ଇଡିର ଶିକାର ହେଲେ ରିୟାଙ୍କ ଭାଇ ଶୋଭିକ, ସୁଶାନ୍ତଙ୍କ ଆତ୍ମହତ୍ୟା ନେଇ ଶୋଭିକଙ୍କୁ ୧୮ ଘଣ୍ଟାର ଜେରା

ନୂଆଦିଲ୍ଲୀ: ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ଦିନକୁ ଦିନ ଜଟିଳ ରହସ୍ୟରେ ପରିଣତ ହେଉଛି । ସିବିଆଇ ତାର ତଦନ୍ତକୁ ଯୋର କରିଛି । ଏହି ମାମଲାରେ ରିୟା ଚକ୍ରବର୍ତ୍ତୀ ଏବଂ ତାଙ୍କ ପରିବାରକୁ ନେଇ ଚର୍ଚ୍ଚା ଜୋର ଧରିଛି । ଜଣଙ୍କ ପରେ ଜଣଙ୍କୁ ଇଡି ତାର ତଦନ୍ତ ଆଢ଼ୁଆଳକୁ ନେବାରେ ଲାଗିଛି । ଏନଫୋର୍ସମେଣ୍ଟ ନିର୍ଦ୍ଦେଶାଳୟ ରିୟା ଚକ୍ରବର୍ତ୍ତୀଙ୍କ ଭାଇ ଶୋଭିକ ଚକ୍ରବର୍ତ୍ତୀଙ୍କକୁ ମାରାଥନ ଜେରାରେ ପ୍ରଶ୍ନ କରିଛି । ବିଭିନ୍ନ କ୍ଷେତ୍ରକୁ ନେଇ ଅର୍ଥ ହେରଫେର ମାମଲାରେ ଇଡି ଶୋଭିକଙ୍କୁ ୧୮ ଘଣ୍ଟା ଧରି ପ୍ରଶ୍ନ କରିଛି ।

ଏହାପୂର୍ବରୁ ଶୁକ୍ରବାର ଦିନ ଇଡି ଶୋଭିକଙ୍କୁ ୨ ଘଣ୍ଟା ଜେରା କରିଥିଲା । ଏଥି ସହ ସୁଶାନ୍ତ ସିଂ ରାଜପୁତଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀଙ୍କୁ ଶୁକ୍ରବାର ଦିନ ୯ ଘଣ୍ଟା ଧରି ଇଡି ପଚରାଉଚରା କରିଥିଲା। ଇଡି ଏପର୍ଯ୍ୟନ୍ତ ଶୋଭିକ୍, ସୁଶାନ୍ତ ସିଂ ରାଜପୁତଙ୍କ ମ୍ୟାନେଜର ଶ୍ରୁତି ମୋଦୀ ଏବଂ CA ରିତେଶ ଶାହାଙ୍କ ସହ ରିୟାଙ୍କୁ ପ୍ରଶ୍ନ କରିଛନ୍ତି । ସୁଶାନ୍ତଙ୍କ ପିତା ରିୟା ଏବଂ ତାଙ୍କ ପରିବାରକୁ ୧୫ କୋଟି ଟଙ୍କା ଠକେଇ କରିଥିବା ଅଭିଯୋଗ କରିଛନ୍ତି ।

ଶନିବାର ସୁଶାନ୍ତ ସିଂ ରାଜପୁତଙ୍କ ପିତା କେ.କେ ସିଂ ଏବଂ ତାଙ୍କ ଭଉଣୀ ରାନୀ ସିଂ ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟରଙ୍କୁ ଭେଟିଛନ୍ତି । ସୁଶାନ୍ତଙ୍କ ପିତା କେ.କେ ସିଂଙ୍କୁ ସମବେଦନା ଜଣାଇଥିବା ବେଳେ ସିଏମ ଖଟ୍ଟର କହିଛନ୍ତି ଯେ ସମଗ୍ର ମାମଲା ସିବିଆଇକୁ ହସ୍ତାନ୍ତର ହେବା ପରେ ସେ ବର୍ତ୍ତମାନ ନ୍ୟାୟ ପାଇବେ। ସୁଶାନ୍ତ ସିଂଙ୍କ ଭାଉଜ ଓପି ସିଂ ହେଉଛନ୍ତି ଫରିଦାବାଦର ପୋଲିସ କମିଶନର।

ସୁଶାନ୍ତ ସିଂ ଆତ୍ମହତ୍ୟା ମାମଲାରେ ମହାରାଷ୍ଟ୍ର ସରକାର ଶନିବାର ସୁପ୍ରିମକୋର୍ଟରେ ଏକ ଉତ୍ତର ଦାଖଲ କରିଛନ୍ତି । ଏଥିରେ ମହାରାଷ୍ଟ୍ର ସରକାର ସିବିଆଇ ତଦନ୍ତକୁ ବିରୋଧ କରିଛନ୍ତି । ମହାରାଷ୍ଟ୍ର ପୋଲିସ କହିଛି ଯେ ଯେତେବେଳେ ଏହି ମାମଲା ସୁପ୍ରିମକୋର୍ଟରେ ବିଚାରାଧୀନ ଅଛି, ସେତେବେଳେ ସିବିଆଇ ଏହି ମାମଲା ଦାୟର କରି ନଥାନ୍ତା କିମ୍ବା ତଦନ୍ତକାରୀ ଦଳ ଗଠନ କରି ଆଗକୁ ବଢ଼ିବା ଉଚିତ୍ ନୁହେଁ । ସୁପ୍ରିମକୋର୍ଟଙ୍କ ନିଷ୍ପତ୍ତି ପର୍ଯ୍ୟନ୍ତ ସିବିଆଇ ରହିବା ଉଚିତ୍ ବୋଲି ମୁମ୍ବାଇ ପୋଲିସ କହିଛି ।