ତଦନ୍ତ ନେଇ ପ୍ରଶ୍ନ ଉଠାଇଲେ ଲେନିନ୍: କହିଲେ, ନିର୍ବାଚନ ପୂର୍ବରୁ ରେଡ୍ କରୁଛି ସିବିଆଇ
1 min read
ଭୁବନେଶ୍ଵର: ଦୀର୍ଘ ଦିନର ନିରବତା ପରେ ଚିଟଫଣ୍ଡ ମାମଲାରେ ସକ୍ରିୟ ହୋଇ ଉଠିଛି ସିବିଆଇ । ଶୁକ୍ରବାର ବିଧାୟକ ଦେବୀ ମିଶ୍ରଙ୍କ ଘରେ ରେଡ୍ କରିଛି। ସିବିଆଇର ଏହି ଅଚାନକ ରେଡ୍କୁ ନେଇ ରାଜ୍ୟ ରାଜନୀତି ସରଗରମ ହୋଇ ଉଠିଛି । ଏହି ଘଟଣାରେ ପ୍ରତିକ୍ରିୟା ରଖିଛନ୍ତି ବିଜୁ ଜନତା ଦଳ ମୁଖପାତ୍ର ଲେନିନ୍ ମହାନ୍ତ । ସେ କହିଛନ୍ତି , ଦୀର୍ଘ ୭ ବର୍ଷ ଧରି ସିବିଆଇ ଓଡ଼ିଶାରେ ଚିଟଫଣ୍ଡ ମାମଲାର ତଦନ୍ତ କରୁଛି । ବିଶେଷ କରି ଉପ-ନିର୍ବାଚନ, ସାଧାରଣ ନିର୍ବାଚନ ଓ ପଞ୍ଚାୟତ ନିର୍ବାଚନ ପୂର୍ବ ସିବିଆଇର ସକ୍ରିୟତାକୁ ଦେଖିବାକୁ ମିଳୁଥିବା କହିଛନ୍ତି ଲେନିନ୍ । ଆଉ ସିବିଆଇର ଏଭଳି କାର୍ଯ୍ୟପନ୍ଥା ନେଇ ଓଡ଼ିଶାବାସୀ ଚକିତ ଥିବା ସେ କହିଛନ୍ତି । ସୂଚନା ଯୋଗ୍ୟ ଯେ, ଶୁକ୍ରବାର ପୂର୍ବତନ ମନ୍ତ୍ରୀ ଦେବୀ ମିଶ୍ରଙ୍କ ଘରେ ସିବିଆଇ ରେଡ୍ ମାରିଛି ।
ସି-ସୋର୍ ଚିଟ୍ଫଣ୍ଡ ମାମଲାରେ ସିବିଆଇ ପକ୍ଷରୁ ଦେବୀ ମିଶ୍ରଙ୍କ ଭୁବନେଶ୍ବର ୟୁନିଟ୍-୧ରେ ଥିବା ସରକାରୀ ବାସଭବନ ସହିତ ନରସିଂହପୁର, ଡମକଟାରେ ଥିବା ପୈତୃକ ଘରେ ମଧ୍ୟ ରେଡ୍ କରାଯାଇଛି । ସି-ସୋର୍ ମହାନଦୀ ପର୍ଯ୍ୟଟନ ପ୍ରକଳ୍ପକୁ ନେଇ ଖୋଳତାଡ଼ କରୁଥିବା ସିବିଆଇ ପୂର୍ବତନ ମନ୍ତ୍ରୀ ଦେବୀ ମିଶ୍ରଙ୍କୁ ୨ଘଣ୍ଟା ଧରି ଜେରା କରିବା ସହ ତାଙ୍କ ଘରୁ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରିଛି । ସି-ସୋର ଚିଟଫଣ୍ଡ ଲିଙ୍କ ନେଇ ୨୦୧୩ ମସିହାରୁ ତଦନ୍ତ ଚଳାଇଥିବା ସିବିଆଇ ପୂର୍ବରୁ ମଧ୍ୟ ଦେବୀ ମିଶ୍ରଙ୍କୁ ପଚରା ଉଚରା କରିଥିଲା । ତେବେ ଆଜିର ରେଡ୍ ପରେ ପୂର୍ବତନ ମନ୍ତ୍ରୀଙ୍କ କହିବା କଥା ସି-ସୋରକୁ ମହାନଦୀ ପର୍ଯ୍ୟଟନ ପ୍ରକଳ୍ପ ଦିଆଯିବା ବେଳେ ସେ ପର୍ଯ୍ୟଟନ ମନ୍ତ୍ରୀ ଥିଲେ । ତେବେ ଏ ନିଷ୍ପତି ତାଙ୍କର ନିଜସ୍ୱ ନଥିଲା, ସରକାରଙ୍କ ନିଷ୍ପତ୍ତି କାର୍ଯ୍ୟକାରୀ ହୋଇଥିଲା ।
