ନନ୍ଦିଘୋଷ ବ୍ୟୁରୋ : ଯୁଦ୍ଧର ୨ ବର୍ଷ ପରେ ବି ସୁଧୁରୁନି ଗାଜା ସ୍ଥିତି। ଗତ ଜୁଲାଇ ୨୦୨୪ରୁ ବର୍ତ୍ତମାନ ସୁଦ୍ଧା ୧ ହଜାରରୁ ଅଧିକ ରୋଗୀଙ୍କ ମୃତ୍ୟୁ ଘଟିଲାଣି ବୋଲି କହିଛି ବିଶ୍ବ ସ୍ବାସ୍ଥ୍ୟ ସଂଗଠନ। ଗାଜାର ବିଭିନ୍ନ ହସ୍ପିଟାଲରେ ବର୍ତ୍ତମାନ ୧୬ ହଜାର ୫୦୦ରୁ ଅଧିକ ରୋଗୀ ଜୀବନ ମରଣ ସହ ଲଢୁଛନ୍ତି ବୋଲି କହିଛି ସଂଗଠନ। ସେମାନଙ୍କୁ ତୁରନ୍ତ ଉଦ୍ଧାର କରି ଅନ୍ୟତ୍ର ନ ନିଆଗଲେ ସ୍ଥିତି ଅଧିକ ସଂଗୀନ ହେବ ବୋଲି ଆଶଙ୍କା ପ୍ରକାଶ ପାଇଛି। ତେବେ ୧୬ ହଜାର ୫୦୦ ନୁହେଁ ବରଂ ଏହି ସଂଖ୍ୟା ୪ ଗୁଣ ହେବ ବୋଲି କହିଛି ଡକ୍ଟର୍ସ ଉଇଦଆଉଭ ବର୍ଡର୍ସ। ରୋଗୀମାନେ ଔଷଧ ନପାଇ ହାହାକାର ମଧ୍ୟରେ ଗତି କରୁଛନ୍ତି। ବିଶ୍ବ ସ୍ବାସ୍ଥ୍ୟ ସଂଗଠନ ମୁଖ୍ୟ ଟେଡରସ ଅଧନମ ଘେବ୍ରିସିୟସ କହିଛନ୍ତି ୨୦୨୨ରେ ଯୁଦ୍ଧ ଆରମ୍ଭ ପରଠାରୁ ୧୦ ହଜାର ୬୦୦ ରୋଗୀଙ୍କୁ ସ୍ଥାନାନ୍ତର କରାଯାଇଛି। ସେମାନଙ୍କ ମଧ୍ୟରେ ଅଛନ୍ତି ୫ ହଜାର ଶିଶୁ। ଯଦି ରୋଗୀଙ୍କ ଲାଗି ତୁରନ୍ତ ଔଷଧ ବ୍ୟବସ୍ଥା ନକରାଯାଏ ତେବେ ମୃତ୍ୟୁ ସଂଖ୍ୟା ବହୁ ଅଧିକ ହେବ ବୋଲି ଆଶଙ୍କା ପ୍ରକାଶ ପାଇଛଇ। ଡିସେମ୍ବର ୧ ଯାଏ ପ୍ରାୟ ୩୦ ରାଷ୍ଟ୍ର ଗାଜାର ବହୁ ରୋଗୀଙ୍କୁ ନିଜ ନିଜ ଦେଶକୁ ନେଇଛନ୍ତି। ମାତ୍ର ଇଜିପ୍ଟ ଓ ୟୁଏଇ ବହୁ କମ୍ ସଂଖ୍ୟକ ରୋଗୀଙ୍କୁ ନିଜ ଦେଶକୁ ନେଇଛନ୍ତି।
ଭାରତ-ବାଂଲାଦେଶ ମଧ୍ୟରେ ସମ୍ପର୍କ ହେଉଛି ତିକ୍ତ, ଦୁଇ ଦେଶ ମଧ୍ଯରେ କୂଟନୈତିକ ଉତ୍ତେଜନା ଜାରି
ନନ୍ଦିଘୋଷ ବ୍ୟୁରୋ : ଭାରତ-ବାଂଲାଦେଶ ମଧ୍ୟରେ ସମ୍ପର୍କ ହେଉଛି ତିକ୍ତ। ବାଂଲାଦେଶରେ ଭାରତ ବିରୋଧୀ କାର୍ଯ୍ୟକଳାପ ବଢୁଥିବାରୁ ଦୁଇ ଦେଶ ମଧ୍ଯରେ କୂଟନୈତିକ ଉତ୍ତେଜନା ଜାରି ରହିଛି। ବାଂଲାଦେଶର ଅନ୍ତରୀଣ ଶାସକ ମହମ୍ମଦ ୟୁନୁସଙ୍କ ଦୋମୁହାଁ ନୀତି ହିଁ ଭାରତ ଲାଗି ସବୁଠାରୁ ଅଧିକ ବିପଦ ସୃଷ୍ଟି କରୁଛି। ଉଗ୍ରବାଦୀ ସଂଗଠନକୁ ତୋଷଣ କରିବା ଲାଗି ସେ ଦେଶରେ ହିଂସା ରୋକିବାରେ ଅକ୍ଷମ ବୋଲି ଚର୍ଚ୍ଚା ହେଉଛି। ବାଂଲାଦେଶ ଜମାତ-ଇ-ଇସଲାମି, ଇସଲାମି ଛାତ୍ର ଶିବିର, ଅନସୁରୁଲ୍ଲା ବାଂଲା ଟିମ୍, ହିଜବ ଉତ ତାହିର, ଇସଲାମି ଆନ୍ଦୋଳନ ବାଂଲାଦେଶ ଆଦି ସଂଗଠନ ସହ ୟୁନୁସ ହାତ ମିଳାଇଥିବା ସୂଚନା ମିଳୁଛି। ସେପଟେ ଦୁଇ ଦେଶ ମଧ୍ୟରେ ସ୍ଥିରତା ରକ୍ଷା ଲାଗି ଦୁଇ ଦେଶର ସେନାମୁଖ୍ୟମାନେ ଆଲୋଚନା କରିଥିବା ସୂଚନା ମିଳିଛି। ବାଂଲାଦେଶ ସେନା ମୁଖ୍ୟ ଜେନେରାଲ ୱାକର ଉଜ ଜମାନ କହିଛନ୍ତି- ଭାରତର ସେନାମୁଖ୍ୟ ସେ ଦୁଇ ଦେଶ ମଧ୍ୟରେ ସ୍ଥିରତା ପ୍ରସଙ୍ଗରେ ଆଲୋଚନା କରିଛନ୍ତି। ପଡ଼ୋଶୀ ରାଷ୍ଟ୍ର ସହ ଶାନ୍ତି ରକ୍ଷା କରିବା ତାଙ୍କର ଉଦ୍ଦେଶ୍ୟ ବୋଲି ସେ କହିଛନ୍ତି। ଭାରତ ବିରୋଧୀ ନେତା ଶରିଫ ଓସମାନ ହାଦିଙ୍କ ମୃତ୍ୟୁ ପରେ ବାଂଲାଦେଶରେ ହିଂସା ସୃଷ୍ଟି ହୋଇଥଇଲା। ବିଶେଷ କରି ଶେଖ ହସିନା ସରକାରର ପତନ ପରଠାରୁ ବାଂଲାଦେଶରେ ହିନ୍ଦୁ ବିରୋଧୀ ମନୋଭାବ ବଢୁଥିବାରୁ ଭାରତ ପକ୍ଷରୁ ଚିନ୍ତାବ୍ୟକ୍ତ କରାଯାଇଛି। ବାଂଲାଦେଶରେ ଘଟୁଥିବା ହିଂସାକୁ ସାଧାରଣ ଭାବେ ଗ୍ରହଣ କରାଯାଇପାରିବ ନାହିଁ। ଚଟ୍ଟୋଗ୍ରାମସ୍ଥିତ ଭାରତର ସହକାରୀ ଉଚ୍ଚାୟୁକ୍ତଙ୍କ କାର୍ଯ୍ଯାଳୟ ଉଫରେ ଆକ୍ରମଣ ଘଟଣାକୁ ସହଜ ଭାବେ ଗ୍ରହଣ କରାଯାଇପାରିବା ନାହିଁ। ବିଶେଖ କରି ଜମାଏତ-ଇ-ଇସଲାମି ସହ ସମ୍ପର୍କିତ ସଂଗଠନଗୁଡିକ ଜରିଆରେ ଭାରତ ବିରୋଧୀ ହିଂସା ଜାରି ରହିଛି।
ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର ନଥିଲେ ପେଟ୍ରୋଲ ପମ୍ପରେ ମିଳିବନି ତେଲ
ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର ନଥିଲେ ପେଟ୍ରୋଲ ପମ୍ପରେ ମିଳିବନି ତେଲ
ନନ୍ଦିଘୋଷ ବ୍ୟୁରୋ: ବୈଧ ପ୍ରଦୂଷଣ ନିୟନ୍ତ୍ରଣ ପ୍ରମାଣପତ୍ର (PUCC) ନଥିଲେ ତେଲ ମିଳିବ ନାହିଁ । ପରିବହନ କ୍ଷେତ୍ରରେ ପରିବେଶ ସୁରକ୍ଷାକୁ ଦୃଷ୍ଟିରେ ରଖି ପଦକ୍ଷେପ ନିଆଯାଉଛି । ତେଲ ବିକ୍ରୟକାରୀ କମ୍ପାନୀଗୁଡ଼ିକୁ ଚିଠି ଲେଖିଲା ବାଣିଜ୍ୟ ଓ ପରିବହନ ବିଭାଗ ।
ମୋଟର ଯାନ ନିୟମ ଉଲ୍ଲଙ୍ଘନ କରି ପ୍ରଦୂଷଣ ସୃଷ୍ଟି କରୁଥିବା ଯାନ ଉପରେ ଲାଗିବ ଅଙ୍କୁଶ । ମୋଟର ଯାନ ନିୟମ ଉଲ୍ଲଙ୍ଘନ କରି ପ୍ରଦୂଷଣ ସୃଷ୍ଚି କରୁଥିବା ଯାନ ଉପରେ ଅଙ୍କୁଶ ଲଗାଇବାକୁ ବାଣିଜ୍ୟ ଓ ପରିବହନ ବିଭାଗ ପଦକ୍ଷେପ ନେଉଛି । ଯେଉଁ ମୋଟର ଯାନର ବୈଧ ପ୍ରଦୂଷଣ ପ୍ରମାଣପତ୍ର ନଥିବ, କୌଣସି ପେଟ୍ରୋଲ ପମ୍ପରେ ତେଲ ନ ଦେବାକୁ ଚିଠିରେ ଉଲ୍ଲେଖ କରାଯାଇଛି । ମୋଟର ଯାନ ଆଇନ ଅନୁଯାୟୀ ବୈଧ ପ୍ରଦୂଷଣ ପ୍ରମାଣପତ୍ର ରଖିବା ବାଧ୍ୟତାମୂଳକ । ଏଥିପାଇଁ ଗାଡ଼ିଗୁଡିକୁ ନିୟମିତ ବ୍ୟବଧାନରେ ପଞ୍ଜିକୃତ ପ୍ରଦୂଷଣ ପରୀକ୍ଷା କେନ୍ଦ୍ରରେ ଯାଞ୍ଚ କରାଇବାକୁ ହୋଇଥାଏ । ପ୍ରଦୂଷଣ ପ୍ରମାଣପତ୍ର ଯାଞ୍ଚକୁ ଗୁରୁତ୍ୱ ଦେଇ ସମସ୍ତ ଟୋଲଗେଟରେ ଇ-ଡିଟେକ୍ସନ ବ୍ୟବସ୍ଥାରେ ମଧ୍ୟ ଏହାକୁ ଅନ୍ତର୍ଭୁକ୍ତ କରାଯାଇଛି । ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ମୋଟର ଯାନ ବ୍ୟବହାରକାରୀଙ୍କୁ ନିବେଦନ କରାଯାଇଛି ଯେ, ସର୍ବଦା ଗାଡ଼ିର ବୈଧ ପ୍ରଦୂଷଣ ପ୍ରମାଣପତ୍ର ରଖନ୍ତୁ । ପ୍ରଦୂଷଣ ସୃଷ୍ଟି କରୁଥିବା ଯାନକୁ ବ୍ୟବହାର କରନ୍ତୁ ନାହିଁ । ପରିବେଶ ସୁରକ୍ଷାରେ ସହଭାଗୀ ହୁଅନ୍ତୁ ।
ଓଡ଼ିଆ ଭାଷାକୁ ସମୃଦ୍ଧ କରିବ AI: ମୂଲ୍ୟବାନ ଇନପୁଟ ପାଇଁ ଓଡ଼ିଶା ଭର୍ଚୁଆଲ୍ ଏକାଡେମୀ ଶୀଘ୍ର ଆରମ୍ଭ କରିବ ଓଡ଼ିଆ ଭାଷା ଦାନ ଅଭିଯାନ
ଓଡ଼ିଆ ଭାଷାକୁ ସମୃଦ୍ଧ କରିବ AI: ମୂଲ୍ୟବାନ ଇନପୁଟ ପାଇଁ ଓଡ଼ିଶା ଭର୍ଚୁଆଲ୍ ଏକାଡେମୀ ଶୀଘ୍ର ଆରମ୍ଭ କରିବ ଓଡ଼ିଆ ଭାଷା ଦାନ ଅଭିଯାନ
ନନ୍ଦିଘୋଷ ବ୍ୟୁରୋ: ଓଡ଼ିଆ ଭାଷାକୁ ବଳ ଯୋଗାଇବ ଆର୍ଟିଫିସିଆଲ ଇଣ୍ଟେଲିଜେନ୍ସ । ବିଶ୍ୱବ୍ୟାପୀ ଓଡ଼ିଆ ଭାଷାର ପ୍ରଚାର ପ୍ରସାର ପାଇଁ ସାହାଯ୍ୟ କରିବ ଏଆଇ । ଏଥିପାଇଁ ଦରକାର ପଡୁଥିବା ତଥ୍ୟ ହାସଲ ପାଇଁ ଖୁବଶୀଘ୍ର ଆରମ୍ଭ ହେବାକୁ ଯାଉଛି ଓଡ଼ିଆ ଭାଷାଦାନ ଅଭିଯାନ । ଶିକ୍ଷା, ସ୍ୱାସ୍ଥ୍ୟ, ବିପର୍ଯ୍ୟୟ ପରିଚାଳନା କ୍ଷେତ୍ରରେ ମଧ୍ୟ ଉନ୍ନତ ସେବା ପାଇଁ ପ୍ରଶାସନକୁ ସାହାଯ୍ୟ କରିବ ଏଆଇ । ଏସବୁ ପାଇଁ ଆବଶ୍ୟକୀୟ ଭିତ୍ତିଭୂମି ଓ ଟେକ୍ନୋଲୋଜି ପ୍ରସ୍ତୁତି କାମରେ ଲାଗିଛି ରାଜ୍ୟ ସରକାରଙ୍କ ଆଇଟି ବିଭାଗ ।
ଖୁବଶୀଘ୍ର ଆରମ୍ଭ ହେବାକୁ ଯାଉଛି ଓଡ଼ିଆ ଭାଷାଦାନ ଅଭିଯାନ । ଓଡ଼ିଆ ଭାଷା କ୍ଷେତ୍ରର ବିଜ୍ଞ ବ୍ୟକ୍ତି ଓ ଅନୁଷ୍ଠାନ ଦେଇପାରିବେ ସେମାନଙ୍କ ଇନପୁଟ । କାରଣ ଇନପୁଟ୍ ଡାଟା ବା ତଥ୍ୟ ଯେତେ ବଳିଷ୍ଠ ହେବ, ଭାଷା ସେତେ ସମୃଦ୍ଧ ହେବ । ପର୍ଯ୍ୟାପ୍ତ ଡାଟା ମିଳିଲେ ଲୋକେ ଓଡ଼ିଆ ଭାଷାରେ ଓଡିଶା ବିଷୟରେ ଅଧିକ ଜାଣିପାରିବେ । ଓଡ଼ିଆ ଭାଷାର ପ୍ରଚାର ପ୍ରସାର ପାଇଁ ଆର୍ଟିଫିସିଆଲ ଇଣ୍ଟିଲିଜେନ୍ସ ସହାୟକ ହେବ । ଆଇଆଇଟି ମାଡ୍ରାସର ଭାରତ ଏଆଇ ହେଉ କି ଆଇଆଇଟି ଭୁବନେଶ୍ୱରର ଭାସିନୀ ଏଆଇ ମଡ୍ୟୁଲ ଖୁବ ସହାୟକ ହେବ । ଓଡ଼ିଶା ଭରଚୁଆଲ ଏକାଡେମୀ ଆରମ୍ଭ କରିବାକୁ ଯାଉଛି ଓଡ଼ିଆ ଭାଷାଦାନ ଅଭିଯାନ । ଆଇଆଇଟି ଭୁବନେଶ୍ୱର ଦ୍ୱାରା ଖୋଲାଯାଇଥିବା ଏଏଚଆରସି କେନ୍ଦ୍ରରେ ଓଡିଆ ଭାଷା ବାବଦରେ ଯେ କୌଣସି ବ୍ୟକ୍ତି କିମ୍ବା ଅନୁଷ୍ଠାନ ନିଜ ନିଜର ଗବେଷଣାର ତଥ୍ୟ ଦାଖଲ କରିପାରିବେ । ଭାଷା ବିଷୟରେ ଅବଦାନ ପାଇଁ ହାତଲେଖା, ସ୍ୱର କିମ୍ବା ସ୍କ୍ରିପଟିଂ ଗ୍ରହଣ କରାଯିବ । ଡାଟା ଷ୍ଟୋରେଜ ପାଇଁ ସ୍ୱତନ୍ତ୍ର ସର୍ଭର ବ୍ୟବସ୍ଥା କରାଯାଇଛି ।
ଓଡ଼ିଆ ଭାଷାଦାନ ଅଭିଯାନରେ ନିଯୁକ୍ତ ହେବେ ୫ ଶହ ଡାଟା ଇଞ୍ଜିନିୟର । ରାଜ୍ୟସ୍ତରରେ କାମ କରିବେ ଶହେରୁ ଅଧିକ ଏଆଇ ଏକ୍ସପର୍ଟ । ଓଡ଼ିଆ ଭାଷା ବିଷୟରେ କୋଣ ଅନୁକୋଣରୁ ଆସୁଥିବା ଇନପୁଟକୁ ଏମାନେ ଅନୁଧ୍ୟାନ କରି ନିର୍ଭୁଲ ଭାବେ ଉପସ୍ଥାପନ କରିବେ । ଭୁବନେଶ୍ୱରରେ ଚାଲିଥିବା ଦୁଇ ଦିନିଆ ଏଆଇ ଇମ୍ପାକ୍ଟ ସମ୍ମିଳନୀରେ ଏହା ଉପରେ ବିଦେଶରୁ ଆସିଥିବା ଏକ୍ସପର୍ଟମାନେ ଆଲୋଚନା କରିଛନ୍ତି । ମଣିଷ ଭଳି ଦେଖାଯାଉଥିବା ରୋବଟ ଆକର୍ଷଣ ପାଲଟିଛି । ମଣିଷ ଭଳି ଦୌଡ଼ି ପାରୁଛି, ନାଚି ପାରୁଛି । ସେଲ୍ଫି ପାଇଁ ରୋବଟ ପାଖରେ ଭିଡ଼ ମଧ୍ୟ କିଛି କମ୍ ନୁହେଁ । ଓଡ଼ିଆ ଭାଷା ଭଳି ଶିକ୍ଷା, ସ୍ୱାସ୍ଥ୍ୟ, ଶକ୍ତି ଓ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଏଆଇର ଉପଯୋଗ ପାଇଁ ଉଦ୍ୟମ ଆରମ୍ଭ ହୋଇଛି । ଏଥିପାଇଁ ଆଇଟି ବିଭାଗ ପକ୍ଷରୁ ଭିତ୍ତିଭୂମି ଓ ଟେକ୍ନୋଲୋଜି ଉପରେ ଗୁରୁତ୍ୱ ଦିଆଯାଉଛି ।
ଓଡ଼ିଶା ପ୍ରଥମ ରାଜ୍ୟ ଭାବେ ଏଆଇ ପଲିସି ଆଣିବା ସହ ଏଆଇ ଭିତ୍ତିଭୂମି ଓ ଟେଲକ୍ନୋଲୋଜି ପାଇଁ ବଜେଟରେ ବ୍ୟବସ୍ଥା କରିଛନ୍ତି ସରକାର । ଏଆଇ ଇମ୍ପାକ୍ଟ ସମ୍ମିଳନୀରେ ଗଣତାନ୍ତ୍ରିକ ପ୍ରକ୍ରିୟାରେ ଏଆଇର ଭୂମିକା ନେଇ ଆଲୋଚନା ଚାଲିଛି ।
୨୬ରେ ପ୍ରତିଷ୍ଠା ଦିବସ ପାଳିବ ବିଜେଡି: ପ୍ରତି ନିର୍ବାଚନ ମଣ୍ଡଳୀରେ ନବୀନ ସରକାର ସମୟର ସଫଳତା ବଖାଣିବେ ନେତା
୨୬ରେ ପ୍ରତିଷ୍ଠା ଦିବସ ପାଳିବ ବିଜେଡି: ପ୍ରତି ନିର୍ବାଚନ ମଣ୍ଡଳୀରେ ନବୀନ ସରକାର ସମୟର ସଫଳତା ବଖାଣିବେ ନେତା
ନନ୍ଦିଘୋଷ ବ୍ୟୁରୋ: ଆସନ୍ତା ୨୬ ତାରିଖରେ ୨୯ତମ ପ୍ରତିଷ୍ଠା ଦିବସ ପାଳନ କରିବ ବିଜୁ ଜନତା ଦଳ । ଏହାକୁ ପ୍ରତି ନିର୍ବାଚନ ମଣ୍ଡଳୀରେ ପାଳନ କରିବ ବିଜେଡି । ଏହି ଅବସରରେ ନବୀନ ପଟ୍ଟନାୟକଙ୍କ ସରକାର ସମୟର ସଫଳତା ଓ ବର୍ତ୍ତମାନ ସରକାରର ପ୍ରତାରଣା ସମ୍ପର୍କରେ ସୃଷ୍ଟି କରାଯିବ ଜନସଚେତନତା । ଜନସେବା ଜାରି ରଖିବାକୁ ପ୍ରତିଷ୍ଠା ଦିବସରେ ସଂକଳ୍ପ ନେବେ ଦଳୀୟ କର୍ମୀ ଓ ନେତୃବୃନ୍ଦ । ଏହାସହ ଭୋଟ ଚୋରି ପରି ପ୍ରସଙ୍ଗ ମଧ୍ୟ ଉଠାଇବ ଦଳ ।
୨୮ ବର୍ଷ ପୂରଣ କରି ୨୯ ବର୍ଷରେ ପଦାର୍ପଣ କରିବ ବିଜୁ ଜନତା ଦଳ । ଏହାକୁ ପ୍ରତି ନିର୍ବାଚନ ମଣ୍ଡଳୀରେ କରାଯିବ ପାଳନ । ଏଥିପାଇଁ ଦଳୀୟ ପଦାଧିକାରୀଙ୍କୁ ଚିଠି ଲେଖି ସେବା କାର୍ଯ୍ୟ ଜାରି ରଖିବାକୁ ନିର୍ଦ୍ଦେଶ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଗତ ୨୮ ବର୍ଷ ଧରି ଉତ୍ସର୍ଗୀକୃତ ମନୋଭାବ ନେଇ ନିଷ୍ଠାପର ଭାବେ ଜନତାଙ୍କ ପାଇଁ ନିରବଚ୍ଛିନ୍ନ ଭାବେ କାମ କରି ଆସୁଛି ବିଜେଡି । ୨୮ ବର୍ଷର ଏହି ଲମ୍ବା ସମୟରେ ଲୋକଙ୍କ ସେବା ଓ ରାଜ୍ୟର ବିକାଶ କରି ଆସୁଛି ଦଳ । ରାଜନୈତିକ ଓ ସାମାଜିକ ଅଙ୍ଗୀକାର ବଦ୍ଧତା ପାଇଁ ମଧ୍ୟ ବେଶ ପରିଚିତ ଲାଭ କରିଛି । ଖାଲି ସେତିକି ନୁହେଁ, ଏକ ସାମାଜିକ ଆନ୍ଦୋଳନରେ ପରିଣତ ହୋଇଛି ଦଳ । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଆଦର୍ଶରେ ଓଡ଼ିଶାର ସବୁ କ୍ଷେତ୍ରରେ ଓ ସବୁ ବର୍ଗର ଲୋକଙ୍କ ବିକାଶ ପାଇଁ ଜନତାଙ୍କ ଅକୁଣ୍ଠ ସମର୍ଥନ ଓ ଶୁଭେଚ୍ଛା ପାଇ ଆସିଛି । ସେହିପରି କର୍ମକର୍ତ୍ତା ଓ ଜନ ପ୍ରତିନିଧିଙ୍କ ନିଷ୍ଠା ମନୋଭାବ ଯୋଗୁଁ ଲୋକଙ୍କ ନିକଟତର ହୋଇଛି ବିଜେଡି ।
ଏକ ଦାୟିତ୍ଵ ସମ୍ପନ୍ନ ବିରୋଧୀ ଦଳ ଭାବେ ବିକାଶର ଆଭିମୁଖ୍ୟକୁ ପ୍ରାଥମିକତା ଦେଇଆସୁଛି ବିଜେଡି । ଏହାସହ ବିଭିନ୍ନ ଜନସ୍ବାର୍ଥ ସମ୍ବଳିତ ପ୍ରସଙ୍ଗରେ ଜନସାଧାରଣଙ୍କୁ ସଚେତନ କରାଉଛି । ରାଜ୍ୟର ସ୍ବାର୍ଥ ପାଇଁ ସ୍ବର ବି ଉତ୍ତୋଳନ କରୁଛି ଦଳ । ଓଡ଼ିଶାବାସୀଙ୍କ ଭଲ ପାଇବାକୁ ପାଥେୟ କରି ବିଜେଡି ତା’ର କାର୍ଯ୍ୟକ୍ରମକୁ ଜାରି ରଖିବ । ସେହିପରି ନବୀନ ସରକାରଙ୍କ ସମୟରେ ନିଆଯାଇଥିବା ସଫଳ କାର୍ଯ୍ୟକ୍ରମ ଓ ବର୍ତ୍ତମାନର ବିଜେପି ସରକାରର ଜନ ବିରୋଧୀ ନୀତି, ଦରଦାମ ବୃଦ୍ଧି, କୁଆଡ଼େ ଗଲା ନିର୍ବାଚନୀ ପ୍ରତିଶୃତି ପରି ପ୍ରସଙ୍ଗରେ ପ୍ରତିଷ୍ଠା ଦିବସରେ ଆଲୋଚନା ହେବ । ଏହି ଅବସରରେ ନବୀନ ପଟ୍ଟନାୟକଙ୍କ ନେତୃତ୍ବରେ ଓଡ଼ିଶାବାସୀଙ୍କ ସ୍ବାଭିମାନକୁ ରକ୍ଷା କରିବାର ସଂକଳ୍ପ ନେବେ ଦଳୀୟ ନେତା ଓ କର୍ମୀ ।
ପ୍ରତିଷ୍ଠା ଦିବସ ଅବସରରେ ଓଡ଼ିଶାବାସୀଙ୍କୁ ଶୁଭକାମନା ଜଣାଇବେ ନବୀନ । ଏହାସହ ନୂଆବର୍ଷ ସମସ୍ତ ପାଇଁ ମଙ୍ଗଳମୟ ହେଉ ବୋଲି ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ସେ ପ୍ରାର୍ଥନା କରିବେ ।
ଆଞ୍ଚଳିକ ଦଳ ଗଠନକୁ ବିଜୟ ମହାପାତ୍ରଙ୍କ ନା, କହିଲେ- କାହାରି ସହ କରିନି ଆଲୋଚନା କି କେହି ମୋ ସହ କରି ନାହାଁନ୍ତି ମନ୍ତ୍ରଣା
ଆଞ୍ଚଳିକ ଦଳ ଗଠନକୁ ବିଜୟ ମହାପାତ୍ରଙ୍କ ନା, କହିଲେ- କାହାରି ସହ କରିନି ଆଲୋଚନା କି କେହି ମୋ ସହ କରି ନାହାଁନ୍ତି ମନ୍ତ୍ରଣା
ନନ୍ଦିଘୋଷ ବ୍ୟୁରୋ: କଂଗ୍ରେସରୁ ବହିଷ୍କୃତ ନେତା ମହମ୍ମଦ ମୋକିମ ଓ ବରିଷ୍ଠ ରାଜନେତା ବିଜୟ ମହାପାତ୍ରଙ୍କ ଭେଟଘାଟ ପରେ ଏବେ ରାଜ୍ୟ ରାଜନୀତିରେ ନୂଆ ଅଙ୍କକଷା ନେଇ ଚର୍ଚ୍ଚା ଚାଲିଛି । ରାଜ୍ୟରେ ଆଉ ଏକ ଆଞ୍ଚଳିକ ଦଳ ମୁଣ୍ଡ ଟେକି ପାରେ ବୋଲି ଚର୍ଚ୍ଚା ହେଉଛି । କିନ୍ତୁ ଏଥିରେ ବର୍ତ୍ତମାନ ଲାଗି ପୂର୍ଣ୍ଣଚ୍ଛେଦ ଟାଣିଛନ୍ତି ନିଜେ ବିଜୟ ମହାପାତ୍ର । ଓଡିଶାରେ ନୂଆ ଆଂଚଳିକ ଦଳ ନେଇ କୌଣସି ଆଲୋଚନା କରିନାହିଁ କି ନିକଟ ଭବିଷ୍ୟତରେ ମଧ୍ୟ ଏହା ହେବାର ସମ୍ଭାବନା ନାହିଁ ବୋଲି ବିଜୟ କହିଛନ୍ତି । ଅନ୍ୟପଟେ ବିଜେଡି କହିଛି, ଯିଏ ଯେଉଁଠି ବସିଗଲେ ଆଞ୍ଚଳିକ ଦଳ ଠିଆ ହୋଇଯାଏ ନାହିଁ ।
ଆଞ୍ଚଳିକ ଦଳ ଗଠନ ଚର୍ଚ୍ଚାକୁ ଖଣ୍ଡନ କଲେ ବରିଷ୍ଠ ରାଜନେତା ବିଜୟ ମହାପାତ୍ର । କଂଗ୍ରେସରୁ ବହିଷ୍କୃତ ପୂର୍ବତନ କଟକ ବାରବାଟୀ ବିଧାୟକ ମହମ୍ମଦ ମୋକିମ ଓ ବିଜୟ ମହାପାତ୍ରଙ୍କ ଭେଟଘାଟକୁ ନେଇ ରାଜ୍ୟ ରାଜନୀତିରେ ନୂଆ ଆଂଚଳିକ ଦଳ ଗଠନ ହେବା ନେଇ ହେଉଥିବା ଚର୍ଚ୍ଚାର ଅନ୍ତ ଘଟାଇଛନ୍ତି ନିଜେ ବରିଷ୍ଠ ରାଜନେତା ବିଜୟ ମହାପାତ୍ର । କହିଛନ୍ତି, ୨୦୨୬ ଓଡିଶା ରାଜନୀତିରେ ବହୁ ଘଟଣା ଘଟିବ ବୋଲି କହିଛନ୍ତି । ନୂଆ ଦଳ ଗଠନ ଚର୍ଚ୍ଚାକୁ ନେଇ ବିଜେଡି ବିଧାୟକ ଅରୁଣ ସାହୁ ତେରେଚ୍ଛା ବାଣ ମାରିଛନ୍ତି । ଅରୁଣଙ୍କ ଯୁକ୍ତି ହେଉଛି କିଏ କେଉଁଠି ଭେଟଘାଟ କଲେ ଆଲୋଚନା କଲେ ନୂଆ ଦଳ ନେଇ ଚର୍ଚ୍ଚା ହେଉଛି, ତାହା ଠିକ ନୁହେଁ । ଓଡ଼ିଶାରେ ଯେଉଁ ସକରାତ୍ମକ ଢଙ୍ଗରେ ରାଜନୀତି ହେବା କଥା ସେ କଥା ହେଉ ନଥିବାରୁ ଭେଟଘାଟକୁ ନେଇ ଏହି ଚର୍ଚ୍ଚା ଜନ୍ମ ନେଉଛି । ରାଜ୍ୟ ଭଲ ସ୍ଥିତିରେ ନାହିଁ । ଅସଲ ମୁଦ୍ଦା ଦୂରେଇ ଯାଉଛି । ତେଣୁ କୌଣସି ଦଳ ଜନ୍ମ ନେବା ପୂର୍ବରୁ ଆକଳନ କରିବା ଠିକ ହେବନି ।
ନୂଆ ଆଞ୍ଚଳିକ ଦଳ ଚର୍ଚ୍ଚାକୁ ନେଇ ରାଜନୈତିକ ସମୀକ୍ଷକ କେ. ରବି ଭିନ୍ନ ଆକଳନ କରିଛନ୍ତି । ତାଙ୍କ ଯୁକ୍ତି ହେଉଛି ଯେହେତୁ ୨୦୨୪ ନିର୍ବାଚନର ପରେ ୩ ପ୍ରମୁଖ ରାଜନୈତିକ ଦଳରେ ଅସନ୍ତୁଷ୍ଟ ନେତାଙ୍କ ସଂଖ୍ୟା ବଢିଛି । ତେଣୁ ରାଜ୍ୟରେ ନୂଆ ରାଜନୈତିକ ଦଳ ଚର୍ଚ୍ଚା ହେଉଛି । ଶାସକ ଦଳର ଅସନ୍ତୋଷ ଓ ଦୁଇ ବିରୋଧୀ ଦଳରେ ରାଜନୈତିକ ବିଶୁଙ୍ଖଳା ଦେଖା ଦେଇଥିବାରୁ ନୂଆ ଆଂଚଳିକ ଦଳ ଚର୍ଚ୍ଚା ଦାନା ବାନ୍ଧୁଛି ।
ଓଡ଼ିଶାର ବରପୁତ୍ର ବିଜୁ ପଟ୍ଟନାୟକଙ୍କ ନାଁରେ ଗଠନ ହୋଇଥିବା ବିଜେଡି ଓଡିଶାର ସଶକ୍ତ ଆଂଚଳିକ ଦଳ ଭାବେ ଉଭା ହୋଇଛି । ୨୪ ବର୍ଷ ଓଡିଶା ଶାସନର ମଙ୍ଗ ଧରି ଆଜି ବିଜେଡି ମୁଖ୍ୟ ବିରୋଧୀ ଦଳ ଭାବେ ଲୋକଙ୍କ ସ୍ଵର ସାଜିଛି । ବିଜେଡି ଛଡ଼ା ଓଡ଼ିଶାରେ ଯେତେ ବି ଆଞ୍ଚଳିକ ଦଳ ଗଢି ଉଠିଛି କାହାକୁ ସଫଳତା ମିଳିନାହିଁ । ତେଣୁ ଓଡ଼ିଶାରେ ପୁଣି ଏକ ଆଂଚଳିକ ଦଳ ଗଠନ ହେବା ଏତେ ସହଜ ନୁହେଁ ।
ଢାକାରେ ଇନକିଲାବ ମଞ୍ଚ ନେତା ଶରିଫ ଓସମାନ ହାଦିଙ୍କ ଶେଷକୃତ୍ୟ, ସେପଟେ ଦେଶରେ କମୁନି ହିଂସା
ଢାକାରେ ଇନକିଲାବ ମଞ୍ଚ ନେତା ଶରିଫ ଓସମାନ ହାଦିଙ୍କ ଶେଷକୃତ୍ୟ, ସେପଟେ ଦେଶରେ କମୁନି ହିଂସା
ନନ୍ଦିଘୋଷ ବ୍ୟୁରୋ: ବାଂଲାଦେଶ ରାଜଧାନୀ ଢାକାରେ ସମ୍ପନ୍ନ ହେଲା ଇନକିଲାବ ମଞ୍ଚ ନେତା ଶରିଫ ଓସମାନ ହାଦିଙ୍କ ଶେଷକୃତ୍ୟ । ଢାକା ୟୁନିଭର୍ସିଟି ସେଣ୍ଟ୍ରାଲ ମସଜିଦରେ ତାଙ୍କ ଶେଷକୃତ୍ୟ ସମ୍ପନ୍ନ ହୋଇଛି । ଜାତୀୟ କବି କାଜି ନଜରୁଲ ଇସଲାମଙ୍କ କବର ନିକଟରେ ତାଙ୍କୁ କବର ଦିଆଯାଇଛି । ଏଥିରେ ହଜାର ହଜାର ଲୋକଙ୍କ ସମାଗମ ଦେଖିବାକୁ ମିଳିଛି । ହାଦିଙ୍କୁ ସମ୍ମାନ ଜଣାଇ ବିଭିନ୍ନ ସରକାରୀ ଓ ବେସରକାରୀ କୋଠାରେ ଜାତୀୟ ପତାକାକୁ କରାଯାଇଥିଲା ଅର୍ଦ୍ଧନମିତ । ସୁରକ୍ଷା ଦୃଷ୍ଟିରୁ ଅନେକ ସ୍ଥାନରେ ଅର୍ଦ୍ଧସାମରିକ ବାହିନୀ ଓ ପୋଲିସ ମୁତୟନ କରାଯାଇଥିଲା । ବାଂଲାଦେଶର ଅନ୍ତରୀଣ ଶାସକ ମହମ୍ମଦ ୟୁନୁସ କହିଛନ୍ତି ହାଦିଙ୍କ ଅବଦାନ ଚିରଦିନ ଲାଗି ଅବିସ୍ମରଣୀୟ ରହିବ ।
ସେପଟେ ଦୀପୁ ଦାସ ହତ୍ୟା ଘଟଣାରେ ରାପିଡ ଆକ୍ସନ ବାଟାଲିୟନ ୭ ଜଣଙ୍କୁ ଗିରଫ କରିଛି ବୋଲି କହିଛନ୍ତି ସରକାରଙ୍କ ମୁଖ୍ୟ ପରାମର୍ଶଦାତା । ଗିରଫ ବ୍ୟକ୍ତିଙ୍କ ବୟସ ୧୯ରୁ ୪୬ ବର୍ଷ ମଧ୍ୟରେ । ତେଣେ ଚଟ୍ଟୋଗ୍ରାମ ସ୍ଥିତ ନ୍ୟାସନାଲ ଡେମୋକ୍ରାଟିକ ଫ୍ରଣ୍ଟ ପାର୍ଟି ସଭାପତି ଅନିସୁଲ ଇସଲାମ ମହମ୍ମଦଙ୍କ ଘରେ ଭଙ୍ଗାରୁଜା କରିଛନ୍ତି ଆନ୍ଦୋଳନକାରୀ । ଉତ୍ତେଜନା ଦୃଷ୍ଟିରୁ ଢାକାର କଲଚରାଲ ସେଣ୍ଟରକୁ ବନ୍ଦ କରିଦିଆଯାଇଛି ।
୨୦୨୪ ଛାତ୍ର ଆନ୍ଦୋଳନର ନେତା ହାଦିଙ୍କ ମୃତ୍ୟୁ ଘଟଣାକୁ ନେଇ ସାରା ଦେଶରେ ସୃଷ୍ଟି ହୋଇଥିଲା ହିଂସା । ଦୁଇଟି ଖବରକାଗଜ କାର୍ଯ୍ୟାଳୟକୁ ଆନ୍ଦୋଳନକାରୀ ପୋଡ଼ି ଦେଇଥିବାବେଳେ ବଙ୍ଗବନ୍ଧୁ ଶେଖ ମୁଜିବୁର ରେହମାନଙ୍କ ଘରକୁ ବି ଭାଙ୍ଗିଦେଇଥିଲେ । ହାଦିଙ୍କ ହତ୍ୟାଙ୍କୁ କେନ୍ଦ୍ର କରି ଢାକାରେ ଥିବା ଦୁଇ ପ୍ରମୁଖ ସମ୍ବାଦପତ୍ର କାର୍ଯ୍ୟାଳୟକୁ ଜାଳି ଦେଇଥିଲେ ଆନ୍ଦୋଳନକାରୀ । ପ୍ରଥୋମ ଆଲୋ ଖବରକାଗଜ ଏବଂ ଡେଲି ଷ୍ଟାର ନାମକ ଦୁଇ ପ୍ରମୁଖ ସମ୍ବାଦପତ୍ର କାର୍ଯ୍ୟାଳୟର କୋଠାରେ ହମଲା କରିଥିଲେ ଆନ୍ଦୋଳନକାରୀ । ଭଂଗାରୁଜା ସହ ନିଆଁ ଲଗାଇ ଦେଇଥିଲେ ।
ସରକାରୀ ଯୋଜନା କାହା ପାଇଁ ? ୮୦ ପ୍ରତିଶତ ଭିନ୍ନକ୍ଷମ ଝିଅ ଜୀଇଁବାକୁ କରୁଛନ୍ତି ସଂଘର୍ଷ
ସରକାରୀ ଯୋଜନା କାହା ପାଇଁ ? ୮୦ ପ୍ରତିଶତ ଭିନ୍ନକ୍ଷମ ଝିଅ ଜୀଇଁବାକୁ କରୁଛନ୍ତି ସଂଘର୍ଷ
ନନ୍ଦିଘୋଷ ବ୍ୟୁରୋ: ଗରିବ, ଅସହାୟ ଓ ଭିନ୍ନକ୍ଷମଙ୍କ ପାଇଁ ସରକାରଙ୍କ ମାଳ ମାଳ ଯୋଜନା । ହେଲେ ପ୍ରକୃତ ହିତାଧିକାରୀଙ୍କ ପାଖରେ ପହଞ୍ଚି ପାରୁନି ଏହାର ସୁଫଳ । ଦୁଃଖ କଷ୍ଟରେ ଜୀବନ ଅତିବାହିତ କରୁଛନ୍ତି ପ୍ରକୃତ ହିତାଧିକାରୀ । ଏମିତି କିଛି ଦେଖିବାକୁ ମିଳିଛି ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ଖଦାଳ ପୋଖରୀ ଗାଁରୁ ।
ଗାଁରେ ରହୁଛନ୍ତି ବୃଦ୍ଧ ଦମ୍ପତି ଏବଂ ତାଙ୍କ ଭିନ୍ନକ୍ଷମ ଝିଅ ସନ୍ଥ ଦାସ, ମାଆ ଗୌରୀ ଏବଂ ଝିଅ ରମା । ଝିଅ ୮୦ ପ୍ରତିଶତ ଭିନ୍ନକ୍ଷମ ହୋଇ ମଧ୍ୟ ସରକାରୀ ସୁବିଧାରୁ ବଞ୍ଚିତ । ସରକାରଙ୍କ ମାଳ ମାଳ ଯୋଜନା ତାଙ୍କ ପାଖରେ ଅପହଞ୍ଚ । ଦୁଇ ଓଳି ଦୁଇ ମୁଠା ଖାଇବାକୁ ସଂଘର୍ଷ କରୁଛନ୍ତି ବୃଦ୍ଧ ଦମ୍ପତିଙ୍କ ସହ ଝିଅ ରମା । ଭଙ୍ଗା ଦଦରା ଘରେ କଟୁଛି ଜୀବନ । ଘର ଖଣ୍ଡେ ନଥିବାରୁ ପଲିଥିନ ଟାଣି ଖରା ,ବର୍ଷା ,ଶୀତ କାକରରେ ରହୁଛନ୍ତି ସମସ୍ତେ । ଗୋଟିଏ ପଟେ ସରକାରଙ୍କ ଅଣଦେଖା ଓ ଅନ୍ୟପକ୍ଷେ ବୃଦ୍ଧାବସ୍ଥାରେ ଭିନ୍ନକ୍ଷମ ଝିଅର ଦାୟିତ୍ବ ଦମ୍ପତିଙ୍କୁ ଭାଙ୍ଗି ଦେଇଛି । ମସ୍ତିଷ୍କ ବିକୃତି କାରଣରୁ ସରକାରଙ୍କ ତରଫରୁ ମିଳିଛି ଭିନ୍ନକ୍ଷମ ସାର୍ଟିଫିକେଟ । ମାତ୍ର ବିଡମ୍ବନାର ବିଷୟ ରମାଙ୍କୁ ମିଳୁନି କୌଣସି ସରକାରୀ ସୁବିଧା ସୁଯୋଗ ।
ଭିନ୍ନକ୍ଷମଙ୍କ ପାଇଁ ୩୫ ଶହ ଟଙ୍କା ଭତ୍ତା ଦେବାର ବ୍ୟବସ୍ଥା ଥିଲେ ମଧ୍ୟ ଏଥରୁ ବଞ୍ଚିତ ରମା । ନା ଅଛି ରାସନ କାର୍ଡ ନା ଅନ୍ତ୍ୟୋଦୟ ଗୃହ ଯୋଜନାରେ ମିଳିଛି ଘର । କେବଳ ପୂର୍ବ ସରକାରଙ୍କ ସମୟରେ ମିଳୁଥିବା ୧ ହଜାର ଟଙ୍କା ଭତ୍ତା ସାହା ଭରସା । ବୃଦ୍ଧ ଦମ୍ପତିଙ୍କୁ ମିଳୁଥିବା ୨ ହଜାର ଭତ୍ତା ଓ ୧୦ କିଲୋ ଚାଉଳରେ ମାସ ସାରା ଚଳୁଛନ୍ତି ତିନି ଅସହାୟ । ନେତା, ମନ୍ତ୍ରୀଙ୍କଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ସୁଦ୍ଧା କୌଣସି ସୁଫଳ ମିଳୁ ନଥିବା ଅଭିଯୋଗ କରିଛନ୍ତି ଏହି ପରିବାର ।
ମରଣଯନ୍ତା ପାଲଟିଛି ୨୦ ନମ୍ବର ଜାତୀୟ ରାଜପଥ; ପ୍ରତିଦିନ ଘଟୁଛି ଦୁର୍ଘଟଣା, ଏନଏଚ କର୍ତ୍ତୃପକ୍ଷଙ୍କ ନିଘା ନାହିଁ
ମରଣଯନ୍ତା ପାଲଟିଛି ୨୦ ନମ୍ବର ଜାତୀୟ ରାଜପଥ; ପ୍ରତିଦିନ ଘଟୁଛି ଦୁର୍ଘଟଣା, ଏନଏଚ କର୍ତ୍ତୃପକ୍ଷଙ୍କ ନିଘା ନାହିଁ
ନନ୍ଦିଘୋଷ ବ୍ୟୁରୋ: ମରଣଯନ୍ତା ପାଲଟିଛି ୨୦ ନମ୍ବର ଜାତୀୟ ରାଜପଥ । କେନ୍ଦୁଝର ରିମୁଳିରୁ ଚମ୍ପୁଆ ୧୫ କିମି ରାସ୍ତା ଏନଏଚରେ ସାମିଲ ହୋଇଥିଲେ ସୁଦ୍ଧା ବିକାଶର ଚିହ୍ନବର୍ଣ୍ଣ ନାହିଁ । ଖାଲଖମା ଭରା ରାସ୍ତାରେ ପ୍ରତିଦିନ ଘଟୁଛି ଦୁର୍ଘଟଣା, ଯାଉଛି ଜୀବନ । ବାରମ୍ବାର ଦାବି ପରେ ବି ରାସ୍ତା ପ୍ରଶାସ୍ତିକରଣ ପାଇଁ ତତ୍ପରତା ଦେଖାଉନି ଏନଏଚ କର୍ତ୍ତୃପକ୍ଷ । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ବଢ଼ିବାରେ ଲାଗିଛି ।
ରିମୁଳିରୁ ଚମ୍ପୁଆ ୧୫ କିମି ରାସ୍ତାକୁ ୨୦ ନମ୍ବର ଜାତୀୟ ରାଜପଥରେ ଯୋଡି ଯାଇଛି । ମାତ୍ର ଘୋଷଣା କରି ବିଭାଗ ଏହାର ନିର୍ମାଣ କାର୍ଯ୍ୟକୁ ଗୁରୁତ୍ୱ ଦେଉ ନଥିବାରୁ ଯଥା ପୂର୍ବଂ ତଥା ପରଂ ସ୍ଥିତି । ରାସ୍ତା ସାରା ଖାଲଖମାରେ ପରିପୂର୍ଣ୍ଣ । ଓ୍ବାନ ଓ୍ବେ ଥିବାରୁ ଯିବା ଆସିବା କରିବାକୁ ଡରୁଛନ୍ତି ଲୋକେ। ଶହଶହ ଟ୍ରଲର, ଟ୍ରକ ରାସ୍ତା ଦେଇ ଯାଉଥିବାରୁ ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଛି ।
ବିପର୍ଯ୍ୟସ୍ତ ରାସ୍ତାରେ ଦୈନିକ ଘଟୁଛି ଦୁର୍ଘଟଣା । କିଏ ଜୀବନ ହାରୁଛି ତ କିଏ ପଙ୍ଗୁ ହୋଇ ଯାଉଛି । ତଥାପି ଚେତୁ ନାହାଁନ୍ତି ଏନଏଚ କର୍ତ୍ତୃପକ୍ଷ । ଚମ୍ପୁଆ ଉପଖଣ୍ଡର ଲାଇଫ ଲାଇନ କୁହାଯାଉଥିବା ଏହି ରାସ୍ତାରେ ଦୈନିକ ହଜାର ହଜାର ଭାରିଯାନ ଖଣିଜ ପଦର୍ଥ ପରିବହନ କରୁଛି । ଫଳରେ ରାସ୍ତା ଜାମ ସମସ୍ୟା ଦେଖାଦେଉଛି । ବାରମ୍ବାର ରାସ୍ତାର ପ୍ରଶସ୍ତିକରଣ ପାଇଁ ଦାବି ହୋଇଥିଲେ ସୁଦ୍ଧା ଏନଏଚ କର୍ତ୍ତୃପକ୍ଷ ନିଦାବିଷ୍ଣୁ ସାଜିଛନ୍ତି । ରାସ୍ତା ସମସ୍ୟା ସମ୍ପର୍କରେ ପଚାରିବାରୁ କ୍ୟାମେରା ଆଗରେ ମୁହଁ ଖୋଲି ନଥିଲେ ଏନଏଚ ଅଧିକାରୀ ।
ଟି-୨୦ ବିଶ୍ବକପ୍ ପାଇଁ ଟଇମ୍ ଇଣ୍ଡିଆ ଘୋଷଣା: ଗିଲ ଆଉଟ୍, ଇଶାନ ଇନ୍
ଟି-୨୦ ବିଶ୍ବକପ୍ ପାଇଁ ଟଇମ୍ ଇଣ୍ଡିଆ ଘୋଷଣା: ଗିଲ ଆଉଟ୍, ଇଶାନ ଇନ୍
ନନ୍ଦିଘୋଷ ବ୍ୟୁରୋ: ୨୦୨୬ରେ ଖେଳାଯିବାକୁ ଥିବା ଟି୨୦ ବିଶ୍ବକପ୍ ପାଇଁ ଘୋଷଣା ହୋଇଛି ଭାରତୀୟ ଦଳ । ଆଜି ଅର୍ଥାତ ୨୦ ଡିସେମ୍ବରରେ ବିସିସିଆଇର ମୁମ୍ବାଇ ହେଡକ୍ବାର୍ଟରରେ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ଅଧ୍ୟକ୍ଷତାରେ ଚୟନ କମିଟି ସଦସ୍ୟଙ୍କୁ ନେଇ ବୈଠକ ହୋଇଥିଲା । ଏଥିରେ ୧୫ ଜଣ ଖେଳାଳିଙ୍କ ନାଁରେ ମୋହର ବାଜିଛି । ୨୦୨୬ରେ ଭାରତ ସୂର୍ଯ୍ୟକୁମାର ଯାଦବଙ୍କ ଅଧିନାୟକତ୍ବରେ ଫିଲ୍ଡକୁ ଓହ୍ଲାଇବ । ତେବେ ଟିମ୍ ଘୋଷଣା ବେଳେ ଶୁଭମନ ଗିଲଙ୍କୁ ନେଇ ବଡ଼ ଖବର ମିଳିଛି । ବିଶ୍ବକପ୍ ଦଳରେ ଗିଲଙ୍କୁ ସ୍ଥାନ ମିଳିନି । ଆଉ ତାଙ୍କ ସ୍ଥାନରେ ଧୂଆଁଧାର ବ୍ୟାଟର ଇଶାନ କିଶନ କମବ୍ୟାକ୍ କରିଛନ୍ତି । ବୈଠକ ପରେ ବିସିସିଆ ସେକ୍ରେଟାରୀ ଦେବଜିତ ସାଇକିୟା ଟିମ୍ ଘୋଷଣା କରିଥିଲେ ।
ବିଶ୍ବକପ୍ ପାଇଁ ଭାରତୀୟ ଦଳ
ସୂର୍ଯ୍ୟକୁମାର ଯାଦବ (ଅଧିନାୟକ)
ଅଭିଶେକ ଶର୍ମା
ସଞ୍ଜୁ ସାମସଙ୍ଗ (ଓ୍ବିକେଟ କିପର)
ଇଶାନ କିଶନ
ହାର୍ଦ୍ଦିକ ପାଣ୍ଡ୍ୟା
ତିଲକ ବର୍ମା
ଅକ୍ଷର ପଟେଲ (ଉପ-ଅଧିନାୟକ)
ଶିବମ ଦୁବେ
ଓ୍ବାସିଂଟନ ସୁନ୍ଦର
କୁଲଦୀପ ଯାଦବ
ବରୁଣ ଚକ୍ରବର୍ତ୍ତି
ଜସପ୍ରିତ ବୁମରା
ହର୍ଷିତ ରାଣା
ଅର୍ଶଦୀପ ସିଂହ
ରିଙ୍କୁ ସିଂହ
ଗିଲଙ୍କୁ ମିଳିଲାନି ସ୍ଥାନ, ଅକ୍ଷର ପଟେଲ ଉପ-ଅଧିନାୟକ
ଶୁଭମନ ଗିଲଙ୍କୁ ଟିମରେ ସ୍ଥାନ ମିଳିନି । ଆଉ ଟି୨୦ ବିଶ୍ବକପ୍ ଟିମର ଉପ-ଅଧିନାୟକ ଅକ୍ଷର ପଟେଲଙ୍କୁ କରାଯାଇଛି । ସେହିପରି ବହୁଦିନ ପରେ ଟିମ୍ ଇଣ୍ଡିଆକୁ ଇଶାନ କିଶାନଙ୍କ କମବ୍ୟାକ ହୋଇଛି । ତାଙ୍କ ସହ ରିଙ୍କୁ ସିଂହ ବି ଦଳକୁ ଫେରିଛନ୍ତି । ରିଙ୍କୁ ଟି୨୦ ଏସିଆ କପ୍ ଟିମରେ ଥିଲେ ବି ଦକ୍ଷିଣ ଆଫ୍ରିକା ସିରିଜରେ ତାଙ୍କୁ ସ୍ଥାନ ମିଳି ନଥିଲା । ସେହିପରି ଓ୍ବିକେଟ କିପର ବ୍ୟାଟର ଜିତେଶ ଶର୍ମାଙ୍କୁ ଟିମରେ ସ୍ଥାନ ମିଳିନି । ବିଶ୍ବକପରେ ଭାରତୀୟ ପେସ୍ ବାହିନୀର ମଙ୍ଗ ବୁମରା ସମ୍ଭାଳିବାକୁ ଥିବା ବେଳେ ସ୍ପିନ ବିଭାଗକୁ ବରୁଣ ଓ କୁଲଦୀପ ସମ୍ଭାଳିବେ । ଏହାବାଦ ପାଣ୍ଡ୍ୟା ଓ ଦୁବେଙ୍କ ପରି ଅଲରାଉଣ୍ଡର ଦଳକୁ ସନ୍ତୁଳିତ କରୁଛି ।
ଇଶାନଙ୍କ ଦମଦାର ପ୍ରଦର୍ଶନ
ଟି୨୦ ବିଶ୍ବକପ ଟିମରୁ ଗିଲ ବାହାର ହେବା ଓ ଇଶାନ ଫେରିବା ପଛରେ ବଡ଼ କାରଣ ରହିଛି । ଗିଲ ଯେଉଁଠି ଦକ୍ଷିଣ ଆଫ୍ରିକା ବିପକ୍ଷ ଟି୨୦ର ୩ଟି ମ୍ୟାଚରେ ମାତ୍ର ୩୨ ରନ୍ କରିଥିଲେ । ଅନ୍ୟପକ୍ଷେ ଇଶାନ କିଶାନ ସୟଦ ମୁସ୍ତାକ ଅଲି ଟୁର୍ଣ୍ଣାମେଣ୍ଟରେ ଦମଦାର ପ୍ରଦର୍ଶନ କରିଥିଲେ । ଏହି ଟି୨୦ ଫର୍ମାଟରେ ଇଶାନ ସର୍ବାଧିକ ରନ କରିଥିବା ବେଳେ ସର୍ବାଧିକ ଛକା ଓ ଶତକ ମାରିଛନ୍ତି । ସେତିକି ନୁହେଁ, ନିଜ ଅଧିନାୟକତ୍ବ ବଳରେ ସେ ପ୍ରଥମ ଥର ଝାଡ଼ଖଣ୍ଡକୁ ଏହି ଟୁର୍ଣ୍ଣାମେଣ୍ଟ ଜିତାଇଛନ୍ତି । ଟୁର୍ଣ୍ଣାମେଣ୍ଟରେ ସହ ୧୦ଟି ମ୍ୟାଚ୍ ଖେଳି ୫୦୦ରୁ ଅଧିକ ରନ୍ କରିଛନ୍ତି ।