କଂଗ୍ରେସ-ଚୀନ୍ କମ୍ୟୁନିଷ୍ଟ୍ ପାର୍ଟି ଚୁକ୍ତି ପ୍ରସଙ୍ଗ,ବିଜେପି ନିଶାନାରେ ଗାନ୍ଧି ପରିବାର
ନୂଆଦିଲ୍ଲୀ: କଂଗ୍ରେସ ପାର୍ଟି ଓ ଚୀନ୍ କମ୍ୟୁନିଷ୍ଟ୍ ପାର୍ଟି ମଧ୍ୟରେ ହୋଇଥିବା ଚୁକ୍ତିକୁ ନେଇ ବିଜେପି କଂଗ୍ରେସକୁ ଟାର୍ଗେଟ୍ କରିଛି ।ବିଜେପି ପଚାରିଛି କଂଗ୍ରେସ କ’ଣ ଲୁଚାଇବାକୁ ଚାହୁଁଛି ? ବିଜେପି ମୁଖପାତ୍ର ସମ୍ବିତ ପାତ୍ର କହିଛନ୍ତି ଯେ, କଂଗ୍ରେସ ଓ ଚୀନ୍ କମ୍ୟୁନିଷ୍ଟ୍ ପାର୍ଟି ମଧ୍ୟରେ ହୋଇଥିବା ଚୁକ୍ତିକୁ ନେଇ ସୁପ୍ରିମକୋର୍ଟ ମଧ୍ୟ ଆଶ୍ଚର୍ଯ୍ୟ ପ୍ରକଟ କରିଛନ୍ତି । ଆମ ପକ୍ଷକୁ ସିବିଆଇ ମଧ୍ୟ ଠିକ୍ ବୋଲି ଗ୍ରହଣ କରିଛନ୍ତି । ସୋନିଆ ଗାନ୍ଧି ଓ ରାହୁଲ ଗାନ୍ଧିଙ୍କ ଉପରେ ହମଲା କରି ପାତ୍ର କହିଛନ୍ତି ଯେ, ଚୀନ୍ ସହ ସମ୍ବନ୍ଧରେ ମା’ପୁଅ ସାମିଲ ଅଛନ୍ତି । ସେମାନେ ତଥ୍ୟକୁ ଲୁଚାଉଛନ୍ତି । ଅନ୍ୟପକ୍ଷରେ ଚୀନ୍ ପ୍ରସଙ୍ଗ ଉପରେ ସେ କହିଛନ୍ତି ଯେ, ଭାରତ ଏକ ଶକ୍ତିଶାଳୀ ଦେଶ ଓ ଏହା ଉତ୍ତର ଦେବାରେ ସକ୍ଷମ । କାହାରି ମନରେ ଏହାକୁ ନେଇ ସନ୍ଦେହ ରହିବା ଉଚିତ ନୁହେଁ ।
ଚୀନ୍ କମ୍ୟୁନିଷ୍ଟ ପାର୍ଟି ସହ କଂଗ୍ରେସ ୨୦୦୮ ମସିହାରେ ଏକ ଚୁକ୍ତି ସ୍ୱାକ୍ଷରିତ କରିଥିଲା । ଲଦାଖକୁ ନେଇ ଦୁଇ ଦେଶ ମଧ୍ୟରେ ବିବାଦ ସୃଷ୍ଟି ହେବା ପରେ ଏହି ପ୍ରସଙ୍ଗ ରାଜନୀତିର ମୁଖ୍ୟଧାରାକୁ ଆସିଥିଲା । ପରେ ଏହି ପ୍ରସଙ୍ଗ ସୁପ୍ରିମକୋର୍ଟରେ ପହଂଚିଥିଲା । ସୁପ୍ରିମକୋର୍ଟରେ ଆଜି ଏହାର ଶୁଣାଣି କାଳରେ ପ୍ରଧାନ ବିଚାରପତି ଏସଏ ବୋବଡେ କହିଥିଲେ ଯେ, କୌଣସି ରାଜନୈତିକ ଦଳ କେମିତି ଗୋଟିଏ ସରକାର ସହ ଚୁକ୍ତି କରିପାରିବ ?
ପ୍ରଧାନ ବିଚାରପତି କହିଥିଲେ ଯେ, କିଛି ଜିନିଶ ବିଲୁକୁଲ ଅଲଗା । ଗୋଟିଏ ରାଜନୈତିକ ଦଳ କେମିତି ଚୀନ୍ ସହ ଚୁକ୍ତି କରିପାରିବ ? କୌଣସି ସରକାର ଅନ୍ୟ ଗୋଟିଏ ଦେଶର ରାଜନୈତିକ ଦଳ ସହ ଚୁକ୍ତି କରିଥିବାର କେବେ ମଧ୍ୟ ଶୁଣିନଥିଲୁ । ଯଦିଓ ଓକିଲ ଯୁକ୍ତି ରଖିଥିଲେ ଯେ, ଏହି ଚୁକ୍ତି ଦୁଇଟି ଦଳ ମଧ୍ୟରେ ସ୍ୱାକ୍ଷରିତ ହୋଇଥିଲା ।
