ନରହନ୍ତା ଦନ୍ତାର ବଦଳିଲା ଠିକଣା, ଢେଙ୍କାନାଳ କପିଳାସ ସ୍ୱତନ୍ତ୍ର ଏନ୍କ୍ଲୋଜରକୁ ଗଲା ରାକେଶ
ଢ଼େଙ୍କାନାଳ: ନରହନ୍ତା ଦନ୍ତାର ବଦଳିଲା ଠିକଣା । ୮ ମାସ ପରେ ବେଡିରୁ ଖୋଲିବା ଶିକୁଳି । ୧୨ ଲୋକଙ୍କୁ ହତ୍ୟାକରି କାଟୁଥିଲା ବନ୍ଦୀ ଜୀବନ । ସ୍ୱତନ୍ତ୍ର ଏନକ୍ଲୋଜର ହେଲା ରାକେଶର ନୂଆ ଠିକଣା । ଦୀର୍ଘ ୮ ମାସ ପରେ ଦବଙ୍ଗ ଦନ୍ତା ହାତୀ ରାକେଶ ଗୋଡ଼ରୁ ଖୋଲିଛି ଲୁହାର ବେଡି । ଆଉ ତା’ର ସ୍ୱଭାବରେ ପରିବର୍ତ୍ତନ ପାଇଁ ଢେଙ୍କାନାଳର କପିଳାଶ ବନଖଣ୍ଡ କୁତ୍ରିମ ଜଙ୍ଗଲକୁ ପଠାଯାଇଛି । ଯେଉଁଠି ଖୋଲା ଭାବରେ ବୁଲିବା ସହିତ ଖାଇବା ପାଇଁ ରହିଛି ସବୁଜ ଜଙ୍ଗଲ। ତାଳଚେର ପର୍ଯଙ୍ଗ ଅଂଚଳରେ ଆତଙ୍କ ମଚଇ ୧୨ ଜଣଙ୍କ ଜୀବନ ନେଇଥିଲା ଏହି ନରହନ୍ତା ଦନ୍ତା ।
ଢେଙ୍କାନାଳ ଓ ଅନୁଗୁଳ ଜିଲ୍ଲାରେ ପ୍ରତ୍ୟେକ ଦିନ ହାତୀମାନଙ୍କ ଉପଦ୍ରବ ଦେଖିବାକୁ ମିଳୁଛି। ଏହାକୁ ନଜରରେ ରଖି ଟେଂପରାରୀ ଟ୍ରାଞ୍ଜିଟି ଫାସିଲିଟିଜ ଫର ଓ୍ୱାଇଲ୍ଡ ଆନିମାଲ୍ ପ୍ରକଳ୍ପ କାର୍ଯ୍ୟକାରୀ କରାଯାଇଛି । ଏଥିପାଇଁ ପ୍ରଥମ ପର୍ଯ୍ୟାୟରେ ୧୫ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ବେଳେ ୫ ଲକ୍ଷ ଟଙ୍କା ପରେ ଖର୍ଚ୍ଚ ହେବ । ଆଉ ଏହାରି ମାଧ୍ୟମରେ ଉଦ୍ଧାର କରାଯାଇଥିବା ବନ୍ୟାପ୍ରାଣୀମାନଙ୍କୁ କିଛି ଦିନ ରଖିବା ପରେ ପୁଣି ଜଙ୍ଗଲରେ ଛାଡି ଦିଆଯିବ । ଯାହା ଏବେ ନରହନ୍ତା ଦନ୍ତା ରାକେଶ ପକ୍ଷେ କାର୍ଯ୍ୟକାରୀ ହୋଇଥିବା କହିଛନ୍ତି ବନବିଭାଗ କର୍ମଚାରୀ ।
