spot_img

Latest Posts

ଆନ୍ଧ୍ର ନୁହେଁ, ଓଡ଼ିଶା ମୁହାଁ ବାତ୍ୟା! ଗୋପାଳପୁର ନିକଟରେ ଲ୍ୟାଣ୍ଡଫଲ୍ ଆଶଙ୍କା

ନନ୍ଦିଘୋଷ ବ୍ୟୁରୋ: ବାତ୍ୟା ନେଇ ଆସିଲା ବଡ ଅପଡେଟ । ଆନ୍ଧ୍ର ନୁହେଁ ଓଡ଼ିଶାରେ କରିପାରେ ଲ୍ୟାଣ୍ଡଫଲ । ଗୋପାଳପୁର ନିକଟରେ କାଲି ମଧ୍ୟାହ୍ନରେ ଲ୍ୟାଣ୍ଡଫଲ ହେବା ନେଇ ସମ୍ଭାବନା ରହିଛି । ଏବେ ୧୫ କିମି ବେଗରେ ଗତି କରୁଛି ବାତ୍ୟା ଆକୱାନ  ।

ସୂଚନାଯୋଗ୍ୟ, ଆଗାମୀ ୨୦ ଘଣ୍ଟାରେ ଦ୍ରୁତ ଗତିରେ ସ୍ଥଳ ଭାଗ ମୁହାଁ ହେବ ବାତ୍ୟା । ଉପକୂଳମୁହାଁ ବେଳେ ସାମାନ୍ୟ ଦୁର୍ବଳ ହେବାର ସମ୍ଭାବନା ରହିଛି । ଏହି ସମୟରେ ପବନର ବେଗ ୭୦ରୁ ୮୦ କିମି ରହିବା ନେଇ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି । ଅତି ବେଶୀରେ ୧୦୦ କିମି ଝଟକା ପବନ ହେବା ସମ୍ଭାବନା ରହିଛି । ବାତ୍ୟା ବର୍ତ୍ତମାନ କଳିଙ୍ଗପଟନମ ଠାରୁ ୪୦୦ କିମି, ଗୋପାଳପୁର ଠାରୁ ୪୯୦ କିମି ଓ ପୁରୀ ଠାରୁ ୫୫୦ କିମି ଦୂରରେ ଅବସ୍ଥିତ । ବାତ୍ୟା ପ୍ରଭାବରେ ଭୁବନେଶ୍ବର ସମେତ ବିଭିନ୍ନ ସ୍ଥାନରେ ବର୍ଷା ଜାରି ରହିଛି।

ସେପଟେ ପ୍ରବଳରୁ ଅତି ଭୀଷଣ ବର୍ଷା ପାଇଁ ୬ ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରାଯାଇଛି। ଗଜପତି, ଗଞ୍ଜାମ, କନ୍ଧମାଳ, ପୁରୀ, ଜଗତସିଂହପୁର ଓ କେନ୍ଦ୍ରାପଡ଼ାକୁ ରେଡ୍ ୱାର୍ଣ୍ଣିଂ ଜାରି କରାଯାଇଛି। ଏହି ସବୁ ଜିଲ୍ଲାରେ ୨୦ ସେଣ୍ଟିମିଟରରୁ ଅଧିକ ବର୍ଷା ହୋଇପାରେ।  ସେହିପରି ୧୦ ଜିଲ୍ଲା- ମୟୂରଭଞ୍ଜ, ଭଦ୍ରକ, ବାଲେଶ୍ୱର, ଯାଜପୁର, କଟକ, ଖୋର୍ଦ୍ଧା, ନୟାଗଡ, ରାୟଗଡ଼ା, କୋରାପୁଟ ଓ ମାଲକାନଗିରି ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି। ୬ ଜିଲ୍ଲା- କେନ୍ଦୁଝର, ଅନୁଗୁଳ, ଢେଙ୍କାନାଳ, ବୌଦ୍ଧ, କଳାହାଣ୍ଡି ଓ ନବରଙ୍ଗପୁରକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। ୨୦ ତାରିଖ ପାଇଁ ୬ ଜିଲ୍ଲାକୁ ରେଡ୍ ୱାର୍ଣ୍ଣିଂ ଓ ୧୦ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି ।

ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ରହିଛି ଭୀଷଣ ବାତ୍ୟା ଆକୱାନ। ଉତ୍ତର ଦିଗକୁ ମୁହାଁଇ ଓଡ଼ିଶା ଉପକୂଳ ଆଡ଼କୁ ଅଗ୍ରସର ହେଉଛି ବାତ୍ୟା। ବିଶେଷକରି, ପାହାଡ଼ିଆ ଅଞ୍ଚଳରେ ଭୂସ୍ଖଳନ ଆଶଙ୍କା ରହିଛି। ଜୋର୍‌ରେ ପବନ ବହିଲେ ଗଛ ଉପୁଡ଼ିବା ସହ ମାଟି ଘର ଓ ଆଜବେଷ୍ଟସ୍ ଘର କ୍ଷତିଗ୍ରସ୍ତ ହେବାର ଆଶଙ୍କା ରହିଛି। ବାତ୍ୟାର ଗତିପଥ ଓ ତୀବ୍ରତା ଉପରେ ନଜର ରଖିଛି ପାଣିପାଗ ବିଭାଗ। ବୁଢ଼ାବଳଙ୍ଗ, ସୁବର୍ଣ୍ଣରେଖା ସହିତ ସବୁ ନଦୀରେ ଜଳସ୍ତର ବଢୁଛି। ସହରିଆ ଅଞ୍ଚଳରେ ଜଳବନ୍ଦୀ ସମସ୍ୟା ଦେଖା ଦେଇପାରେ।

Latest Posts

Don't Miss