ନନ୍ଦିଘୋଷ ବ୍ୟୁରୋ: ବାତ୍ୟା ନେଇ ସ୍ପଷ୍ଟ କଲା IMD । ଗତକାଲି ମଧ୍ୟ ଆଣ୍ଡାମାନ ସାଗର ଏବଂ ଏହାର ସଂଲଗ୍ନ ଆଣ୍ଡାମାନ ଓ ନିକୋବର ଦ୍ବୀପପୁଞ୍ଜ ଉପରେ ଥିବା ଘୂର୍ଣ୍ଣିବଳୟ ପ୍ରଭାବରେ ଆଜି ସକାଳେ ଦକ୍ଷିଣ-ପୂର୍ବ ବଙ୍ଗାପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହୋଇଛି । ଏହା ସହିତ ଜଡ଼ିତ ଘୂର୍ଣ୍ଣିବଳୟଟି ସମୁଦ୍ର ପତ୍ତନ ଠାରୁ ୫.୮ କିଲୋମିଟର ଉଚ୍ଚତା ପର୍ଯ୍ୟନ୍ତ ବିସ୍ତାରିତ ହୋଇ ରହିଛି I ଏହା ଉତ୍ତର-ପଶ୍ଚିମ ଦିଗକୁ ଗତି କରିବାର ସମ୍ଭାବନା ରହିଛି । ଆସନ୍ତା କାଲି ଏହା ଏକ ସ୍ପଷ୍ଟ ଚିହ୍ନିତ ଲଘୁଚାପ କ୍ଷେତ୍ରରେ ପରିଣତ ହେବାର ସମ୍ଭାବନା ରହିଛି । ୧୫ ତାରିଖରେ ସକାଳ ସମୟ ବେଳକୁ ସେହି ଅଞ୍ଚଳରେ ଅଧିକ ଘନୀଭୂତ ହୋଇ ଏକ ଅବପାତ’ ର ରୂପ ନେବାର ସମ୍ଭାବନା ରହିଛି I ଏହା ପରେ ଏହା ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରିବ ଏବଂ ୧୬ ନଭେମ୍ବର ସନ୍ଧ୍ୟା ସୁଦ୍ଧା ମଧ୍ୟ ବଙ୍ଗୋପସାଗର ଉପରେ ଅଧିକ ଘନୀଭୂତ ହୋଇ ଏକ ‘ବାତ୍ୟା’ ରେ ପରିଣତ ହେବାର ସମ୍ଭାବନା ରହିଛି I ବର୍ତ୍ତମାନ ସମୁଦ୍ର ମଝିରେ ପବନର ବେଗ ୫୫ରୁ ୬୨ କିମି ରହିଛି I ଏହା କେଉଁ ଦିଗକୁ ଗତି କରିବ ଓ କେଉ ସ୍ଥାନରେ ସ୍ଥଳ ଭାଗ ଛୁଇଁବ ଏ ନେଇ ଆସନ୍ତା ୪୮ ଘଣ୍ଟାରେ ସ୍ପଷ୍ଟ ସୂଚନା ମିଳିବ । ବର୍ତ୍ତମାନ ସ୍ଥିତିରେ ଏହା ଆନ୍ଧ୍ର ଓ ତାମିଲନାଡୁ ଅଞ୍ଚଳରେ ସ୍ଥଳ ଭାଗ ଛୁଇଁବା ନେଇ ଅନୁମାନ କରାଯାଉଛି । ଯଦି ଦିଗ ପରିବର୍ତ୍ତନ ହୁଏ ଏହା ମିଆଁମାର୍ ଓ ବାଂଲାଦେଶ ଅଭିମୁଖେ ଗତି କରିବ । କିନ୍ତୁ ଏହାର ପ୍ରଭାବରେ ଆସନ୍ତା ୧୭ରୁ ଓଡ଼ିଶା ଉପକୁଳ ଓ ଦକ୍ଷିଣ ଓଡ଼ିଶାରେ ବର୍ଷା ପରିମାଣ ବଢ଼ିବ । ୨୧ ଯାଏ ଓଡ଼ିଶା ରେ ବର୍ଷା ସମ୍ଭାବନା ରହିବ ବୋଲି ଆକଳନ କରିଛି IMD।
