ନନ୍ଦିଘୋଷ ବ୍ୟୁରୋ : କନ୍ଦାଉଛି ପିଆଜ ଦର । ୫୦ ଟଙ୍କାରେ ମିଳୁଛି କିଲେ । ଦରଦାମ ବୃଦ୍ଧିକୁ ନେଇ ଅତିଷ୍ଠ ଲୋକେ । ଖୋର୍ଦ୍ଧା ଜିଲ୍ଲାର ଅଧିକାଂଶ ପରିବା ଦୋକାନରୁ ପିଆଜ ଗାଏବ ହୋଇଯାଇଥିବା ବେଳେ କେଉଁଠି କେମିତି କିଛି ପିଆଜ ମିଳୁଛି ।
ଧନୀଠାରୁ ଗରିବ, ସମସ୍ତଙ୍କ ଖାଦ୍ୟରେ ପିଆଜର ଚାହିଦା ରହିଛି । ମାତ୍ର ଚାରି ଦିନ ତଳେ ୧୦୦ ଟଙ୍କାରେ ୩ କିଲୋ ପିଆଜ ମିଳୁଥିବା ବେଳେ ଅଚାନକ ଦର ବୃଦ୍ଧି ପାଇ ୫୦ ଟଙ୍କାରେ କିଲୋଏ ପିଆଜ ବିକ୍ରି ହେଉଛି । ଏହାକୁ ନେଇ ଗୃହିଣୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଦରବୃଦ୍ଧି ପାଇଁ ବ୍ୟବସାୟୀମାନେ ସରକାରଙ୍କୁ ଦାୟୀ କରିଛନ୍ତି ।
ପିଆଜ ଦର ବୃଦ୍ଧି ଓ କଳାବଜାରୀ ନେଇ ଅଭିଯୋଗ ଆସିବା ପରେ ଖୋର୍ଦ୍ଧା ଜିଲ୍ଲା ଯୋଗାଣ ଅଧିକାରୀ ଜ୍ଞାନେନ୍ଦ୍ର ମିଶ୍ରଙ୍କ ନେତୃତ୍ୱରେ ୪ଟି ଟିମ୍ ଭୁବନେଶ୍ୱର, ଖୋର୍ଦ୍ଧା, ଜଟଣୀ, ବୋଲଗଡ଼ ଓ ବେଗୁନିଆ ଅଞ୍ଚଳର ବିଭିନ୍ନ ଗୋଦାମରେ ଚଢ଼ାଉ କରିଛନ୍ତି । ଟିମ୍ଗୁଡ଼ିକ ଗୋଦାମରେ ଥିବା ପିଆଜ ଷ୍ଟକ୍ ଯାଞ୍ଚ କରିବା ସହ ବିଲ୍ପତ୍ର ତନଖି କରୁଛନ୍ତି । ଅନ୍ୟପଟେ, ବିରୋଧୀ ଦଳ ଏହାକୁ ସରକାରଙ୍କ ଦୂରଦୃଷ୍ଟିର ଅଭାବ ଓ ବିଫଳତା ବୋଲି କହିଛି ।
