ଶିଶୁଦିବସରେ ମୁଖ୍ୟମନ୍ତ୍ରୀଙ୍କ ଶୁଭେଚ୍ଛା, ‘ମନ ଦୁଃଖ କର ନାହିଁ ଆଗାମୀ ବର୍ଷ ମଜା କରିବ’

ଭୁବନେଶ୍ୱର: ଆଜି ଶିଶୁଦିବସ । ପଣ୍ଡିତ ଜବାହାରଲାଲ ନେହେରୁଙ୍କ ଜନ୍ମତିଥି । ଏହି ଅବସରରେ ଛାତ୍ରଛାତ୍ରୀ ଓ ଶିଶୁଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୀପାବଳି ଥିବାରୁ ଘରେ ରହି ଏହି ଆଲୋକର ପର୍ବକୁ ସୁରକ୍ଷିତ ଭାବେ ପାଳନ କରିବାକୁ ମୁଖ୍ୟମନ୍ତ୍ରୀ ପିଲାମାନଙ୍କୁ ପରାମର୍ଶ ଦେଇଛନ୍ତି ।

ସାଙ୍ଗସାଥିଙ୍କ ସହ ମିଶିପାରି ନଥିବାରୁ ଏଥିପାଇଁ ମନଦୁଃଖ ନକରିବାକୁ ମୁଖ୍ୟମନ୍ତ୍ରୀ କହିଛନ୍ତି । ଆସନ୍ତାବର୍ଷ ଟିକା ଆସିବା ପରେ ପୁଣି ସବୁ ସ୍ୱାଭାବିକ ହେବ ବୋଲି କହିଛନ୍ତି ନବୀନ । ସ୍ୱାସ୍ଥ୍ୟ ହିଁ ସମ୍ପଦ ବୋଲି ପିଲାଙ୍କୁ ପରାମର୍ଶ ଦେଇଛନ୍ତି । ଛାତ୍ରଛାତ୍ରୀଙ୍କ ସ୍ୱାସ୍ଥ୍ୟର ନିରାପତ୍ତାକୁ ଦୃଷ୍ଟିରେ ରଖି ସ୍କୁଲ ବନ୍ଦ କରାଯାଇଛି । ସ୍କୁଲର ଚାରିକାନ୍ଥ ଭିତରେ ଆଉ ଶିକ୍ଷା ସୀମିତ ହୋଇ ରହିନାହିଁ । ଘରେ ରହି ସମସ୍ତଙ୍କୁ ଶିକ୍ଷା ମିଳୁଛି । ଏହାର ସୁଯୋଗ ନେବେ ଓ ସୁରକ୍ଷିତ ରହିବାକୁ ମୁଖ୍ୟମନ୍ତ୍ରୀ ପିଲାମାନଙ୍କୁ ପରାମର୍ଶ ଦେଇଛନ୍ତି ।