ବରୀ: ଚାଷୀଙ୍କୁ ଚିନାବାଦାମ ଚାଷ ଚିନ୍ତା। ମିଳୁନି ସରକାରୀ ବିହନ। କିଭଳି ପରିବାର ପ୍ରତିପୋଷଣ କରିବେ ଘାରିଛି ଟେନସନ। ଚଳିତ ବର୍ଷ ବନ୍ୟାରେ ଯାଜପୁର ବରୀ ବ୍ଲକର ଅନେକ ଚାଷୀଙ୍କ ଧାନ ଫସଲ ନଷ୍ଟ ହୋଇଥିଲା। ଫଳରେ ଚାଷୀଙ୍କ ଆର୍ଥିକ ମେରୁଦଣ୍ଡ ଭାଙ୍ଗିଯାଇଥିଲା। ରବି ଋତୁରେ ଚିନାବାଦାମ ଚାଷ କରି ଗୁଜୁରାଣ ମେଣ୍ଟାଇବାକୁ ଆଶା ରଖିଥିଲେ ଚାଷୀ। ହେଲେ ଚିନାବାଦାମ ଚାଷ ପାଇଁ ସରକାରୀ ବିହନ ବଣ୍ଟନକୁ ନେଇ ଦେଖାଦେଇଛି ଅସନ୍ତୋଷ। ଅନେକ ଚାଷୀଙ୍କୁ ବିହନ ମିଳିନଥିବା ଅଭିଯୋଗ ହୋଇଛି। ଧାନ ଫସଲ ନଷ୍ଟ ଯୋଗୁଁ କ୍ଷତି ସହିଥିବା ଚାଷୀ ଏବେ କିପରି ନିଜ ଖର୍ଚ୍ଚରୁ ବିହନ କିଣିବେ ତାକୁ ନେଇ ମୁଣ୍ଡରେ ହାତ ଦେଇବସିଛନ୍ତି।
ବରୀ ବ୍ଲକର କିଛି ହାତଗଣତି ପଞ୍ଚାୟତକୁ ସରକାରୀ ବାଦାମ ବିହନ ଯୋଗାଇ ଦିଆଯାଇଛି। ହେଲେ ରତଳାଙ୍ଗ ସମେତ ଅନେକ ପଞ୍ଚାୟତର ଚାଷୀଙ୍କୁ କୌଣସି ବିହନ ମିଳିନଥିବା ଅଭିଯୋଗ ହୋଇଛି। ଏନେଇ ଚାଷୀମାନେ ପ୍ରଥମେ ବ୍ଲକ କୃଷି ଅଧିକାରୀ ଓ ପରେ ଜିଲ୍ଲାପାଳଙ୍କୁ ଭେଟି ଦାବି ଜଣାଇଛନ୍ତି। ସେପଟେ ବରୀ ବ୍ଲକରେ ଚିନାବାଦାମ ଚାଷ ପାଇଁ ଯେତିକି ମାତ୍ରାରେ ବିହନର ଆବଶ୍ୟକତା ରହିଛି, ସରକାରଙ୍କ ପକ୍ଷରୁ ସେତେ ପରିମାଣର ବିହନ ଯୋଗାଇ ଦିଆଯାଇନାହିଁ। ତେଣୁ ସମସ୍ତ ଚାଷୀଙ୍କୁ ବିହନ ଯୋଗାଇବା ସମ୍ଭବ ହେଉନାହିଁ ବୋଲି ବ୍ଲକ କୃଷି ଅଧିକାରୀ କହିଛନ୍ତି।
ଚୀନାବାଦାମ ଚାଷ ପାଇଁ ଚାଷୀଙ୍କୁ ସରକାରୀ ବିହନ ମିଳିବ ତ? ନା ନିଜ ଖର୍ଚ୍ଚରୁ ବିହନ କିଣି ପୁଣି ଆର୍ଥିକ କ୍ଷତି ସହିବେ ଚାଷୀ? ତା ଉପରେ ନଜର।

