ନନ୍ଦିଘୋଷ ବ୍ୟୁରୋ : ପଲାସା-ଇଚ୍ଛାପୁରମ ରେଲ ଅଂଚଳକୁ ପୂର୍ବତଟ ରେଳପଥରୁ ବାଦ ଦିଆଯାଇଛି । ପୂର୍ବରୁ ୱାଲଟିୟର ରେଳ ଡିଭିଜନକୁ ପୂର୍ବତଟ ରେଳପଥ ଜୋନରୁ ବାଦ ଦିଆଯାଇଥିଲା । ପୂର୍ବତଟ ରେଳପଥର ସୀମାକୁ ବାରମ୍ବାର ସଂକୋଚିତ କରାଯଉଛି । ପୂର୍ବତଟ ରେଳପଥର ସୁରକ୍ଷା ପାଇଁ ଅଣ୍ଟା ଭିଡିଛନ୍ତି ବିରୋଧୀ । ଆଜି ବିରୋଧୀ ଦଳ ଏକ ବିଶାଳ ଗଣଧାରଣା ଦେଇଛି । ପୂର୍ବତଟ ରେଳପଥ ଜୋନ ଅଫିସ ଆଗରେ ୧୦ଟି ରାଜନୈତିକ ଦଳର ବିଶାଳ ଗଣଧାରଣା । କଂଗ୍ରେସ, ବିଜେଡି, ସିପିଆଇ, ସିପିଆଇ-ଏମଏଲ, ଫରୱାର୍ଡ ବ୍ଲକ, ସମାଜବାଦୀ ପାର୍ଟି, ଏନସିପି, ଆରଜେଡି, ସମତାକ୍ରାନ୍ତି ଦଳ ପ୍ରମୁଖ ଏହି ଗଣଧାରଣରେ ସାମିଲ ହୋଇଛନ୍ତି । ବିରୋଧୀ ଦଳଗୁଡିକର ୫ ଦଫା ଦାବିଗୁଡିକ ହେଲା, ୱାଲଟିୟର ରେଳ ଡିଭିଜନକୁ ପୂର୍ବତଟ ରେଳପଥ ଜୋନକୁ ଫେରାଇଆଣିବା। ପଲାସା-ଇଚ୍ଛାପୁରମ ରେଲ ଅଂଚଳକୁ ସ୍ଥାନାନ୍ତରଣ ନିଷ୍ପତ୍ତି ବାତିଲ କରିବା। ଓଡିଶା ଭୂଖଣ୍ଡ ମଧ୍ୟରେ ଯାଇଥିବା ସମସ୍ତ ରେଳ ଅଂଚଳକୁ ପୂର୍ବତଟ ରେଳପଥ ଅଧୀନକୁ ଆଣିବା। ସୁନ୍ଦରଗଡ଼, ବାଲେଶ୍ୱର, ମୟୂରଭଞ୍ଜ, କେନ୍ଦୁଝର ଓ ଝାଡ଼ସୁଗୁଡା ରେଳଲାଇନ ଗୁଡିକୁ ପୂର୍ବତଟ ରେଳ ଅଧୀନକୁ ଆଣିବା । ଏହି ଅବସରରେ ମିଳିତ ବିରୋଧୀ ଦଳମାନେ ପ୍ରତିକ୍ରିୟା ରଖିଛନ୍ତି । କହିଛନ୍ତି, ରେଳ ରାଜସ୍ବ ଏବଂ ନିଯୁକ୍ତିରେ ଓଡିଶାକୁ ନ୍ୟାୟ ଦେବା ସହ ପୂର୍ବତଟ ରେଳପଥର ସୁରକ୍ଷା ପାଇଁ ଆଗକୁ ଆନ୍ଦୋଳନ ତୀବ୍ରତର ହେବ । ୧୦ଟି ବିରୋଧୀ ଦଳର ନେତା ପ୍ରତିକ୍ରିୟା ରଖିଛନ୍ତି। ଏହି ଅବସରରେ ବିଜେଡି ଉପସଭାପତି ଦେବୀ ପ୍ରସାଦ ମିଶ୍ର, ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ, ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା, ପୂର୍ବତନ ଅର୍ଥମନ୍ତ୍ରୀ ପଞ୍ଚାନନ କାନୁନଗୋ, କଂଗ୍ରେସର ବରିଷ୍ଠ ନେତା ପ୍ରସାଦ ହରିଚନ୍ଦନ, ସିପିଆଇ ନେତା ଏନ୍. ନାରାୟଣ ରେଡ୍ଡୀ, ସିପିଆଇେମ ରାଜ୍ୟ ସାଧାରଣ ସଂପାଦକ ସୁରେଶ ଚନ୍ଦ୍ର ପାଣିଗ୍ରାହୀ, ବିଜେଡି ରାଜ୍ୟ ଯୁବ ସଭାପତି ଚିନ୍ମୟ ସାହୁ, ଛାତ୍ର ବିଜେଡି ସଭାନେତ୍ରୀ ଇପ୍ସିତା ସାହୁ ପ୍ରମୁଖ ଉପସ୍ଥିତ ଥିଲେ।
