ପତ୍ନୀଙ୍କୁ ନିର୍ଯାତନା ଅଭିଯୋଗ, ଆର୍ମି କଷ୍ଟଡିକୁ ଗଲେ ମେଜର

ଭୁବନେଶ୍ୱର: ପତ୍ନୀଙ୍କୁ ଯୌତୁକ ନିର୍ଯାତନା ଦେଉଥିଲେ ସେନା ବାହିନୀର ବରିଷ୍ଠ ଅଧିକାରୀ । ଏହି ମାମଲାରେ ମେଜର୍ ସୌମ୍ୟ ରଞ୍ଜନ ମିଶ୍ରଙ୍କୁ ଗିରଫ୍ କରିଥିଲା ପୋଲିସ୍ । ଗୁରୁବାର ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା କୋର୍ଟ । ଜାମିନ ନାମୁଞ୍ଜର ହେବାରୁ ତାଙ୍କୁ ଆର୍ମି କଷ୍ଟଡିକୁ ପଠା ଯାଇଛି ।

ସୂଚନାଯୋଗ୍ୟ, ଗୁରୁବାର ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା କୋର୍ଟ । ଆଉ କୋର୍ଟରେ ଉପସ୍ଥିତ ଥିଲେ ମାନ୍ୟବର ବିଚାରପତି । ଅଭିଯୁକ୍ତ, ପୀଡିତା ଓ ପରିବାର ଲୋକଙ୍କ ଉପସ୍ଥିତିରେ ଉଭୟ ପକ୍ଷଙ୍କ ଓକିଲ ରଖୁଥିଲେ ଯୁକ୍ତି । ରାତି ଯେତେ ବଢୁଥିଲା ଭାରତୀୟ ଆଇନକୁ ନେଇ ବିତର୍କ ସେତିକି ଶାଣିତ ହେଉଥିଲା । ରାତି ୮.୩୦ରୁ ଆରମ୍ଭ ହୋଇଥିବା ଶୁଣାଣି ରାତି ୨ଟା ପର୍ଯ୍ୟନ୍ତ ଚାଲିଥିଲା । ଶେଷରେ ଅଭିଯୁକ୍ତ ମେଜରଙ୍କୁ ବିଚାର ବିଭାଗୀୟ ହାଜତ ବଦଳରେ ଆର୍ମି କଷ୍ଟଡିକୁ ପଠାଇଲେ କୋର୍ଟ । ଦିଲ୍ଲୀରେ ଅବସ୍ଥାପିତ ବିହାର ରେଜିମେଣ୍ଟର ମେଜର ସୌମ୍ୟ ରଞ୍ଜନ ମିଶ୍ର । ପତ୍ନୀଙ୍କ ଅଭିଯୋଗ, ଯୌତୁକ ପାଇଁ ମେଜର ସୌମ୍ୟ ଓ ତାଙ୍କ ପରିବାର ଲୋକ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ ।

ସୌମ୍ୟରଞ୍ଜନ ୨୦୧୩ ମେ ମାସରେ ବୈଦିକ ରୀତିନୀତିରେ ତେଜସ୍ୱିନୀ ମହାପାତ୍ରଙ୍କୁ ବିବାହ କରିଥିଲେ । ହେଲେ ଖୁସିର ସଂସାର ଆରମ୍ଭ ହେବା ପୂର୍ବରୁ ଯୌତୁକ ରାକ୍ଷାସ ପଶି ଆସିଥିଲା । ନିର୍ଯାତନା ଅସହ୍ୟ ହେବାରୁ କିଛି ମାସ ତଳେ ମହିଳା ଥାନାରେ ଅଭିଯୋଗ କରିଥିଲେ ପତ୍ନୀ ତେଜସ୍ୱିନୀ । ଗୁରୁବାର ମେଜର ସୌମ୍ୟଙ୍କୁ ଗିରଫ କରିଥିଲା ପୋଲିସ୍ । ତେବେ ଜାମିନ୍ ନାମଞ୍ଜୁର କରିବା ସହ ଅଭିଯୁକ୍ତଙ୍କୁ ଆର୍ମି କଷ୍ଟଡିଙ୍କୁ ପଠାଇଥିଲେ କୋର୍ଟ । ସେନାର ଶୃଙ୍ଖଳିତ ଅନୁଶାସନ ଓ କଠୋର କଟକଣା ଭିତରେ ମେଜର ସୌମ୍ୟ କିଭଳି ହେଲେ ବିଶୃଙ୍ଖଳିତ ? ଏ ଚର୍ଚ୍ଚା ଏବେ ସମସ୍ତଙ୍କ ମୁହଁରେ ।