ନମାଜ ପଢ଼ିବା ବେଳେ ମସଜିଦରେ ବିସ୍ଫୋରଣ; ୫୦ ମୃତ

କାବୁଲ: ଆଫଗାନିସ୍ତାନରେ ମସଜିଦରେ ପୁଣି ଆତଙ୍କବାଦୀ ଆକ୍ରମଣ । ଶୁକ୍ରବାର ଆଫଗାନିସ୍ତାନର ସୁନ୍ନି ମସଜିଦରେ ଭୟଙ୍କର ବିସ୍ଫୋରଣ ହୋଇଛି । ଏହି ବିସ୍ଫୋରଣ ଫଳରେ ୫୦ ଜଣଙ୍କର ମୃତ୍ୟୁ ହୋଇଥିବାବେଳେ ଶତାଧିକ ଲୋକ ଆହତ ହୋଇଛନ୍ତି । ଏହି ବିସ୍ଫୋରଣ ପାଇଁ ଏ ପର୍ଯ୍ୟନ୍ତ କୌଣସି ସଂଗଠନ ନିଜକୁ ଦାୟୀ କରିନାହାନ୍ତି । ତାଲିବାନ୍ ମୁଖପାତ୍ର ମହମ୍ମଦ ନଫି ଟାକୋରଙ୍କ ଅନୁଯାୟୀ ରମଜାନ ଚାଲିଥିବାରୁ ନମାଜ ପଢ଼ିବା ପାଇଁ ଅନେକ ଲୋକ ମସଜିଦକୁ ଯାଇଥିଲେ ।

ଏହି ସମୟରେ ବିସ୍ଫୋରଣ ହୋଇଥିଲା । ଏହି ବିସ୍ଫୋରଣ ପରେ ସୁରକ୍ଷାବାହିନୀ ଉକ୍ତ ଅଞ୍ଚଳକୁ ଘେରାଉ କରି ତଦନ୍ତ ଆରମ୍ଭ କରିଛି । ଗତ କିଛି ଦିନ ହେଲା ଆଫଗାନିସ୍ତାନରେ କ୍ରମାଗତ ଭାବେ ବିସ୍ଫୋରଣ ହେଉଛି । ଏହା ପୂର୍ବରୁ ଗୁରୁବାର ମଜାର-ଇ-ସରିଫ ଅଞ୍ଚଳରେ ୨ଟି ବିସ୍ଫୋରଣ ହୋଇଥିଲା । ଏଥିରେ ୯ ଜଣ ପ୍ରାଣ ହରାଇଥିବାବେଳେ ୧୩ ଜଣ ଆହତ ହୋଇଥିଲେ । ଇସଲାମିକ ଷ୍ଟେସ ଖୁରାସାନ ଆତଙ୍କବାଦୀ ମିନି ବସକୁ ଟାର୍ଗେଟ କରି ଏହି ଆକ୍ରମଣ କରିଥିଲେ ।