ନନ୍ଦିଘୋଷ ବ୍ୟୁରୋ: କାଲିଠୁ କମ୍ପବ ଦିଲ୍ଲୀ ରାମଲୀଳା ମଇଦାନ। ସିଇସି ଜ୍ଞାନେଶ କୁମାରଙ୍କୁ ହଟାଇବା ଓ ଏସଆଇଆର ବିରୋଧରେ ରାଲି କରିବ ଇଣ୍ଡି ମେଣ୍ଟ। ଏହି ସମାବେଶରେ ଦେଶରୁ ଲକ୍ଷାଧିକ କର୍ମୀ ସାମିଲ ହେବା ନେଇ ସୂଚନା ମିଳିଛି । ଏହି ମେଗା ସମାବେଶ ଲାଗି ଦିଲ୍ଲୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ବିଭିନ୍ନ ସ୍ଥାନରେ ବ୍ୟାରିକେଡ଼ ଲଗାଯାଇଛି।
ରାହୁଲ ଗାନ୍ଧୀ ଦେଶବାସୀ ଓ ଛାତ୍ରଛାତ୍ରୀଙ୍କୁ ଏହି ରାଲିରେ ସାମିଲ ହେବାକୁ ଆହ୍ୱାନ କରିଛନ୍ତି । ଏନେଇ ରାହୁଲ କହିଛନ୍ତି, ଏହା କୌଣସି ଗୋଟିଏ ରାଜନୈତିକ ଦଳର ରାଲି ନୁହେଁ, ବରଂ ଗଣତନ୍ତ୍ର ଓ ଦେଶର ସମ୍ବିଧାନର ସୁରକ୍ଷା ପାଇଁ ଏକ ମିଳିତ ପ୍ରତିବାଦ । ବିଶେଷ କରି ଭୋଟର ତାଲିକାରେ ଅନିୟମିତତା ଓ ଭୋଟରଙ୍କ ନାଁ କାଟିବା ନେଇ ବିରୋଧୀ ନେତାମାନେ ସରକାର ଉପରେ ବର୍ଷିବେ। ସେପଟେ ଏହି ସମାବେଶକୁ ଭଣ୍ଡୁର କରିବା ଲାଗି ବିଭିନ୍ନ ରାଜ୍ୟରେ ଷଡ଼ଯନ୍ତ୍ର କରାଯାଉଥିବା ଅଭିଯୋଗ ହୋଇଛି। ଦିଲ୍ଲୀ ଆସିବାକୁ ଥିବା ବସ ଗୁଡିକୁ ଅଟକା ଯାଉଥିବା ଅଭିଯୋଗ ହୋଇଛି । ଏହି ରାଲି ଲାଗି ରାମଲୀଳା ମଇଦାନରେ ପ୍ରସ୍ତୁତି ଜୋରଦାର ହୋଇଛି।
ତେଣେ ନଭେମ୍ବର ୧ ରାଲିକୁ ଘୁଞ୍ଚାଇବା ଲାଗି କଂଗ୍ରେସ ସଂସଦୀୟ ଦଳ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ନିକଟକୁ ପତ୍ର ଲେଖିଛି ଚାମ୍ବର ଅଫ ଟ୍ରେଡ଼ ଆଣ୍ଡ ଇଣ୍ଡଷ୍ଟ୍ରି- CTI। ସଂଗଠନ କହିଛି, ଏହି ରାଲିରେ ପ୍ରାୟ ୧୦ ଲକ୍ଷ ଲୋକଙ୍କ ସମାଗମ ହେବ। ପ୍ରାୟ ୨୦ ହଜାର ଯାନବାହନ କେନ୍ଦ୍ରୀୟ ଦିଲ୍ଲୀକୁ ପ୍ରବେଶ କରିବେ। ଫଳରେ ଦିଲ୍ଲୀରେ ବ୍ୟାପକ ଟ୍ରାଫିକ୍ ସମସ୍ୟା ଉପୁଜିବ । ଏହା ସହ ୧୨ ହଜାର କୋଟି ଟଙ୍କାର ବ୍ୟବସାୟିକ କ୍ଷତି ହେବ ବୋଲି ସିଟିଆଇ ଅଧ୍ୟକ୍ଷ ବ୍ରିଜେଶ ଗୋୟଲ କହିଛନ୍ତି । ଦିଲ୍ଲୀକୁ ଆସିଥିବା ଟ୍ରେନ୍ ଗୁଡିକରେ ହଜାର ହଜାର ସଂଖ୍ୟକ କର୍ମୀ ଆସୁଥିବା ଦେଖାଯାଇଛି।
