ନନ୍ଦିଘୋଷ ବ୍ୟୁରୋ: ଗାଁକୁ ନାହିଁ ପକ୍କା ରାସ୍ତା । ପାହାଡ଼ିଆ ମାଟି ରାସ୍ତା ସାଜିଛି ଏକମାତ୍ର ଭରସା। ଶିକ୍ଷା, ସ୍ୱାସ୍ଥ୍ୟ ପରି ବିଭିନ୍ନ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଲୋକେ ସେପଟେ କିନ୍ତୁ ବେଫିକର ପ୍ରଶାସନ। ଗଜପତି ଜିଲ୍ଲା ଗୁମ୍ମା ବ୍ଲକ ଜୟନ୍ତା ଭୂୟାଁସାହି ଗାଁରେ ଦେଖିବାକୁ ମିଳିଛି ଏଭଳି ଦୂରାବସ୍ଥା ।
ଗାଁରେ ପାହାଡ଼ିଆ ମାଟି ରାସ୍ତା ସାଜିଛି ଗ୍ରାମବାସୀଙ୍କ ଏକମାତ୍ର ଭରସା । ପକ୍କା ରାସ୍ତା ନଥିବାରୁ ଶିକ୍ଷା, ସ୍ୱାସ୍ଥ୍ୟ ପରି ବିଭିନ୍ନ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଗ୍ରାମବାସୀ। ଜରୁରୀକାଳୀନ ପରିସ୍ଥିତିରେ ଗାଁକୁ ପହଞ୍ଚି ପାରୁନି ଆମ୍ବୁଲାନ୍ସ। ସରକାରୀ ଯୋଜନାର ସୁଫଳ ପାଇବା ପାଇଁ ନାହିଁ ନଥିବା ସମସ୍ୟା ଭୋଗୁଛନ୍ତି ଲୋକେ। ଗାଁରେ ବସବାସ କରନ୍ତି ପ୍ରାୟ ୨୫୦ ଆଦିବାସୀ ପରିବାର। କୁଣ୍ଡେଇସିଂ ଠାରୁ ୪ କିଲୋମିଟରର ପାହାଡ଼ିଆ ମାଟି ରାସ୍ତା ଦେଇ ଜୟନ୍ତା ଭୂୟାଁସାହି ଗାଁକୁ ଯିବାକୁ ପଡ଼ିଥାଏ। ବର୍ଷା ହେଲେ ରାସ୍ତାର ଅବସ୍ଥା ନ କହିବା ଭଲ। କାଦୁଅ ପଚପଚ ରାସ୍ତା ଦେଇ ଯାଆସ କରିଥାନ୍ତି ଲୋକେ। ପକ୍କା ରାସ୍ତା ନଥିବାରୁ ଜରୁରୀ ସମୟରେ ଆମ୍ବୁଲାନ୍ସ ପହଞ୍ଚି ପାରେନାହିଁ। ଫଳରେ ଅନେକ ସମସ୍ୟାରେ ସନ୍ତୁଳି ହେଉଛନ୍ତି ଗ୍ରାମବାସୀ। ରାସ୍ତା ସମସ୍ୟା ଯୋଗୁଁ ଅନେକ ସରକାରୀ ସୁବିଧାରୁ ବଞ୍ଚିତ ହେଉଥିବା ଅଭିଯୋଗ କରିଛନ୍ତି ଗ୍ରାମବାସୀ । ରାସନ, ନିର୍ମାଣ ସାମଗ୍ରୀ ଓ କୃଷିଜାତ ଦ୍ରବ୍ୟ ପରିବହନରେ ଅଧିକ ଖର୍ଚ୍ଚାନ୍ତ ହେଉଛନ୍ତି।
ସେପଟେ ପକ୍କା ରାସ୍ତା ନିର୍ମାଣ ପାଇଁ ବାରମ୍ବାର ଦାବି ସତ୍ତ୍ବେ ଫଳ କିନ୍ତୁ ଶୂନ। ସମସ୍ୟାର ସମାଧାନ ନହେଲେ ଆନ୍ଦୋଳନାତ୍ମକ ପନ୍ଥା ଆପଣାଇବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ। ସେପଟେ ଖୁବଶୀଘ୍ର ସରକାରଙ୍କୁ ପ୍ରସ୍ତାବ ଦିଆଯିବ ବୋଲି ଗ୍ରାମ୍ୟ ଉନ୍ନୟନ ବିଭାଗ ନିର୍ବାହୀ ଯନ୍ତ୍ରୀ କହିଛନ୍ତି..। କେବେ ପ୍ରଶାସନର ନିଦ ଭାଙ୍ଗିବ ? କେବେ ଜୟନ୍ତା ଭୂୟାଁସାହିକୁ ପହଞ୍ଚିବ ପକ୍କା ରାସ୍ତା? ତାହା ଦେଖିବାକୁ ବାକି ରହିଲା।
