ନନ୍ଦିଘୋଷ ବ୍ୟୁରୋ : ଡବଲ ଇଞ୍ଜିନ ସରକାରରେ ଅସୁରକ୍ଷିତ ଆଦିବାସୀ ! ସୁନ୍ଦରଗଡ଼ ଜିଲ୍ଲା କୋଇଡା ବ୍ଲକ ଝାରବେଡା ଗ୍ରାମର ପାତୁ ମୁଣ୍ଡାଙ୍କୁ ବଜରଙ୍ଗ ଦଳର କର୍ମୀ ଆକ୍ରମଣ କରିବା ଘଟଣାରେ ସ୍ଥିତି ପରଖିଛନ୍ତି ବିଜୁ ଜନତା ଦଳ ଅନୁସୂଚିତ ଜନଜାତି ସେଲର ପ୍ରତିନିଧି। ପୂର୍ବତନ ମନ୍ତ୍ରୀ ସୁଦାମ ମାର୍ଣ୍ଡିଙ୍କ ନେତୃତ୍ୱରେ ପୂର୍ବତନ ସାଂସଦ ନିରଞ୍ଜନ ବିଶି, ବିଧାୟକ ଯୋଗେଶ ସିଂ, ବିଧାୟକ ରୋହିତ ଯୋଶେଫ ତିର୍କି, ଵିଜେଡି ରାଜ୍ୟ ଗଣମାଧ୍ୟମ ସଂଯୋଜକ ପ୍ରିୟବ୍ରତ ମାଝିଙ୍କ ସହ ଅନ୍ୟାନ୍ୟ ନେତା କରିଛନ୍ତି ସ୍ଥିତି ଅନୁଧ୍ୟାନ। ଗତ ୧ ତାରିଖରେ ପାତୁ ମୁଣ୍ଡା ଚାଷ କାର୍ଯ୍ୟ ପାଇଁ ଗୋରୁ ନେଇ ଘରକୁ ଫେରୁଥିବା ବେଳେ ତାଙ୍କୁ ଆକ୍ରମଣ କରିଥିଲେ ବଜରଙ୍ଗ ଦଳର କର୍ମୀ। ଏହି ଘଟଣାରେ ଦୃଢ଼ କାର୍ଯ୍ଯାନୁଷ୍ଠାନ ଦାବି କରିଛି ଦଳ।
ବଲ ଇଞ୍ଜିନ ସରକାର କ୍ଷମତାକୁ ଆସିବା ପରେ ରାଜ୍ୟର ବିଭିନ୍ନ ସ୍ଥାନରେ ଆଦିବାସୀଙ୍କ ଉପରେ ନିର୍ଯ୍ୟାତନା ଓ ଆକ୍ରମଣ ଘଟଣା ବୃଦ୍ଧି ପାଇଛି। ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ଆଦିବାସୀଙ୍କ ପୂଜାସ୍ଥଳୀରେ ଆକ୍ରମଣ କରାଯିବା ଘଟଣାକୁ ବିଭିନ୍ନ ମହଲରେ ନିନ୍ଦା କରାଯିବା ସହ ବିଜେଡି ପ୍ରତିନିଧି ଦଳ ଘଟଣାସ୍ଥଳ ପରିଦର୍ଶନ କରିଥିଲେ। ଗତ ମାସ ୨୩ ତାରିଖରେ ଘସିପୁରା ଥାନା ବସନ୍ତପୁରା ଗାଁରେ ସାନ୍ତାଳ ସମ୍ପ୍ରଦାୟର ପବିତ୍ର ପୂଜାସ୍ଥଳୀ ଜାହେର ଥାନ୍ ରେ କିଛି ଦୁର୍ବୃତ୍ତ ଆକ୍ରମଣ କରିଥିବା ଅଭିଯୋଗ ହୋଇଥିଲା । ବିଜୁ ଜନତା ଦଳର ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ନିର୍ଦ୍ଦେଶକ୍ରମେ ପୂର୍ବତନ ମନ୍ତ୍ରୀ ତଥା ଵିଜେଡି ଆଦିବାସୀ ସେଲ ସଭାପତି ସୁଦାମ ମାର୍ଣ୍ଡିଙ୍କ ନେତୃତ୍ୱରେ ଏକ ପ୍ରତିନିଧି ଦଳ ସେହି ଗ୍ରାମ ପରିଦର୍ଶନ କରିଥିଲେ। ଆଦିବାସୀଙ୍କ ଉପରେ ଆକ୍ରମଣ ଓ ନିର୍ଯାତନା ଘଟଣା ବୃଦ୍ଧି ପାଉଥିବାରୁ ଆଦିବାସୀଙ୍କ ସୁରକ୍ଷା ପାଇଁ ଵିଜେଡି କାର୍ଯ୍ୟ କରିବ ବୋଲି ଦଳ ପକ୍ଷରୁ କୁହାଯାଇଛି।
