ଜିଲ୍ଲାରେ ୫୦ ମିଟର ତଳକୁ ଖସିବ ଦୃଶ୍ୟମାନ ଦୂରତା। ୨୬ରୁ ୨୮ ତାରିଖ ଯାଏଁ ରହିବ ଶୁଖିଲା ପାଗ ରହିବ । ୨୯ ତାରିଖରୁ ପୁଣି କୋହଲା ପାଗ ସହ ବର୍ଷା ସମ୍ଭାବନା ରହିଛି । ଆସନ୍ତା ୩ ଦିନ ପରେ ଶୀତର ପ୍ରଭାବ ବଢିବା ନେଇ ସୂଚନା ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର।
ସୁପରଷ୍ଟାର ଅଲୁ ଅର୍ଜୁନଙ୍କ ଘର ଉପରକୁ ପଥର ମାଡ଼
ହାଇଦ୍ରାବାଦ : ଅଭିନେତା ଅଲୁ ଅର୍ଜୁନଙ୍କ ଘର ଉପରେ ପଥରମାଡ଼। ଘର ଆଗରେ ପ୍ରତିବାଦ କରିବା ସହ ଟମାଟୋ ଓ ଅଣ୍ଡା ମାଡ଼ କରିଛନ୍ତି କିଛି ଅଜଣା ଯୁବକ। ହାଇଦ୍ରାବାଦ ଜୁବୁଲି ହିଲ୍ସ ସ୍ଥିତ ବାସଭବନ ଆଗରେ ହୋଇଥିଲା ଏହି ପଥର ମାଡ଼। ଘର ବାହାରେ କିଛି ଅଜଣା ଛାତ୍ର ଆଖିବୁଜା ପଥରମାଡ଼ କରିଥିଲେ। ଘର ଆଗରେ ବିକ୍ଷୋଭ ପ୍ରଦର୍ଶନ କରିବା ସହ ବାସଭବନ ପରିସରକୁ ପଶି ଭଂଗାରୁଜା କରିଥିଲେ। ଆକ୍ରମଣରେ ହାଇଦ୍ରାବାଦ ଓସମାନିଆ ୟୁନିଭର୍ସିଟିରେ ସକ୍ରିୟ JAC ଛାତ୍ର ସଂଗଠନର ସଦସ୍ୟ ଏହି ଆକ୍ରମଣ କରିଥିବା ସୂଚନା ମିଳିଛି। ଜେଏଲି ସଂଗଠନର ୬ ଜଣ ସଦସ୍ୟ ଏହି ଆକ୍ରମଣ କରିଥିବା ଜୁବଲି ହିଲ୍ସ ପୋଲିସ କହିଛି।
ତେବେ ମାମଲାରେ ବର୍ତ୍ତମାନ ପର୍ଯ୍ୟନ୍ତ କୌଣସି ଅଭିଯୋଗ କରାଯାଇନାହିଁ। ସୋସିଆଲ ମିଡିଆରେ ଆଜି ସୁପରଷ୍ଟାର ଅଲୁ ଅର୍ଜୁନ ପୋଷ୍ଟ କରି ବାର୍ତ୍ତା ଦେଇଥିଲେ। ଅଫଲାଇନ କିମ୍ବା ଅନଲାଇନରେ କାହାକୁ ଅପମାନଜନକ ଶବ୍ଦ ବ୍ୟବହାର ନକରିବାକୁ କହିଥିଲେ। ଗତକାଲି ପ୍ରେସମିଟ କରି ଘଟଣା ନେଇ ଦୁଃଖ ପ୍ରକାଶ କରିଥିଲେ ଅଲୁ ଅର୍ଜୁନ। ସିନେମା ପୁଷ୍ପା-୨କୁ ନେଇ ହାଇଦ୍ରାବାଦ ସଂଧ୍ୟା ସିନେମା ହଲରେ ଦଳାଚକଟା ହୋଇଥିଲା। ଏଥିରେ ଜଣେ ମହିଳାଙ୍କ ମୃତ୍ୟୁ ଘଟିଥିବାବେଳେ ତାଙ୍କର ୮ ବର୍ଷୀୟ ନାବାଳକ ଗୁରୁତର ହୋଇ ପଡିଥିଲେ।ଏହି ମାମଲାରେ ଏଫଆଇଆର ହେବା ପରେ ଗତ ୧୩ ତାରିଖରେ ଗିରଫ ହୋଇଥିଲେ ଅଲୁ ଅର୍ଜୁନ। ତେବେ ତେଲଙ୍ଗାନା ହାଇକୋର୍ଟ ଅଲୁ ଅର୍ଜୁନଙ୍କୁ ଜାମିନ ପ୍ରଦାନ କରିଛନ୍ତି ।
ବଦଳିଲା ନିର୍ବାଚନ ଆଚରଣ ଅଧିନିୟମ : ସାଧାରଣ ଲୋକ କିମ୍ବା ପ୍ରାର୍ଥୀଙ୍କୁ ମିଳିବନି ମତଦାନ କେନ୍ଦ୍ରର ଫୁଟେଜ୍
ନୂଆଦିଲ୍ଲୀ : ବଦଳିଲା ନିର୍ବାଚନ ଆଚରଣ ଅଧିନିୟମ । ଗଣତନ୍ତ୍ର ପ୍ରତି ବଡ଼ ଚାଲେଞ୍ଜ। ଆଉ ସାଧାରଣ ଲୋକ କିମ୍ବା ପ୍ରାର୍ଥୀଙ୍କୁ ମିଳିବନି ମତଦାନ କେନ୍ଦ୍ରର ସିସିଟିଭି ଫୁଟେଜ୍ କି ଅନ୍ୟ ତଥ୍ୟ । ଯେ ପର୍ଯ୍ୟନ୍ତ କମ୍ପିଟେଣ୍ଟ୍ କୋର୍ଟ ନିର୍ଦ୍ଦେଶ ଦେଇନାହାନ୍ତି ଭାରତୀୟ ନିର୍ବାଚନ କମିଶନ ଏହି ତଥ୍ୟ କାହାରିକୁ ଉପଲବ୍ଧ କରିବେନାହିଁ । ନିର୍ବାଚନ କମିଶନଙ୍କ ସୁପାରିସ ଆଧାରରେ କେନ୍ଦ୍ର ଆଇନ ମନ୍ତ୍ରାଳୟ ଗତ ଶୁକ୍ରବାର ୧୯୬୧ ନିର୍ବାଚନ ଆଚରଣ ବିଧି ଅଧିନିୟମ ଧାରା ୯୩ ଉପଧାରା ୨ କ୍ଲଜ୍ କ’ରେ କରିଛି ସଂଶୋଧନ । ଏ ନେଇ ଫାଳିକିଆ ଗେଜେଟ୍ ବିଜ୍ଞପ୍ତି ପରେ ବିରୋଧୀ ଆଖି ଲାଲ କଲେଣି । ଅଭିଯୋଗ କରିଛନ୍ତି, ଭାରତର ନିର୍ବାଚନ ପ୍ରକ୍ରିୟାକୁ ହାଇଜାକ୍ କରୁଛି ବିଜେପି । କିପରି ହେବ ସ୍ବଚ୍ଛ ନିର୍ବାଚନ ? ହରିୟାଣା ବିଧାନସଭା ନିର୍ବାଚନକୁ ନେଇ ଏକ ମାମଲାରେ ପଞ୍ଜାବ-ହରିୟାଣା ହାଇକୋର୍ଟଙ୍କ ନିର୍ବାଚନ କମିଶନଙ୍କୁ ନିର୍ଦ୍ଦେଶ ଥିଲା ମତଦାନ କେନ୍ଦ୍ର ସମସ୍ତ ଭୋଟର ତାଲିକା ଓ ବୈଦ୍ୟୁତିକ ପ୍ରମାଣ ଦେବାକୁ । କିନ୍ତୁ ହାଇକୋର୍ଟଙ୍କ ନିର୍ଦ୍ଦେଶ ପାଳନ ନ କରି ବିଜେପିକୁ ସୁହାଇଲା ଭଳି ଅଧିନିୟମ ପରିବର୍ତ୍ତନ କରାଗଲା । ଯଦି ନିୟମ ରହିଛି କମ୍ପିଟେଣ୍ଟ୍ କୋର୍ଟଙ୍କ ନିର୍ଦ୍ଦେଶରେ ମତଦାନ କେନ୍ଦ୍ରର ସମସ୍ତ ତଥ୍ୟ ଦିଆଯାଇପାରିବ, ତାହେଲେ ପଞ୍ଜାବ-ହରିୟାଣା କୋର୍ଟ କଣ କମ୍ପିଟେଣ୍ଟ୍ କୋର୍ଟ ନୁହଁନ୍ତି କି? ଏହି ପ୍ରସଙ୍ଗରେ ଏପରି କହିଛନ୍ତି ଏଆଇସିସି ସଭାପତି ମଲ୍ଲିକାର୍ଜୁନ ଖଡ଼ଗେ। ରାଷ୍ଟ୍ରୀୟ ମୁଖପାତ୍ର ଜୟରାମ ରମେଶଙ୍କ ସମେତ କଂଗ୍ରେସର ତୁଙ୍ଗ ନେତା ସୋସିଆଲ ମିଡିଆରେ କେନ୍ଦ୍ର ସରକାରଙ୍କୁ କଟାକ୍ଷ କରିଛନ୍ତି । ଏପରି କରିବା ଦ୍ବାରା ନିର୍ବାଚନ ପ୍ରକ୍ରିୟା ଉପରେ ବିଶ୍ବାସ ଉଠିଯିବ ବୋଲି ଆଶଙ୍କା ପ୍ରକାଶ ପାଇଛି।
ଅନ୍ୟପଟେ ବାମଦଳ, ଆମ ଆଦମୀ ପାର୍ଟି ଓ ବିଶେଷଜ୍ଞ ଏହି ପ୍ରସଙ୍ଗରେ କେନ୍ଦ୍ର ସରକାର ଓ ଭାରତର ନିର୍ବାଚନ କମିଶନଙ୍କ ବିଶ୍ବସନୀୟତା ନେଇ ପ୍ରଶ୍ନ ଉଠାଇଛନ୍ତି । ଆପ୍ ଅଭିଯୋଗ କରିଛି ଆଗକୁ ଦିଲ୍ଲୀ ନିର୍ବାଚନ ଥିବାରୁ କେନ୍ଦ୍ର ସରକାର ନିଜକୁ ସୁହାଇଲା ଭଳି ଏପରି କରିଛନ୍ତି । ବିରୋଧୀ ରାଜନୈତିକ ଦଳ ଏହି ପ୍ରସଙ୍ଗକୁ ନେଇ ଯେତେ ଯାହା କହିଲେ ବି ଅଧିନିୟମ ସଂଶୋଧନ ଆବଶ୍ୟକ ଥିଲା ବୋଲି ଯୁକ୍ତି ଦର୍ଶାଇଛନ୍ତି ନିର୍ବାଚନ କମିଶନଙ୍କ ପୂର୍ବତନ ବରିଷ୍ଠ ଉପଦେଷ୍ଟା । କହିଛନ୍ତି, ରାଜନୈତିକ ଦଳମାନେ ନିର୍ବାଚନ ଅଧିନିୟମକୁ ଭଲ କରି ଅଧ୍ଯୟନ କରିବା ଆବଶ୍ୟକ ରହିଛି । ଭୋଟରଙ୍କ ଜୀବନକୁ ସୁରକ୍ଷା ଦେବା ମଧ୍ୟ ନିର୍ବାଚନ କମିଶନଙ୍କ ସାମ୍ବିଧାନିକ ଦାୟିତ୍ବ । ଜମ୍ମୁ ଓ କଶ୍ମୀର ଓ ନକ୍ସଲ ପ୍ରବଣ ଭଳି ସମ୍ବେଦନଶୀଳ ଅଞ୍ଚଳରେ ନିର୍ବାଚନ କରିବା ଦୁରୂହ ବ୍ୟାପାର । ମତଦାନ କେନ୍ଦ୍ର ତଥ୍ୟ ସାଧାରଣରେ ଉପଲବ୍ଧ ହେଲେ ସମ୍ବେଦନଶୀଳ ଅଞ୍ଚଳରେ ଭୋଟରଙ୍କ ଜୀବନ ବିପଦରେ ପଡ଼ିପାରେ । ଏହି ପ୍ରସଙ୍ଗରେ ରାଜ୍ୟ ଆଇନ ମନ୍ତ୍ରୀ ମୁହଁ ଖୋଲିବାକୁ ନାରାଜ । ନିର୍ବାଚନରେ ସ୍ବଚ୍ଛତା ଓ ଲୋକଙ୍କ ଜୀବନକୁ ସୁରକ୍ଷା ଦେବା ପାଇଁ ନିର୍ବାଚନ ଆଚରଣ ଅଧିନିୟମରେ ପରିବର୍ତ୍ତନ କରାଯାଇଛି । କିନ୍ତୁ ଭାରତୀୟ ଗଣତନ୍ତ୍ରରେ ଜନତା ଓ ପ୍ରାର୍ଥୀଙ୍କ ଅଧିକାରକୁ ଏହା ବାଧିତ କରୁଛି କି ନାହିଁ ତାକୁ ନେଇ ନୂଆ ବିତର୍କ ସୃଷ୍ଟି କରିଛି ।
ରାଜ୍ୟର ସ୍ଵାର୍ଥ ଏବଂ ଓଡ଼ିଆଙ୍କ ହିତ ପାଇଁ ଶୀତ ଅଧିବେଶନରେ ଲଢ଼ିଲେ ବିଜେଡିର ସପ୍ତରଥୀ ସାଂସଦ
ନୂଆଦିଲ୍ଲୀ : ସଂସଦର ଶୀତ ଅଧିବେଶନରେ ବିଜେଡି ସାଂସଦମାନଙ୍କ ପ୍ରଦର୍ଶନ ଉଚ୍ଚକୋଟୀର ରହିଛି । ରାଜ୍ୟସଭାର ଗୃହକାର୍ଯ୍ୟରେ ସେମାନେ ସକ୍ରିୟ ଅଂଶଗ୍ରହଣ କରି ପ୍ରଶ୍ନ ପଚାରିବା ସହିତ ଆଲୋଚନାରେ ଭାଗ ନେଇଛନ୍ତି। ରାଜ୍ୟର ସ୍ଵାର୍ଥକୁ ନେଇ ବିଜେଡି ସାଂସଦ ଅନେକ ପ୍ରଶ୍ନ ପଚାରି ଥିଲେ, ବିଭିନ୍ନ ପ୍ରସଙ୍ଗ ଉତଥାପନ କରିଥିଲେ । ତାସହିତ ବିଭିନ୍ନ ଜାତୀୟ ସ୍ଵାର୍ଥ ସମ୍ମିଳିତ ଆଲୋଚନାରେ ସକ୍ରିୟ ଭାବେ ଭାଗ ନେଇଥିଲେ । ଓଡ଼ିଶାକୁ ସ୍ଵତନ୍ତ୍ର ରାଜ୍ୟ ପାହ୍ୟା ପ୍ରଦାନ ପାଇଁ ଏଥର ମଧ୍ୟ ରାଜ୍ୟସଭାରେ ଦାବି ଦୋହରାଇଥିଲେ ସସ୍ମିତ ପାତ୍ର । ଏ ନେଇ ସେ କେନ୍ଦ୍ର ସରକାରଙ୍କୁ ପ୍ରଶ୍ନ କରିଥିଲେ। ସସ୍ମିତ ପାତ୍ର ମୋଟ ୩୮ ଟି ଅଣତାରକା ଓ ୫ଟି ତାରକା ପ୍ରଶ୍ନ ଉତଥାପନ କରିଥିଲେ। ରାଜ୍ୟର ସ୍ଵାର୍ଥ ସମ୍ମିଳିତ ପ୍ରସଙ୍ଗ ଉଠାଇବା ସହିତ କୋଷ୍ଟାଲ ହାଇୱେ, ପୋଲାଭରମ ପ୍ରକଳ୍ପ, ଓଡ଼ିଶା ଉପରେ ଏହି ପ୍ରକଳ୍ପର ନକରାତ୍ମକ ପ୍ରଭାବ ପ୍ରସଙ୍ଗ ଉଠାଇଥିଲେ ସସ୍ମିତ ପାତ୍ର । ଏହା ସହିତ କୋଇଲା ରୟାଲଟି ସଂଶୋଧନ ପାଇଁ ସେ ଦାବି ଦୋହରାଇଥିଲା। କୋଇଲା ରୟାଲଟି ସଂଶୋଧନ ହେଲେ ଓଡ଼ିଶା ଲାଭବାନ ହେବ। କିନ୍ତୁ କେନ୍ଦ୍ର ଏହା କରୁନଥିବାରୁ, ଦୃଷ୍ଟି ଆକର୍ଷଣ କରିଥିଲେ ସସ୍ମିତ ପାତ୍ର।
ସାଂସଦ ମାନସ ମଙ୍ଗରାଜ ୩୦ଟି ଅଣତାରକା ଓ ୪ଟି ତାରକା ପ୍ରଶ୍ନ ଉତଥାପନ କରିଥିଲେ। ବରିଷ୍ଠ ନାଗରିକଙ୍କ କଲ୍ୟାଣ, କୋଇଲା ଖନନ ଏବଂ ଓଡ଼ିଶାରେ MSME ର ବିକାଶ ସଂପର୍କିତ ପ୍ରଶ୍ନ ଉଠାଇ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ ମାନସ ମଙ୍ଗରାଜ । ଅଏଲ ଫିଲ୍ଡସ ସଂଶୋଧନ ବିଲ୍-୨୦୨୪ ଆଲୋଚନାରେ ଅଂଶଗ୍ରହଣ କରି, ପ୍ରଭାବିତ ହେବାକୁ ଥିବା ଲୋକଙ୍କ ସମସ୍ୟାକୁ ଦୃଷ୍ଟିରେ ରଖି ଆଇନରେ ସଂଶୋଧନ କରିବାକୁ ସେ ପ୍ରସ୍ତାବ ଦେଇଥିଲେ। ଅଏଲ ରିଫାଇନାରି ଦୁର୍ଘଟଣା ସଂପର୍କରେ ଗୃହକୁ ଅବଗତ କରାଇଥିଲେ ମାନସ ମଙ୍ଗରାଜ।
ସାଂସଦ ସୁଲତା ଦେଓ ୧୮ ଟି ଅଣତାରକା ଓ ୨ଟି ତାରକା ପ୍ରଶ୍ନ ଉଠାଇଥିଲେ । ଦୁଇଟି ପ୍ରମୁଖ ଆଲୋଚନାରେ ସେ ଅଂଶ ଗ୍ରହଣ କରିଥିଲେ। ଭାରତୀୟ ବାୟୁଯାନ ବିଧେୟକ ସଂଶୋଧନ ବିଲ୍ ଓ ବଏଲର ସଂଶୋଧନ ବିଲ୍ ଆଲୋଚନାରେ ଅଂଶଗ୍ରହଣ କରି ଗଠନମୂଳକ ପ୍ରସ୍ତାବ ଦେଇଥିଲେ। ସେହିପରି ସାଂସଦ ମୁନ୍ନା ଖାନ୍ ୨୬ଟି ଅଣତାରକା ଓ ୪ଟି ତାରକା ପ୍ରଶ୍ନ ଉଠାଇଥିଲେ। ପୋଲାଭରମ ପ୍ରକଳ୍ପକୁ କେନ୍ଦ୍ର ସରକାର ଏକ ପାଖିଆ ସମର୍ଥନ କରି, ସଂଘୀୟ ବ୍ୟବସ୍ଥାକୁ ଉଲ୍ଲଘଂନ କରୁଛନ୍ତି ବୋଲି କହିଥିଲେ ମୁନ୍ନା ଖାଁ ।
ସେହିପରି ସାଂସଦ ନିରଞ୍ଜନ ବିଶି ୩୧ଟି ଅଣତାରକା ଓ ଗୋଟିଏ ତାରକା ପ୍ରଶ୍ନ ଉଠାଇଥିଲେ । ସମ୍ବିଧାନର ଅଷ୍ଟମ ଅନୁଛେଦରେ ହୋ, ମୁଣ୍ଡାରି, ଭୂମିଜ, କୁଇ, କୋଶଲୀ ଏବଂ ସଉରା ଭାଷାକୁ ସାମିଲ କରିବା ପାଇଁ ଦାବି କରିଥିଲେ ନିରଂଜନ ବିଶି। ସାଂସଦ ଦେବାଶିଷ ସାମନ୍ତରାୟ ୨୭ଟି ଅଣତାରକା ଓ ୪ଟି ତାରକା ପ୍ରଶ୍ନ ଉଠାଇଥିଲେ। ଓଡ଼ିଶାରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହିଳାଙ୍କ ପାଇଁ ସ୍ଵୟଂଶାସିତ ସଂସ୍ଥାରେ ୫୦ ପ୍ରତିଶତ ସଂରକ୍ଷଣ ଓ ମିଶନ ଶକ୍ତି ଭଳି ବଳିଷ୍ଠ ପଦକ୍ଷେପ ନେଇଥିବା କହିଥିଲେ ଦେବାଶିଷ ସାମନ୍ତରାୟ। ଅନ୍ୟପଟେ ସାଂସଦ ଶୁଭାଶିଷ ଖୁଣ୍ଟିଆ ୧୪ଟି ଅଣତାରକା ଓ ୩ଟି ତାରକା ପ୍ରଶ୍ନ ଉଠାଇଥିଲେ । ପୁରୀରେ ଅନ୍ତର୍ଜାତୀୟ ବିମାନ ବନ୍ଦର ପ୍ରତିଷ୍ଠା ଏବଂ ଓଡ଼ିଶାକୁ ଗ୍ୟାସ୍ ପାଇପ୍ ଲାଇନ୍ ସଂଯୋଗ ନେଇ ପ୍ରଶ୍ନ ଉଠାଇଥିଲେ ବିଜେଡିର ଏହି ସାଂସଦ।
ରାଉରକେଲାରେ ଅଣାୟତ ଆଇନଶୃଙ୍ଖଳା, ପୋଲିସର ଅପରେସନ ସୁରକ୍ଷାକୁ ଚ୍ୟାଲେଞ୍ଜ
ରାଉରକେଲା : ରାଉରକେଲାରେ ଅଣାୟତ ଆଇନଶୃଙ୍ଖଳା । ଦିନ ଦ୍ବିପ୍ରହରେ ଫୁଟୁଛି ଗୁଳି । ମାରଣାସ୍ତ୍ର ଧରି ରାଜରାସ୍ତାରେ ବୁଲୁଛନ୍ତି ଅପରାଧୀ । ଲୁଟ୍ ଛିନତାଇ, ଗଣ ଦୁଷ୍କର୍ମ, ରହାଜାନୀ, ଗୁଳିମାଡ଼ ଘଟଣା ବଢିବାରେ ଲାଗିଛି । ଅପରାଧ ଦମନ ପାଇଁ ପୋଲିସ ଏସପିଙ୍କ ନେତୃତ୍ବରେ ଚାଲିଛି ଅପରେସନ ସୁରକ୍ଷା । ହେଲେ ପୋଲିସ ଲୋକଙ୍କୁ ସୁରକ୍ଷା ଦେବାରେ ପୁଣି ଫେଲ୍ ମାରିଛି । ସକ୍ଟର ଦୁଇ ନିକଟରେ ଜଣେ ରେଲୱେ କର୍ମଚାରୀଙ୍କୁ ହୋଇଛି ଗୁଳିମାଡ଼ । ୟୁଥ ହଷ୍ଟେଲ ପକ୍ଷରୁ ସେକ୍ଟର ଦୁଇ ଛକ ନିକଟରେ ମାରଥନ ଚାଲିଥିବା ସମୟରେ ସଲିଲ କୁମାର ସାହୁ ରେଜିଷ୍ଟ୍ରେସନ କାଉଣ୍ଟରରେ ବସିଥିଲେ । ଏହି ସମୟରେ ତାଙ୍କ ପିଠିପଟରୁ ହୋଇଥିଲା ଅଚାନକ ଗୁଳିମାଡ଼ । ତୁରନ୍ତ ଚିକିତ୍ସା ପାଇଁ ରାଉରକେଲା ଇସ୍ପାତ ଜେନେରାଲ ହସପିଟାଲରେ ତାଙ୍କୁ ଭର୍ତ୍ତି କରାଯାଇଥିବାରୁ ଅଳ୍ପକେ ବଞ୍ଚିଯାଇଛି ଜୀବନ ।
ଗୁଳିକାଣ୍ଡର ପ୍ରକୃତ କାରଣ ଜଣା ପଡ଼ି ନଥିବାବେଳେ ସେକ୍ଟର ୩ ଥାନା ପୋଲିସ ଘଟଣାସ୍ଥଳରେ ଛାନବିନ ଜାରି ରଖିଛି । ପୋଲିସ ଗୋଟିଏ ଖୋଖା ଜଵତ କରି ଘଟଣାର ତଦନ୍ତ ଆରମ୍ଭ କରିଛି । ଦୁଇଦିନ ତଳେ ଉଦିତ ନଗର ଥାନାରେ ଜଣେ ନାବାଳିକାଙ୍କୁ ଦୁଷ୍କର୍ମ ନେଇ ଅଭିଯୋଗ ହୋଇଥିଲା । ବାରମ୍ବାର ଏପରି ଅପରାଧ ଘଟୁଥିବାରୁ ସହରରେ ପୋଲିସ ପକ୍ଷରୁ କରାଯାଉଛି ଅପରେସନ ସୁରକ୍ଷା । ତେବେ ବାହାରୁ ଚୋରା ବନ୍ଧୁକ ଆଣି ପୋଲିସକୁ ଚ୍ଯାଲେଞ୍ଜ ଦେଉଛନ୍ତି ଅପରାଧୀ । CISF ରେଞ୍ଜ ଫାୟାରିଙ୍ଗ କୋର୍ସ୍ ସମୟରେ ସେହି ଗୁଳି ଆସି ଯୁବକଙ୍କ ଦେହରେ ଵାଜିଥିବା ପୋଲିସ ପକ୍ଷରୁ ସନ୍ଦେହ କରାଯାଉଛି ।
ଉଦ୍ଧାର ହେଲା ଭିତରକନିକାରେ ଫସିଥିବା ପର୍ଯ୍ୟଟକଙ୍କ ବୋଟ
କେନ୍ଦ୍ରାପଡା : ଉଦ୍ଧାର ହେଲା ଭିତରକନିକାରେ ଫସିଥିବା ପର୍ଯ୍ୟଟକଙ୍କ ବୋଟ । ପର୍ଯ୍ୟଟକଙ୍କୁ ନେଇ ଯାଉଥିବା ସମୟରେ କୁମ୍ଭୀରିଆ ନଦୀ ମଧ୍ୟରେ ଫସିଥିଲା ବୋଟ। ୨ଟି ବୋଟରେ ମୋଟ ୪୦ ଜଣ ଥିବା ସୂଚନା ମିଳିଛି।ବନ ବିଭାଗର ଉଦ୍ୟମରେ ଉଦ୍ଧାର ହେଲା ଫସିଥିବା ବୋଟ। ମା ମଙ୍ଗଳା ଓ ମା ଗୁପ୍ତଚଣ୍ଡୀ ନାମକ ଦୁଇଟି ଘରୋଇ ବୋଟରେ ପର୍ଯ୍ୟଟକ ମାନେ ବୁଲିବାକୁ ଫସି ରହିଥିଲୋ। ବୋଟରେ ଯାନ୍ତ୍ରିକ ତ୍ରୁଟି ଯୋଗୁ ନଦୀ ମଝିରେ ଫସି ରହିଥିଲା।
ଲୋକଙ୍କ ପାଇଁ କାଳ ପାଲଟିଛି ତେନ୍ତୁଳି କେନାଲ ; ପାଣିରେ ପଶି ସ୍କୁଲ ଯାଉଛନ୍ତି କୁନି କୁନି ପିଲା
ନୂଆପଡ଼ା : ଲୋକଙ୍କ ପାଇଁ କାଳ ପାଲଟିଛି ତେନ୍ତୁଳି ନାଳ, ନିଦାବିଷ୍ଣୁ ସାଜିଛି ପ୍ରଶାସନ । ଦୀର୍ଘଦିନର ଦାବି ପରେ ନାଳରେ ହୋଇପାରିନାହିଁ ପୋଲ । ନୂଆପଡ଼ା ଜିଲ୍ଲା ଖଡିଆଳ ବ୍ଲକ ଡୁଆଝର ଗାଁର ତେନ୍ତୁଳି ନାଳରେ ପୋଲ ନଥିବାରୁ ଲୋକଙ୍କୁ ଯାତାୟାତ ପାଇଁ ସମସ୍ୟା ସୃଷ୍ଟି ହେଉଛି । ନାଳ ପାଣିରେ ପସି ଯିବା ଆସିବା କରୁଛନ୍ତି ଲୋକେ । ଦେଖନ୍ତୁ କିପରି କୁନି କୁନି ସ୍କୁଲ ପିଲା ଏହି ନାଳପାଣିରେ ପସି ସ୍କୁଲ ଯାଉଛନ୍ତି । ଶୀତ ଦିନେ ପାଣି କମ ରହୁଥିବା ବେଳେ ବର୍ଷା ଦିନେ ନାଳରେ ପାଣି ଭରିଯାଉ ଥିବାରୁ ନାଳ ପାରିହୋଇ ଯାତାୟତ ଏକ ପ୍ରକାର ଠପ୍ ହୋଇଯାଏ । ନାଳ ଆରପାରୀରେ ଥିବା ଜମିକୁ ଚାଷ ପାଇଁ ଆସିବା ମଧ୍ୟ ଏକ ପ୍ରକାର କଷ୍ଟକର ହୋଇପଡୁଛି । ଏହା ଆଜିର ନୁହେଁ, ଦୀର୍ଘଦିନରୁ ଏହି ସମସ୍ୟା ଲାଗିରହିଛି । ଯାତାୟତ ପାଇଁ ୨ଟି ପଞ୍ଚାୟତର ୫ଖଣ୍ଡ ଗାଁର ଲୋକେ ଏହି ରାସ୍ତା ଉପରେ ନିର୍ଭର କରନ୍ତି । ରାସ୍ତା ଅବସ୍ଥା ଛାଡ଼ନ୍ତୁ ନାଳ ପାଣିରେ ପଶି ଲୋକଙ୍କୁ ଯାତାୟତ କରିବାକୁ ପଡିଥାଏ । ଦୀର୍ଘ ଦିନ ହେଲା ସମସ୍ୟା ହୋଇ ରହିଛି ଏହି ସମସ୍ୟା ର ସମାଧାନ ଦିଗରେ ପ୍ରଶାସନ ଦୃଷ୍ଟି ଦେଉନଥିବା ଲୋକେ ଅଭିଯୋଗ କରିଛନ୍ତି।
ଡୁଆଝର ପଞ୍ଚାୟତରୁ ଦାବ୍ରି ପଞ୍ଚାୟତକୁ ସଂଯୋଗ କରିଥିବା ଏହି ରାସ୍ତା ନିତି ଦିନିଆ ଯାତାୟତର ଏକମାତ୍ର ମାଧ୍ୟମ । ଖଡିଆଳ ସହରକୁ ବ୍ୟବସାୟ ପାଇଁ ହେଉ ଅବା ଚାଷୀକୁ ଫସଲ ବିକ୍ରି ପାଇଁ ଏହି ନାଳ ପାରି ହୋଇ ଯିବାକୁ ପଡ଼େ । ସ୍ଵାସ୍ଥ୍ୟକେନ୍ଦ୍ରକୁ ଯିବାକୁ ହେଲେ ରୋଗୀଙ୍କୁ ନାଳ ପାରି କରି ନେବାକୁ ପଡ଼ିଥାଏ । ବର୍ଷା ଦିନରେ ଭରା ନାଳକୁ ପାରିହୋଇ ଯିବା ସମ୍ଭବପର ହେଉନଥିବା ବେଳେ ମାସ ମାସ ଧରି ଘରେ ରହି ପାଠପଢିଥାନ୍ତି ଛାତ୍ରଛାତ୍ରୀ । ଜରୁରୀ କାର୍ଯ୍ୟରେ ଲୋକଙ୍କ ପାଇଁ ଏହି ନାଳ ବାଧକ ସାଜିଥାଏ । ସମସ୍ୟାର ସମାଧାନ ପାଇଁ ତେନ୍ତୁଳି ନାଳରେ ଏକ ବ୍ରିଜ ନିର୍ମାଣ ପାଇଁ ସ୍ଥାନୀୟ ଲୋକେ ଦାବି କରିଛନ୍ତି । ସେପଟେ ଯୁଗ୍ମ ତଦନ୍ତ କରାଯାଇ ରାସ୍ତା ଓ ପୋଲ ନିର୍ମାଣ ପାଇଁ ପଦକ୍ଷେପ ନିଆଯିବ ବୋଲି କହିଛନ୍ତି ଜିଲ୍ଲାପାଳ ।
ଗାଁକୁ ସହର ଶହ ଯୋଡ଼ିବା ପାଇଁ ଗମନା ଗମନ ସୁବିଧା ପାଇଁ ରାଜକୋଶରୁ କୋଟି କୋଟି ଟଙ୍କା ଖର୍ଚ୍ଚ ହେଉଛି । ନୂଆପଡ଼ା ଜିଲ୍ଲା ଖଡିଆଳ ବ୍ଲକ ଡୁଆଝର ଗାଁ ପରି ଅନେକ ଗାଁ ରହିଛି ଯେଉଁଠି ଯାତାୟତ ପାଇଁ ଆଜିବି ସମସ୍ୟା ଭୋଗୁଛନ୍ତି ଲୋକେ ।
ପ୍ରତାପ ଷଡ଼ଙ୍ଗୀଙ୍କୁ ଭଲ ଅଭିନେତା କହିଲେ ତାରା
ଭୁବନେଶ୍ୱର : ସଂସଦ ଗଣ୍ଡଗୋଳ ଘଟଣାକୁ ନେଇ ବାଲେଶ୍ଵରର ବିଜେପି ସାଂସଦ ପ୍ରତାପ ଷଡ଼ଙ୍ଗୀଙ୍କୁ କଂଗ୍ରେସ ବିଧାୟକ ତାରାପ୍ରସାଦ ବାହିନୀପତିଙ୍କ କଡ଼ା ସମାଲୋଚନା। ତାରା କହିଛନ୍ତି, ପ୍ରତାପ ଷଡ଼ଙ୍ଗୀ ଜଣେ ଉଚ୍ଚକୋଟୀର ଅଭିନେତା । ପ୍ରଥମେ ପ୍ରତାପ କହିଥିଲେ ରାହୁଲ ଗାନ୍ଧି ଠେଲିଛନ୍ତି। ପରେ ଆଉ ଜଣେ ଠେଲିଥିବା କହିଲେ। ପ୍ରଥମେ ମୁଣ୍ଡରେ ଛୋଟିଆ ମାଡ଼ ହୋଇଥିବାର ଦେଖିବାକୁ ମିଳିଥିଲା । ଛୋଟିଆ ବ୍ୟାଣ୍ଡେଜ ଲାଗିଥିଲା। ପରେ ଆଉ ଟିକେ ବଡ଼ ବ୍ୟାଣ୍ଡେଜ ବାନ୍ଧିଲେ। ରାତିରେ ପୁରା ମୁଣ୍ଡ ସାରା ବ୍ୟାଣ୍ଡେଜ ବାନ୍ଧି ଡ୍ରାମା କଲେ। ଏହି ଡ୍ରାମା ସମସ୍ତେ ଦେଖିଛନ୍ତି। ନାଟକରେ ପ୍ରତାପ ଷଡ଼ଙ୍ଗୀ ପୁରା ପାରଙ୍ଗମ। ଫିଲ୍ମ କଲେ ବେଶ୍ ଭଲ ଅଭିନୟ କରିବେ ବୋଲି କଟାକ୍ଷ କରିଛନ୍ତି ତାରାପ୍ରସାଦ ବାହିନୀପତି ।
ଦିଲ୍ଲୀରେ ମୁଣ୍ଡ ଟେକିଲା ଚାଷୀ ଆନ୍ଦୋଳନ, ୩୬୦ଟି ଗ୍ରାମର ଅନ୍ନଦାତା ଏକାଠି
ନୂଆଦିଲ୍ଲୀ : ବିଭିନ୍ନ ଦାବି ନେଇ ଦିଲ୍ଲୀରେ ଏକାଠି ଅନ୍ନଦାତା। ଦିଲ୍ଲୀର ୩୬୦ଟି ଗ୍ରାମର ଚାଷୀନେତା ଏକାଠି ହୋଇ ପ୍ରସ୍ତୁତ କରିଛନ୍ତି ରଣନୀତି। ଭୂସଂସ୍କାର, କ୍ଷତିପୂରଣ ସମେତ ଚାଷୀଙ୍କ ଅନ୍ୟାନ୍ୟ ଦାବି ନେଇ ଉତ୍ତର-ପଶ୍ଚିମ ଦିଲ୍ଲୀରେ ଚାଷୀ କରିଛନ୍ତି ମହାପଞ୍ଚାୟତ।ଦିଲ୍ଲୀରେ ହେବାକୁ ଆଗାମୀ ବିଧାନସଭା ନିର୍ବାଚନରେ କୌଣସି ଏକ ଦଳକୁ ଭୋଟ ଦେବେ ନା ନିର୍ବାଚନକୁ ବର୍ଜନ କରିବେ ଏ ନେଇ ଏହି ମହାପଞ୍ଚାୟତରେ ନିଷ୍ପତ୍ତି ହେବ।
ବିଭିନ୍ନ ଗାଁର ସମସ୍ୟାର ସମାଧାନ କରିବାକୁ ଦାବି କରିଛନ୍ତି । ଭୂସଂସ୍କାର, ଗୃହ କର ଏବଂ ଜମି ଅଧିଗ୍ରହଣ ପରିବର୍ତ୍ତେ ଉଚିତ କ୍ଷତିପୂରଣ ପ୍ରଦାନ ଭଳି ଅନେକ ପ୍ରସଙ୍ଗର ସମାଧାନ ହୋଇପାରିନାହିଁ । ଚାଷୀଙ୍କ ଏହି ସମସ୍ତ ଦାବି ନେଇ ଆଲୋଚନା ପରେ ମହାପଞ୍ଚାୟତରେ ରଣନୀତି ପ୍ରସ୍ତୁତ ହେବ। ଏହି ରଣନୀତିକୁ ନେଇ ଆଗାମୀ ବିଧାନସଭା ନିର୍ବାଚନରେ ଏହି ରଣନୀତି ଉପରେ କାର୍ଯ୍ୟକାରୀ ହେବ । ଚାଷୀ ସମସ୍ୟା ନେଇ ଆପ ରାଷ୍ଟ୍ରୀୟ ସଂଯୋଜକ ତଥା ପୂର୍ବତନ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କୁ ଭେଟିଥିଲେ ମଧ୍ୟ କୌଣସି ସମାଧାନର ବାଟ ବାହାରିନାହିଁ । ୨୦୦୦ ମସିହାରୁ ଚାଷୀଙ୍କ ଜମି ଅଧିଗ୍ରହଣ ହୋଇଥିଲେ ମଧ୍ୟ ଏହାର ପ୍ରତିବଦଳରେ ସେମାନଙ୍କୁ ଜମି ପ୍ରଦାନ କରାଯାଇନାହିଁ।