spot_img

Latest Posts

ଭୋଗରାଇରେ ବିଜେଡିର ଜନସମ୍ପର୍କ ପଦଯାତ୍ରା, ଯୋଗଦେବେ ସୁଜାତା କାର୍ତ୍ତିକେୟନ

ନନ୍ଦିଘୋଷ ବ୍ୟୁରୋ:ବାଲେଶ୍ୱର ଜିଲ୍ଲା ଭୋଗରାଇରେ ଆଜି ବିଜେଡିର ଜନସମ୍ପର୍କ ପଦଯାତ୍ରା ଓ ଦଳ ପକ୍ଷରୁ ଆୟୋଜିତ ହେଉଛି ବିଭିନ୍ନ କାର୍ଯ୍ୟକ୍ରମ । ମାନ୍ୟବର ପୂର୍ବତନ ମୁଖ୍ଯମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଏଥିରେ ଯୋଗଦେବେ ବରିଷ୍ଠ ବିଜେଡି ନେତ୍ରୀ ସୁଜାତା ରାଉତ କାର୍ତ୍ତିକେୟନ । ଗତକାଲି ସନ୍ଧ୍ୟାରେ ଭୋଗରାଇରେ ପହଞ୍ଚିବା ପରେ ତାଳସାରୀ ସ୍ଥିତ ଓଟିଡିସି ପାନ୍ଥନିବାସରେ ରାତ୍ରିଯାପନ କରିଥିଲେ । ବାଲେଶ୍ୱର ବିଜେଡି ପକ୍ଷରୁ ଜିଲ୍ଲା ସଭାପତି ଜ୍ୟୋତି ପାଣିଗ୍ରାହୀ, ଭୋଗରାଇ ବିଧାୟକ ଗୌତମବୁଦ୍ଧ ଦାସ, ଜଳେଶ୍ୱର ବିଧାୟକ ଅଶ୍ୱିନୀ ପାତ୍ର, ବରିଷ୍ଠ ନେତ୍ରୀ ଲେଖାଶ୍ରୀ ସାମନ୍ତସିଂହାର, ନୀଳଗିରିର ପୂର୍ବତନ ବିଧାୟକ ସୁକାନ୍ତ ନାୟକ, ରେମୁଣାର ପୂର୍ବତନ ବିଧାୟକ ସୁଧାଂଶୁ ପରିଡ଼ା, ଯୁବ ବିଜେଡି ସଭାପତି ଚିନ୍ମୟ ସାହୁ ଏବଂ ଛାତ୍ର ବିଜେଡି ସଭାପତି ଇପ୍ସିତା ସାହୁଙ୍କ ସମେତ ଦଳର ଅନେକ ନେତା ଓ କର୍ମୀ ତାଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଜଣାଇଥିଲେ ।

ଆଜି ସକାଳ ୭ଟା ୩୦ ମିନିଟରେ ସେ ପ୍ରଥମେ ପ୍ରସିଦ୍ଧ ଚନ୍ଦନେଶ୍ୱର ମନ୍ଦିରକୁ ଯାଇ ଦେବଦର୍ଶନ କରିବା ପରେ ପୁନର୍ବାର ପାନ୍ଥନିବାସକୁ ଫେରିଆସିବେ । ଏହାପରେ ସକାଳ ୧୦ଟା ସମୟରେ ଥାନା ଛକ ସ୍ଥିତ ହନୁମାନ ମନ୍ଦିର ନିକଟକୁ ଯାଇ ପଦଯାତ୍ରା କାର୍ଯ୍ୟକ୍ରମରେ ଯୋଗଦେବା ସହ ସକାଳ ୧୦ଟା ୩୦ ମିନିଟରେ ବିଜେଡି ପଦଯାତ୍ରାରେ ଅଂଶଗ୍ରହଣ କରିବେ । ପଦଯାତ୍ରା ଶେଷ ହେବା ପରେ ସକାଳ ୧୧ଟା ସମୟରେ ସେ ହେଲିପ୍ୟାଡ୍ ପଡ଼ିଆଠାରେ ଆୟୋଜିତ ସାଧାରଣ ସଭାସ୍ଥଳରେ ପହଞ୍ଚିବେ ଏବଂ ସକାଳ ୧୧ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଉକ୍ତ ସାଧାରଣ ସଭାରେ ଯୋଗଦେଇ ଉପସ୍ଥିତ ଜନସାଧାରଣଙ୍କୁ ସମ୍ବୋଧିତ କରିବେ। ସଭା କାର୍ଯ୍ୟକ୍ରମ ପରେ ଅପରାହ୍ନ ୧ଟା ସମୟରେ ସେ ବାଟଗ୍ରାମ ରାଜସ୍ୱ ଡାକବଙ୍ଗଳା ଅଭିମୁଖେ ଯାତ୍ରା କରିବେ ଏବଂ ସେଠାରେ ଅପରାହ୍ନ ୧ଟା ୪୫ ମିନିଟରେ ବାଲେଶ୍ୱର ଜିଲ୍ଲାର ଯୁବ ଓ ଛାତ୍ର ନେତୃବୃନ୍ଦଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବେ । ତତ୍ପରେ ଅପରାହ୍ନ ୨ଟା ୧୫ ମିନିଟରେ ସେ ଭୋଗରାଇରୁ ବାହାରି ଜଳେଶ୍ୱର ଅଭିମୁଖେ ଯାତ୍ରା କରିବେ ଏବଂ ଅପରାହ୍ନ ୩ଟା ସମୟରେ ଜଳେଶ୍ୱରରେ ପହଞ୍ଚି ଜାତୀୟ ରାଜପଥ ଓ ପଶ୍ଚିମବାର୍ଡ ରାସ୍ତା ଦେଇ ବର୍ତ୍ତନା ଗ୍ରାମ ପଞ୍ଚାୟତସ୍ଥିତ ପୀଡ଼ିତଙ୍କ ବାସଭବନକୁ ଯିବେ । ଶେଷରେ ସମସ୍ତ ନିର୍ଦ୍ଧାରିତ କାର୍ଯ୍ୟକ୍ରମ ସମାପ୍ତ କରି ଅପରାହ୍ନ ୩ଟା ୩୦ ମିନିଟରେ ସେ ଜଳେଶ୍ୱରରୁ ଭୁବନେଶ୍ୱର ଅଭିମୁଖେ ପ୍ରତ୍ୟାବର୍ତ୍ତନ କରିବାର କାର୍ଯ୍ୟକ୍ରମ ରହିଛି ।

Latest Posts

Don't Miss