spot_img

Latest Posts

କାନାଡାରେ ୱାଲମାର୍ଟ ଷ୍ଟୋର ବାହାରେ ଡବଲ୍ ମର୍ଡର: ଗୁଳିକାଣ୍ଡରେ ୨ ଭାରତୀୟ ବଂଶୋଦ୍ଭବଙ୍କ ମୃତ୍ୟୁ

ନନ୍ଦିଘୋଷ ବ୍ୟୁରୋ: କାନାଡାରେ ଦୁଇ ଭାରତୀୟ ବଂଶୋଦ୍ଭବଙ୍କୁ ଗୁଳିକରି ହତ୍ୟା। ବ୍ରିଟିଶ କଲମ୍ବିଆର ସରେ ସହରସ୍ଥିତ ଏକ ୱାଲମାର୍ଟ ଷ୍ଟୋରର ପାର୍କିଂ ଅଞ୍ଚଳରେ ଏହି ଗୁଳିକାଣ୍ଡ ଘଟିଛି। ଏଥିରେ ୨୩ ବର୍ଷୀୟ ଗଗନପ୍ରୀତ (ଗ୍ୟାରି) ରେହାଲ ଏବଂ ୨୪ ବର୍ଷୀୟ ସୁଖଜିତ କୌରଙ୍କ ମୃତ୍ୟୁ ହୋଇଛି। ପୋଲିସର ପ୍ରାଥମିକ ତଦନ୍ତରୁ ଏହା ଏକ ଯୋଜନାବଦ୍ଧ ତଥା ଟାର୍ଗେଟେଡ୍ ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି। ଏହା ପଛରେ ସଂଗଠିତ ଅପରାଧର ସମ୍ପୃକ୍ତି ଥାଇପାରେ ବୋଲି ମଧ୍ୟ ତଦନ୍ତକାରୀ ଅଧିକାରୀ ଆଶଙ୍କା କରୁଛନ୍ତି।

ୱାଲମାର୍ଟ ପାର୍କିଂରେ ଗୁଳିକାଣ୍ଡ

ସୂଚନା ଅନୁଯାୟୀ, ନଭେମ୍ବର ୧୫ ତାରିଖ ରାତି ପ୍ରାୟ ୧୦ଟା ୩୮ ମିନିଟ୍ ସମୟରେ ସରେ ସହରର ଏକ ୱାଲମାର୍ଟ ଷ୍ଟୋର ପାର୍କିଂ ଅଞ୍ଚଳରେ ଦୁଇ ଜଣଙ୍କୁ ଗୁଳି କରାଯାଇଥିବା ନେଇ ପୋଲିସକୁ ସୂଚନା ମିଳିଥିଲା। ଖବର ପାଇ ସରେ ପୋଲିସ ସେବା ଏବଂ ବ୍ରିଟିଶ କଲମ୍ବିଆ ଜରୁରୀକାଳୀନ ସ୍ୱାସ୍ଥ୍ୟସେବା ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଉଭୟ ଆହତଙ୍କୁ ବଞ୍ଚାଇବା ପାଇଁ ଜରୁରୀକାଳୀନ କର୍ମଚାରୀମାନେ ଉଦ୍ୟମ କରିଥିଲେ। ପରେ ସେମାନଙ୍କୁ ହସ୍ପିଟାଲ ନିଆଯାଇଥିଲେ ମଧ୍ୟ ଚିକିତ୍ସାଧୀନ ଅବସ୍ଥାରେ ଉଭୟଙ୍କ ମୃତ୍ୟୁ ହୋଇଥିଲା। ପୋଲିସର ସୂଚନା ଅନୁସାରେ, ଉଭୟ ମୃତକ ପଡ଼ୋଶୀ ଡେଲଟା ଟାଉନସିପ୍ ଅଞ୍ଚଳର ବାସିନ୍ଦା ଥିଲେ।

ଜଣେ ଯୁବକଙ୍କ ନାଁରେ ପୂର୍ବରୁ ଅପରାଧିକ ରେକର୍ଡ

ହତ୍ୟା ମାମଲାର ତଦନ୍ତ କରୁଥିବା ଇଣ୍ଟିଗ୍ରେଟେଡ୍ ହୋମିସାଇଡ୍ ଇନଭେଷ୍ଟିଗେସନ୍ ଟିମ୍ (IHIT) ଅନୁଯାୟୀ, ଗଗନପ୍ରୀତ ରେହାଲଙ୍କ ନାମ ପୂର୍ବରୁ ଅସ୍ତ୍ରଶସ୍ତ୍ର ସମ୍ବନ୍ଧୀୟ ଅପରାଧ ମାମଲାରେ ପୋଲିସ ରେକର୍ଡରେ ରହିଥିଲା। ଅନ୍ୟପଟେ ସୁଖଜିତ କୌରଙ୍କର କାନାଡାରେ ସୀମିତ ପରିଚିତି ଓ ସାମାଜିକ ସମ୍ପର୍କ ଥିବା ତଦନ୍ତକାରୀମାନେ କହିଛନ୍ତି। IHITର ମୁଖପାତ୍ର ସର୍ଜେଣ୍ଟ ଫ୍ରେଡା ଫଙ୍ଗ କହିଛନ୍ତି ଯେ, ଏହି ଗୁଳିକାଣ୍ଡରେ ଦୁଇଟି ପରିବାର ନିଜ ପ୍ରିୟଜନଙ୍କୁ ହରାଇ ଗଭୀର ଦୁଃଖରେ ଅଛନ୍ତି। ହତ୍ୟା ପଛର କାରଣ ଏବଂ ଏଥିରେ ସମ୍ପୃକ୍ତ ଅପରାଧୀଙ୍କୁ ଚିହ୍ନଟ କରିବା ପାଇଁ ପୋଲିସ ସମସ୍ତ ଉପଲବ୍ଧ ସୁରାକ ଆଧାରରେ ତଦନ୍ତ କରୁଛି।

ଗୁଳିକାଣ୍ଡର ୧୫ ମିନିଟ୍ ପରେ ଜଳିଗଲା କାର୍

ଏହି ଡବଲ୍ ମର୍ଡର ଘଟଣାର ପ୍ରାୟ ୧୫ ମିନିଟ୍ ପରେ ସେହି ଅଞ୍ଚଳରେ ଆଉ ଏକ ଗାଡ଼ିରେ ନିଆଁ ଲାଗିଥିବା ନେଇ ପୋଲିସକୁ ଖବର ମିଳିଥିଲା। ଘଟଣାସ୍ଥଳରେ ପୋଲିସ ଏକ ପୋଡ଼ିଯାଇଥିବା ଚାରି ଦ୍ୱାର ବିଶିଷ୍ଟ ସେଡାନ୍ କାର୍ ଠାବ କରିଥିଲା। ଏହି କାର୍‌ରେ କେଉଁମାନେ ଥିଲେ ଏବଂ ନିଆଁ ଲାଗିବା ପରେ ସେମାନେ କେଉଁଆଡ଼େ ଫେରାର ହୋଇଛନ୍ତି, ସେନେଇ ପୋଲିସ ଖୋଳତାଡ଼ କରୁଛି। ତେବେ ଜଳିଯାଇଥିବା କାର୍‌ର ଏହି ଘଟଣା ଦୁଇ ଜଣଙ୍କ ହତ୍ୟାକାଣ୍ଡ ସହ ଜଡ଼ିତ କି ନାହିଁ, ତାହା ଏଯାଏଁ ସ୍ପଷ୍ଟ ହୋଇନାହିଁ। ପୋଲିସ ମଧ୍ୟ ଏହି ଦୁଇଟି ଘଟଣା ମଧ୍ୟରେ କୌଣସି ସିଧାସଳଖ ସମ୍ପର୍କ ଥିବା ନେଇ ନିଶ୍ଚିତ କରିନାହିଁ। ବର୍ତ୍ତମାନ ହତ୍ୟା ତଦନ୍ତକାରୀ ଟିମ୍ ଗୁଳିକାଣ୍ଡର ପ୍ରକୃତ କାରଣ ଖୋଜୁଥିବା ବେଳେ ପୋଲିସ ଜଳିଯାଇଥିବା କାର୍ ଓ ସେଥିରେ ଥିବା ସନ୍ଦିଗ୍ଧଙ୍କ ସମ୍ପର୍କରେ ତଥ୍ୟ ସଂଗ୍ରହ କରୁଛି। ଦୁଇ ଭାରତୀୟ ବଂଶୋଦ୍ଭବଙ୍କୁ କାହିଁକି ଟାର୍ଗେଟ୍ କରାଗଲା ଏବଂ ଏହି ହତ୍ୟା ପଛରେ କାହାର ହାତ ରହିଛି, ତାହା ତଦନ୍ତ ପରେ ସ୍ପଷ୍ଟ ହେବ।

Latest Posts

Don't Miss