କୋଲକାତା: ପଶ୍ଚିମବଙ୍ଗରେ ଲକ୍‌ଡାଉନ୍‌କୁ ୩୧ ଜୁଲାଇ ଯାଏଁ ବୃଦ୍ଧି କରିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ରାଜ୍ୟରେ ଲଗାତାରଭାବେ ବଢ଼ୁଥିବା କରୋନା ମାମଲାକୁ ଆଖିଆଗରେ ରଖି ଏଭଳି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ସ୍କୁଲ, କଲେଜକୁ ପୂର୍ବରୁ ହିଁ ୩୧ ଜୁଲାଇ ଯାଏଁ ବନ୍ଦ ଘୋଷଣା କରାଯାଇଥିଲା । ତେବେ ବୁଧବାର ଅନୁଷ୍ଠିତ ସର୍ବଦଳୀୟ ବୈଠକ ପରେ ଲକ୍‌ଡାଉନ୍‌ ବୃଦ୍ଧି ନେଇ ଘୋଷଣା କରିଛନ୍ତି ମମତା ।

ରାଜ୍ୟ ସରକାରଙ୍କ ପକ୍ଷରୁ କୁହାଯାଇଛି ଯେ, ସାମାଜିକ ଦୂରତ୍ୱ ସହିତ ଯେଉଁଭଳି ବର୍ତ୍ତମାନ କାମ ଚାଲିଛି ସେହିଭଳି ଆଗକୁ ମଧ୍ୟ ଜାରି ରହିବ । ଆଇସିଏମ୍‌ଆର ଗାଇଡଲାଇନ୍‌ ଅନୁଯାୟୀ ବର୍ତ୍ତମାନ କରୋନା ରୋଗୀଙ୍କୁ ଅଗ୍ରାଧିକାରୀଙ୍କ ଭିତ୍ତିରେ ଚିକିତ୍ସା କରାଯିବ । ବହୁ ଅଞ୍ଚଳରେ ଲୋକେ ଅନ୍ୟାନ୍ୟ ରୋଗରେ ମଧ୍ୟ ପୀଡ଼ିତ ଅଛନ୍ତି, ତଥାପି କରୋନା ରୋଗୀଙ୍କୁ ଅଗ୍ରାଧିକାର ଭିତ୍ତିରେ ଚିକିତ୍ସା କରାଯାଉଛି ।

            ରାଜ୍ୟରେ କରୋନା ମାମଲ ବଢ଼ୁଥିବା ବେଳେ ବୁଧବାର ସର୍ବଦଳୀୟ ବୈଠକ ଡକାଇଥିଲେ ମମତା । ତେବେ ପ୍ରଥମ ଥର ପାଇଁ ମମତା ସର୍ବଦଳୀୟ ବୈଠକ ଡକାଇଥିଲେ । ସୂଚନା ଯୋଗ୍ୟ ଯେ, ସାରା ଦେଶରେ ଏଯାବତ୍ କରୋନା ଯୋଗୁଁ ୪୬୫ ଜଣଙ୍କ ମୃତ୍ୟୁ ହୋଇଥିବା ବେଳେ ୨୪ ଘଣ୍ଟା ମଧ୍ୟରେ ୧୫ ହଜାର ୯୬୮ ଜଣଙ୍କ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଏଥିସହିତ ଦେଶରେ ମୋଟ କରୋନା ସଂକ୍ରମିତଙ୍କ ସଂଖ୍ୟା ୪ଲକ୍ଷ ୫୬ ହଜାର ୧୮୩ରେ ପହଞ୍ଚିଛି ।