ନନ୍ଦିଘୋଷବ୍ୟରୋ: ରୁଷିଆ-ୟୁକ୍ରେନ୍ ଯୁଦ୍ଧର ଅନ୍ତ ଘଟାଇବାକୁ ଶାନ୍ତି ଆଲୋଚନା ମଧ୍ୟରେ ଆସିଛି ଏକ ବଡ଼ ଖବର। ଆଗାମୀ ପର୍ଯ୍ୟାୟର ଶାନ୍ତି ଆଲୋଚନାରେ ୟୁରୋପୀୟ ସଂଘ (EU)ର ପ୍ରତିନିଧିମାନଙ୍କୁ ସାମିଲ କରିବାକୁ ଆମେରିକା ପକ୍ଷରୁ ପ୍ରତିଶ୍ରୁତି ମିଳିଛି। ଏହାକୁ ସ୍ୱାଗତ କରିଛନ୍ତି ୟୁକ୍ରେନ୍ ରାଷ୍ଟ୍ରପତି ଭୋଲୋଦିମିର ଜେଲେନସ୍କି। ଏହାଦ୍ୱାରା ଶାନ୍ତି ଆଲୋଚନାରେ ୟୁରୋପର ମଧ୍ୟ ନିଜସ୍ୱ ମତ ରଖିବାର ସୁଯୋଗ ମିଳିବ ବୋଲି ସେ କହିଛନ୍ତି।
ଗୁରୁବାର ଆୟରଲ୍ୟାଣ୍ଡର ଡବଲିନ୍ରେ ଜେଲେନସ୍କିଙ୍କୁ ଭେଟିଥିଲେ ଆମେରିକାର ଦୂତ ଜାରେଡ୍ କୁଶନର ଏବଂ ଷ୍ଟିଭ୍ ୱିଟକଫ୍। ଏହା ପୂର୍ବରୁ ଉଭୟ ମସ୍କୋରେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ମଧ୍ୟ ଆଲୋଚନା କରିଥିଲେ। ତେବେ ଯୁଦ୍ଧ ଏବଂ ୟୁକ୍ରେନ୍ର ଅଞ୍ଚଳକୁ ନେଇ ରୁଷିଆର ଆଭିମୁଖ୍ୟରେ କୌଣସି ପରିବର୍ତ୍ତନ ହୋଇନଥିବା ସ୍ପଷ୍ଟ କରିଛନ୍ତି ପୁଟିନ୍।
କୁଶନର କହିଛନ୍ତି, ଗତ କିଛି ମାସ ହେଲା ଆମେରିକା ୟୁରୋପୀୟ ଦେଶଗୁଡ଼ିକ ସହ ଘନିଷ୍ଠ ଭାବେ କାମ କରୁଛି। ଏପରିକି ଆଲୋଚନା ଟେବୁଲରେ ୟୁରୋପୀୟ ପ୍ରତିନିଧିଙ୍କ ଉପସ୍ଥିତି କେତେ ଗୁରୁତ୍ୱପୂର୍ଣ୍ଣ, ସେନେଇ ପୁଟିନଙ୍କୁ ମଧ୍ୟ ଅବଗତ କରାଯାଇଛି। ଏଥିରେ ପୁଟିନ୍ ରାଜି ହୋଇ ଏକ ପରୀକ୍ଷାମୂଳକ ପଦକ୍ଷେପ ନେବାକୁ ସମ୍ମତି ଦେଇଥିବା ସେ କହିଛନ୍ତି।
ଅନ୍ୟପଟେ, ୟୁରୋପୀୟ କମିଶନର ଉପାଧ୍ୟକ୍ଷ କାଜା କାଲାସ୍ କହିଛନ୍ତି, ଆଲୋଚନାରେ ୟୁରୋପର ପ୍ରତିନିଧିତ୍ୱକୁ ନେଇ ରୁଷିଆ ଏବେ ୟୁରୋପର ଗୁରୁତ୍ୱ ବୁଝିବା ଆରମ୍ଭ କରିଛି। ତେବେ ରୁଷିଆ ପକ୍ଷରୁ ଶାନ୍ତି ଚୁକ୍ତି ପାଇଁ ପ୍ରକୃତ ଆଗ୍ରହ ରହିଛି କି ନାହିଁ, ସେନେଇ ସେ ସନ୍ଦେହ ପ୍ରକାଶ କରିଛନ୍ତି।
ଏହି ଆଲୋଚନା ମଧ୍ୟରେ ଆଉ ଏକ ବଡ଼ ନିଷ୍ପତ୍ତି ହୋଇଛି। ରୁଷିଆ ଓ ୟୁକ୍ରେନ୍ ମଧ୍ୟରେ ପୁଣି ଥରେ ବନ୍ଦୀ ବିନିମୟ ପାଇଁ ସହମତି ହୋଇଛି। ୨୦୨୨ରେ ଯୁଦ୍ଧ ଆରମ୍ଭ ହେବା ପରଠାରୁ ଏହା ସବୁଠାରୁ ବଡ଼ ବନ୍ଦୀ ବିନିମୟ ହେବ ବୋଲି କୁହାଯାଉଛି। ଏହାଦ୍ୱାରା ହଜାର ହଜାର ଲୋକ ନିଜ ପରିବାରକୁ ଫେରିପାରିବେ ବୋଲି କୁଶନର କହିଛନ୍ତି। ତେବେ କେତେ ସଂଖ୍ୟକ ବନ୍ଦୀ ମୁକ୍ତ ହେବେ ଏବଂ କେବେ ଏହି ପ୍ରକ୍ରିୟା ହେବ, ସେନେଇ ସ୍ପଷ୍ଟ ସୂଚନା ମିଳିନାହିଁ।
ଅନ୍ୟପଟେ, ୟୁକ୍ରେନର ପ୍ରାୟ ୨୦ ପ୍ରତିଶତ ଅଞ୍ଚଳ ଏବେ ବି ରୁଷିଆ ସେନା କବଜାରେ ରହିଛି। ଏଭଳି ସ୍ଥିତିରେ ଯୁଦ୍ଧ କେବେ ସରିବ ଏବଂ ୟୁରୋପର ସୁରକ୍ଷା କେମିତି ରହିବ, ତାକୁ ନେଇ ଚିନ୍ତା ବଢ଼ିଛି।
