ନନ୍ଦିଘୋଷ ବ୍ୟୁରୋ: ପଶ୍ଚିମ ଏସିଆରେ ପ୍ରତିଷ୍ଠା ହୋଇପାରେ ଶାନ୍ତି। ୬୦ ଦିନିଆ ଅସ୍ତ୍ରବିରତି ଲାଗି ଉଭୟ ଆମେରିକା ଓ ଇରାନ ରାଜିଥିବା ନେଇ ସୂଚନା ଦେଇଛନ୍ତି ଆମେରିକା ଉପରାଷ୍ଟ୍ରପତି ଜେ.ଡି. ଭାନ୍ସ। ତେବେ ଏହି ରାଜିନାମା ପାଇଁ ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଓ ଇରାନ ସୁପ୍ରିମ ଲିଡର ମୋଜତାବା ଖାମେନେଇଙ୍କ ମଞ୍ଜୁରୀ ଆବଶ୍ୟକ କରୁଛି।
ତେବେ ଏକ ୬୦ ଦିନିଆ ବୁଝାମଣା ଚୁକ୍ତି ସକାଶେ ଉଭୟ ପକ୍ଷ ରାଜିଥିବା କୁହାଯାଇଛି। ଯଦି ଏହି ବୁଝାମଣାକୁ ଟ୍ରମ୍ପ ଓ ଖାମେନେଇଙ୍କ ଗ୍ରୀନ ସିଗନାଲ ମିଳେ ତେବେ ପ୍ରାୟ ୩ ମାସ ଧରି ଚାଲିଆସିଥିବା ଅଚଳାବସ୍ଥା ଦୂର ହୋଇପାରିବ। ପ୍ରସ୍ତାବିତ ରାଜିନାମା ଅନୁସାରେ ଆଉ ଇରାନ ଆଣବିକ କାର୍ଯ୍ୟକ୍ରମ କରିବ ନାହିଁ ବୋଲି ସର୍ତ୍ତ ରହିଛି।
ଇରାନ ନିକଟରେ ଗଚ୍ଛିତ ଥିବା ସମୃଦ୍ଧ ୟୁରାନିୟମ ପ୍ରସଙ୍ଗରେ ଏହି ୬୦ ଦିନ ଭିତରେ ଦୁଇ ପକ୍ଷ ସବିଶେଷ ଆଲୋଚନା କରିବେ। ରାଜିନାମାର ବିଷୟବସ୍ତୁକୁ ଇରାନର ବରିଷ୍ଠ ନେତାମାନେ ସ୍ବୀକୃତି ଦେଇଥିବା କୁହାଯାଇଛି। ତେବେ ଏହି ରାଜିନାମା ସମ୍ପର୍କରେ ନିଷ୍ପତ୍ତି ନେବା ଲାଗି ଟ୍ରମ୍ପ କିଛି ଦିନ ସମୟ ନେଇପାରନ୍ତି ବୋଲି କୁହାଯାଇଛି।
ତେବେ ଏହି ରାଜିନାମା ଅନୁସାରେ ହର୍ମୁଜ ପ୍ରଣାଳୀ ଦେଇ ଜାହାଜ ଚଳାଚଳ କଟକଣା ହଟାଇବା ଲାଗି ଦୁଇ ପକ୍ଷ ସହମତ ଥିବା ସୂଚନା ମିଳିଛି। ଏହା ସହ ଜବତ ହୋଇଥିବା ଇରାନର ପାଣ୍ଠିକୁ ମୁକ୍ତ କରାଯିବା ଲାଗି ଆମେରିକା ରାଜିଥିବା କୁହାଯାଇଛି।
