ନନ୍ଦିଘୋଷ ବ୍ୟୁରୋ: ଗୁଣି ଗାରେଡ଼ି ସନ୍ଦେହରେ ନିଜ ବାପାଙ୍କୁ ହତ୍ୟା କରିଛି ପୁଅ। ଏହି ଘଟଣା ହେଉଛି ରାୟଗଡ଼ା ଜିଲ୍ଲା ପୁଟାସିଂ ଥାନା ରେଗେଇସିଂ ଗାଁର। ଗତ ଡିସେମ୍ବର ୧୮ ତାରିଖରେ ହୋଇଥିବା ହତ୍ୟାକାଣ୍ଡର ପର୍ଦ୍ଦାଫାସ କରିଛି ପୋଲିସ ଓ ୩ ଜଣଙ୍କୁ ଗିରଫ କରିଛି। ମୃତକ ହେଲେ ଡାନିଏଲ୍ ଶବର। ତାଙ୍କ ପୁଅ ଆନ୍ଦ୍ରିୟ ଶବର ହିଁ ବାପାଙ୍କୁ ହତ୍ଯା କରିଥିବା ପୋଲିସ କହିଛି। ଘଟଣାରେ ମୁଖ୍ୟ ଅଭିଯୁକ୍ତ ପୁଅ ସହିତ ଅନ୍ୟ ଦୁଇ ଜଣଙ୍କୁ ଗିରଫ କରିଛି ପୋଲିସ ଏବଂ କୋର୍ଟ ଚାଲାଣ କରିଛି। ହତ୍ୟାରେ ବ୍ୟବହୃତ ଟାଙ୍ଗିଆ ଓ ଅନ୍ୟ ଏକ ଧାରୁଆ ଅସ୍ତ୍ର ଜବତ କରାଯାଇଛି। ପୋଲିସ କହିବା ଅନୁସାରେ ମୃତକ ଡାନିଏଲ୍ ଶବରଙ୍କ ଦୁଇଟି ପତ୍ନୀ । ପ୍ରଥମ ସ୍ତ୍ରୀର ପୁଅ ଆନ୍ଦ୍ରିୟ ସନ୍ଦେହ କରୁଥିଲା ଯେ, ଭାଇ ଫିଲିପ୍ କୁ ବାପା ଡାନିଏଲ୍ ଗୁଣି କରି ହତ୍ୟା କରିଥିଲା। ଏହାର ପ୍ରତିଶୋଧ ନେବାକୁ ସେ ଯୋଜନା କରିଥିଲା। ବାପା ଡାନିଏଲ୍ କୁ ହତ୍ୟା କରିବା ପାଇଁ ସାବତ ଭାଇର ସ୍ତ୍ରୀ ଅନୀତାର ସହଯୋଗରେ ଷଡ଼ଯନ୍ତ୍ର କରିଥିଲା ପୁଅ ଆନ୍ଦ୍ରିୟ। ଯୌତୁକକୁ ନେଇ ଅନୀତିକୁ ଡାନିଏଲ ବିଭିନ୍ନ ସମୟରେ ଆକ୍ଷେପ କରୁଥିବାରୁ ଅନୀତାର ବି ରାଗ ଥିଲା ଶ୍ବଶୁର ଉପରେ। ଆନ୍ଦ୍ରିୟ ତାର ସାଙ୍ଗ କପଳେଶ ଓ ଅନୀତା ସହିତ ମିଶି ଗତ ବାପା ଡାନିଏଲକୁ ଡିସେମ୍ଵର ୧୮ ତାରିଖରେ ଟାଙ୍ଗିଆରେ ହାଣି ହତ୍ୟା କରିଥିଲେ ଓ ମୃତ ଦେହକୁ ପାହାଡ଼ରେ ଫିଙ୍ଗି ଦେଇଥିଲେ। ପରେ ନିଜେ ଆସି ପୋଲିସରେ ଅଭିଯୋଗ କରିଥିଲା ଆନ୍ଦ୍ରିୟ। ତଦନ୍ତରୁ ପୋଲିସ ସତ ଜାଣିପାରିଥିଲା ଓ ୩ ଜଣଙ୍କୁ ଗିରଫ କରିଛି।
ଆମେରିକାରେ ବଡ଼ ଧରଣର ବନାଗ୍ନି, ୩୦ ହଜାରରୁ ଅଧିକ ଲୋକଙ୍କୁ କରାଗଲା ସ୍ଥାନାନ୍ତର
ନନ୍ଦିଘୋଷ ବ୍ୟୁରୋ: ଆମେରିକାର କାର୍ଲିଫର୍ଣ୍ଣିଆ ରାଜ୍ୟ ଲସଏଞ୍ଜେଲ୍ସରେ ବଡ଼ ଧରଣର ବନାଗ୍ନି । ଏଥିରେ ୫ ଜଣଙ୍କ ମୃତ୍ୟୁ ହୋଇଥିବାବେଳେ ୩୦ ହଜାରରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି । ୪୮ ଘଣ୍ଟାରେ ଜଙ୍ଗଲ ନିଆଁ ଯୋଗୁ ୫ ଜଣ ପ୍ରାଣ ହରାଇଥିବା ବେଳେ ଅନେକ ଲୋକ ଆହତ ହୋଇଛନ୍ତି । ନିଆଁ କବଳକୁ ହଜାର ହଜାର ଘର ଆସିବାରୁ ପ୍ରାୟ ଲକ୍ଷେ ଲୋକ ଘର ଛାଡ଼ିଛନ୍ତି । ଲସ୍ ଏଞ୍ଜେଲ୍ସର ପ୍ୟାସିଫିକ ପ୍ୟାଲିସେଡ୍ସ ଅଞ୍ଚଳରେ ଅନେକ ଘର ଆଖି ପିଛୁଳାକେ ପୋଡ଼ି ପାଉଁଶ ହୋଇଯାଇଛି ।
୩୦ ହଜାର ଲୋକଙ୍କୁ ଯୁଦ୍ଧକାଳୀନ ଭିତ୍ତିରେ ଖାଲି କରାଯାଇଥିଲେ ମଧ୍ୟ ଆହୁରି ଅନେକ ଫସି ରହିଥିବାରୁ ଉଦ୍ଧାର କାର୍ଯ୍ୟ ଜାରି ରହିଛି। ନିଆଁ ବ୍ୟାପିବା ଫଳରେ ଲୋକମାନେ ତୋପାଙ୍ଗା କାନ୍ୟନ୍ ପାର୍ବତ୍ୟାଞ୍ଚଳ ଛାଡ଼ି ଦେଇଛନ୍ତି। ସମଗ୍ର ହାଇୱେ ନିଆଁ କବଳକୁ ଚାଲିଆସିବାରୁ ଲୋକେ ପାଲିସେଡ୍ସ ଡ୍ରାଇଭ୍ରେ ସେମାନଙ୍କ କାର୍ ଛାଡ଼ି ଦୌଡ଼ିଥିଲେ। ଜାତୀୟ ପାଣିପାଗ ସେବା ପକ୍ଷରୁ ଲସ ଏଞ୍ଜେଲ୍ସ କାଉଣ୍ଟି ପାଇଁ ବ୍ୟାପକ ନିଆଁ ଲାଗିବା ସଂପର୍କରେ ଆଗୁଆ ସତର୍କ କରାଯାଇଥିଲା।
ରାଜ୍ୟରେ ସାମାନ୍ୟ କମିଲା ଶୀତ, ହେଲେ କୁହୁଡ଼ି କରିବ କଲବଲ
ନନ୍ଦିଘୋଷ ବ୍ୟୁରୋ: ବଢିଲା ପାରା । ସାମନ୍ୟ କମିଲା ଶୀତ । ହେଲେ କୁହୁଡି କରୁଛି କଲବଲ । ଆହୁରି ୨ ଦିନ ୨ ରୁ ୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ପାଇବ । ଉପକୂଳ ସମେତ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ବୃଦ୍ଧି ପାଇବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ହାଲୁକା ଶୀତ ସହ କଲବଲ କରୁଛି ଘନକୁହୁଡି । ରାସ୍ତାରେ ଦୃଶ୍ୟମାନ କ୍ଷମତା କମ ରହୁଛି । ଆଜି ଘନକୁହୁଡି ନେଇ ୩ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ବିଶେଷ କରି ସୁନ୍ଦରଗଡ, କନ୍ଧମାଳ ଏବଂ କୋରାପୁଟରେ ଘନ କୁହୁଡି ଅନୁଭୁତ ହେବ। ସମ୍ବଲପୁର, ଝାରସୁଗୁଡା, ବଲାଙ୍ଗୀର, ଗଞ୍ଜାମ ଏବଂ କଳାହାଣ୍ଡିରେ ହାଲୁକା କୁହୁଡି ନେଇ ମଧ୍ୟ ସତର୍କତା ଜାରି କରାଯାଇଛି। ବିଶେଷ କରି ରାତି ୨ ଟାରୁ ସକାଳ ୧୦ ପର୍ଯ୍ୟନ୍ତ ଘାଟି ରାସ୍ତା ଏବଂ ଦୁର୍ଘଟଣା ପ୍ରବଣ ରାସ୍ତାରେ ନଜର ରଖିବାକୁ ପରିବହନ ବିଭାଗକୁ ସତର୍କ କରାଯାଇଛି ।
ଇସ୍ରୋର ସାଟେଲାଇଟ ଡକିଂ ଅଭିଯାନ ସ୍ଥଗିତ
ନନ୍ଦିଘୋଷ ବ୍ୟୁରୋ: ପ୍ରଥମ ସାଟେଲାଇଟ ଡକିଂ ଅଭିଯାନ ସ୍ଥଗିତ। ଦୁଇ ସାଟେଲାଇଟ ମଧ୍ଯରେ ଗତିଜନିତ ସମସ୍ଯା ପରିଲକ୍ଷିତ ହେବା ପରେ ଏହି ନିଷ୍ପତ୍ତି ନେଇଛି ଇସ୍ରୋ। ଗତ ଜାନୁଆରୀ ୭ରେ ଏହି ପ୍ରକ୍ରିୟା ଆରମ୍ଭ ହେବାର ଥିଲା । ମାତ୍ର ପରେ ଏହାକୁ ସ୍ଥଗିତ ରଖାଯାଇଥିଲା । ଭବିଷ୍ୟତର ଅନେକ ମିଶନ ସମେତ ଚନ୍ଦ୍ରଯାନ-୪ ଦିଗରେ ଏହି ଅଭିଯାନ ସହାୟତା କରିବା ଲକ୍ଷ୍ଯ ରହିଛଇ । ସ୍ପେସ ଡକିଂ ଏକ୍ସପେରିମେଣ୍ଟ ବା ସ୍ପେଡେକ୍ସ ସାଟେଲାଇଟ କ୍ଷେତ୍ରରେ କୌଣସି ପ୍ରତିବନ୍ଧକ ସୃଷ୍ଟି ହେବ ନାହିଁ ବୋଲି କହିଥିଲା ଇସ୍ରୋ । ଗତ ଡିସେମ୍ବର ୩୦ରେ ଇସ୍ରୋ ପକ୍ଷରୁ ପ୍ରେରଣ କରାଯାଇଥିଲା ଦୁଇଟି ଚେଜର ଓ ଟାର୍ଗେଟ ସ୍ପେଡେସ୍କ ସାଟେଲାଇଟ । ସ୍ପେଡେକ୍ସ ଲଞ୍ଚ ହେବା ପରେ ଏହାର ଡକିଂ ଉପରେ ଗୁରୁତ୍ବ ଦିଆଯାଉଥିଲା ଯାହାକି ବିଭିନ୍ନ ପର୍ଯ୍ୟାୟ ଉପରେ ନିର୍ଭର କରିଥାନ୍ତା । ଦୁଇଟି ଯାକ ସାଟେଲାଇଟକୁ ମନିଟରିଂ କରିବା ଲାଗି ବିଭିନ୍ନ ଗ୍ରାଉଣ୍ଡ ଷ୍ଟେସନକୁ ବ୍ୟବହାର କରାଯାଇଥାନ୍ତା । ସେକଣ୍ଡ ପ୍ରତି ୧୦ ମିଲିମିଟର ଗତିରେ ଚେଜର ସାଟେଲାଇଟ ଟାର୍ଗେଟ ସାଟେଲାଇଟରେ ପ୍ରବେଶ କରିବା ଲକ୍ଷ୍ଯ ରହିଥିଲା । ଥରେ ଦୁଇଟି ଯାକ ଉପଗ୍ରହ ପରସ୍ପର ସହ ସଂଯୁକ୍ତ ହେଲେ ଏହା ଏକ ସିଙ୍ଗଲ ୟୁନିଟରେ ପରିଣତ ହୋଇଥାନ୍ତା।
ଆଜି ପବିତ୍ର ଶାମ୍ବ ଦଶମୀ, କୋଣାର୍କ ଚନ୍ଦ୍ରଭାଗାରେ ଶ୍ରଦ୍ଧାଳୁଙ୍କ ଭିଡ଼
ନନ୍ଦିଘୋଷ ବ୍ୟୁରୋ: ଆଜି ହେଉଛି ପବିତ୍ର ଶାମ୍ବ ଦଶମୀ। ନିଜ ପରିବାରକୁ ନିରୋଗ ରଖିବାକୁ ଆଜି ସୂର୍ଯ୍ୟ ଦେବତାଙ୍କୁ ପୂଜା କରାଯାଇଥାଏ। ପ୍ରାତଃ, ମଧ୍ୟାହ୍ନ ଓ ଅପରାହ୍ନରେ ସୂର୍ଯ୍ୟ ଦେବତାଙ୍କୁ ପୂଜା କରିଯାଏ। ଶାମ୍ବ ଦଶମୀ ଅବସରରେ ଗାୟତ୍ରୀ ପରିବାର ପକ୍ଷରୁ କୋଣାର୍କ ଚନ୍ଦ୍ରଭାଗାରେ ସୂର୍ଯ୍ୟ ଆଳତି କରାଯାଇଛି। ଏହା ସହିତ ଅନନ୍ତ ଅବଧୂତ ମଠଠାରୁ ଚନ୍ଦ୍ରଭଗା ପର୍ଯ୍ୟନ୍ତ ସୂର୍ଯ୍ୟ ରଥ ଯାତ୍ରା ଅନୁଷ୍ଠିତ ହୋଇଥାଏ । ଏହି ସୂର୍ଯ୍ୟରଥ 27 ଦିନ ପର୍ଯ୍ୟନ୍ତ ଚନ୍ଦ୍ରଭାଗାରେ ରହି ମାଘ ସପ୍ତମୀରେ ବାହୁଡା ଯାତ୍ରା ଅନୁଷ୍ଠିତ ହୋଇଥାଏ । ପୌରାଣିକ ମତ ଅନୁସାରେ କୃଷ୍ଣଙ୍କ ପୁତ୍ର ଶାମ୍ବ ଅଭିଶାପ ଜନିତ ବ୍ୟାଧିରୁ ମୁକ୍ତି ପାଇଁ ଆଜିର ଦିନରେ ଚନ୍ଦ୍ରଭାଗା ନଦୀରେ ସ୍ନାନ କରି ସୂର୍ଯ୍ୟଙ୍କ ଆଶୀର୍ବାଦରୁ ବ୍ୟାଧି ମୁକ୍ତ ହୋଇଥିଲେ । ଶାମ୍ବ ହିଁ ପ୍ରଥମେ ସୂର୍ଯ୍ୟନାରାୟଣଙ୍କ ବିଗ୍ରହ ପୂଜା ଆରମ୍ଭ କରି ସୂର୍ଯ୍ୟ ରଥ ଯାତ୍ରା ଆରମ୍ଭ କରିଥିଲେ। ଗାୟତ୍ରୀ ପରିବାର ତରଫରୁ ଆଜି ପବିତ୍ର ଶାମ୍ବ ଦଶମୀରେ ଚନ୍ଦ୍ରଭାଗାରେ ସୂର୍ଯ୍ୟନାରାୟଣ ଙ୍କୁ ପୂଜା କରିଛନ୍ତି ।
ସମଲିଙ୍ଗୀ ବିବାହ ମାମଲା: ଆଜି ରିଭ୍ଯୁ ପିଟିସନର ବିଚାର କରିବେ ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ: ସମଲିଙ୍ଗୀ ବିବାହ ମାମଲା । ଆଜି ଏସଂକ୍ରାନ୍ତ ବିଭିନ୍ନ ରିଭ୍ଯୁ ପିଟିସନର ବିଚାର କରିବେ ସୁପ୍ରିମକୋର୍ଟଙ୍କ ପାଞ୍ଚ ଜଣିଆ ଖଣ୍ଡପୀଠ । ସୁପ୍ରିମକୋର୍ଟଙ୍କ ସମ୍ଭାବ୍ଯ ନିଷ୍ପତ୍ତି ଉପରେ ରହିଛି ଏଲଜିବିଟିକ୍ୟୁଆଇଏଙ୍କ ନଜର । ଗତ ଜୁଲାଇ ୨୦୨୪ରେ ଜଷ୍ଟିସ ସଞ୍ଜୀବ ଖାନ୍ନା ଏହି ଖଣ୍ଡପୀଠରୁ ଅବ୍ୟାହତି ନେବା ସହ ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ, ଜଷ୍ଟିସ ସଞ୍ଜୟ କୌଲ, ରବୀନ୍ଦର ଭଟ ଓ ହିମା କୋହଲି ଅବସର ନେବା ପରେ ଏହି କମିଟିକୁ ପୁନର୍ଗଠିତ କରାଯାଇଥିଲା । ନୂଆ କମିଟିରେ ସଦସ୍ଯମାନେ ହେଉଛନ୍ତି ଜଷ୍ଟିସ ଭୂଷଣ ଗଭାଇ, ସୂର୍ଯ୍ୟ କାନ୍ତ, ବି.ଭି. ନାଗରତ୍ନା, ପିଏସ ନରସିଂହ୍ମା ଓ ଦୀପଙ୍କର ଦତ୍ତ । ଏହି ଗୁରୁତ୍ବପୂର୍ଣ୍ଣ ମାମଲାକୁ କେବଳ ଖଣ୍ଡପୀଠ ସ୍ତରରେ ସମୀକ୍ଷା କରାଯିବ । ଆବଶ୍ଯକ ପଡିଲେ ଏହାର ଶୁଣାଣି ଖୋଲା କୋର୍ଟରେ ହୋଇପାରେ । ଗତ ୨୦୨୩ ଅକ୍ଟୋବର ୧୭ର ରାୟରେ ସମଲିଙ୍ଗୀ ବିବାହକୁ ଆଇନଗତ ମାନ୍ଯତା ଦେବାକୁ ଖଣ୍ଡପୀଠ ଅଗ୍ରାହ୍ୟ କରିଥିଲେ ।
ଏହା ସହ ଏହି ପ୍ରସଙ୍ଗରେ ସଂସଦ ଓ ରାଜ୍ଯ ବିଧାନସଭା ନିଷ୍ପତ୍ତି ନିଅନ୍ତୁ ବୋଲି କହିଥିଲେ ଖଣ୍ଡପୀଠ । ୨୦୨୩ ଅକ୍ଟୋବର ୧୭ ରାୟରେ ୫ ଜଣିଆ ଖଣ୍ଡପୀଠରୁ ୩ ଜଣ ଅର୍ଥାତ ଜଷ୍ଟିସ ଭଟ୍ଟ, କୋହଲି ଓ ନରସିହ୍ମା ସମଲିଙ୍ଗୀ ବିବାହକୁ ବିରୋଧ କରିଥିବାବେଳେ ୨ ଜଣ ଅର୍ଥାତ ଜଷ୍ଟିସ ଚନ୍ଦ୍ରଚୂଡ଼ ଓ କୌଲ ସମର୍ଥନ କରିଥିଲେ । ସମଲିଙ୍ଗୀ ବିବାହ ଓ ସେହି ଦମ୍ପତି ପୋଷ୍ୟସନ୍ତାନ ଗ୍ରହଣ କରିବା ଏକ ସାମ୍ବିଧାନିକ ଅଧିକାର ବୋଲି ଏହି ଦୁଇ ଜଣ ମତ ଦେଇଥିଲେ । ସମଲିଙ୍ଗୀ ବିବାହ ଏକ ସାମ୍ବିଧାନିକ ଅଧିକାର ଦର୍ଶାଇ ସୁପ୍ରିମକୋର୍ଟରେ କେତେକ ପିଟିସନ ଦାୟର ହୋଇଥିଲା ।
ପିଟିସନରକାରୀମାନେ କହିଛନ୍ତି- ୨୦୧୮ରେ ନବତେଜ ସିଂ ଜୋହର ବନାମ କେନ୍ଦ୍ର ସରକାର ଏବଂ ୨୦୧୪ରେ ନଲସା ବନାମ କେନ୍ଦ୍ର ସରକାର ମାମଲାରେ ଏଲଜିବିଟିକ୍ୟୁଆଇଏ ସମ୍ପର୍କରେ ସୁପ୍ରିମକୋର୍ଟ ଦେଇଥିବା ରାୟ ଅନୁସାରେ ଏହି ମାମଲାର ପୁନର୍ବିଚାର କରାଯାଉ । ନବତେଜ ସିଂ ମାମଲାରେ ସୁପ୍ରିମକୋର୍ଟ ଦୁଇ ଜଣ ବୟସ୍କଙ୍କ ସହମତିଭିତ୍ତିକ ଯୌନ ସମ୍ପର୍କ ଅପରାଧ ନୁହେଁ ବୋଲି କହିଥିଲେ । ସେହିପରି ଜାତୀୟ ଆଇନ ସେବା କର୍ତ୍ତୃପକ୍ଷ ବା ନାଲସା ମାମଲାରେ ସୁପ୍ରିମକୋର୍ଟ କହିଥିଲେ- ଟ୍ରାନ୍ସଜେଣ୍ଡରମାନେ ହେଉଛନ୍ତି ତୃତୀୟ ଲିଙ୍ଗୀ ଏବଂ ଲିଙ୍ଗଗତ ସମାନତା ଓ ଆତ୍ମସମ୍ମାନ ସେମାନଙ୍କ ମୌଳିକ ଅଧିକାର ।
ତିରୁପତି ମନ୍ଦିରରେ ଦଳାଚକଟା: ୬ ଶ୍ରଦ୍ଧାଳୁଙ୍କ ମୃତ୍ୟୁ, ୨୫ ଆହତ
ତିରୁମାଲା: ଆନ୍ଧ୍ରପ୍ରଦେଶର ପ୍ରସିଦ୍ଧ ତିରୁପତି ମନ୍ଦିରରେ ଆଜି ଏକ ବଡ଼ ଅଘଟଣ ଘଟିଥିଲା । ବୈକୁଣ୍ଠ ଦର୍ଶନ ଦ୍ବାର ଟିକେଟ କେନ୍ଦ୍ର ନିକଟରରେ ଦଳାଚକଟାରେ ୬ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିଲା । ଏଥିସହିତ ୨୫ ଜଣ ଆହତ ହୋଇଥିଲେ । ବୈକୁଣ୍ଠ ଦ୍ବାର ଦର୍ଶନ ୧୦ ଦିନ ପାଇଁ ଖୋଲିଥିଲା । ତେଣୁ ଟୋକନ ନେବା ପାଇଁ ହଜାର ହଜାର ସଂଖ୍ୟାରେ ଲୋକଙ୍କର ଭିଡ଼ ଜମିଥିଲା । ବୈକୁଣ୍ଠ ଦ୍ବାର ଦର୍ଶନ ପାଇଁ ତିରୁପତିର ବିଭିନ୍ନ ଟିକେଟ କେନ୍ଦ୍ରରେ ଲୋକମାନେ ରୁଣ୍ଡ ହୋଇଥିଲେ । ସମସ୍ତ ଆହତମାନଙ୍କୁ ଚିକିତ୍ସା ନିମନ୍ତେ ହସ୍ପିଟାଲରେ ଭର୍ତ୍ତି କରାଯାଇଥିବା ଜଣାପଡ଼ିଛି । ଟୋକନ ପାଇଁ ପାଖାପାଖି ୪ ହଜାର ଲୋକ ଭିଡ଼ ଜମାଇଥିଲେ । ପରିସ୍ଥିତି ବିଷୟରେ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡ଼ୁ ମନ୍ଦିର କମିଟିର ଅଧ୍ୟକ୍ଷଙ୍କ ସହ ଫୋନରେ କଥା ହୋଇଥିଲେ । ଏହି ଘଟଣାର ମୃତାହତଙ୍କ ପାଇଁ ମୁଖ୍ୟମନ୍ତ୍ରୀ ଗଭୀର ଶୋକବ୍ୟକ୍ତ କରିଥିଲେ । ଗୁରୁବାର ସକାଳ ୧୦ଟା ସମୟରେ ମୁଖ୍ୟମନ୍ତ୍ରୀ ହସ୍ପିଟାଲକୁ ଯାଇ ସମସ୍ତ ଆହତଙ୍କ ସ୍ବାସ୍ଥ୍ୟାବସ୍ଥା ବୁଝିବେ ।
ଆସନ୍ତା ୧୦ରୁ ୧୯ ତାରିଖ ଯାଏ ତିରୁମାଲା ତିରୁପତି ଦେବସ୍ଥାନମ ବା ଟିଟିଡି ପକ୍ଷରୁ ବୈକୁଣ୍ଠ ଏକାଦଶୀ ଓ ବୈକୁଣ୍ଠ ଦ୍ବାର ଦର୍ଶନମ କାର୍ଯ୍ୟକ୍ରମ ହେବାର ଥିଲା। ଟିଟିଡି ବୋର୍ଡର ଅଧ୍ୟକ୍ଷ ବି.ଆର. ନାଇଡୁ ଏକ ଜରୁରୀ ବୈଠକ ଡାକି ସ୍ଥିତି ସମୀକ୍ଷା କରିଛନ୍ତି। ମନ୍ଦିର କର୍ତ୍ତୃପକ୍ଷଙ୍କ ସହ ଆଲୋଚନା କରିଛନ୍ତି ମୁଖ୍ୟମନ୍ତ୍ରୀ ନାଇଡୁ। ବୈକୁଣ୍ଠ ଏକାଦଶୀ ଓ ବୈକୁଣ୍ଠ ଦ୍ବାର ଦର୍ଶନମ କାର୍ଯ୍ୟକ୍ରମରେ ପ୍ରାୟ ୭ ଲକ୍ଷ ଶ୍ରଦ୍ଧାଳୁ ସମାଗମ ହେବାର ଆଶା ରଖିଛି ଟିଟିଡି। ଏତେ ସଂଖ୍ୟକ ଶ୍ରଦ୍ଧାଳୁଙ୍କ ଲାଗି ଟିକେଟ ବ୍ୟବସ୍ଥା କରାଯିବା ପରେ ସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା।
ମଦ ଦୋକାନରୁ ଟଙ୍କା ଚୋରି ମାମଲାର ପର୍ଦାଫାଶ: ୪ ଅଭିଯୁକ୍ତ ଗିରଫ
କାଶୀପୁର: ମଦ ଦୋକାନରୁ ଟଙ୍କା ଚୋରି ମାମଲାର ପର୍ଦାଫାଶ ହୋଇଛି । ଏହି ମାମଲାରେ ୪ ଅଭିଯୁକ୍ତ ଗିରଫ ହୋଇଛନ୍ତି । ଏଥିସହିତ ୨ ଲକ୍ଷ ୫୦ ହଜାର ଟଙ୍କା ଓ ବୁଲେଟ ଜବତ ହୋଇଛି । ଏକ ମଦ ଦୋକାନରୁ ନଗଦ ଟଙ୍କା ଚୋରି ମାମଲାର ତଦନ୍ତ କରି ଅଭିଯୁକ୍ତଙ୍କୁ ଗିରଫ କରିବା ସହିତ ନଗଦ ଟଙ୍କା, ଗୋଟିଏ ଗଇଁତି ଓ ଗୋଟିଏ ବୁଲେଟ ଗାଡି ଜବତ କରିଛି ରାୟଗଡା ଜିଲ୍ଲା ଚାନ୍ଦିଲି ଥାନା ପୋଲିସ । ଗିରଫ ୪ଜଣ ହେଲେ ଚାନ୍ଦିଲି ଥାନା ଅନ୍ତର୍ଗତ ଗେରାପୁଟ ଗ୍ରାମର ଆକାଶ ହିକକା, ରମାକାନ୍ତ କୁଲୁସିକା, ପ୍ରଦୀପ ମେଲେକା ଓ ଶିବ କାଡ୍ରାକା । ଜାନୁୟାରୀ ୫ ତାରିଖରେ ଚାନ୍ଦିଲି ଥାନା ଅଧୀନସ୍ଥ ଥେରୁବାଲି ସ୍ଥିତ ବିଦେଶୀ ମଦ କାଉଣ୍ଟଟରରୁ ନଗଦ ୨ଲକ୍ଷ ୫୦ ହଜାର ଟଙ୍କା ଚୋରି ହୋଇଥିଲା । ଏନେଇ ମ୍ୟାନେଜର ଅନିଲ କୁମାର ୬ ତାରିଖରେ ଚାନ୍ଦିଲି ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ଚାନ୍ଦିଲି ଥାନା ପୋଲିସ ଘଟଣାର ତଦନ୍ତ କରିଥିଲା । ଉକ୍ତ ତଦନ୍ତରେ ଗିରଫ ୪ଜଣଙ୍କ ସମ୍ପୃକ୍ତି ରହିଥିବା ଜାଣିବା ପରେ ପୋଲିସ ଯୋଜନା ଭିତିରେ ସେମାନଙ୍କୁ ଗିରଫ କରିବା ସହିତ ଟଙ୍କା ଓ ଅନ୍ୟାନ୍ୟ ଜିନିଷ ଜବତ କରିଥିବା ଜଣାପଡିଛି ।
ଏକ ଦେଶ ଏକ ନିର୍ବାଚନ: ନୂଆଦିଲ୍ଲୀରେ ପ୍ରଥମ ଯୁଗ୍ମ ସଂସଦୀୟ କମିଟି ବୈଠକ ଅନୁଷ୍ଠିତ
ନୂଆଦିଲ୍ଲୀ: ଏକ ଦେଶ ଏକ ନିର୍ବାଚନକୁ ନେଇ ଆସିଛି ଏକ ବଡ଼ ଅପଡେଟ । ଆଜି ନୂଆଦିଲ୍ଲୀରେ ଏନେଇ ପ୍ରଥମ ଯୁଗ୍ମ ସଂସଦୀୟ କମିଟି ବୈଠକ ବସିଥିଲା। ବୈଠକରେ ଆଇନ ଓ ନ୍ୟାୟ ମନ୍ତ୍ରାଳୟର କର୍ତ୍ତୃପକ୍ଷଙ୍କ ସମେତ ସଦସ୍ୟମାନେ ଉପସ୍ଥିତ ଥିଲେ। ୩୯ଜଣିଆ କମିଟିରେ ବିଜେପି ସାଂସଦ ପିପି ଚୌଧୁରୀ ଅଧ୍ୟକ୍ଷତା କରିଥିଲେ। ଏଥରେ କଂଗ୍ରେସର ପ୍ରିୟଙ୍କା ଗାନ୍ଧୀ, ଜେଡିୟୁର ସଞ୍ଜୟ ଝା, ଶିବସେନାର ଶ୍ରୀକାନ୍ତ ସିନ୍ଦେ, ଆପର ସଞ୍ଜୟ ସିଂ, ଟିଏମସିର କଲ୍ୟାଣ ବାନାର୍ଜୀଙ୍କ ସମେତ ବିଭିନ୍ନ ଦଳର ସଦସ୍ୟମାେନ ସାମିଲ ହୋଇଥିଲେ। ଗତ ଶୀତକାଳୀନ ଅଧିବେଶନରେ ଲୋକସଭାରେ ସମ୍ବିଧାନର ୧୨୯ ସଂଶୋଧନ ବିଲ ଓ କେନ୍ଦ୍ର ଶାସିତ ଅଞ୍ଚଳ ଆଇନ ସଂଶୋଧନ ବିଲ ଆଗତ ହୋଇଥିଲା। ପ୍ରଥମେ ଜେପିସିର ସଦସ୍ୟ ସଂଖ୍ୟା ୩୧ ଥିବାବେଳେ ପରେ ତାହାକୁ ୩୯କୁ ବୃଦ୍ଧି କରାଯାଇଥିଲା। ସେଥିରେ ଲୋକସଭାର ୨୭ ଓ ରାଜ୍ୟସଭାର ୧୨ ସଦସ୍ୟ ରହିଛନ୍ତି। ପ୍ୟାନେଲର ପ୍ରମୁଖ ସଦସ୍ୟମାନେ ହେଉଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ଅନୁରାଗ ଠାକୁର, ପୁରୁଷୋତ୍ତମ ରୂପାଲା, ମନୀଷ ତିୱାରୀ, ଅନୀଲ ବାଲୁନି, ବାନସୁରୀ ସ୍ବରାଜ ପ୍ରମୁଖ।
ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ଭିସାକୁ ପରିବର୍ଦ୍ଧିତ କଲେ ଭାରତ ସରକାର
ନୂଆଦିଲ୍ଲୀ: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ଭିସାକୁ ପରିବର୍ଦ୍ଧିତ କରିଛନ୍ତି କେନ୍ଦ୍ର ସରକାର। ଗତବର୍ଷ ଅଗଷ୍ଟ ମାସରରେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଭାରତ ଚାଲିଆସିଥିଲେ ହସିନା। ବାଂଲାଦେଶ ହାତରେ ପ୍ରତ୍ୟର୍ପଣ କରିବା ଲାଗି ଅନ୍ତରୀଣ ସରକାରଙ୍କ ପକ୍ଷରୁ ଚାପ ପଡୁଥିବା ବେଳେ ଭିସା ଅବଧିକୁ ବଢାଇଛନ୍ତି କେନ୍ଦ୍ର ସରକାର। ଗତ ବର୍ଷ ଅଗଷ୍ଟ ୫ରେ ଢାକାରୁ ଚାଲିଆସିଥିବା ହସିନାଙ୍କୁ ଭାରତ ଆଶ୍ରୟ ଦେଇଥିଲା । ହସିନାଙ୍କ ଭାରତ ରହଣୀ ଅବଧି ବୃଦ୍ଧି ଏକ ପାରିପାର୍ଶ୍ବିକ ପଦକ୍ଷେପ ବୋଲି ଭାରତ ପକ୍ଷରୁ କୁହାଯାଇଛି। ଗତ ଡିସେମ୍ବର ୨୩ ତାରିଖରେ ହସିନାଙ୍କୁ ବାଂଲାଦେଶ ହାତରେ ପ୍ରତ୍ଯର୍ପଣ କରିବା ଲାଗି ଭାରତ ନିକଟରେ ଦାବି କରିଥିଲେ ଅନ୍ତରୀଣ ସରକାର। ଗତ ୭ ତାରିଖରେ ଶେଖ ହସିନାଙ୍କ ସମେତ ୯୭ ଜଣଙ୍କ ପାସପୋର୍ଟ ରଦ୍ଦ କରିଥିଲେ ଅନ୍ତରୀଣ ସରକାର।