ଲକ୍ଡାଉନ୍ରେ ଭିକ୍ଷା ମାଗି ପିଲାଙ୍କୁ ଖୁଆଇଥିଲେ, ତିନ ତଲାକ୍ ଦେଲେ ସ୍ୱାମୀ
ନୂଆଦିଲ୍ଲୀ: ପରିବାର ପରାମର୍ଶ କେନ୍ଦ୍ରରେ ନିଜ ପତ୍ନୀ ସହ ମୀମାଂସା କରିବାକୁ ଆସିଥିବା ସ୍ୱାମୀ ନିଜ ସ୍ତ୍ରୀକୁ ୩ ଥର ତଲାକ କହି ତଲାକ ଦେଇଛନ୍ତି । ଆଇନତଃ ତିନ ତଲାକ ଶେଷ ହୋଇସାରିଛି । ଏଣୁ ସ୍ୱାମୀଙ୍କ ବିରୋଧରେ ପୋଲିସ ମାମଲା ରୁଜୁ କରି ଗିରଫ କରିଛି ।
ପୀଡ଼ିତା ସ୍ତ୍ରୀ ଜଣଙ୍କ ହେଉଛନ୍ତି ଖଣ୍ଡାବାର ଗୁଲନାଜ ସିଦ୍ଧିକି । ଯିଏ କି ୮ ବର୍ଷ ପୂର୍ବେ ଝାନ୍ସିର ଅଜହର ସହ ବିବାହ କରିଥିଲେ । ଆରମ୍ଭରୁ ସମ୍ପର୍କ ଠିକ୍ଠାକ ଥିଲା । ୨ଟି ସନ୍ତାନ ମଧ୍ୟ ହୋଇଛନ୍ତି । ଏହାପରେ ଉଭୟଙ୍କ ସମ୍ପର୍କରେ ତିକ୍ତତା ଆରମ୍ଭ ହୋଇଯାଇଥିଲା । ଲକ୍ଡାଉନ୍ ଆରମ୍ଭ ବେଳକୁ ହିଁ ହଠାତ୍ ଅଜହର ତାଙ୍କ ସ୍ତ୍ରୀ ଗୁଲନାଜଙ୍କୁ ଛାଡ଼ି କେଉଁଆଡ଼େ ଚାଲିଗଲେ । ଗୁଲନାଜ ଏବଂ ତାଙ୍କ ଛୁଆଙ୍କୁ ଭୋକରେ ମରିବାକୁ ଭଳି ପରିସ୍ଥିତି ଉପୁଜିଥିଲା ।
ଗୁଲନାଜ କହିଛନ୍ତି ଯେ, ମୋର ପତି ବାହାଘର ପରଠଶରୁ ହିଁ ଯୌତୁକ ପାଇଁ ଚାପ ପକାଉଥିଲେ । ବହୁ ଥର ମୋ ବାପା ତାଙ୍କୁ ଟଙ୍କା ପଠାଇଥିଲେ କିନ୍ତୁ ପରିବାରର ଦାୟିତ୍ୱ ନେଉନଥିଲା । ଲକଡାଉନ୍ ପୂର୍ବରୁ ଘର ଛାଡ଼ି ଚାଲିଗଲା । ଭୋକରେ ରହିବାକୁ ପଡ଼ିଲା ଭଳି ପରିସ୍ଥିତି ଉପୁଜିଥିଲା । ସେ ଭିକ୍ଷ ମାଗି ଛୁଆମାନଙ୍କୁ ବଞ୍ଚାଇଥିବା କହିଛନ୍ତି । ଏବେ ବି ପିଲାମାନଙ୍କ ଲାଗି ସମ୍ପର୍କ ତୁଟାଇବାକୁ ଚାହୁଁନଥିବା କହିଛନ୍ତି । ଏଣୁ ମହିଳା ପରାମର୍ଶ କେନ୍ଦ୍ରକୁ ଯାଇଥିଲେ । ଏଠାରେ ବୁଝାମଣା ନେଇ ସ୍ୱାମୀକୁ ଡକାଯାଇଥିଲା । କିନ୍ତୁ ସେ ସମସ୍ତଙ୍କ ସାମ୍ନାରେ ତାଙ୍କୁ ତିନ ତଲାକ୍ ଦେଇଛନ୍ତି ।
