ନନ୍ଦିଘୋଷ ବ୍ୟୁରୋ: ଆସନ୍ତା ଡିସେମ୍ବରରେ ବାଂଲାଦେଶ ଫେରିବାକୁ ଯୋଜନା କରୁଛନ୍ତି ପୂର୍ବତନ ପ୍ରଧନମନ୍ତ୍ରୀ ଶେଖ ହସିନା। ମାତ୍ର ତାଙ୍କ ନିରାପତ୍ତା ପ୍ରସଙ୍ଗରେ ଉଦବେଗ ପ୍ରକାଶ କରିଛି ଭାରତ। ଢାକାଠାରୁ ନିର୍ଦ୍ଦିଷ୍ଟ ଗ୍ୟାରେଣ୍ଟି ପାଇବା ପରେ ହିଁ ତାଙ୍କ ବାଂଲାଦେଶ ଗସ୍ତକୁ ନିଶ୍ଚିତ କରାଯିବ ବୋଲି କହିଛି ଭାରତ। ଆୱାମି ଲିଗ ନେତ୍ରୀଙ୍କ ନିରାପତ୍ତା, ନ୍ୟାୟ ଲାଗି ଗ୍ୟାରେଣ୍ଟିକୁ ଭାରତ ଅଗ୍ରାଧିକାର ଦେବ ବୋଲି କୁହାଯାଇଛି।
ଭାରତ ଚାହୁଁଛି ହାସିନାଙ୍କ ଲାଗି ବାଂଲାଦେଶ ଏକ ସାମରିକ ବିମାନ ପଠାଉ। ଦ୍ବିତୀୟତଃ ହାସିନାଙ୍କୁ ନ୍ୟାୟ ମିଳିବା ଲାଗି ଗ୍ୟାରେଣ୍ଟି ଦିଆଯାଉ। ପ୍ରଥମ ସର୍ତ୍ତ ହେଉଛି, ଯେଉଁଭଳି ଭାବରେ ୨୦୨୪ ଅଗଷ୍ଟ ୫ ତାରିଖରେ ବାଂଲାଦେଶର ସାମରିକ ବିମାନରେ ହସିନା ଭାରତ ଆସିଥିଲେ, ସେହିଭଳି ତାଙ୍କୁ ଫେରାଇ ନେବାର ଦାୟିତ୍ୱ ମଧ୍ୟ ବାଂଲାଦେଶ ସେନା ନେଉ। ଏଥିପାଇଁ ବାଂଲାଦେଶ ସେନା ଦିଲ୍ଲୀକୁ ନିଜର ସାମରିକ ବିମାନ ପଠାଇପାରେ କିମ୍ବା ସ୍ଥଳପଥରେ ନିର୍ଦ୍ଧାରିତ ସୀମାନ୍ତ ଅଞ୍ଚଳରେ ତାଙ୍କୁ ଗ୍ରହଣ କରିପାରେ। ଅର୍ଥାତ୍ ହସିନାଙ୍କ ଫେରିବା ପ୍ରକ୍ରିୟାରେ ବାଂଲାଦେଶ ସେନାର ଭୂମିକା ରହିବା ନେଇ ଦିଲ୍ଲୀ ପକ୍ଷରୁ ସଙ୍କେତ ଦିଆଯାଇଥିବା ରିପୋର୍ଟରେ ଉଲ୍ଲେଖ ରହିଛି।
ଦ୍ୱିତୀୟ ସର୍ତ୍ତଟି ଆହୁରି ଗୁରୁତ୍ୱପୂର୍ଣ୍ଣ। ହସିନାଙ୍କୁ ବାଂଲାଦେଶରେ ନ୍ୟାୟିକ ପ୍ରକ୍ରିୟାରେ ନିଜ ପକ୍ଷ ରଖିବାର ସୁଯୋଗ ମିଳୁ। ତାଙ୍କ ବିରୋଧରେ ଘୋଷିତ ମୃତ୍ୟୁଦଣ୍ଡକୁ ଅପିଲ୍ କରିବାର ସୁଯୋଗ ଦିଆଯାଉ ଏବଂ ୨୦୨୪ ଜୁଲାଇ ଆନ୍ଦୋଳନ ସମୟରେ ଘଟିଥିବା ହିଂସା ଓ ହତ୍ୟା ଅଭିଯୋଗ ସମ୍ପର୍କିତ ମାମଲାରେ ନୂଆ କରି ନ୍ୟାୟିକ ବିଚାର ପ୍ରକ୍ରିୟା ହେଉ। ଏହା ସହିତ ବିଚାର ପ୍ରକ୍ରିୟା ନିରପେକ୍ଷ ଓ ସ୍ୱଚ୍ଛ ହେବା ଏବଂ ଅନ୍ତର୍ଜାତୀୟ ସମୁଦାୟ ଓ ଗଣମାଧ୍ୟମର ନଜରରେ ରହିବା ନେଇ ମଧ୍ୟ ଭାରତର ଚିନ୍ତା ଥିବା ରିପୋର୍ଟରେ କୁହାଯାଇଛି।
