ନନ୍ଦିଘୋଷ ବ୍ୟୁରୋ: ଥମୁନି ବାଂଲାଦେଶ ହିଂସା। ବିଭିନ୍ନ ସ୍ଥାନରେ ଏବେ ବି ଜାରି ରହିଛି ଉତ୍ତେଜନା। ବାଂଲାଦେଶ ପୋଲିସ ୩ ଜଣ ନେତାଙ୍କୁ ନିଜ କବଜାକୁ ନେଇଛି। କୋଟା ବ୍ଯବସ୍ଥାକୁ ବିରୋଧ କରି ଦେଶରେ ଆନ୍ଦୋଳନ ଜାରି ରହିଥିବାବେଳେ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଗିରଫଦାରୀ କରାଯାଇଛି। କୋଟା ବିରୋଧୀ ହିଂସାରେ ବର୍ତ୍ତମାନ ସୁଦ୍ଧା ୨୦୦ ଲୋକଙ୍କ ମୃତ୍ଯୁ ଘଟିଥିବାବେଳେ ସରକାର ବିରୋଧୀ ହିଂସା ବଳବତ୍ତର ରହିଛି। ଷ୍ଟୁଡେଣ୍ଟସ ଏଗନେଷ୍ଟ ଡେସ୍କ୍ରିମିମେସନ ମୁଖପାତ୍ର ନାହିଦ ଇସଲାମ ଓ ଅନ୍ଯ ୨ ନେତାଙ୍କୁ ବଳପୂର୍ବକ କିଛି ଲୋକ ହସ୍ପିଟାଲରୁ ନେଇଯିବା ଅଭିଯୋଗ ପରେ ପୋଲିସ ସେମାନଙ୍କୁ ନିଜ ହେପାଜତକୁ ନେଇଛି।
ପ୍ରଧାନମନ୍ତ୍ରୀ ଶେଖ ହାସିନା କହିଛନ୍ତି- ଦେଶର ଅର୍ଥନୀତିକୁ ଧ୍ବଂସ କରିବା ସହ ଦେଶକୁ ଭିକ୍ଷୁକଙ୍କ ରାଷ୍ଟ୍ରରେ ପରିଣତ କରିବା ଲାଗି ବିରୋଧୀ ଷଡ଼ଯନ୍ତ୍ର କରୁଛନ୍ତି। ଦେଶରେ ଶାନ୍ତି ପ୍ରତିଷ୍ଠା ଲାଗି ସେ ଆହ୍ବାନ ଦେଇଛନ୍ତି। ଏହି ଆନ୍ଦୋଳନ ବେଳେ ରାଷ୍ଟ୍ରୀୟ ବାଂଲାଦେଶ ଟେଲିଭିଜନ ସମେତ ଅନେକ ସରକାରୀ ପ୍ରତିଷ୍ଠାନକୁ ନଷ୍ଟ କରିଥିଲେ ଆନ୍ଦୋଳନକାରୀ।
