ନନ୍ଦିଘୋଷ ବ୍ୟୁରୋ: ଗଞ୍ଜାମ ବନ୍ୟା ପରିଚାଳନାରେ ପଦାରେ ପଡ଼ିଲାଣି ସରକାରଙ୍କ ବିଫଳତା। ବିରୋଧୀ ଘେରିବା ପରେ ମୁଖ୍ୟ ଶାସନ ସଚିବଙ୍କ ପରେ ସରକାରଙ୍କ ପକ୍ଷରୁ କାଉଣ୍ଟର କରିଛନ୍ତି ରାଜସ୍ବ ମନ୍ତ୍ରୀ। ବିବୃତିରେ ଯଥା ସମ୍ଭବ ନିଜ ଦୁର୍ବଳତାକୁ ଲୁଚାଇବାକୁ ପ୍ରୟାସ କରିଛନ୍ତି ସୁରେଶ ପୂଜାରୀ।
ଯାଜପୁରରେ ଲଗାତର ବନ୍ୟା ପରିଚାଳନା ବିଫଳତା ପରେ ଏବେ ସରକାରଙ୍କ ମୁଣ୍ଡରେ ଲାଗିଛି ଗଞ୍ଜାମ ଜିଲ୍ଲା ବନ୍ୟାର ଅଠା । ଡ୍ୟାମ ପରିଚାଳନାରେ ତ୍ରୁଟି, ଲୋକଙ୍କୁ ଆଗୁଆ ସୂଚନା ଦେବାରେ ବିଫଳତା ଓ ଠିକ୍ ସମୟରେ ଲୋକଙ୍କୁ ସ୍ଥାନାନ୍ତରରେ ଅସମର୍ଥ ଯୋଗୁଁ ଗଞ୍ଜାମ ଜିଲ୍ଲା ଏତେ ବଡ଼ ବନ୍ୟା ଦେଖିଲା ବୋଲି କହିଛନ୍ତି ବିପନ୍ନ। ବିରୋଧୀ ମଧ୍ୟ ସ୍ଥାନୀୟ ବାସିନ୍ଦାଙ୍କୁ ସମର୍ଥନ କରି ସରକାରଙ୍କୁ ଟାର୍ଗେଟ କରିଛନ୍ତି । ବିରୋଧୀଙ୍କ ବାରମ୍ବାର ଅଭିଯୋଗ ଓ ପୂର୍ବତନ ମୁଖ୍ୟ ଶାସନ ସଚିବଙ୍କ ତଥ୍ୟ ଭିତ୍ତିକ ଉପସ୍ଥାପନା ପରେ, ସରକାରଙ୍କ ପକ୍ଷରୁ ମୁଖ୍ୟ ଶାସନ ସଚିବ ଅନୁ ଗର୍ଗ ଗଣମାଧ୍ୟମରେ ସ୍ପଷ୍ଟୀକରଣ ରଖିଲେ । ହେଲେ ଏତିକି ଯଥେଷ୍ଟ ହେଲା ନାହିଁ। ଆଜି ରାଜସ୍ବ ମନ୍ତ୍ରୀ ନିଜ ଦୁର୍ବଳତାକୁ ଲୁଚାଇବାକୁ ଯାଇ ବିରୋଧୀଙ୍କୁ ଏ ପ୍ରସଙ୍ଗରେ ତର୍କ ପାଇଁ ଆହ୍ବାନ କରିଛନ୍ତି। ସାମଗ୍ରିକ ପ୍ରସଙ୍ଗକୁ ଲମ୍ବା ପ୍ରସଙ୍ଗ କରିବାକୁ ଆମେ ପ୍ରସ୍ତୁତ। ବିଧାନସଭାରେ ଆଲୋଚନା ପାଇଁ ଆମେ ପ୍ରସ୍ତୁତ ବୋଲି କହିଛନ୍ତି ରାଜସ୍ବ ମନ୍ତ୍ରୀ। ବିଜେଡି ବିଧାୟକ ଅରୁଣ ସାହୁ ରାଜସ୍ବ ମନ୍ତ୍ରୀଙ୍କ ଆହ୍ବାନକୁ ଗ୍ରହଣ କରି ବିଧାନସଭା ନୁହେଁ, ଲୋୟର ପିଏମଜିରେ ତର୍କ କରିବାକୁ ସରକାର ଆସନ୍ତୁ ବୋଲି ଚ୍ୟାଲେଞ୍ଜ କରିଛନ୍ତି।
ସେପଟେ ବନ୍ୟାକୁ ନେଇ ମୁଖ୍ୟ ଶାସନ ସଚିବ ଓ ରାଜସ୍ବ ମନ୍ତ୍ରୀଙ୍କ ସ୍ପଷ୍ଟୀକରଣ ପରେ ବି ଶାନ୍ତ ପଡ଼ିନାହାନ୍ତି ବିରୋଧୀ । ସରକାର ବନ୍ୟାର ସାମ୍ନା କରିବାକୁ ପ୍ରସ୍ତୁତ ନଥିଲେ ବୋଲି ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛି ବିଜେଡି। ରାଜସ୍ୱ ମନ୍ତ୍ରୀ ନିଜ ଉପରୁ ଦୋଷ ଛଡାଇ ଅନ୍ୟ ମୁଣ୍ଡରେ ଅଠା ବୋଳିବାକୁ ଉଦ୍ୟମ କରିଛନ୍ତି। ଲୋକଙ୍କୁ ମୃତ୍ୟୁ ମୁଖକୁ ଠେଲିଦେଲେ ସରକାର। ଯାହା ଏକ ଅପରାଧିକ ଅବହେଳା ବୋଲି ଅଭିଯୋଗ କରି ମୁଖ୍ୟମନ୍ତ୍ରୀଙ୍କ ଇସ୍ତଫାରୁ କାର୍ଯ୍ୟାନୁଷ୍ଠାନ ଆରମ୍ଭ ହେବା ଦରକାର ବୋଲି କହିଛି ବିଜେଡି। ନବୀନ ସରକାରର ବିପର୍ଯ୍ୟୟ ପରିଚାଳନାକୁ ରାଜସ୍ବ ମନ୍ତ୍ରୀ ଟାର୍ଗେଟ କରିଥିବା ବେଳେ, କେନ୍ଦ୍ର ସରକାରଙ୍କ ପ୍ରଶଂସାକୁ ମନେ ପକାଇଛି ବିଜୁ ଜନତା ଦଳ। ସରକାର ସ୍ପଷ୍ଟୀକରଣ ନୁହେଁ ପ୍ରତିକାର କରନ୍ତୁ । ଅନ୍ୟପଟେ ବନ୍ୟା ପରିଚାଳନାରେ ବିଫଳତାକୁ ସ୍ବୀକାର କରି ରାଜସ୍ବ ମନ୍ତ୍ରୀ ଇସ୍ତଫା ଦିଅନ୍ତୁ ବୋଲି କହିଛି କଂଗ୍ରେସ। କେବଳ ଶାସକ ଦଳକୁ ବଞ୍ଚାଇବା ପାଇଁ ସରକାର ଆଉ କେତେ ମିଛ କହିବେ ବୋଲି ସିପିଆଇ ରାଷ୍ଟ୍ରୀୟ ସମ୍ପାଦକ ପ୍ରଶ୍ନ କରିଥିବା ବେଳେ, ଏବେ ସ୍ପଷ୍ଟୀକରଣ ନ ଦେଇ ବନ୍ୟାର ସ୍ଥାୟୀ ପ୍ରତିକାର କରିବାକୁ ଦାବି ହୋଇଛି।
ଡ୍ୟାମ୍ ପରିଚାଳନାରେ ତ୍ରୁଟି ହୋଇନାହିଁ । ପ୍ରବଳ ବର୍ଷା ଯୋଗୁଁ ଗଞ୍ଜାମରେ ବନ୍ୟା ହେଲା ବୋଲି କହି ସରକାର ଖସିବାକୁ ବସିଛନ୍ତି। ହେଲେ ପ୍ରବଳ ବର୍ଷା ନେଇ ୨୩ ତାରିଖରୁ ପାଣିପାଗ ବିଭାଗର ସୂଚନା ପରେ ଜଳସମ୍ପଦ ବିଭାଗ କ’ଣ ପଦକ୍ଷେପ ନେଲା, ସେ ବାବଦରେ କେହି କିଛି କହୁନାହାନ୍ତି । ଗଞ୍ଜାମ ବନ୍ୟାକୁ ନେଇ ରାଜନୀତି ଦିନକୁ ଦିନ ତୀବ୍ର ହେଉଥିବା ବେଳେ, ଆଗାମୀ ବିଧାନସଭା ଅଧିବେଶନରେ ଏହି ପ୍ରସଙ୍ଗ ଫୋକସରେ ରହିବା ନେଇ ଚର୍ଚ୍ଚା ହେଉଛି।
