ନନ୍ଦିଘୋଷ ବିୁରୋ: ଜଗତସିଂହପୁର ଜିଲ୍ଲାରେ ଚୋରା ବାଲି ଚାଲାଣ l ଗତକାଲି ବିଳମ୍ବିତ ରାତ୍ରରେ ଜଗତସିଂହପୁର ଜିଲ୍ଲା ଖଣି ବିଭାଗ ଅଧିକାରୀ, ଅତିରିକ୍ତ ତହସିଲଦାର ଏବଂ ଜଗତସିଂହପୁର ପୋଲିସ ଉପସ୍ଥିତିରେ ୧୧ ଟି ବେଆଇନ ବାଲି ବୋଝେଇ ହାଇୱେ ଗାଡିକୁ ଜଗତସିଂହପୁର ସହର ଗାନ୍ଧୀ ଛକଠାରେ ଜବତ କରାଯାଇଛି। କଟକ ଜଗତସିଂହପୁର ରାସ୍ତାର ବିରିଡ଼ି, ହାଜିପୁର, ବିଲୁଆ ଖାଇ ଅଞ୍ଚଳର ଦେବୀ ନଦୀରୁ ବେଧଡ଼କ୍ ଭାବରେ ବାଲି ମାଫିଆମାନେ ବାଲି ଚୋରି କରି ଜଗତସିଂହପୁର ଜୟପୁର ବାଟ ଦେଇ ସିଧା ପାରାଦୀପ ଅଭିମୁଖେ ଯାଉଥିବା ଅଭିଯୋଗ ହେଉଥିଲା l ପାରାଦୀପରେ ଶିଳ୍ପାଞ୍ଚଳ ସହ ଆଖପାଖରେ ବାଲିର ଚାହିଦା ଥିବାରୁ ବର୍ତ୍ତମାନ ବାଲି ମାଫିଆମାନେ ପୁଣି ସକ୍ରିୟ ହୋଇ ଉଠିଛନ୍ତି l ଦେବୀନଦୀରୁ ଆଖି ବୁଜା ବାଲି ଉତ୍ତୋଳନ ହେଉଛି l ଦିନକୁ ପାଖାପାଖି ଦୁଇ ହଜାର ସି ଏମ୍ ବାଲି ଚୋରା ଚାଲାଣ ହେଉଥିବା କୁହାଯାଉଛି l ଜବତ ସମସ୍ତ ବାଲି ବୋଝେଇ ଗାଡି ସହ କେତେକ ହାଇୱେ ଗାଡିର ଚାଳକକୁ ଜଗତସିଂହପୁର ପୋଲିସ ଧରି ଥାନାରେ ଅଟକ ରଖିଥିଲା।
