କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଳକରେ ପିଲାଚୋର ଗୁଜବକୁ ନେଇ ଦୁଇ ଜଣ ରାଜ୍ୟ ବାହାରର ସ୍ଵେଚ୍ଛାସେବୀଙ୍କୁ ଅମାନୁଷିକ ଭାବେ ଆକ୍ରମଣ କରାଯିବା ଘଟଣାରେ ପୋଲିସ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆଜି ପୋଲିସ ଏହି ମାମଲାରେ ଆଉ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏହାକୁ ମିଶାଇ ବର୍ତ୍ତମାନ ସୁଦ୍ଧା ମୋଟ ୨୦ ଜଣଙ୍କୁ ଗିରଫ କରାଯାଇ ସାରିଲାଣି। ପୂର୍ବରୁ ପୋଲିସ ୧୬ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।
ଏହି ବର୍ବରୋଚିତ କାଣ୍ଡର ଏକ ଭିଡିଓ ସାମାଜିକ ଗଣମାଧ୍ୟମ ରେ ଭାଇରାଲ ହେବା ପରେ ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଛି। ଭିଡିଓରେ ଉତ୍ତ୍ୟକ୍ତ ଲୋକେ ଜଣେ ମହିଳା ସ୍ଵେଚ୍ଛାସେବୀଙ୍କ ପୋଷାକ ଚିରି ଦେଇଥିବା ଭଳି ଅତି ସଂଗୀନ ଓ ଦୁଃଖଦ ଦୃଶ୍ୟ ଦେଖିବାକୁ ମିଳିଛି। ଅନ୍ୟପଟେ, ଏହି ସମ୍ବେଦନଶୀଳ ଘଟଣାରେ ସ୍ଥାନୀୟ ପୋଲିସର କାର୍ଯ୍ୟାନୁଷ୍ଠାନକୁ ନେଇ ସାଧାରଣରେ ଅସନ୍ତୋଷ ମଧ୍ୟ ପ୍ରକାଶ ପାଇଛି।
ସୂଚନା ଅନୁଯାୟୀ, କଲ୍ୟାଣସିଂହପୁର ଥାନାରୁ ମାତ୍ର ୭ କିଲୋମିଟର ଦୂର ଢାମୁଣିପଙ୍ଗା ପଞ୍ଚାୟତର କାନ୍ଦୁଲଗୁଡା ଗ୍ରାମରେ ଏହି ସୂତ୍ରପାତ ହୋଇଥିଲା। ଗ୍ରାମବାସୀମାନେ ଉକ୍ତ ୨ ସ୍ଵେଚ୍ଛାସେବୀଙ୍କୁ ପିଲାଚୋର ସନ୍ଦେହ କରି ପ୍ରଥମେ ଯୁକ୍ତିତର୍କ କରିଥିଲେ। ପରିସ୍ଥିତି ଉଗ୍ର ହେବାରୁ ଭୟଭୀତ ହୋଇ ସ୍ଵେଚ୍ଛାସେବୀ ଦ୍ୱୟ ସେଠାରୁ ଫେରୁଥିବା ବେଳେ ଗ୍ରାମବାସୀମାନେ ଫୋନ୍ ଯୋଗେ ଆଖପାଖର ଅନ୍ୟ ଗ୍ରାମ ଗୁଡ଼ିକୁ ଏହି ସୂଚନା ଦେଇଥିଲେ।
ଗୁଜବ ପ୍ରସାରିତ ହେବା ମାତ୍ରେ କଲ୍ୟାଣସିଂହପୁର ଗ୍ରାମର ସାଇ ନଗର ଓ ଇନ୍ତାଲିଗୁଡା ଆଦି ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ସାଇନଗର ନିକଟସ୍ଥ ଏକ ଢାବା ପାଖରେ ଶତାଧିକ ଉତ୍ତ୍ୟକ୍ତ ଯୁବକ ଏହି ଦୁଇ ସ୍ଵେଚ୍ଛାସେବୀଙ୍କୁ ଅଟକାଇ ବର୍ବରୋଚିତ ଭାବେ ଆକ୍ରମଣ କରିଥିଲେ। ପୋଲିସ ବର୍ତ୍ତମାନ ଘଟଣାର ଅଧିକ ତଦନ୍ତ ଜାରି ରଖିଛି।
