ନନ୍ଦିଘୋଷ ବ୍ୟୁରୋ: ଆହୁରି ୩ ଦିନ ଯାଏ ସିଝିବ ଓଡ଼ିଶା । ଆସନ୍ତା ୧୯ ତାରିଖ ପର୍ଯ୍ୟନ୍ତ କଲବଲ କରିବ ଗ୍ରୀଷ୍ମ ପ୍ରବାହ । ଆଜି ୪୩.୫ ସହ ବୌଦ୍ଧ ରାଜ୍ୟର ସବୁଠୁ ଉତପ୍ତ ସହର ପାଲଟିଛି । ସେହିପରି ୪୨ ତାପମାତ୍ରା ସହ ବରଗଡ଼ ଦ୍ବିତୀୟ ଏବଂ ୪୦.୭ ସହ ଅନୁଗୁଳ ତୃତୀୟରେ ରହିଛି । ଟିଟିଲାଗଡ଼ ୪୦.୫, ମାଲକାନଗିରି ୪୦.୨, ଝାରସୁଗୁଡା ୩୯.୮, ସମ୍ବଲପୁର ୩୯.୬, ହୀରାକୁଦ ୩୯.୧, ରାଉରକେଲା ୩୭.୧, କଟକ ୩୭, ଚାନ୍ଦବାଲି ୩୬.୮,ଭୁବନେଶ୍ବର ୩୬.୭ ରେକର୍ଡ କରାଯାଇଛି । ଆସନ୍ତା ୨୪ ଘଣ୍ଟା ଯାଏ ସିଭିୟର ହିଟ ୱେଭ ରହିଥିବା ବେଳେ ବଲାଙ୍ଗୀର, ଅନୁଗୁଳ ଝାରସୁଗୁଡା ଓ ବୌଦ୍ଧ ପାଇଁ ଅରେଞ୍ଜ ଓ୍ୱାର୍ଣ୍ଣିଂ ଜାରି କରିଛି ପାଣିପାଗ ବିଭାଗ । ସେହିପରି ସମ୍ବଲପୁର, ସୁନ୍ଦରଗଡକୁ ୟେଲୋ ଓ୍ୱାର୍ଣ୍ଣିଙ୍ଗ ଜାରି କରାଯାଇଥିବା ବେଳେ ବାଲେଶ୍ୱର, ଭଦ୍ରକ, ଯାଜପୁର,କେନ୍ଦ୍ରାପଡା, କଟକ, ଜଗତସିଂହପୁର, ଖୋର୍ଦ୍ଧା ଓ ଗଜପତିକୁ ଜିଲାକୁ ମଧ୍ୟ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ୩ ଦିନ ପରେ ଅର୍ଥାତ ୨୦ ତାରିଖ ବେଳକୁ କମିବ ତାପମାତ୍ରା । ୨ ରୁ ୪ ଡିଗ୍ରୀ ତାପମାତ୍ରା ହ୍ରାସ ହେବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ତାପମାତ୍ରା ହ୍ରାସ ସହ ବିଜୁଳି ଘଡଘଡି ହେବାର ସମ୍ଭାବନା ରହିଛି । ଆସନ୍ତାକାଲିଠୁ କିଛି କିଛି ସ୍ଥାନରେ ବିଜୁଳି ଘଡ଼ଘଡ଼ି ବର୍ଷା ହୋଇପାରେ ବୋଲି ବିଭାଗ ପୂର୍ବାନୁମାନ କରିଛି । ଭଦ୍ରକ, ଯାଜପୁର, ବାଲେଶ୍ୱର, କେନ୍ଦୁଝର, ମୟୁରଭଞ୍ଜ ଓ ସୁନ୍ଦରଗଡ ଜିଲ୍ଲାର କେତେକ ସ୍ଥାନରେ ବିଜୁଳି ଘଡଘଡି ସହ ହାଲୁକା ବର୍ଷା ହେବାର ସମ୍ଭାବନା ରହିଛି । ଏହି ସମୟରେ ୩୦ ରୁ ୪୦ କିମି ପବନ ବହିବ । ସେହିପରି ୨୦ ତାରିଖରେ ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାର ୧୫ ଜିଲ୍ଲାରେ ବିଜୁଳି ଘଡଘଡି ସହ କୁଆପଥର ଵର୍ଷା ହେବାର ସମ୍ଭାବନା ରହିଛି ।
ଋଷ-ୟୁକ୍ରେନ୍ ଯୁଦ୍ଧରେ ପଡିବ ଯବନିକା ! ଯୁଦ୍ଧ ବିରତି ପାଇଁ ମିଳିଲା ସଙ୍କେତ…
ନନ୍ଦିଘୋଷ ବ୍ୟୁରୋ: ଖୁବଶୀଘ୍ର ଲାଗିପାରେ ଯୁଦ୍ଧରେ ବିରାମ୍ । ଦୀର୍ଘଦିନ ଧରି ଜାରି ରହିଥିବା ଋଷ-ୟୁକ୍ରେନ୍ ଯୁଦ୍ଧରେ ପୂର୍ଣ୍ଣଚ୍ଛେଦ ପଡିପାରେ । ଏନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜୋରଦାର ପ୍ରୟାସ କରୁଛନ୍ତି । ଚଳିତ ସପ୍ତାହରେ ଯୁଦ୍ଧ ବନ୍ଦ ନେଇ ଭଲ ଖବର ସାମ୍ନାକୁ ଆସିବ ବୋଲି ଆଶା କରାଯାଉଛି । କାହିଁକି ନା ଯୁଦ୍ଧ ବନ୍ଦ ନେଇ ଖୁବଶୀଘ୍ର ଋଷ ରାଷ୍ଟ୍ରପତି ପୁଟିନଙ୍କ ସହ ଫୋନରେ ଆଲୋଚନା କରିପାରନ୍ତି ଡୋନାଲ୍ଡ ଟ୍ରମ୍ପ ।
ହ୍ୱାଇଟ୍ ହାଉସର ଜଣେ ସ୍ୱତନ୍ତ୍ର ପ୍ରତିନିଧି ଷ୍ଟିଭ୍ ୱିଟକଫ ରବିବାର କହିଛନ୍ତି ଯେ ଆମେରିକା ମଧ୍ୟ ୟୁକ୍ରେନ ସହିତ ନିରନ୍ତର ଯୋଗାଯୋଗରେ ଅଛି । ପୂର୍ବରୁ ଆମେରିକା ଉଭୟ ଦେଶକୁ ୩୦ ଦିନିଆ ଅସ୍ତ୍ରବିରତି ପ୍ରସ୍ତାବ ଦେଇଥିଲା । ୟୁକ୍ରେନ ପ୍ରସ୍ତାବକୁ ଗ୍ରହଣ କରିଥିବାବେଳେ, ପୁଟିନଙ୍କ ଠାରୁ ଏପର୍ଯ୍ୟନ୍ତ କୌଣସି ସମ୍ମତି ମିଳିନାହିଁ ।
ଟ୍ରମ୍ପଙ୍କୁ ଭେଟିବେ ପୁଟିନ୍
ଷ୍ଟିଭ୍ ୱିଟକଫ ଋଷ ରାଷ୍ଟ୍ରପତି ପୁଟିନଙ୍କ ସହ ତାଙ୍କର ଆଲୋଚନାକୁ ସକାରାତ୍ମକ ଆଲୋଚନା ବୋଲି ବର୍ଣ୍ଣନା କରିଛନ୍ତି । ସେ କହିଛନ୍ତି, ‘ଏହା ଏକ ସମାଧାନ-ଭିତ୍ତିକ ଆଲୋଚନା ଥିଲା ।’ ୱିଟକଫଙ୍କ ଅନୁସାରେ, ପୁଟିନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିବାକୁ ପ୍ରସ୍ତୁତ ଏବଂ ଉଭୟ ନେତା ଯୁଦ୍ଧ ସମାପ୍ତ କରିବାକୁ ଚାହୁଁଛନ୍ତି । ସେ ଏହା ମଧ୍ୟ ଦୋହରାଇଲେ ଯେ ଟ୍ରମ୍ପ ଆଶାବାଦୀ ଅଛନ୍ତି ଯେ ଆଗାମୀ ସପ୍ତାହ ମଧ୍ୟରେ କୌଣସି ପ୍ରକାରର ଚୁକ୍ତି ହୋଇପାରିବ ।
କଣ ସର୍ତ୍ତ ରଖିଛି ଋଷ ?
ଯୁଦ୍ଧ ବିରତିକୁ ନେଇ ବଡ ସର୍ତ୍ତ ରଖିଛି ୟୁକ୍ରେନ୍ । ଜେଲେନସ୍କି କହିଛନ୍ତି, ମତେ ଏକ ପ୍ରତିଶ୍ରୁତି ଦିଆଯାଉ, ଯଦି ଭବିଷ୍ୟତରେ ଋଷ ପୁଣି ୟୁକ୍ରେନ୍ ଉପରେ ଆକ୍ରମଣ କରେ ତେବେ ଆମେରିକା ଏବଂ ତାର ଅନ୍ୟ ସହଯୋଗୀ ରାଷ୍ଟ୍ର ୟୁକ୍ରେନର ସାଥ ଦେବେ । କିନ୍ତୁ ୟୁକ୍ରେନର ଏହି ସର୍ତ୍ତ ଉପରେ କୌଣସି ପ୍ରତିକ୍ରିୟା ରଖିନି ଆମେରିକା । ଅନ୍ୟପଟେ, ଋଷ ସ୍ପଷ୍ଟ କରି କହିଛି, କୌଣସି ପରିସ୍ଥିତିରେ ଅସ୍ଥାୟୀ ଯୁଦ୍ଧବିରତି ଚାହେଁ ନାହିଁ ।
କାଲିଠୁ ଖେଳାଯିବ ସମ୍ମାନଜନକ ଅନ୍ତଃ ଜିଲ୍ଲା କଳାହାଣ୍ଡି କପ କ୍ରିକେଟ
ନନ୍ଦିଘୋଷ ବ୍ୟୁରୋ: ଓସିଏ ଆନୁକୂଲ୍ୟରେ ଆସନ୍ତାକାଲିଠାରୁ ଖେଳାଯିବ ସମ୍ମାନଜନକ ଅନ୍ତଃ ଜିଲ୍ଲା କଳାହାଣ୍ଡି କପ କ୍ରିକେଟ । କଟକ, ଖୋର୍ଦ୍ଧା, ଜଟଣୀ, ଅଡସପୁରର ୯ ଟି ଗ୍ରାଉଣ୍ଡରେ ଏକା ସାଙ୍ଗରେ ମ୍ୟାଚ ଅନୁଷ୍ଠିତ ହେବ । ଏଥିରେ ରାଜ୍ୟର ସମସ୍ତ ଜିଲ୍ଲା ଓ କିଛି ବିଭାଗୀୟ ଟିମକୁ ମିଶାଇ ମୋଟ ୩୮ ଟିମ ଅଂଶଗ୍ରହଣ କରୁଛନ୍ତି । ଲିଗ କମ ନକଆଉଟ ଭିତ୍ତିରେ ସମସ୍ତ ମ୍ୟାଚ ଖେଳାଯିବ । ଏଥିରୁ ଆଗାମୀ ସିଜିନ ପାଇଁ ସମ୍ଭାବ୍ଯ ରଣଜୀ ଖେଳାଳିଙ୍କୁ ଚୟନ କରାଯିବ । ରଣଜୀ ସିଜିନ ଆରମ୍ଭରୁ ଏହି ଟୁର୍ଣ୍ଣାମେଣ୍ଟର ଆୟୋଜନ କରୁଛି ଓସିଏ । ସବୁ ଟିମକୁ ୬ ଟି ଗ୍ରୁପରେ ବିଭକ୍ତ କରି ୫୦ ଓଭର ବିଶିଷ୍ଟ ଲିଗ ମ୍ୟାଚ ଅନୁଷ୍ଠିତ ହେବ । ପ୍ରତି ଟିମ ନିଜ ଗ୍ରୁପରେ ଅତି କମରେ ୫ ଟି ମ୍ୟାଚ ଖେଳିବାକୁ ସୁଯୋଗ ପାଇବେ । ଫଳରେ ସେମାନଙ୍କ ପ୍ରତିଭା ପରଖିବା ପାଇଁ ଚୟନକର୍ତ୍ତାଙ୍କ ପାଖରେ ଭଲ ସୁଯୋଗ ରହିବ । ଲିଗ ସରିବା ପରେ ଶ୍ରେଷ୍ଠ ଦଳକୁ ନେଇ ନକଆଉଟ ଭିତ୍ତିରେ ଚମ୍ପିୟନ ଓ ରନର୍ସ ଅଫ ଟିମ ବଛାଯିବ ।
ଜୟପୁରରେ ପଛୁଆ ବର୍ଗ ଛାତ୍ରଛାତ୍ରୀଙ୍କୁ ଅଣଦେଖା
ନନ୍ଦିଘୋଷ ବ୍ୟୁରୋ: ଜୟପୁର ସହରରେ ୮ଶହ ସଂଖ୍ଯା ବିଶିଷ୍ଟ ହଷ୍ଟେଲ୍ ନିର୍ମାଣରେ ବ୍ଯାପକ ଅବହେଳା । କାମ ସାରିବା ଅବଧି ସରିଯାଇଥିବା ପରେ ବି ୩ ବର୍ଷ ହେଲାଣି କାର୍ଯ୍ୟ ସରିବାର ନା ନେଉନାହିଁ । ଯାହା ଫଳରେ ହଷ୍ଟେଲ ସୁବିଧାରୁ ବଞ୍ଚିତ ହେଉଛନ୍ତି ପଛୁଆ ବର୍ଗର ଛାତ୍ରଛାତ୍ରୀ । ସେପଟେ ଅସମ୍ପୂର୍ଣ୍ଣ ହଷ୍ଟେଲକୁ ବିକ୍ରମ ଦେବ ବିଶ୍ବବିଦ୍ୟାଳୟର ଛାତ୍ରଛାତ୍ରୀ ମାନେ ରହିବା ପାଇଁ ବିଶ୍ବ ବିଦ୍ୟାଳୟକୁ ହସ୍ତାନ୍ତର କରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି ।
ପଛୁଆ ବର୍ଗର ଛାତ୍ରଛାତ୍ରୀଙ୍କ ପ୍ରତି ଅଣଦେଖା । ହଷ୍ଟେଲ ନିର୍ମାଣରେ ବିଳମ୍ବ ଯୋଗୁଁ ଅସୁବିଧାରେ ବିଦ୍ଯାର୍ଥୀ । ଅସମ୍ପୂର୍ଣ୍ଣ ହଷ୍ଟେଲକୁ ବିଶ୍ବବିଦ୍ଯାଳୟକୁ ହସ୍ତାନ୍ତର । SC-ST ବିଭାଗ ନିକଟରେ ନାହିଁ ଖବର । ଅବିଭକ୍ତ କୋରାପୁଟ ଜିଲ୍ଲାରେ ପଛୁଆ ବର୍ଗ ଛାତ୍ରଛାତ୍ରୀ ଅଧିକ ଗୁରୁତ୍ବ ଦେଇଥିଲେ ପୂର୍ବ ସରକାର । ଏଥିପାଇଁ ୮ଶହ ସଂଖ୍ଯା ବିଶିଷ୍ଟ ହେଷ୍ଟେଲ ନିର୍ମାଣ ପାଇଁ ଯୋଗାଇ ଦେଇଥିଲେ ୧୦ କୋଟି ଟଙ୍କା । ୨୦୧୯ ରେ ନିର୍ମାଣ ପାଇଁ NPCC ନାମକ ଏକ ଜାତୀୟ ଠିକା ସଂସ୍ଥାକୁ ଦିଆଯାଇଥିଲା ଦାୟିତ୍ବ । ହେଲେ ବର୍ତ୍ତମାନ ଯାଏଁ ନିର୍ମାଣ କାର୍ଯ୍ୟ ସରିପାରୁନାହିଁ । ଫଳରେ ଛାତ୍ରଛାତ୍ରୀ ହଷ୍ଟେଲ ସୁବିଧାରୁ ବଞ୍ଚିତ ହୋଇଛନ୍ତି । ବାଧ୍ଯହୋଇ ବାହାରେ ଘରଭଡ଼ା ନେଇ ରହୁଛନ୍ତି ଅନେକ ଛାତ୍ରଛାତ୍ରୀ । ଠିକା ସଂସ୍ଥା ପ୍ରତି ନୂଆ ସରକାର କାହିଁକି ଏତେ ଅନୁକମ୍ପା ବୋଲି ପ୍ରଶ୍ନ କରିଛନ୍ତି ବୁଦ୍ଧିଜୀବୀ ।
ହଷ୍ଟେଲ କାର୍ଯ୍ଯ ସରି ନଥିବା ରାଜ୍ୟ SC-ST ବିଭାଗ ନିକଟରେ ଖବର ନାହିଁ । କାମ ଅସମ୍ପୂର୍ଣ୍ଣ ଥିବା ବେଳେ ଏହାକୁ ହସ୍ତାନ୍ତର କରିବା ଲାଗି ବିକ୍ରମ ଦେବ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କୁ ଚିଠି ଲେଖିଛନ୍ତି । ହଷ୍ଟେଲ କାର୍ଯ୍ୟ ଅଛି ସରି ନଥିବାରୁ ଏହାକୁ ଛାତ୍ରଛାତ୍ରୀଙ୍କୁ କିପରି ହସ୍ତାନ୍ତର କରାଯିବ ସେନେଇ ପ୍ରଶ୍ନ ଉଠାଇଛନ୍ତି ବିଶ୍ବବିଦ୍ୟାଳୟ କୁଳ ସଚିବ । ସେପଟେ କୋରାପୁଟ ଜିଲ୍ଲାପାଳ କହିଛନ୍ତି, ତୁରନ୍ତ କାର୍ଯ୍ୟ ସାରିବାକୁ ବିଭାଗକୁ ନିର୍ଦ୍ଦେଶ ଦିଆଯାଇଛି ।
ରବି ଦାସ ହତ୍ୟା ମାମଲାରେ ୩ ଜଣ ଗିରଫ
ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ହରିପୁର ଗାଁରେ ଦୁର୍ଦ୍ଦାନ୍ତ ଅପରାଧୀ ରବି ଦାସ ହତ୍ୟା ମାମଲାରେ ୩ ଜଣଙ୍କୁ ଗିରଫ କରିଛି ଖଲ୍ଲିକୋଟ ପୋଲିସ୍ । ଗିରଫ ତିନି ହେଲେ ରବି ଦାସର ପୁତୁରା ନିଲାଞ୍ଚଲ ଦାସ, ଶ୍ରୀନିବାସ ଦାସ, ସଞ୍ଜୟ ଦାସ। ଗତ ଦଶ ବର୍ଷ ଧରି ବେଆଇନ୍ ମଦ ବ୍ୟବସାୟ ଚାଲିଥିବା ବେଳେ ଉଭୟଙ୍କ ମଧ୍ୟରେ ବ୍ୟବସାୟକୁ ନେଇ ଶତ୍ରୁତା ସୃଷ୍ଠି ହୋଇଥିଲା। ପୂର୍ବରୁ ରବି ଦାସ ନିଜର ଦୁଇ ପୁତୁରାଙ୍କ ଉପରେ ବୋମା ମାଡ କରିଥିଲେ। ଯାହାର ପାଲଟା ଜବାବ ନିଜ ପୁତୁରା ମାନେ ମାନେ ଗତ ୫ ତାରିଖ ସକାଳୁ ରବିଙ୍କୁ ତାଙ୍କ ଘର ସାମ୍ନାରେ ହତ୍ୟା କରି ଫେରାର ହୋଇଯାଇଥିଲେ। ରବିଙ୍କ ସ୍ତ୍ରୀ ମୀନତିଙ୍କ ଏତଲା ପରେ ପୋଲିସ ତଦନ୍ତ କରି ଗତ କାଲି ଛତ୍ରପୁର ଅଞ୍ଚଳରୁ ଅଞ୍ଚରୁ ୩ ଜଣ ଅଭିଯୁକ୍ତଙ୍କୁ ଗିରଫ କରିବା ସହ କୋର୍ଟ ଫରଓ୍ବାର୍ଡ କରିଛି। ସେମାନଙ୍କ ଠାରୁ ଦୁଇ ଟି ଖଣ୍ଡା, 3ଟି ମୋବାଇଲ, ଗୋଟିଏ ବୁଲେଟ ଜବତ୍ କରିଛି ପୋଲିସ । ଏଇ ଘଟଣା ରେ ଅନ୍ୟ ଜଣେ ଅଭିଯୁକ୍ତ ଫେରାର ଥିବା ସାମ୍ୱାଦିକ ସମ୍ମିଲନି ରେ ସୂଚନା ଦେଇଛନ୍ତି ଛତ୍ରପୁର ଏସଡ଼ିପିଓ ଚନ୍ଦନ ଘଡେ଼ଇ।
ଥାନା ପରିସରକୁ ଧସେଇ ପଶିଲେ ଗ୍ରାମବାସୀ
ନନ୍ଦିଘୋଷ ବ୍ୟୁରୋ: ପୋଲିସର ନିଷ୍କ୍ରିୟତା ପ୍ରତିବାଦରେ ଥାନା ପରିସରକୁ ଧସେଇ ପଶିଲେ ଗ୍ରାମବାସୀ। କେନ୍ଦ୍ରାପଡା ଜିଲ୍ଲା ରାଜକନିକା ଥାନା ଅନ୍ତର୍ଗତ ଖଣ୍ଡେଇତା ଗାଁରେ ଜଣେ ଯୁବକଙ୍କ ସନ୍ଦେହଜନକ ମୃତ୍ୟୁ ଘଟଣାକୁ ନେଇ ଥାନା ପରିସରକୁ ଗ୍ରାମବାସୀ ଧସେଇ ପଶିବା ସହିତ ଥାନା ସମ୍ମୁଖରେ ଧାରଣାରେ ବସିଛନ୍ତି। କିଛି ସମୟ ପାଇଁ ଥାନା ପରିସରରେ ଉତ୍ତେଜନା ଲାଗିରହିଥିଲା । ଗତ ୧୦ ତାରିଖ ଦିନ ଖଣ୍ଡେଇତା ଗାଁର ରବିନାରାୟଣ ରାଉତଙ୍କ ପୁଅ ଶ୍ରୀକାନ୍ତ ରାଉତଙ୍କୁ ମୁର୍ମୁଷ ଅବସ୍ଥାରେ ରାଜକନିକା ଥାନା ଠାରୁ କିଛି ଦୂରରୁ ଉଦ୍ଧାର କରାଯାଇ ମେଡିଲାରେ ଭର୍ତ୍ତି କରାଯାଇଥିଲା । ପରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ଏନେଇ ପରିବାର ଲୋକେ ଶ୍ରୀକାନ୍ତ କାମକରୁଥିବା ପାଣି ଫ୍ଯାକ୍ଟ୍ରିରେ ମାଲିକଙ୍କ ନାମରେ ହତ୍ୟା ଅଭିଯୋଗ ଆଣିଥିଲେ। ହେଲେ ଶ୍ରୀକାନ୍ତଙ୍କ ମୃତ୍ୟୁର ୬ଦିନ ପରେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିନଥିବାରୁ ଆଜି ଗ୍ରାମବାସୀ ଥାନା ଘେରାଉ କରିଛନ୍ତି ।
ବୁଡିବାକୁ ବସିଛି କୁମ୍ଭକାରଙ୍କ କୌଳିକ ବୃତ୍ତି, କମିଗଲାଣି ମାଟି ତିଆରି ସାମଗ୍ରୀ ଚାହିଦା
ନନ୍ଦିଘୋଷ ବ୍ୟୁରୋ: ଆଧୁନିକତାର ଚାକଚକ୍ୟ ମଧ୍ୟରେ ବୁଡିଯିବାକୁ ବସିଛି କୁମ୍ଭକାରଙ୍କ କୌଳିକ ବୃତ୍ତି । କଂସା ପିତଳ, ଷ୍ଟିଲ ଓ ଆଲୁମିନିୟମ ଯୁଗରେ ଆଉ ପୂର୍ବ ଭଳି ବିକ୍ରି ହେଉନି ମାଟି ତିଆରି ସାମଗ୍ରୀ । ଧର୍ମଗଡ ଉପଖଣ୍ଡର ବିଭିନ୍ନ ବ୍ଲକର ୫ ହଜାରରୁ ଅଧିକ କାରିଗର ମାଟି ସାମଗ୍ରୀ ତିଆରି କରୁଥିଲେ ବି ତାଙ୍କୁ ମିଳୁନି ସରକାରୀ ପ୍ରୋତ୍ସାହନ । ଫଳରେ ବୃତ୍ତିରୁ ଧୀରେ ଧୀରେ ମୁଁହ ଫେରାଇବାକୁ ବସିଲେଣି ।
ଆଧୁନିକତାକର ଚାକଚକ୍ଯ ମଧ୍ଯରେ ଏବେ ମାଟି ତିଆରି ସାମଗ୍ରୀର ଚାହିଦା କମିଗଲାଣି । ଦିନ ଥିଲା କୁମ୍ଭକାର ପରିବାର ମାନେ ପୂଜା ପର୍ବାଣୀ ସମୟରେ ମାଟି ତିଆରି ସାମଗ୍ରୀ ତିଆରି କରି ବେଶ ଦୁଇ ପଇସା ରୋଜଗାର କରୁଥିଲେ । ଅଖ ଚକ ଘୁରାଇ ମାଟି ସହ ମାଟି ହୋଇ ହାଣ୍ଡି, କଳସ ଦୀପ, ସୁରେଇ, ରୁଖା ଭଳି ଅନେକ ସମାଗ୍ରୀ ତିଆରି କରୁଥିଲେ । ହେଲେ ଏବେ କଂସା ପିତଳ, ଷ୍ଟିଲ ଓ ଆଲୁମିନିୟମ ଯୁଗରେ ଆଉ ପୂର୍ବ ଭଳି ବିକ୍ରି ହେଉନି ମାଟି ତିଆରି ସାମଗ୍ରୀ । ଫଳରେ ଏବେ ଏହି ବୃତ୍ତିରୁ ଧୀରେ ଧୀରେ ମୁଁହ ଫେରାଇବାକୁ ବସିଲେଣି କୁମ୍ଭକାର ।
କଳାହାଣ୍ଡି ଜିଲ୍ଲା ଧର୍ମଗଡ ଉପଖଣ୍ଡର ବିଭିନ୍ନ ବ୍ଲକର ବିଭିନ୍ନ ଗାଁରେ ପାଖାପାଖି ୫ ହଜାରରୁ ଉର୍ଦ୍ଧ୍ଵ କୁମ୍ଭକାର ପରିବାର ନିଜର କୌଳିକ ବୃତ୍ତି ଜରିଆରେ ପରିବାର ପ୍ରତିପୋଷଣ କରୁଛନ୍ତି । ହେଲେ ନା ସେମାନଙ୍କୁ ମିଳୁଛି ସରକାରୀ ପ୍ରୋତ୍ସାହନ ନା ସେମାନଙ୍କ ପାଇଁ ବିକ୍ରି ବ୍ୟବସ୍ଥା ରହିଛି ଯାହାରି ଫଳରେ ସେମାନେ ଏବେ ନିଜ କୌଳିକ ବୃତ୍ତିରୁ ମୁହଁ ଫେରାଉଛନ୍ତି । ମାଟିରେ ପସ୍ତୁତ ସାମଗ୍ରୀର ବିକ୍ରିବଟା ବ୍ଯବସ୍ଥା ନଥିବାରୁ ଡିସେମ୍ବରରୁ ଏପ୍ରିଲ ମାସ ବ୍ଯତୀତ ଅନ୍ଯ ମାସ ମାନଙ୍କରେ କୁମ୍ଭକାର ପରିବାର ମାନେ ହାତ ବାନ୍ଧିରହୁଥିବା ନେଇ ଅଭିଯୋଗ କରିଛନ୍ତି ।
ଚଇତି ଯାତ୍ରା ପାଇଁ ଚଳଚଞ୍ଚଳ ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମା’ ତାରାତାରିଣୀଙ୍କ ପୀଠ
ନନ୍ଦିଘୋଷ ବ୍ୟୁରୋ: ଚଳଚଞ୍ଚଳ ତାରାତାରିଣୀଙ୍କ ପୀଠ । ଆସନ୍ତା କାଲିଠାରୁ ଆରମ୍ଭ ହେବ ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମାଆ ତାରାତାରିଣୀଙ୍କ ଚୈତ୍ର ଯାତ୍ରା । ଯାତ୍ରାକୁ ଶାନ୍ତିଶୃଙ୍ଖଳା ସହିତ ସମାପନ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ବ୍ଯାପକ ବ୍ଯବସ୍ଥା ଗ୍ରହଣ କରାଯାଇଛି । ମନ୍ଦିର ଉପରେ ଓ ତଳେ ପାନୀୟ ଜଳ ବ୍ୟବସ୍ଥା ସାଙ୍ଗକୁ ବ୍ଯାରିକେଟ ବ୍ଯବସ୍ଥା ହୋଇଛି ।
ସଜେଇ ହେଲାଣି ଗଞ୍ଜାମ ଜିଲ୍ଲାର ଅଧିଷ୍ଠାତ୍ରୀ ଦେବୀ ମାଆ ତାରାତାରିଣୀଙ୍କ ପୀଠ । ଆସନ୍ତାକାଲିଠାରୁ ଆରମ୍ଭ ହେବ ମାଆଙ୍କ ଚୈତ୍ର ଯାତ୍ରା । ଏବେଠୁ ପୀଠରେ ଲାଗିଲାଣି ଭକ୍ତଙ୍କ ଗହଳି । ମାଆଙ୍କ ଯାତ୍ରାକୁ ଶାନ୍ତିଶୃଙ୍ଖଳା ସହିତ ସମାପନ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ବ୍ଯାପକ ବ୍ଯବସ୍ଥା ଗ୍ରହଣ କରାଯାଇଛି । ଭକ୍ତ ମାନେ ଯେପରି ଶାନ୍ତିଶୃଙ୍ଖଳାର ସହ ମାଆଙ୍କ ଦର୍ଶନ କରିପାରିବେ ସେଥିପାଇଁ ବ୍ଯାରିକେଡର ବ୍ଯବସ୍ଥା କରାଯାଇଛି । ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ମନ୍ଦିର ଉପରକୁ ଭକ୍ତଙ୍କ ଯାତାୟତ ନିମନ୍ତେ ୨୦ ରୁ ୨୫ ଟି ବସ ଚଳାଚଳର ବ୍ଯବସ୍ଥା କରାଯିବା ସାଙ୍ଗକୁ ମନ୍ଦିର ଉପର ଓ ତଳେ ପାନୀୟ ଜଳର ବ୍ଯବସ୍ଥା କରାଯାଇଛି ।
ମାଆଙ୍କ ଚୈତ୍ର ଯାତ୍ରା ଆସନ୍ତାକାଲି ଠାରୁ ଆରମ୍ଭ ହୋଇ ଏପ୍ରିଲ ୧୫ରେ ଶେଷ ହେବ । ଚୈତ୍ର ଯାତ୍ରା ଅବସରରେ ମାଆଙ୍କୁ ସ୍ଵତନ୍ତ୍ର ରୀତିନୀତି ସହକାରେ ପୂଜାର୍ଚ୍ଚନା କରାଯିବ । ପ୍ରତି ମଙ୍ଗଳବାର ଦିନ ମାଆ ବିଭିନ୍ନ ବେଶରେ ଭକ୍ତଙ୍କୁ ଦର୍ଶନ ଦେବେ । ସେପଟେ ଆସନ୍ତାକାଲି ଠାରୁ ମାଆଙ୍କ ଚୈତ୍ର ଯାତ୍ରା ଆରମ୍ଭ ହେଉଥିବା ବେଳେ ଆଜି ଠାରୁ ପୀଠରେ ଭକ୍ତ ମାନଙ୍କର ଭିଡ଼ ଲାଗିଲାଣି । ଚଳିତ ବର୍ଷ ଚୈତ୍ର ମାସରେ ୪ଟି ମଙ୍ଗଳବାର ପଡୁଥିବାରୁ ଲକ୍ଷାଧିକ ସଂଖ୍ଯାରେ ଭକ୍ତଙ୍କ ଭିଡ ଲାଗିବାର ସମ୍ଭାବନା ରହିଥିବାରୁ ଉଭୟ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ସଜାଗ ରହିଛନ୍ତି ।
ଠିକାଦାରଙ୍କ ମନମାନି ଯୋଗୁଁ ଅକାଳରେ ଚାଲିଗଲା ଜୀବନ: ନିଦାବିଷର୍ଣ୍ଣୁ ପୂର୍ତ୍ତ ବିଭାଗ!
ନନ୍ଦିଘୋଷ ବ୍ୟୁରୋ: ସମସ୍ତେ ଆନନ୍ଦ ଉଲ୍ଲାସରେ ହୋଲିରେ ରଙ୍ଗ ଅବିରରେ ଭିଜିଥିବାବେଳେ ଜଟଣୀ ବିଶ୍ଵନାଥ କଲୋନୀର ତ୍ରିନାଥ ସାହୁଙ୍କ ପରିବାର ଭିଜିଛି ଆଖି ଲୁହରେ । ପରିବା କିଣିବାକୁ ସ୍ତ୍ରୀଙ୍କୁ କହି ବଜାରକୁ ଯାଇଥିଲେ ତ୍ରିନାଥ । ହେଲେ ଫେରିବା ବାଟରେ ରାସ୍ତା ଉପରେ ସତେ ଯେମିତି ଛକି ବସିଥିଲା ଯମ । ଗାଡି ଚକ ସ୍ଲିପ କରିବାରୁ ନିର୍ମାଣାଧୀନ ଡ୍ରେନରୁ ବାହାରିଥିବା ରଡ ଛାତିରେ ପଶିଯିବାରୁ ଛଟପଟ ହୋଇ ସେଇଠି ପ୍ରାଣ ହରାଇଥିଲେ ତ୍ରିନାଥ । ଜଟଣୀ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଗଲା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏବେ ପ୍ରଶ୍ନ ଉଠୁଛି ଏପରି ଦାୟିତ୍ବହୀନତା ଲାଗି ଦାୟୀ କିଏ ? ପୂର୍ତ୍ତ ବିଭାଗ ନା ଠିକାଦାର ?
ହୋଲି ଦିନ ଉଜୁଡିଗଲା ସଂସାର । ସମସ୍ତେ ଆନନ୍ଦ ଉଲ୍ଲାସରେ ରଙ୍ଗ ଖେଳୁଥିବା ବେଳେ ଲୁହରେ ଭିଜିଲା ଜଟଣୀ ପୌରପରିଷଦ ୧୧ ନମ୍ବର ୱାର୍ଡର ବିଶ୍ଵନାଥ କଲୋନୀ । ପରିବା କିଣିବାକୁ ଯାଇ ଆରପାରିକୁ ଚାଲିଗଲେ ତ୍ରିନାଥ । ରାସ୍ତା ଉପରେ ବାଲି ପଡିଥିବାରୁ ଚକା ସ୍ଲିପ କରିବାରୁ ନିର୍ମାଣଧୀନ ଡ୍ରେନର ରଡ ଛାତିରେ ପଶିଯାଇଥିବାରୁ ତ୍ରିନାଥଙ୍କ ଘଟଣାସ୍ଥଳରେ ମୃତ୍ଯୁ ହୋଇଥିଲା । ଟିକେ ନଜର ପକାନ୍ତୁ ଏହି ରାସ୍ତା ଉପରେ କିପରି ନିର୍ମାଣଧୀନ ଡ୍ରେନ ଉପରକୁ ବାହାରିଛି ଲୁହା ରଡ । ଏହି ରାସ୍ତା ଜଣଙ୍କର ମୁଣ୍ଡ ନେଇସାରିଲାଣି । ହେଲେ ଘଟଣାସ୍ଥଳକୁ କୌଣସି ଅଧିକାରୀ ନିରୀକ୍ଷଣ ପାଇଁ ପହଞ୍ଚିନଥିବା ଅଭିଯୋଗ ହୋଇଛି ।
ପୂର୍ତ୍ତ ବିଭାଗ ଠିକା ସଂସ୍ଥାକୁ ଡ୍ରେନ କାମ ଦେଇ କୌଣସି ଅଧିକାରୀଙ୍କୁ କାର୍ଯ୍ୟ ସ୍ଥଳକୁ ନିରୀକ୍ଷଣ ପାଇଁ ନ ପଠାଇବାରୁ ଠିକାଦାର ଏଭଳି ମରଣଯନ୍ତା କରିଥିବା ଅଭିଯୋଗ ହୋଇଛି । ଏପଟେ ଠିକା ସଂସ୍ଥା ଦୀର୍ଘ ଦିନ ଧରି କାମ କରୁଥିଲେ ସୁଦ୍ଧା ଜଟଣୀ ପୌର ପରିଷଦକୁ କୌଣସି ସୂଚନା ଦେଇନଥିବା ପୌରାଧ୍ଯକ୍ଷ ଅଭିଯୋଗ କରିଛନ୍ତି । ଏଠି ପ୍ରଶ୍ନ ଉଠୁଛି- ରାସ୍ତା କାମ ଚାଲୁଥିବା ବେଳେ କାହିଁକି ଲଗାଯାଇନଥିଲା ନୋ ଏଣ୍ଟ୍ରି ବୋର୍ଡ ? ଖୋଲା ଡ୍ରେନରେ ରଡ ବାହାରିଥିବା ବେଳେ ଠିକାଦାର କାହିଁକି ବାଇକ ଚାଳକଙ୍କ ପାଇଁ ସତର୍କ ଫଳକ ଲଗାଇନଥିଲା ? କାହିଁକି ରାସ୍ତା ଉପର ବାଲି ସଫା କରାଯାଇନଥିଲା ? ଠିକା ସଂସ୍ଥାର ଖାମଖିଆଲି ମନୋଭାବ ଯୋଗୁଁ ନିରୀହ ଲୋକଙ୍କ ଜୀବନ ଯିବା ପରେ ବି ଚୁପ ରହିଛନ୍ତି ପୂର୍ତ୍ତ ବିଭାଗ । ଅନ୍ଯପଟେ ଏ ବିଷୟରେ ପୂର୍ତ୍ତ ବିଭାଗ ମୁହଁ ଖୋଲୁନଥିବା ଦେଖିବାକୁ ମିଳିଛି । କେବେ ପୂର୍ତ୍ତ ବିଭାଗର ନିଦ ଭାଙ୍ଗିବ ଆଉ କାହାର ଜୀବନ ଯିବା ପୂର୍ବରୁ ନିର୍ମାଣଧୀନ ଡ୍ରେନର କାମ ସରିବ ତା ଉପରେ ସମସ୍ତଙ୍କ ନଜର ରହିଛି ।
ଅନାସ୍ଥା ଭୋଟ ପୂର୍ବରୁ ଇସ୍ତଫା ଦେଲେ କବିସୂର୍ଯ୍ୟନଗର ଏନଏସି ଅଧ୍ୟକ୍ଷା
ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଏନଏସି ଅଧ୍ୟକ୍ଷାଙ୍କ ବିରୋଧରେ ଆସିଥିବା ଅନାସ୍ଥା ଭୋଟରେ ଆସିଲା ନୂଆମୋଡ । ଅନାସ୍ଥା ଭୋଟ ପୂର୍ବରୁ ଇସ୍ତଫା ଦେଲେ ଏନଏସି ଅଧ୍ୟକ୍ଷା ଏସ. ଲକ୍ଷ୍ମୀ । କାଉସିଲରମାନେ ଭୋଟ ଦେବାଲାଗି ଏନଏସି ସଭାଗୃହରେ ବସିଥିବା ବେଳେ ତାପୂର୍ବରୁ ଇସ୍ତଫା ଦେଇଛନ୍ତି ଅଧ୍ୟକ୍ଷା । ଅଧ୍ୟକ୍ଷା ଏନଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ ଭେଟି ଇସ୍ତଫା ପତ୍ର ଦେଇଛନ୍ତି । ତେବେ ଏନେଇ ସରକାରୀ ସ୍ତରରେ କୌଣସି ଘୋଷଣା ହୋଇନଥିବା ବେଳେ ନିଜ ଇସ୍ତଫା ନେଇ ପ୍ରତିକ୍ରିୟା ଦେଇଛନ୍ତି ଅଧ୍ୟକ୍ଷା । ପୂର୍ବରୁ କାଉସିଲ ବୈଠକରେ ହୋଇଥିବା ଘୋଟାଲା ନେଇ ଜିଲ୍ଲାପାଳଙ୍କୁ ଅଭିଯୋଗ ପରେ ବି କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ । ତେଣୁ ଆଜି ଭୋଟ ପୂର୍ବରୁ ସେ ଇସ୍ତଫା ଦେଇଥିବା କହିଛନ୍ତି ।