ନନ୍ଦିଘୋଷ ବ୍ୟୁରୋ : ଯାତ୍ରାରେ ଏବେ ଟ୍ରେଣ୍ଡ ଚାଲିଛି ଚେୟାର ସହ ପାଣି ବୋତଲ ମାଡ । କେତେବେଳେ ଆପତ୍ତି ଜନକ ଦୃଶ୍ୟ ପାଇଁ ତ ଆଉ କେତେବେଳେ ଧର୍ମାନ୍ତିକରଣ ଦୃଶ୍ୟ ପରିବେଷଣ ପାଇଁ ଦର୍ଶକ ମାନେ କଳାକାରଙ୍କୁ ବିରୋଧ କରୁଛନ୍ତି । ଚେୟାର ପାଣି ବୋତଲ ଫିଙ୍ଗି ସିଧା ସଳଖ ପ୍ରତିବାଦ କରୁଛନ୍ତି। ଏଭଳି ଦୃଶ୍ୟ ଦେଖିବାକୁ ମିଳିଛି ଅପେରା ଯାଜ୍ଞସେନୀରେ । ଗତକାଲି କଟକ ଜିଲ୍ଲା ତିଗିରିଆ ଥାନା ନୂଆପାଟଣା ଠାରେ ଅପେରା ଯାଜ୍ଞସେନୀର “ସନାତନୀ” ନାଟକ ପରିବେଷଣ ବେଳେ ଉତ୍ତେଜନା ଦେଖାଦେଇଛି। ଏକ ଧର୍ମାନ୍ତିକରଣ ଦୃଶ୍ୟ ପରିବେଷଣ ବେଳେ ଷ୍ଟେଜ ଉପରକୁ ଚେୟାର ଓ ପାଣି ବୋତଲ ମାଡ କରିଥିଲେ ଦର୍ଶକ ।
ଦିଲ୍ଲୀରେ ନାବାଳିକାଙ୍କୁ ଗଣଦୁଷ୍କର୍ମ ପରେ ହତ୍ୟା ଅଭିଯୋଗ, ୪ ଗିରଫ
ନନ୍ଦିଘୋଷ ବ୍ୟୁରୋ : ଦିଲ୍ଲୀରେ ଜଣେ ୧୭ ବର୍ଷୀୟା ନାବାଳିକାଙ୍କୁ ଗଣଦୁଷ୍କର୍ମ ପରେ ହତ୍ୟା ଅଭିଯୋଗ। ଛୁରୀରେ ଭୁସି ହତ୍ୟା କରାଯାଇଥିଲା। ଘଟଣାରେ ୪ ଜଣଙ୍କୁ ପୁଲିସ ଧରିଛି। ଧରାପଡ଼ିଥିବା ୪ ଜଣଙ୍କ ମଧ୍ୟରେ ୩ ଜଣ ନାବାଳକ। ସ୍ୱରୂପ ନଗର ଥାନା ଅଞ୍ଚଳର କୁଶକ ରୋଡ୍ ନିକଟ ଜୟପାଲ ରାଣାଙ୍କ ଜମି ପାଖ ଏକ ଖୋଲା ପଡ଼ିଆରୁ ସେପ୍ଟେମ୍ବର ୧୩ରେ ନାବାଳିକାଙ୍କ ମୃତଦେହ ମିଳିଥିଲା। ଦୀର୍ଘ ସମୟ ଧରି ମୃତଦେହ ପଡ଼ିରହିବାରୁ ତାହା ଅତ୍ୟଧିକ ପଚିଯାଇଥିଲା। ଫଳରେ ପ୍ରାଥମିକ ଭାବେ ମୃତଦେହଟି ପୁରୁଷ କି ମହିଳା, ତାହା ମଧ୍ୟ ସ୍ପଷ୍ଟ ହୋଇନଥିଲା। ମୃତଦେହର କିଛି ଅଂଶକୁ ବୁଲା କୁକୁର ଖାଇ ଦେଇଥିବା ବେଳେ ଗୋଟିଏ ହାତ ଶରୀରଠାରୁ ଅଲଗା ଅବସ୍ଥାରେ ମିଳିଥିଲା। ପୁଲିସ କହିଛି, ମୃତ ନାବାଳିକା ଏବଂ ଅଭିଯୁକ୍ତମାନେ ପରସ୍ପରକୁ ଜାଣିଥିଲେ। ଘଟଣା ଦିନ ନାବାଳିକା ଅଭିଯୁକ୍ତମାନଙ୍କ ସହ ଏକ ଟେମ୍ପୋରେ ଯାତ୍ରା କରୁଥିଲେ। ଟେମ୍ପୋ ଭିତରେ ସେମାନେ ମଦ୍ୟପାନ କରିଥିବା ଏବଂ ପରେ ନାବାଳିକାଙ୍କୁ ଯୌନ ନିର୍ଯାତନା ଦେଇ ଛୁରୀ ଭୁସି ହତ୍ୟା କରାଯାଇଥିଲା। ୫୦ରୁ ଅଧିକ ସିସିଟିଭି ଫୁଟେଜ୍ ଯାଞ୍ଚ ପରେ ଟେମ୍ପୋର ସୁରାଗ ମିଳିଥିଲା। ଡ୍ରାଇଭରକୁ ପଚରା ଉଚରା ପରେ ସବୁ ଜଣାପଡ଼ିଥିଲା।
ଶ୍ରୀମନ୍ଦିରରେ ଆଜି କେକେଶି ବଧ ଲୀଳା, କାଳିକାଦେବୀ ସାହି ପକ୍ଷରୁ ଅନୁଷ୍ଠିତ ହେବ ପରମ୍ପରା
ନନ୍ଦିଘୋଷ ବ୍ୟୁରୋ : ଆଜି ଭାଦ୍ରବ ଶୁକ୍ଳ ସପ୍ତମୀ ତିଥି । ଶ୍ରୀମନ୍ଦିରରେ ମହାପ୍ରଭୁଙ୍କର ନିକଟରେ କେକେଶି ବଧପ୍ରସ୍ତାବ ଅନୁଷ୍ଠିତ ହେବ। ସନ୍ଧ୍ୟାଧୂପ ନୀତି ପରେ କାଳିକାଦେବୀ ସାହି ପକ୍ଷରୁ କେକେଶି ବଧପ୍ରସ୍ତାବ ଅନୁଷ୍ଠିତ ହେବ। ପରମ୍ପରା ଅନୁସାରେ ସନ୍ଧ୍ୟାଧୂପ ପରେ ମଦନମୋହନ ରତ୍ନ ସିଂହାସନକୁ ବିଜେ କରିବା ସହ ଜଗନ୍ନାଥଙ୍କ ବାଡରୁ ଆଜ୍ଞାମାଳ ପ୍ରାପ୍ତି କରି ନାଟ ମଣ୍ଡପ ସ୍ଥିତ ଖଟ ଉପରକୁ ବିଜେ କରିବେ। ପରେ ପ୍ରଭୁଙ୍କର ଛାମୁରେ କାଳିକାଦେବୀ ସାହି ଲୋକ କେକେଶି ବଧ ପ୍ରସ୍ତାବ କରିବେ। ଦ୍ୱାପର ଯୁଗର କଥା ଅନୁସାରେ କେକେଶି ରାକ୍ଷସକୁ ମହାରାଜ କଂସ ଶ୍ରୀକୃଷ୍ଣଙ୍କୁ ହତ୍ୟା କରିବାକୁ ପଠାଇଥିଲେ। ଭିନ୍ନ ଭିନ୍ନ ରୂପ ଧାରଣ କରି ଭଗବାନ ଶ୍ରୀକୃଷ୍ଣ ଙ୍କୁ କେକଶୀ ଆକ୍ରମଣ କରିବାକୁ ଚେଷ୍ଟା କରିଥିଲା। ମାତ୍ର ଭଗବାନ ଶ୍ରୀକୃଷ୍ଣ ତାର ପ୍ରକୃତ ରୂପ ଜାଣିପାରି ତାକୁ ହତ୍ୟା କରିଥିଲେ । ସେହି ସ୍ମୃତି ରେ କାଳିକାଦେବୀ ସାହିରୁ କେକେଶି ବଧ ଲୀଳା କରିବା ପାଇଁ ଜଣେ ବେଶ ହୋଇ ସ୍ୱତନ୍ତ୍ର ଭାବରେ ଉପସ୍ଥିତ ହୁଅନ୍ତି। ନାଟମଣ୍ଡପରେ ଉପସ୍ଥିତ ହେଲା ପରେ ପ୍ରଭୁଙ୍କ ଶୀତଳ ଭୋଗ ଓ ବନ୍ଦାପନା କରାଯାଇଥାଏ ।
ଉତ୍କଳ ବିଶ୍ୱବିଦ୍ୟାଳୟ ପ୍ରଶ୍ନପତ୍ର ଲିକ୍ ଅଭିଯୋଗ, ସୋସିଆଲ ମିଡିଆରେ ଘୁରୁଛି ପ୍ରଶ୍ନପତ୍ର
ନନ୍ଦିଘୋଷ ବ୍ୟୁରୋ : ଉତ୍କଳ ବିଶ୍ୱବିଦ୍ୟାଳୟର ପ୍ରଶ୍ନପତ୍ର ଲିକ୍ ଅଭିଯୋଗ। ଯୁକ୍ତ ୩ ଦ୍ୱିତୀୟ ସେମିଷ୍ଟାରର ବିଭିନ୍ନ ବିଷୟର ପ୍ରଶ୍ନପତ୍ର ପରୀକ୍ଷା ପୂର୍ବରୁ ସୋସିଆଲ ମିଡିଆରେ ଘୁରୁଥିବା ଅଭିଯୋଗ ହୋଇଛି। ପରୀକ୍ଷାର ଦିନକ ପୂର୍ବରୁ ପ୍ରଶ୍ନପତ୍ର ସୋସିଆଲ ମିଡିଆରେ ଆସୁଥିବା ନେଇ ଛାତ୍ରଛାତ୍ରୀଙ୍କ ମଧ୍ୟରେ ଚର୍ଚ୍ଚା ହେଉଛି। ସେପ୍ଟେମ୍ବର ୧୨ ତାରିଖରୁ ଯୁକ୍ତ ୩ ଦ୍ୱିତୀୟ ସେମିଷ୍ଟାର ପରୀକ୍ଷା ଆରମ୍ଭ ହୋଇଛି। ଉତ୍କଳ ବିଶ୍ୱବିଦ୍ୟାଳୟ ଅଧୀନରେ ଥିବା ପ୍ରାୟ ୩୦୦ କଲେଜରେ ଏହି ପରୀକ୍ଷା ଚାଲିଛି। ପ୍ରଶ୍ନପତ୍ର ଲିକ୍ ଅଭିଯୋଗକୁ ନେଇ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଯାଞ୍ଚ ଆରମ୍ଭ କରିଛନ୍ତି। ପରୀକ୍ଷା ନିୟନ୍ତ୍ରକ ଡକ୍ଟର ହୃଷୀକେଶ ନାୟକ କହିଛନ୍ତି, ପ୍ରଶ୍ନପତ୍ର କେଉଁଠାରୁ ଲିକ୍ ହୋଇଛି, ତାହାର ତଦନ୍ତ କରାଯିବ। କୁଳପତିଙ୍କ ନେତୃତ୍ୱରେ ଏନେଇ ତଦନ୍ତ ହେବା ସହ ସାଇବର ଥାନାରେ ଏତଲା ଦିଆଯିବ। ଯଦି ପ୍ରକୃତରେ ପ୍ରଶ୍ନପତ୍ର ଲିକ୍ ହୋଇଥିବା ପ୍ରମାଣିତ ହୁଏ, ତେବେ ସମ୍ପୃକ୍ତ ବିଷୟର ପରୀକ୍ଷା ପୁନଃ କରାଯିବ।
ନିୟମ ଅନୁସାରେ ବିଶ୍ୱବିଦ୍ୟାଳୟରୁ ପ୍ରଶ୍ନପତ୍ର ସିଲ୍ ହୋଇ କଲେଜକୁ ପଠାଯାଇଥାଏ। ପରୀକ୍ଷା ଆରମ୍ଭର ୩୦ ମିନିଟ୍ ପୂର୍ବରୁ ଏହାକୁ ଖୋଲାଯାଏ। ତେଣୁ ପ୍ରଶ୍ନପତ୍ର କେଉଁଠାରୁ ଲିକ୍ ହେଲା ଏବଂ ବ୍ୟବସ୍ଥାରେ କେଉଁଠି ତ୍ରୁଟି ରହିଲା, ତାହାର ପୁଙ୍ଖାନୁପୁଙ୍ଖ ଅନୁଧ୍ୟାନ କରାଯିବ ବୋଲି ପରୀକ୍ଷା ନିୟନ୍ତ୍ରକ କହିଛନ୍ତି।
ଉମରକୋଟରେ ଅଜଣା ଜ୍ୱର ସାଙ୍ଗକୁ ଝାଡ଼ାବାନ୍ତି ଆତଙ୍କ, ୮ ବର୍ଷର ଶିଶୁ ମୃତ ଅଭିଯୋଗ
ନନ୍ଦିଘୋଷ ବ୍ୟୁରୋ : ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ କେନ୍ଦୁଘାଟ ଗାଁରେ ଅଜଣା ଜ୍ୱର ସାଙ୍ଗକୁ ଝାଡ଼ାବାନ୍ତି ଆତଙ୍କ। ଜ୍ୱର ଓ ଝାଡ଼ାବାନ୍ତିରେ ଆକ୍ରାନ୍ତ ହୋଇ ଗାଁର ଜଣେ ୮ ବର୍ଷର ନାବାଳକର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଗାଁରେ ଏକାଧିକ ଲୋକ ଅସୁସ୍ଥ ହୋଇପଡ଼ିଥିବା ବେଳେ ୭ରୁ ଊର୍ଦ୍ଧ୍ୱ ଆକ୍ରାନ୍ତ ପୂଜାରୀଗୁଡ଼ା ମେଡିକାଲରେ ଭର୍ତ୍ତି ହୋଇଛନ୍ତି । ଗୁରୁବାର ଦିନ କେନ୍ଦୁଘାଟ ଗାଁର ଅନେକ ଲୋକଙ୍କୁ ଝାଡ଼ାବାନ୍ତି ହୋଇଥିଲା। ସ୍ଥିତି ଗମ୍ଭୀର ହେବା ପରେ ପୂଜାରୀଗୁଡ଼ାରୁ ଏକ ମେଡିକାଲ ଟିମ୍ କେନ୍ଦୁଘାଟରେ ପହଞ୍ଚି ଆକ୍ରାନ୍ତଙ୍କୁ ଚିକିତ୍ସା ପାଇଁ ମେଡିକାଲକୁ ଆଣୁଥିବା ସୂଚନା ମିଳିଛି। ତେବେ ନାବାଳକର ମୃତ୍ୟୁର ପ୍ରକୃତ କାରଣ ସ୍ବାସ୍ଥ୍ୟ ବିଭାଗ ପକ୍ଷରୁ ସ୍ପଷ୍ଟ ହୋଇନାହିଁ। । କେନ୍ଦୁଘାଟରେ ଏବେ ତୁରନ୍ତ ଚିକିତ୍ସା ଶିବିର, ଆକ୍ରାନ୍ତଙ୍କ ଚିହ୍ନଟ ଏବଂ ଆବଶ୍ୟକ ଚିକିତ୍ସା ସୁନିଶ୍ଚିତ କରିବା ଦାବି ଜୋର ଧରିଛି ।
ଟଙ୍କା ନେଣଦେଣକୁ ନେଇ ମରଣାନ୍ତକ ଆକ୍ରମଣ, ଭଙ୍ଗା କାଚ ବୋତଲରେ ଯୁବକଙ୍କ ମୁହଁକୁ ଆଘାତ
ନନ୍ଦିଘୋଷ ବ୍ୟୁରୋ : ଟଙ୍କା ନେଣଦେଣକୁ ନେଇ ମରଣାନ୍ତକ ଆକ୍ରମଣ। ଭଙ୍ଗା କାଚ ବୋତଲରେ ଯୁବକଙ୍କ ମୁହଁକୁ ଆକ୍ରମଣ ଅଭିଯୋଗ। ଗୁରୁତର ଅବସ୍ଥାରେ ଆହତ ଯୁବକଙ୍କୁ ଭୁବନେଶ୍ୱର ଏମ୍ସକୁ ସ୍ଥାନାନ୍ତର କରାଯାଇଛି। ପୁରୀ ଜିଲ୍ଲା କାକଟପୁର ଅଞ୍ଚଳରୁ ଆସିଛି ଏଭଳି ଅଭିଯୋଗ। ସମାକୁଳା ଅଞ୍ଚଳରେ ସାମାନ୍ୟ ଟଙ୍କା ନେଣଦେଣକୁ କେନ୍ଦ୍ର କରି ଏହି ଆକ୍ରମଣ ହୋଇଥିବା ଜଣାପଡ଼ିଛି। ଉପୁଳା ଗାଁର ଯୋଗେନ୍ଦ୍ର ସେଠୀ ଓ ସୁରେନ୍ଦ୍ର ବେହେରାଙ୍କ ମଧ୍ୟରେ ଦୀର୍ଘଦିନ ଧରି ଟଙ୍କା ନେଣଦେଣକୁ ନେଇ ବିବାଦ ଲାଗି ରହିଥିଲା। ଗତକାଲି ରାତିରେ ନୟାହାଟ-କୋଣାର୍କ ମୁଖ୍ୟ ରାସ୍ତାରେ ଉଭୟଙ୍କ ମଧ୍ୟରେ ପ୍ରଥମେ ବଚସା ହୋଇଥିଲା। ପରେ ବଚସା ଉଗ୍ର ରୂପ ନେବାରୁ ଯୋଗେନ୍ଦ୍ର ପାଖରେ ଥିବା ଏକ କାଚ ବୋତଲ ଭାଙ୍ଗି ସୁରେନ୍ଦ୍ରଙ୍କ ମୁହଁକୁ ଆକ୍ରମଣ କରିଥିବା ଅଭିଯୋଗ ହୋଇଛି। ସୂଚନା ପାଇ ନୟାହାଟ ଫାଣ୍ଡି ଓ କୋଣାର୍କ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଘଟଣା ପରେ ଅଭିଯୁକ୍ତ ଯୋଗେନ୍ଦ୍ର ଫେରାର ଥିବା ବେଳେ ତାଙ୍କୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।
ତୃଣମୂଳର ନାଁ-ଚିହ୍ନ ଫ୍ରିଜ୍, ଉପନିର୍ବାଚନ ପାଇଁ ନୂଆ ନାଁ ଓ ପ୍ରତୀକ ବାଛିବେ ଦୁଇ ଗୋଷ୍ଠୀ
ନନ୍ଦିଘୋଷ ବ୍ୟୁରୋ : ତୃଣମୂଳ କଂଗ୍ରେସର ନାଁ ଓ ନିର୍ବାଚନୀ ଚିହ୍ନକୁ ଅସ୍ଥାୟୀ ଭାବେ ଫ୍ରିଜ୍ କରିଛନ୍ତି ନିର୍ବାଚନ କମିଶନ। ଏବେ ଉପନିର୍ବାଚନରେ ଦଳର ନାଁ କିମ୍ବା ‘ଫୁଲ ଓ ଘାସ’ ଚିହ୍ନ ବ୍ୟବହାର କରିପାରିବେ ନାହିଁ କୌଣସି ଗୋଷ୍ଠୀ। ଆଗାମୀ ଉପନିର୍ବାଚନ ପାଇଁ ଉଭୟ ଗୋଷ୍ଠୀକୁ ନୂଆ ନାଁ ଓ ନିର୍ବାଚନୀ ଚିହ୍ନ ବାଛିବାକୁ ନିର୍ଦ୍ଦେଶ ଦିଆଯାଇଛି। ମମତା ବାନାର୍ଜୀ ଓ ଋତବ୍ରତ ବାନାର୍ଜୀଙ୍କ ନେତୃତ୍ୱାଧୀନ ଦୁଇ ଗୋଷ୍ଠୀକୁ ନିଜ ପସନ୍ଦର ତିନୋଟି ନାଁ ଏବଂ ତିନୋଟି ନିର୍ବାଚନୀ ଚିହ୍ନର ବିକଳ୍ପ ଦାଖଲ କରିବାକୁ କୁହାଯାଇଛି। ଏହି ଚିହ୍ନଗୁଡ଼ିକ ନିର୍ବାଚନ କମିଶନଙ୍କ ମୁକ୍ତ ପ୍ରତୀକ ତାଲିକାରୁ ବାଛିବାକୁ ପଡ଼ିବ। ଉଭୟ ଗୋଷ୍ଠୀକୁ ଆଜି ସକାଳ ୧୧ଟା ସୁଦ୍ଧା ପସନ୍ଦ କ୍ରମରେ ବିକଳ୍ପ ଦାଖଲ କରିବାକୁ ନିର୍ଦ୍ଦେଶ ରହିଛି। ଏହି ଅସ୍ଥାୟୀ ବ୍ୟବସ୍ଥା ଆସନ୍ତା ଉପନିର୍ବାଚନ ପର୍ଯ୍ୟନ୍ତ ଲାଗୁ ରହିବ। ଅକ୍ଟୋବର ୬ରେ ନନ୍ଦିଗ୍ରାମ ଓ ରେଜିନଗର ଆସନରେ ଉପନିର୍ବାଚନ ହେବ। ଏହି ଦୁଇ ଆସନ ପାଇଁ ଉଭୟ ଗୋଷ୍ଠୀ ପ୍ରାର୍ଥୀ ଦେଇଥିବା ବେଳେ ଦଳର ନାଁ ଓ ନିର୍ବାଚନୀ ଚିହ୍ନ ଉପରେ ନିଜ ନିଜ ଦାବି ରଖିଛନ୍ତି।
ଖୋର୍ଦ୍ଧାରେ ବ୍ରାଉନସୁଗାର ବେପାରୀ ଗିରଫ, ୫୨ ଗ୍ରାମ ଧଳାଜହର ଜବତ
ନନ୍ଦିଘୋଷ ବ୍ୟୁରୋ : ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଅଧୀନ କମାଗୁରୁ ଗାଁ ରାସ୍ତାରେ ବ୍ରାଉନସୁଗାର କାରବାର ଅଭିଯୋଗରେ ଜଣେ ବେପାରୀକୁ ଗିରଫ କରିଛି ଟାଙ୍ଗୀ ଅବକାରୀ ପୋଲିସ। ଧଳାଜହର ବିକ୍ରି ହେଉଥିବା ନେଇ ସୂଚନା ପାଇବା ପରେ ଅବକାରୀ ବିଭାଗ ଚଢ଼ାଉ କରିଥିଲା। ଚଢ଼ାଉ ବେଳେ ଅଭିଯୁକ୍ତ ପାଣ୍ଡବ ବେହେରାଙ୍କୁ କାବୁ କରାଯାଇଥିଲା। ତାଙ୍କ ନିକଟରୁ ୫୨ ଗ୍ରାମ ବ୍ରାଉନସୁଗାର ଜବତ ହୋଇଛି। ଜବତ ଧଳାଜହରର ଆନୁମାନିକ ମୂଲ୍ୟ ୫ ଲକ୍ଷ ଟଙ୍କାରୁ ଅଧିକ ବୋଲି ଅବକାରୀ ବିଭାଗ ପକ୍ଷରୁ ସୂଚନା ମିଳିଛି। ଗିରଫ ପାଣ୍ଡବ ବେହେରାଙ୍କ ବୟସ ୩୨ ବର୍ଷ। ତାଙ୍କ ଘର ନୟାଗଡ଼ ଜିଲ୍ଲା ଚାନ୍ଦପୁର ଥାନା ଅଧୀନ ମୟୁରଝଲିଆ ଗାଁରେ ବୋଲି ଜଣାପଡ଼ିଛି। ସେ ବିଭିନ୍ନ ଗାଁରେ ନିୟମିତ ଭାବେ ବ୍ରାଉନସୁଗାର ବିକ୍ରି କରୁଥିବା ଅଭିଯୋଗ ରହିଛି। ଗିରଫ ପରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଆଗକୁ ପୂଜା ପର୍ବ ଥିବାରୁ ନିଶା କାରବାର ରୋକିବା ପାଇଁ ଅବକାରୀ ବିଭାଗ ପକ୍ଷରୁ ଚଢ଼ାଉ ଜୋରଦାର କରାଯିବ ବୋଲି ଇନ୍ସପେକ୍ଟର ଅଜିତ କୁମାର ପାତ୍ର ସୂଚନା ଦେଇଛନ୍ତି
ମହାନଦୀ ଜଳ ବିବାଦ: ଦଶହରା ପୂର୍ବରୁ ଆସିପାରେ ଶୁଭ ଖବର
ନନ୍ଦିଘୋଷ ବ୍ୟୁରୋ : ମହାନଦୀ ଜଳ ବଣ୍ଟନରେ ଓଡ଼ିଶାର ସ୍ୱାର୍ଥ ସୁରକ୍ଷିତ ରହିବ। ଧୀରେ ଧୀରେ ମହାନଦୀ ଜଳ ବିବାଦର ସମାଧାନ ଆଡ଼କୁ ମାମଲା ଗତି କରୁଛି। ଦଶହରା ପୂର୍ବରୁ ରାଜ୍ୟବାସୀ ଶୁଭ ଖବର ପାଇପାରନ୍ତି ବୋଲି ଆଶା ପ୍ରକାଶ କରିଛନ୍ତି ରାଜ୍ୟ ସରକାରଙ୍କ ମହାଧିବକ୍ତା। ମହାନଦୀ ଜଳ ବିବାଦ ଟ୍ରିବ୍ୟୁନାଲରେ ଆଜିର ଶୁଣାଣି ପରେ ସେ କହିଛନ୍ତି, କେନ୍ଦ୍ରୀୟ ଜଳ ଆୟୋଗ ଅଧ୍ୟକ୍ଷତାରେ ଓଡ଼ିଶା ଓ ଛତିଶଗଡ଼ର ବୈଷୟିକ ଟିମ୍ ମଧ୍ୟରେ ହୋଇଥିବା ବୈଠକର ବିବରଣୀ ଟ୍ରିବ୍ୟୁନାଲ ରେଜିଷ୍ଟ୍ରାରଙ୍କୁ ପ୍ରଦାନ କରାଯାଇଛି। ଏଥିସହ ଉଭୟ ରାଜ୍ୟ ମଧ୍ୟରେ କେତେକ ବିବାଦୀୟ ପ୍ରସଙ୍ଗରେ ହୋଇଥିବା ସହମତିକୁ ମଧ୍ୟ ଟ୍ରିବ୍ୟୁନାଲ ରେକର୍ଡଭୁକ୍ତ କରିଛନ୍ତି। ଆସନ୍ତା ୨୧ ତାରିଖରେ CWC ଅଧ୍ୟକ୍ଷଙ୍କ ଅଧ୍ୟକ୍ଷତାରେ ଉଭୟ ରାଜ୍ୟର ବୈଷୟିକ ଟିମ୍ର ପୁଣି ଏକ ବୈଠକ ବସିବ। ମହାନଦୀ ଜଳ ବଣ୍ଟନ ନେଇ ଓଡ଼ିଶା ଓ ଛତିଶଗଡ଼ ମଧ୍ୟରେ ସମାଧାନର ରାସ୍ତା ବାହାର କରିବା ଉପରେ ଏଥିରେ ଆଲୋଚନା ହେବ।
ତେବେ ଛତିଶଗଡ଼ ସହ ବୁଝାମଣା ବେଳେ ଓଡ଼ିଶାର ସ୍ୱାର୍ଥ ସୁରକ୍ଷିତ ରଖିବାକୁ ସରକାର ଗୁରୁତ୍ୱ ଦେଇଛନ୍ତି। ଏଥିରେ କୌଣସି ସାଲିସ କରାଯିବ ନାହିଁ ବୋଲି ମହାଧିବକ୍ତା କହିଛନ୍ତି। ମହାନଦୀ ଜଳ ବିବାଦ ମାମଲାର ପରବର୍ତ୍ତୀ ଶୁଣାଣି ସେପ୍ଟେମ୍ବର ୨୮ ତାରିଖ ଅପରାହ୍ନ ୩ଟା ୩୦ରେ ହେବ।
ଭୁବନେଶ୍ୱର ଡିସିପି ଜଗମୋହନ ମୀନାଙ୍କ ଇସ୍ତଫା ଗୃହୀତ, କେନ୍ଦ୍ର ଗୃହ ମନ୍ତ୍ରାଳୟର ମଞ୍ଜୁରୀ
ନନ୍ଦିଘୋଷ ବ୍ୟୁରୋ : ଭୁବନେଶ୍ଵର ଡିସିପି ଜଗମୋହନ ମୀନାଙ୍କ ଇସ୍ତଫା ଗୃହୀତ। ତାଙ୍କୁ ଇସ୍ତଫାକୁ ଗ୍ରହଣ କରିଛି କେନ୍ଦ୍ର ଗୃହ ମନ୍ତ୍ରାଳୟ। ୨୦୧୩ ଓଡିଶା କ୍ୟାଡର IPS ଜଗମୋହନ ମୀନା। ବ୍ୟକ୍ତିଗତ କାରଣରୁ ଜୁଲାଇ ୨୦୨୬ରେ ଇସ୍ତଫା ଦେଇଥିଲେ। ଅଗଷ୍ଟ ୨୭ରେ ରାଜ୍ୟ ସରକାର ଇସ୍ତଫା ନେଇ NOC ଦେଇଥିଲେ। ଜଗମୋହନ ମୀନାଙ୍କ ଇସ୍ତଫାପତ୍ର କେନ୍ଦ୍ରକୁ ପଠାଇଥିଲେ ରାଜ୍ୟ ସରକାର।