ପ୍ରବାସୀ ଶ୍ରମିକଙ୍କୁ ପଠାଇବା ନେଇ ୧୫ ଦିନର ସମୟ ଦେଲେ ସୁପ୍ରିମକୋର୍ଟ
ନୂଆଦିଲ୍ଲୀ: ଫସିରହିଥିବା ସମସ୍ତ ପ୍ରବାସୀ ଶ୍ରମିକଙ୍କୁ ଘରକୁ ପଠାଇବାକୁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ଆସନ୍ତା ୧୫ ଦିନ ମଧ୍ୟରେ ଫସିରହିଥିବା ସମସ୍ତ ଶ୍ରମିକଙ୍କୁ ପଠାଇବାକୁ ସମୟ ଦେଇଛନ୍ତି ମାନ୍ୟବର କୋର୍ଟ । ଶୁକ୍ରବାର ଜଷ୍ଟିସ ଅଶୋକ ଭୂଷଣ, ଏସ୍.କେ କୋଲ୍ ଏବଂ ଏମଆର୍ ଶାହଙ୍କୁ ନେଇ ଗଠିତ ଖଣ୍ଡପୀଠ ପ୍ରବାସୀ ଶ୍ରମିକଙ୍କ ମାମଲାର ଶୁଣାଣି ବେଳେ ଏହି ନିର୍ଦ୍ଦେଶ ଦେଇଛନ୍ତି । ଭିଡିଓ କନ୍ଫରେନ୍ସିଂ ଜରିଆରେ ଚାଲିଥବା ଏହି ଶୁଣାଣିରେ ପ୍ରବାସୀଙ୍କୁ ପଠାଇବା ନେଇ ୧୫ ଦିନର ମହଲତ ଦେବା ସହ ସେମାନଙ୍କ ରେଜିଷ୍ଟ୍ରେସନ୍ ଏବଂ ନିଯୁକ୍ତି ଦେବା ନେଇ ଏକ ମେକାନିଜମ୍ ପ୍ରସ୍ତୁତ କରିବାକୁ ମଧ୍ୟ ନିର୍ଦ୍ଦେଶରେ କହିଛନ୍ତି ।
ତେବେ ଏଯାବତ୍ ମୋଟ ୧ କୋଟି ଶ୍ରମିକଙ୍କୁ ପଠାଯାଇଛି । ୪୧ ଲକ୍ଷ ଶ୍ରମିକଙ୍କୁ ସଡ଼କ ପଥରେ ଏବଂ ୫୭ ଲକ୍ଷ ପ୍ରବାସୀଙ୍କୁ ଟ୍ରେନ୍ ଜରିଆରେ ସେମାନଙ୍କୁ ଘରକୁ ପହଞ୍ଚାଯାଇଛି । ମୋଟ ୪୨୦୦ ଶ୍ରମିକ ସ୍ପେଶାଲ ଟ୍ରେନ୍ ଚଳାଚଳ କରିଛି । ତେବେ ଆଉ କେତେ ପ୍ରବାସୀ ଶ୍ରମିକ ଫେରିବାର ଅଛି ଏବଂ କେତେଟି ଟ୍ରେନ୍ର ଆବଶ୍ୟକତା ରହିଛି ସେ ନେଇ କେବଳ ରାଜ୍ୟ ସରକାରମାନେ ସୂଚନା ଦେଇପାରିବେ ବୋଲି ମାନ୍ୟବର କୋର୍ଟଙ୍କୁ କହିଛନ୍ତି ସଲିସିଟର ଜେନେରାଲ ତୁଷାର ମେହେଟ୍ଟା ।
