ନନ୍ଦିଘୋଷ ବ୍ୟୁରୋ: ବଳ ଗୋଟାଉଛି ବାତ୍ୟା ଆକୱାନ । ଆଜି ଅବପାତରେ ପରିଣତ ହୋଇଛି ଲଘୁଚାପ । ଆସନ୍ତାକାଲି ସୁଦ୍ଧା ଏହା ବାତ୍ୟା ରୂପ ନେବା ସମ୍ଭାବନା ରହିଛି । ଏହାପରେ ୧୭ ତାରିଖରେ ଭୀଷଣ ଓ ୧୯ରେ ଅତି ଭୀଷଣ ବାତ୍ୟା ରୂପ ନେଇ ଆନ୍ଧ୍ର ଉପକୂଳରେ ସ୍ଥଳଭାଗ ଅତିକ୍ରମ କରିବା ଆଶଂକା ରହିଛି । ତେବେ ଏହା କେଉଁଠି ଲ୍ୟାଣ୍ଡଫଲ କରିବ ସେନେଇ ସ୍ପଷ୍ଟ କରିନି IMD । ଏବେ ବଙ୍ଗୋପସାଗରରେ ୧୦ କିଲୋମିଟର ବେଗରେ ଆଗକୁ ବଢୁଛି ଅବପାତ ।
ସ୍ଥଳଭାଗ ଛୁଇଁବା ବେଳକୁ ୧୨୦ କିଲୋମିଟ ରୁ ୧୩୦ କିଲୋମିଟର ବେଗରେ ପବନ ବହିବା ସମ୍ଭାବନା ରହିଛି । ଝଟକା ପବନର ବେଗ ୧୪୫ କିମି ଛୁଇଁବା ନେଇ ଆକଳନ କରିଛି ପାଣିପାଗ କେନ୍ଦ୍ର । ବାତ୍ୟା ସୃଷ୍ଟି ହେଲେ ଏହାର ନାମ ରହିବ ଆକୱାନ । ରାଜ୍ଯରେ ୧୭ ତାରିଖ ଯାଏଁ ଶୁଖିଲା ପାଗ ଥିବାବେଳେ ବାତ୍ୟା ପ୍ରଭାବରେ ଦକ୍ଷିଣ ଓ ଉପକୂଳ ଓ ଅଭ୍ୟନ୍ତରୀଣ ଓଡ଼ିଶାରେ ୧୮ ରୁ ୨୦ ଯାଏଁ ବର୍ଷା ନେଇ ସତର୍କତା ଜାରି କରାଯାଇଛି । ଗଞ୍ଜାମ, ଗଜପତି, ପୁରୀ ଓ ଖୋର୍ଦ୍ଧାରେ ପ୍ରବଳରୁ ଅତି ପ୍ରବଳ ବର୍ଷା ନେଇ ୧୮ ରୁ ୨୦ ଯାଏ ଅରେଞ୍ଜ ୱାର୍ଣ୍ଣି ଜାରି କରାଯାଇଛି । ୨୧ରେ ପଶ୍ଚିମ ଓଡ଼ିଶାରେ ପ୍ରବଳ ବର୍ଷା ହେବା ସମ୍ଭାବନା ରହିଛି ।
