ବ୍ରିଟିଶ ଅମଳର କେନାଲ, ଚାଷୀଙ୍କ ପାଇଁ ଥିଲା ବଡ଼ ସହାୟକ ! ହେଲେ ଏବେ..?

ଯାଜପୁର: (ବିକ୍ରମ କେଶରୀ ସାହୁ): କେନାଲରେ ପାଣି ନାହିଁ । ଚାଷୀ ହତାଶ । ଯାଜପୁର ଜିଲ୍ଲାର ଏକ କେନାଲର ପୁନରୁଦ୍ଧାର କାମ ହୋଇନଥିବାରୁ ଏହା ଚାଷୀଙ୍କ କାମରେ ଲାଗୁନାହିଁ ।

ଶୁଖିଲା ପଡ଼ିଛି କେନାଲ । ପୋତି ହୋଇଯିବା ସହ ଅନାବନା ଗଛ ମାଡ଼ିଗଲାଣି । ଆମେ କହୁଛୁ ଯାଜପୁର ଜିଲ୍ଲା ଜାରକା ଜଳସେଚନ ଡିଭିଜନ ଅଧିନସ୍ଥ ହାଇଲେଭେଲ କେନାଲ କଥା । ଏହା କଟକ ଜଗତପୁର ନିକଟ ବିରୂପା ନଦୀରୁ ବାହାରି ଧର୍ମଶାଳା ବ୍ଲକ ଜେନାପୁର ନିକଟ ବ୍ରାହ୍ମଣୀ ନଦୀ ପର୍ଯ୍ୟନ୍ତ ଲମ୍ବିଛି । ହେଲେ କେନାଲରେ ପାଣି ଆସୁ ନଥିବାରୁ ଚାଷୀ ହତାଶ ହୋଇପଡ଼ିଛନ୍ତି । ବିଭାଗକୁ ବାରମ୍ବାର ଜଣାଇଲେ ବି ଫଳ ଶୂନ୍ ।

ବ୍ରିଟିଶ୍‌ ଅମଳରେ ଏହି କେନାଲ ଖୋଳାଯାଇଥିଲା । କିନ୍ତୁ ନିର୍ଦ୍ଦିଷ୍ଟ ସମୟ ବ୍ୟବଧାନରେ ମରାମତି ହେଉନାହିଁ । ୪୩ କିଲୋମିଟର ଲମ୍ବ ଏହି କେନାଲର ୩୧ କିଲୋମିଟର ପୁନରୁଦ୍ଧାର କରାଯାଇ ବାକି ୧୨ କିଲୋମିଟରକୁ ଛାଡ଼ି ଦିଆଯାଇଛି । ଫଳରେ ପାଣି କେନାଲର ଶେଷମୁଣ୍ଡକୁ ଯାଉନାହିଁ । ତେବେ ପୁନରୁଦ୍ଧାର କାର୍ଯ୍ୟ ଅତିଶୀଘ୍ର ଆରମ୍ଭ ହେବ ବୋଲି ଯାଜପୁର ଅତିରିକ୍ତ ଜିଲ୍ଲାପାଳ କହିଛନ୍ତି । ଶୀଘ୍ର ପୁନରୁଦ୍ଧାର କରାନଗଲେ କେନାଲଟି ସଂପୂର୍ଣ୍ଣ ପୋତି ହୋଇପଡ଼ିବାର ଆଶଙ୍କା ରହିଛି ବୋଲି ସ୍ଥାନୀୟ ଲୋକ ଅଭିଯୋଗ କରିଛନ୍ତି । ଯାହାକି ଚାଷୀଙ୍କ ପାଇଁ ଚିନ୍ତା ବଢ଼ାଇପାରେ ।