ନନ୍ଦିଘୋଷବ୍ୟୁରୋ: ପ୍ରତିଭା ଆଗରେ ହାର ମାନିଛି ସବୁ ପ୍ରତିବନ୍ଧକ। ଦୃଢ଼ ଇଚ୍ଛାଶକ୍ତି ଓ ଅସାଧାରଣ ପ୍ରତିଭା ବଳରେ ନିଜ ପାଇଁ ଏକ ସ୍ୱତନ୍ତ୍ର ପରିଚୟ ତିଆରି କରିଛନ୍ତି କଟକର ୨୦ ବର୍ଷୀୟ ଆଶୁତୋଷ ପାଣିଗ୍ରାହୀ। ମାତ୍ର ୩ ମିନିଟ୍ ୪୭ ସେକେଣ୍ଡରେ ୫୦ଟି ହିନ୍ଦୁସ୍ତାନୀ ଶାସ୍ତ୍ରୀୟ ରାଗକୁ ଚିହ୍ନିବା ସହ ଗାଇ ସେ ଏବେ ଚର୍ଚ୍ଚାରେ। ତାଙ୍କର ଏହି ଅସାଧାରଣ ସଫଳତା ଏସିଆ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛି।
ଆଶୁତୋଷଙ୍କ ସଫଳତା କେବଳ ସଙ୍ଗୀତ ଜଗତରେ ସୀମିତ ନୁହେଁ। ପାଠପଢ଼ା ସହ ବିଭିନ୍ନ କ୍ଷେତ୍ରରେ ନିଜ ପ୍ରତିଭାର ପରିଚୟ ଦେଇଛନ୍ତି ସେ। ୨୦୨୩ ମସିହାରେ ଆବାକସ୍ରେ ମାତ୍ର ୧୫ ମିନିଟ୍ରେ ୨୦୮ଟି ଗଣିତ ସମାଧାନ କରି ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ହାସଲ କରିଥିଲେ।
ସେହିପରି ୨୦୨୪ରେ ସ୍ପେଶାଲ ଅଲିମ୍ପିକ୍ସ ଭାରତ ପକ୍ଷରୁ ପାୱାର ଲିଫ୍ଟିଂରେ ଭାଗ ନେଇ ୩ଟି ବ୍ରୋଞ୍ଜ ପଦକ ଜିତିଥିଲେ। ୨୦୨୫ରେ ବିଶ୍ୱ ଅଟିଜିମ୍ ଦିବସ ଅବସରରେ ବନାରସର ପ୍ରସିଦ୍ଧ ‘ସୁବାହ୍-ଏ-ବନାରସ୍’ ମଞ୍ଚରେ ପ୍ରଥମ ନ୍ୟୁରୋଡାଇଭର୍ଜେଣ୍ଟ କଳାକାର ଭାବେ ନିଜର କଳା ପ୍ରଦର୍ଶନ କରିଥିଲେ।
ସଙ୍ଗୀତ ଓ କ୍ରୀଡ଼ା ଉଭୟ କ୍ଷେତ୍ରରେ ଆଶୁତୋଷଙ୍କ ଏହି ସଫଳତା ଜାରି ରହିଛି। ୨୦୨୬ରେ ରାଜ୍ୟସ୍ତରୀୟ ଦୌଡ଼ ପ୍ରତିଯୋଗିତାରେ ଦୁଇଟି ସ୍ୱର୍ଣ୍ଣ ଓ ଗୋଟିଏ ବ୍ରୋଞ୍ଜ ପଦକ ଜିତି ନିଜ ଦକ୍ଷତା ପ୍ରମାଣିତ କରିଛନ୍ତି। ଏବେ ତାଙ୍କ ଲକ୍ଷ୍ୟ ଅଲିମ୍ପିକ୍ସରେ ଦେଶ ପାଇଁ ପ୍ରତିନିଧିତ୍ୱ କରିବା। ସେଥିପାଇଁ ଜୋରଦାର ପ୍ରସ୍ତୁତି ମଧ୍ୟ ଚଳାଇଛନ୍ତି।
ଆଶୁତୋଷଙ୍କ ଜୀବନ ଯାତ୍ରା ମଧ୍ୟ ସଂଘର୍ଷପୂର୍ଣ୍ଣ। ମାତ୍ର ୯ ବର୍ଷ ବୟସରେ ତାଙ୍କଠାରେ ଅଟିଜିମ୍ ସ୍ପେକ୍ଟ୍ରମ୍ ଡିସଅର୍ଡର ଚିହ୍ନଟ ହୋଇଥିଲା। ତେବେ ଏହାକୁ ନିଜ ସ୍ୱପ୍ନର ପଥରେ ପ୍ରତିବନ୍ଧକ ହେବାକୁ ଦେଇନାହାନ୍ତି ସେ। ଆଶୁତୋଷଙ୍କ ଅସାଧାରଣ ପ୍ରତିଭା ଓ ସଫଳତାକୁ ନେଇ ତାଙ୍କ ପିତାମାତା ମଧ୍ୟ ବେଶ୍ ଗର୍ବିତ।
ନିଜର ଦୃଢ଼ ମନୋବଳ, ନିରନ୍ତର ଅଭ୍ୟାସ ଓ ଅଦମ୍ୟ ଇଚ୍ଛାଶକ୍ତି ବଳରେ ଆଶୁତୋଷ ଆଜି ଅନ୍ୟ ଅଟିଜିମ୍ ଥିବା ଯୁବକଯୁବତୀଙ୍କ ପାଇଁ ପ୍ରେରଣାର ଉତ୍ସ ପାଲଟିଛନ୍ତି। ତାଙ୍କର ଏହି ସଫଳତା ପ୍ରମାଣ କରୁଛି ଯେ, ସୁଯୋଗ, ସମର୍ଥନ ଓ ଉତ୍ସାହ ମିଳିଲେ ପ୍ରତ୍ୟେକ ବ୍ୟକ୍ତି ନିଜ ପ୍ରତିଭାରେ ନୂଆ ଉଚ୍ଚତା ଛୁଇଁପାରିବେ।
