ଧରା ପଡିବା ପରେ ବି ସେଇ ପୁରୁଣା ଦମ୍ଭ, ପୋଲିସକୁ ଦେଲା ଧମକ
ଉଜ୍ଜୈନ: କାନପୁର ସୁଟଆଉଟ୍ ମୁଖ୍ୟ ଅଭିଯୁକ୍ତ ମଧ୍ୟପ୍ରଦେଶର ଉଜ୍ଜୈନସ୍ଥିତ ମହାକାଳେଶ୍ୱର ମନ୍ଦିରରୁ ବନ୍ଧା ହୋଇଛି । ତଥାପି ତା’ର ପୁରୁଣା ଦମ୍ଭ ଯାଇନି । ପୋଲିସ ହେପାଜତରେ ଥାଇ ସେ ପୋଲିସକୁ ଦେଇଛି । ଧମକ । ଗୁରୁବାର ଦିନ ବିକାଶ ଧରା ପଡିବା ପରେ ତାକୁ ପୋଲିସ ଭ୍ୟାନକୁ ନେଇ ଯାଉଥିବା ପୋଲିସ କର୍ମଚାରୀଙ୍କୁ ସେ ଧମକ ଦେଇଥିଲା । ଚିଲେଇକରି କହିଥିଲା ‘ମୁଁ ବିକାଶ ଦୁବେ,କାନପୁରବାଲା’ ।
ପୋଲିସକୁ ଏମିତି ଦେଲା ଧମକ
ବିକାଶ କାଳେ ଫେରାର ହୋଇଯିବ ସେଇ ଡରରେ ଦୁଇ ତିନିଜଣ ପୋଲିସ ଅଧିକାରୀ ତାକୁ ଧରିଥିଲେ । କିନ୍ତୁ ବିକାଶର ଚେହେରାରେ ଡରର ଚିହ୍ନ ନଥିଲା । ସେ ଗଡଜିତିଲା ଭଳି ଚାଲୁଥିଲା । ପୋଲିସ ଭ୍ୟାନ୍ ପାଖରେ ପହଂଚିବା ପରେ ତାକୁ ଗାଡିରେ ବସାଇବାକୁ ଚେଷ୍ଟା କରୁଥିବା ପୋଲିସ ଅଧିକାରୀଙ୍କୁ ସେ ଧମକ ଦେଇ କହିଥିଲା ଯେ, ମୁଁ କାନପୁର ବାଲା ବିକାଶ ଦୁବେ । କିନ୍ତୁ ପୋଲିସ ତା’ଧମକରେ ଡରିନଥିଲା । ତା’ ପଛରେ ଥିବା ଜଣେ ପୋଲିସ ଅଧିକାରୀ ବିକାଶକୁ ପଛପଟୁ ଭଲକରି ଚାପୁଡାଟାଏ ମାରିଥିଲେ । ଚାପୁଡା ଖାଇବା ପରେ ବିକାଶ ଦୁବେ ଚୁପ୍ ହୋଇଥିଲା ।
ମୁହଁରେ ନଥିଲା ଡର
ପୋଲିସ ଅଧିକାରୀଙ୍କଠାରୁ ଚାପୁଡା ଖାଇ ବିକାଶ ଚୁପ୍ ହୋଇଥିଲା ସତ କିନ୍ତୁ ତା’ ସାମ୍ନାରେ ଛିଡା ହୋଇଥିବା ଜଣେ ଅଧିକାରୀଙ୍କୁ ସେ ଆଖି ଲାଲ କରି ଅନେଇ ଥିଲା । ବିକାଶକୁ ଦେଖି ଲାଗୁନଥିଲା ଯେ,ତା’ ମନରେ ଆଇନକୁ ନେଇ କୌଣସି ଡର ଅଛି ।
ଏମିତି ଧରାପଡିଲା ବିକାଶ
କାନପୁରରେ ୮ ପୋଲିସ ଅଧିକାରୀଙ୍କ ଲାସ ବିଛେଇଥିବା ବିକାଶ ଗୁରୁବାର ଦିନ ଉଜ୍ଜୈନର ମହାକାଳ ମନ୍ଦିରରୁ ଧରାପଡିଥିଲା । ସକାଳେ ବିକାଶ ମହାକାଳ ମନ୍ଦିରରେ ପହଂଚିବା ପରେ ମୁଁ କାନପୁର ବାଲା ବିକାଶ ଦୁବେ ବୋଲି ଚିଲ୍ଲାଇ ଥିଲା । ଏହାପରେ ପୋଲିସ ପହଂଚି ତାକୁ ଗିରଫ କରିଥିଲା । ନିକଟରେ ଦିଲ୍ଲୀରୁ ବିକାଶ ଅଳ୍ପକେ ଖସି ଯାଇଥିଲା ।
ବିକାଶ ଗୋଟିଏ ଅଟୋରେ ବସି ଯାଉଥିବା ଭିଡିଓ ସାମ୍ନାକୁ ଆସିଥିଲା । ବିକାଶର ପ୍ଲାନ୍ ଉତ୍ତର ପ୍ରଦେଶ ପୋଲିସ ହାତରେ ନପଡି ଆତ୍ମସମର୍ପଣର ଥିଲା । ଏନକାଉଣ୍ଟର ଭୟରେ ସେ ମଧ୍ୟପ୍ରଦେଶ ଆସି ଜାଣିଶୁଣି ପୋଲିସକୁ ଧରା ଦେଇଛି । ତେବେ ଏବେ ସବୁଠୁ ବଡ ପ୍ରଶ୍ନ ହେଉଛି ଉତ୍ତର ପ୍ରଦେଶରୁ ମଧ୍ୟପ୍ରଦେଶ ଆସିବାରେ ତାକୁ କିଏ ସାହାଯ୍ୟ କରିଥିଲା ।
