ନନ୍ଦିଘୋଷ ବ୍ୟୁରୋ: ବିଶ୍ୱ ରାଜନୀତିରେ ଏବେ ଏସିଆର ଭୂମିକା ବେଶ୍ ଗୁରୁତ୍ୱପୂର୍ଣ୍ଣ। ଆଉ ଏହି ସମୟରେ ଏକାଠି ହେବାକୁ ଯାଉଛନ୍ତି ବିଶ୍ୱର ପ୍ରମୁଖ ରାଷ୍ଟ୍ରନେତା। ଫିଲିପାଇନ୍ସର ରାଜଧାନୀ ମାନିଲାରେ ଆୟୋଜିତ ହେବ ୪୯ତମ ଆସିଆନ୍ ସମ୍ମିଟ୍। ନଭେମ୍ବର ୧୫ରୁ ୧୭ ତାରିଖ ଯାଏଁ ଚାଲିବ ଏହି ଗୁରୁତ୍ୱପୂର୍ଣ୍ଣ ଶିଖର ସମ୍ମିଳନୀ। ଏଥିରେ ଦକ୍ଷିଣ-ପୂର୍ବ ଏସିଆର ୧୧ଟି ସଦସ୍ୟ ରାଷ୍ଟ୍ରର ନେତାଙ୍କ ସମେତ ବିଭିନ୍ନ ପ୍ରମୁଖ ଦେଶ ଓ ଅନ୍ତର୍ଜାତୀୟ ସଂଗଠନର ପ୍ରତିନିଧି ଯୋଗଦେବେ। ଏହି ସମ୍ମିଳନୀରେ ପ୍ରାୟ ୧୯ ଜଣ ବିଶ୍ୱସ୍ତରୀୟ ନେତା ଓ ସଂସ୍ଥାର ମୁଖ୍ୟଙ୍କ ଯୋଗଦାନ ଆଶା କରାଯାଉଛି। ଚଳିତ ବର୍ଷ ଫିଲିପାଇନ୍ସ ଆସିଆନ୍ର ଅଧ୍ୟକ୍ଷତା କରୁଥିବା ବେଳେ ଏହି ସମ୍ମିଳନୀର ଥିମ୍ ରହିଛି— ‘Navigating Our Future, Together’ ଅର୍ଥାତ୍ ଏକାଠି ହୋଇ ଭବିଷ୍ୟତର ପଥ ନିର୍ଦ୍ଧାରଣ। ଆଞ୍ଚଳିକ ଶାନ୍ତି, ସୁରକ୍ଷା, ଅର୍ଥନୈତିକ ସମୃଦ୍ଧି ଓ ଜନସାଧାରଣଙ୍କ ସଶକ୍ତୀକରଣକୁ ମୁଖ୍ୟ ପ୍ରାଥମିକତା ଦିଆଯାଇଛି।
ଏହି ସମ୍ମିଳନୀରେ ଆମେରିକା, ଚୀନ୍, ଭାରତ, ଜାପାନ, ଅଷ୍ଟ୍ରେଲିଆ, ଦକ୍ଷିଣ କୋରିଆ ଓ ଅନ୍ୟ ପ୍ରମୁଖ ଦେଶ ସହ ଆସିଆନ୍ର ସମ୍ପର୍କ ଓ ସହଯୋଗକୁ ନେଇ ଆଲୋଚନା ହେବ। ବିଶେଷକରି ଆମେରିକା ଓ ଚୀନ୍ ଭଳି ପ୍ରମୁଖ ଶକ୍ତିଶାଳୀ ରାଷ୍ଟ୍ରଙ୍କ ଉପସ୍ଥିତି ଏହି ସମ୍ମିଳନୀକୁ ଆହୁରି ଗୁରୁତ୍ୱପୂର୍ଣ୍ଣ କରିଛି। ବିଶ୍ୱରେ ବଢ଼ୁଥିବା ଭୂରାଜନୈତିକ ଉତ୍ତେଜନା, ବାଣିଜ୍ୟିକ ଅନିଶ୍ଚିତତା ଓ ଆନ୍ତର୍ଜାତିକ ସମୀକରଣ ମଧ୍ୟରେ ଏହି ବୈଠକ ଉପରେ ରହିଛି ସମସ୍ତଙ୍କ ନଜର। ତେବେ ଏଥରର ସମ୍ମିଳନୀରେ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଆଲୋଚନାର କେନ୍ଦ୍ରବିନ୍ଦୁ ହେବ। ମିଆଁମାରରେ ଜାରି ରାଜନୈତିକ ସଙ୍କଟ, ଦକ୍ଷିଣ ଚୀନ୍ ସାଗରରେ ବଢ଼ୁଥିବା ଉତ୍ତେଜନା, ଆଞ୍ଚଳିକ ସାମୁଦ୍ରିକ ସୁରକ୍ଷା, ଆତଙ୍କବାଦ ମୁକାବିଲା ଓ ସଦସ୍ୟ ରାଷ୍ଟ୍ରମାନଙ୍କ ମଧ୍ୟରେ ସହଯୋଗକୁ ନେଇ ଆଲୋଚନା ହେବ। ଏହା ସହିତ ବିଶ୍ୱ ବାଣିଜ୍ୟ, ଶକ୍ତି ସୁରକ୍ଷା, ଡିଜିଟାଲ୍ ଅର୍ଥନୀତି, କୃତ୍ରିମ ବୁଦ୍ଧିମତ୍ତା ଓ ନୂତନ ନିବେଶର ସୁଯୋଗ ଉପରେ ମଧ୍ୟ ଗୁରୁତ୍ୱ ଦିଆଯିବ।
ଏହି ଶିଖର ସମ୍ମିଳନୀରେ ଭାରତର ଭୂମିକା ମଧ୍ୟ ବେଶ୍ ଗୁରୁତ୍ୱପୂର୍ଣ୍ଣ। ଆସିଆନ୍ ଦେଶଗୁଡ଼ିକ ସହ ଭାରତର ଦୀର୍ଘଦିନର ରାଜନୈତିକ, ବାଣିଜ୍ୟିକ ଓ ସାମୁଦ୍ରିକ ସମ୍ପର୍କ ରହିଛି। ଭାରତର ‘ଆକ୍ଟ ଇଷ୍ଟ ପଲିସି’ ଅନୁସାରେ ଦକ୍ଷିଣ-ପୂର୍ବ ଏସିଆର ଦେଶଗୁଡ଼ିକ ସହ ସଂଯୋଗ, ବାଣିଜ୍ୟ, ପ୍ରତିରକ୍ଷା ଓ ସାଂସ୍କୃତିକ ସମ୍ପର୍କକୁ ଅଧିକ ମଜବୁତ କରିବା ଉପରେ ଭାରତ ଗୁରୁତ୍ୱ ଦେଇଆସୁଛି। ତେଣୁ ଆସିଆନ୍ ଓ ଭାରତ ମଧ୍ୟରେ ସହଯୋଗର ନୂଆ ଦିଗ ଖୋଲିବା ନେଇ ମଧ୍ୟ ଏହି ବୈଠକରୁ ଆଶା ରହିଛି। ଅନ୍ୟପଟେ ଚଳିତ ସମ୍ମିଳନୀରେ ଆସିଆନ୍ରେ ସାମିଲ ହୋଇଥିବା ନୂଆ ସଦସ୍ୟ ତିମୋର-ଲେଷ୍ଟେର ଉପସ୍ଥିତି ମଧ୍ୟ ଆଞ୍ଚଳିକ ସଂଗଠନର ବିସ୍ତାରକୁ ଦର୍ଶାଉଛି। ଏହାଦ୍ୱାରା ଆସିଆନ୍ର ସଦସ୍ୟ ସଂଖ୍ୟା ୧୧ରେ ପହଞ୍ଚିଛି। ଆଗାମୀ ଦିନରେ ଏହି ସଂଗଠନ କିଭଳି ଏକତା ଓ ସାମୂହିକ ସହଯୋଗକୁ ଆହୁରି ମଜବୁତ କରିବ, ତାହା ମଧ୍ୟ ଏକ ବଡ଼ ପ୍ରସଙ୍ଗ।
