ନେତା ଉତାରିପାରୁନି ରାଜ୍ୟ ବିଜେପି, ଆମଦାନୀ କରା ନେତାଙ୍କ ଉପରେ ଲଗାଉଛି ବାଜି

ଭୁବନେଶ୍ୱର, କେବଳ ଭାରତ ନୁହେଁ, ସାରା ପୃଥିବୀର ସର୍ବବୃହତ ଦଳ ଭାବେ ଭାଜପା ନିଜକୁ ଅଭିହିତ କରିଥାଏ । ୨୦୧୪ରୁ ଭାଜପା କେନ୍ଦ୍ରରେ ସରକାରରେ ରହିଛି । ଏଥିସହିତ ଭାରତର ବିଭିନ୍ନ ପ୍ରମୁଖ ରାଜ୍ୟରେ ମଧ୍ୟ ଶାସନ କରୁଛି । ଏହି ଦଶନ୍ଧି ମଧ୍ୟରେ ଦଳର ସଙ୍ଗଠନର ମଧ୍ୟ ବୃଦ୍ଧି ପାଇଛି । ହେଲେ ଯେତେବେଳ ଓଡ଼ିଶା କଥା ଆସେ, ତେବେ ଭାଜପାର ଏହି ଦାବି ଗୌଣ ମନେ ହୁଏ । ଏକଦା ଭାଗୁଆଳି ସରକାରରେ ଥିବା ଭାଜପା ଏଠାରେ ନିଜସ୍ୱ ସଙ୍ଗଠନ ସୃଷ୍ଟି କରିବାରେ ବିଫଳ ହୋଇ ଆସୁଛି । ନିଜ ଦଳର ନେତାଙ୍କୁ ପ୍ରାର୍ଥୀ କରିବା ପରିବର୍ତ୍ତେ ଅନ୍ୟ ଦଳରୁ ଆସୁଥିବା ନେତାଙ୍କୁ ଗୁରୁତ୍ୱ ଦେଉଛି । ମୋଟ ଉପରେ କହିଲେ ନିଜସ୍ୱ ଦମ୍ ରେ ଭାଜପା ନେତା ଉତାରି ପାରୁ ନାହିଁ । ନିର୍ବାଚନ ଆସିଲେ ବିଜେପିକୁ ପାରାସୁଟରେ ଓହ୍ଲାଉଛନ୍ତି ଅନ୍ୟଦଳ ଦ୍ୱାରା ପ୍ରତ୍ୟାଖ୍ୟାତ ନେତା ।

ନିକଟ ଅତୀତରେ ବିଜେଡି ନେତା ବିଷ୍ଣୁଦାସଙ୍କ ପରଲୋକ ହୋଇଥିଲା । ଏହାପରେ ସେ ପ୍ରତିନିଧିତ୍ୱ କରୁଥିବା ତିର୍ତ୍ତୋଲ ଆସନ ଖାଲି ହୋଇଥିଲା । ଡିସେମ୍ବର ପୂର୍ବରୁ ଏହି ଉପନିର୍ବାଚନ ବାଲେଶ୍ୱର ସଦର ସହ ଅନୁଷ୍ଠିତ ହେବ । ଏହି ନିର୍ବାଚନ ନେଇ ସବୁ ଦଳରେ ତତ୍ପରତା ଲାଗି ରହିଛି । ସେହିକ୍ରମରେ ଭାଜପାରେ ମଧ୍ୟ ସକ୍ରିୟତା ଦେଖା ଦେଇଛି, ହେଲେ ତାହା ନିଜର ସ୍ୱଅର୍ଜିତ ସଙ୍ଗଠନକୁ ଆଧାର କରି ନୁହେଁ । ବରଂ ଅନ୍ୟ ଦଳର ପ୍ରାର୍ଥୀଙ୍କୁ ଆଣିବାରେ । ୨୦୧୪ ମସିହାରେ କଂଗ୍ରେସରୁ ତିର୍ତ୍ତୋଲ ଅଞ୍ଚଳରେ ପ୍ରାର୍ଥୀ ହୋଇଥିବା ରାଜ କିଶୋର ବେହେରାଙ୍କୁ ଭାଜପା ନିଜ ଦଳକୁ ଆଣିଛି । କୁଆଡେ ତାଙ୍କୁ ତିର୍ତ୍ତୋଲ ଉପନିର୍ବାଚନରେ ପ୍ରାର୍ଥୀ କରାଯିବା ଏକ ପ୍ରକାର ନିଶ୍ଚିତ । ତେଣୁ ଦୀର୍ଘଦିନ ଧରି ଦଳ ପାଇଁ କାର୍ଯ୍ୟ କରିଆସୁଥିବା ପ୍ରାର୍ଥୀ, ନେତା ଉପେକ୍ଷିତ ହେବା , ଏକ ପ୍ରକାର ସୁନିଶ୍ଚିତ ।

ସାରା ଦେଶରେ କଂଗ୍ରେସ ମୁକ୍ତର ସ୍ଲୋଗାନ ଦେଇଥିବା ଭାଜପା ଓଡ଼ିଶାରେ ଅତିମାତ୍ରାରେ କଂଗ୍ରେସ ନେତା ଯୁକ୍ତ ହୋଇ ଚାଲିଛି । ଏହା କେବଳ ତିର୍ତ୍ତୋଲ କଥା ନୁହେଁ । ପୂର୍ବ ୩ ବିଧାନସଭା ଓ ଲୋକ ସଭା(୨୦୦୯,୨୦୧୪ ଏବଂ ୨୦୧୯)ନିର୍ବାଚନରେ ପ୍ରମାଣିତ ହୋଇଛି । ୨୦୧୯ରେ କଂଗ୍ରେସରୁ ଟିକେଟ୍ ପାଇ ନ ଥିବା ବିଭୂ ତରାଇ ଜଗତସିଂହପୁର ଲୋକ ସଭା ଆସନରୁ ଭାଜପା ପ୍ରାର୍ଥୀ ହୋଇଥିଲେ । ଏହି ଧାରା କେବଳ ଜଗତସିଂହପୁର ନୁହେଁ, ସାରା ଓଡ଼ିଶାରେ ଦେଖିବାକୁ ମିଳିଥିଲା ।

ପରିସ୍ଥିତି ଏପରି ହୋଇଥିଲା ଯାଜପୁର ଜିଲା କଂଗ୍ରେସ ଏବଂ ବିଜେଡ଼ିର ପ୍ରତ୍ୟାଖିତ ନେତାମାନଙ୍କୁ ଦଳ ବିଭିନ୍ନ ବିଧାନସଭା ଆସନରେ ପ୍ରାର୍ଥୀ କରିଥିଲା । କେନ୍ଦ୍ରାପଡ଼ାରୁ ବିଜେଡିର ଅଲୋଡା ନେତା ବୈଜୟନ୍ତ ପଣ୍ଡା, ସାଲେପୁରରୁ ପ୍ରକାଶ ବେହେରା, ମାହାଙ୍ଗରେ ଶାରଦା ଜେନାଙ୍କୁ ପ୍ରାର୍ଥୀ କରିଥିଲା । ଭାଜପାର ଏହି ଆଭିମୁଖ୍ୟ ଦଳର ମୂଳ ନେତାମାନଙ୍କୁ ବ୍ୟଥିତ କରିଛି । ଅନେକ ନେତା ବିଭିନ୍ନ ଦଳ ଛାଡିକି ଆସି ଭାଜପାରେ କୋଣଠେସା ହୋଇ ରହିଥିବା ମନେ ହେଉଛି ।

ଦିନକୁଦିନ ଭାଜପାରେ ଏହି କୋଣଠେସାଙ୍କ ସଂଖ୍ୟାବୃଦ୍ଧି ପାଇବାରେ ଲାଗିଛି । ସେ ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ ହୁଅନ୍ତି କି ବିଜେଡି ଛାଡିଥିବା ଜୟରାମ ପାଙ୍ଗୀ, ଅର୍ଚ୍ଚନା ନାୟକ ,ରଘୁନାଥ ମହାନ୍ତି ଇତ୍ୟାଦି । ଦଳରେ ଏହି ଆମଦାନୀ ନେତାଙ୍କ ବୃଦ୍ଧି ଦଳର କଳେବର ତଥା ଆକାରକୁ ବୃଦ୍ଧି କରୁଛି ସତ ହେଲେ ତାହାର କୌଣସି ଗ୍ରହଣୀୟତା ରହୁନାହିଁ । କେତେକ ନେତା ୨୦୧୯ ସାଧାରଣ ନିର୍ବାଚନ ପରେ ପୂର୍ବଭଳି ଭାଜପା ସଙ୍ଗଠନକୁ ଗୁରୁତ୍ୱ ଦେଉଥିବା ଲକ୍ଷ୍ୟ କରାଯାଉନାହିଁ । ମାତ୍ର ମୂଳ କର୍ମୀମାନେ ସାଙ୍ଗଠନିକ କାର୍ଯ୍ୟ ଜାରି ରଖୁଛନ୍ତି, ହେଲେ ଯେତେବେଳ ନିର୍ବାଚନ ଆସୁଛି । ସେ ସମୟରେ ଆମଦାନୀ ନେତାଙ୍କୁ ଗୁରୁତ୍ୱ ଦିଆଯଆଉଛି, ଯାହା ସେମାନଙ୍କ ପାଇଁ ଅସହଜ ମନେ ହେଉଥିବା ରାଜନୈତିକ ସମୀକ୍ଷକମାନେ କହିଛନ୍ତି ।