ନନ୍ଦିଘୋଷ ବ୍ୟୁରୋ: ଅନ୍ଧବିଶ୍ୱାସକୁ ପ୍ରଶ୍ରୟ ଦେଉଥିବା ଅଭିଯୋଗରେ ତାନ୍ତ୍ରିକ ଗିରଫ ।ମଶାଣିରେ ତନ୍ତ୍ରମନ୍ତ୍ର କରି ମହିଳାଙ୍କ ଦେହରୁ ଭୂତ ଛଡ଼ାଉଥିବା ଦାବି କରୁଥିଲେ ତାନ୍ତ୍ରିକ। ଏପରିକି ଝଡ଼ାଫୁଙ୍କା କରିବାର ଭିଡିଓ ମଧ୍ୟ ସୋସିଆଲ ମିଡିଆରେ କରୁଥିଲେ ଭାଇରାଲ। ଭିଡିଓ ଦେଖି ଦୂରଦୂରାନ୍ତରୁ ବହୁ ମାନସିକ ରୋଗୀ ତାନ୍ତ୍ରିକ ପାଖକୁ ଆସୁଥିଲେ । ମାନସିକ ସମସ୍ୟାରେ ପୀଡ଼ିତ ଲୋକଙ୍କୁ ଭୂତ ଲାଗିଥିବା କହି ଝଡ଼ାଫୁଙ୍କା କରିବା ସହ ଅର୍ଥ ଆଦାୟ କରୁଥିଲେ।ନିଜ ସୋସିଆଲ ମିଡିଆରେ ଆକାଉଣ୍ଟରେ ଭିଡିଓ ଛାଡି ଫସିଗଲେ ତାନ୍ତ୍ରିକ।ଗଞ୍ଜାମ ଜିଲ୍ଲା ଧରାକୋଟ ବ୍ଲକ ଡ଼ି. ସିଙ୍ଗିପୁର ଗାଁର କ୍ରିଷ୍ଣା କୁମାର ମୁନିଙ୍କୁ ଗିରଫ କରିଛି ଗାଙ୍ଗପୁର ପୋଲିସ। ତାଙ୍କ ନିକଟରୁ ତନ୍ତ୍ରମନ୍ତ୍ରରେ ବ୍ୟବହୃତ କିଛି ସାମଗ୍ରୀ ମଧ୍ୟ ଜବତ ହୋଇଛି।
ପ୍ରାୟ ୫ ବର୍ଷ ଧରି ଗାଁରେ ଏକ କୁଡ଼ିଆ ଘର କରି ତନ୍ତ୍ର ସାଧନା କରୁଥିଲେ।ଯୁବତୀଙ୍କ ଝାଡ଼ଫୁଙ୍କ କରୁଥିବାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଗଞ୍ଜାମ ଏସ୍ପି ଘଟଣାକୁ ଗୁରୁତର ସହ ନେଇଥିଲେ। ତାଙ୍କ ନିର୍ଦ୍ଦେଶ ପରେ ଗାଙ୍ଗପୁର ପୋଲିସ ଚଢ଼ାଉ କରି ତାନ୍ତ୍ରିକଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି।
