ଆଫଗାନର ଗର୍ଜିଲା ବାରୁଦ, ମସଜିଦରେ ଭୟଙ୍କର ବିସ୍ଫୋରଣ

କାବୁଲ: ବିସ୍ଫୋରଣରେ ପୁଣି ଥରିଲା ଆଫଗାନିସ୍ତାନ । ପୂର୍ବାଞ୍ଚଳ ଆଫଗାନିସ୍ତାନର ନଙ୍ଗରହାର ପ୍ରଜାତନ୍ତ୍ରର ଏକ ମସଜିଦରେ ଘଟିଛି ବଡ ଧରଣର ବିସ୍ଫୋରଣ । ସ୍ପିନଘର ଇଲାକାରେ ଘଟିଥିବା ବିସ୍ପୋରଣରେ ପ୍ରାଣ ହରାଇଛନ୍ତି ୩ ଜଣ । ଆହତ ହୋଇଛନ୍ତି ୧୫ରୁ ଅଧିକ ଲୋକ । ମୃତ୍ୟୁ ସଂଖ୍ୟା ବଢିବ ବୋଲି ଆଶଙ୍କା କରାଯାଉଛି ।

ଆହତଙ୍କ ମଧ୍ୟରେ ଜଣେ ଇମାମ ଥିବାବେଳେ ସେମାନଙ୍କୁ ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି । ଜନଗହଳିପୂର୍ଣ୍ଣ ମସଜିଦରେ ପ୍ରାର୍ଥନା ଚାଲିଥିବାବେଳେ ଆତଙ୍କବାଦୀ ଏହା ଉପରେ ହମଲା କରିଥିଲେ । ବିସ୍ଫୋରଣ ଲାଗି ସୁଚିନ୍ତିତ ଯୋଜନା କରାଯାଇଥିଲା ଏବଂ ମସଜିଦ ଭିତରେ ବୋମା ରଖାଯାଇଥିବା ସନ୍ଦେହ କରାଯାଉଛି । ଏକ ଲାଉଡସ୍ପିକରରେ ଶକ୍ତିଶାଳୀ ବୋମା ଖଞ୍ଜାଯାଇଥିଲା ବୋଲି ସୂଚନା ମିଳିଛି ।

ପ୍ରାର୍ଥନା ଆରମ୍ଭ ହେବା ମାତ୍ରେ ଏହା ବିସ୍ଫୋରଣ ହୋଇଥିଲା । ବିସ୍ଫୋରଣ ଲାଗି କୌଣସି ସଂଗଠନ ନିଜକୁ ଦାୟୀ କରିନାହିଁ । ଗତ ଅଗଷ୍ଟରୁ ଦେଶର ବିଭିନ୍ନ ସ୍ଥାନରେ ଘଟିଥିବା ବିସ୍ଫୋରଣ ଘଟଣାରେ ନିଜକୁ ଦାୟୀ କରିଆସୁଛି ଇସଲାମିକ ଷ୍ଟେଟ ଇନ ଖୋରାସନ ପ୍ରୋଭିନ୍ସ ବା ଆଇଏସକେପି । ଏହି ସଂଗଠନ ଆଇଏସଆଇଏସ- କେ ସଂଗଠନର ସହଭାଗୀ ।