ସୁପ୍ରିମକୋର୍ଟ ବିଗାଡ଼ିଲେ ଟ୍ରମ୍ପଙ୍କ ଗଣିତ, ଏବେ ଆମେରିକା କରିବ ଟାରିଫ ରିଫଣ୍ଡ
ନନ୍ଦିଘୋଷ ବ୍ୟୂରୋ: ଆମେରିକା ସୁପ୍ରିମକୋର୍ଟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଝଟକା ଦେବା ସହ ତାଙ୍କ ଦ୍ବାରା ଲଗା ଯାଇଥିବା ରିସିପ୍ରୋକଳ ଟାରିଫକୁ ବେଆଇନ କହି ରଦ୍ଦ କରିଦେଇଛନ୍ତି । ଏହାର ପ୍ରଭାବ ଅନ୍ୟ ଦେଶଙ୍କ ସମେତ ଆମେରିକାର ବ୍ୟବସାୟ ଓ ଦରଦାମ ଉପରେ ବି ଦେଖିବାକୁ ମିଳିବ । ତେବେ କୋର୍ଟଙ୍କ ରାୟ ପରେ ଟ୍ରମ୍ପ ରାଗରେ ୧୦ ପ୍ରତିଶତ ଗ୍ଲୋବାଲ ଟାରିଫ ଲଗାଇ ଦେଇଛନ୍ତି । ହେଲେ ପୁରୁଣା ଟାରିଫ ରଦ୍ଦ ହେବା ଅନ୍ୟ ଦେଶଙ୍କ ପାଇଁ ଆଶ୍ବସ୍ତିର ଖବର । କାରଣ ଏହି ନୂଆ ଟାରିଫ ପୂର୍ବରୁ ଲାଗିଥିବା ରିସିପ୍ରୋକଲ ଟାରିଫର ସ୍ଥାନ ନେବ । ଏମିତିରେ ପ୍ରଶ୍ନ ଉଠୁଛି କି ଆମେରିକାକୁ ଏବେ ଟାରିଫ ରିଫଣ୍ଡ କରିବାକୁ ପଡିବ କି ? ଯଦି ହଁ ତେବେ କେମିତି ଓ କାହାକୁ ଆମେରିକା ଟାରିଫ ରିଫଣ୍ଡ କରିବ ?
ଜାପାନ, ଇୟୁ, କୋରିଆ ସମେତ ଭାରତ ଉପରେ ପ୍ରଭାବ
ଟ୍ରମ୍ପଙ୍କ ରିସିପ୍ରୋକାଲ ଟାରିଫ ସୁପ୍ରିମକୋର୍ଟ ରଦ୍ଦ କରିବାର ପ୍ରଭାବ କାନାଡା, ଚୀନ, ମେସ୍କିକୋ, ଭାରତ, ବ୍ରାଜିଲ ସମେତ ଅନ୍ୟ ଦେଶଙ୍କ ପାଇଁ ଆଶ୍ବସ୍ତି ଆଣିଛି । ଏହି ସବୁ ଦେଶଙ୍କୁ ହାଇ ଟାରିଫର ସାମ୍ନା କରିବାକୁ ପଡୁଥିଲା । ହ୍ବାଇଟ ହାଉସର ଅଧିକାରୀ ଶନିବାର ସ୍ପଷ୍ଟ କରିଛନ୍ତି, କୋର୍ଟଙ୍କ ଦ୍ବାରା ଟାରିଫ ରଦ୍ଦ ପରେ ଭାରତର ଟାରିଫ ଦର ୧୮ ପ୍ରତିଶତରୁ କମି ୧୦ ପ୍ରତିଶତ ହୋଇଯିବ ।
ଇଣ୍ଟରନ୍ୟାସନାଲ ଇମରଜେନ୍ସି ପାଓ୍ବାର ଆକ୍ଟ (IEEPA) ଅନୁସାରେ ପାରିପାର୍ଶ୍ବିକ ଟାରିଫ ବଦଳରେ ଧାରା ୧୨୨ ଅନୁସାରେ ନୂଆ ଟାରିଫ ଲାଗୁ ହେବ । ଯେପର୍ଯ୍ୟନ୍ତ ଅନ୍ୟ ପ୍ରାଧିକରଣ ଲାଗୁ ହୋଇନି ସେତେଦିନ ଯାଏଁ ୧୦ ପ୍ରତିଶତ ଟାରିଫ ରହିବ । ଏହାଦ୍ବାରା ଭାରତ, ୟୁରୋପୀୟ ସଂଘ, ଜାପାନ ଓ ଦକ୍ଷିଣ କୋରିଆ ଉପରେ ଲାଗିଥିବା ୧୫ ପ୍ରତିଶତ ଟାରିଫ କମି ୧୦ ପ୍ରତିଶତ ହେବ । ସେହିପରି ଭିଏତନାମ ଉପରେ ଲାଗିଥିବା ୨୦ ପ୍ରତିଶତ ଟାରିଫ କମି ୧୦ ପ୍ରତିଶତ ହୋଇଯିବ ।
ଆମେରିକା କେମିତି ଦେବ ଟାରିଫ ରିଫଣ୍ଡ ?
ଟାରିଫ ଜରିଆରେ ଡୋନାଲ୍ଡ ଟ୍ରମ୍ପ ଟ୍ରିଲିୟନ ଟ୍ରିଲିୟନ ରାଜସ୍ବ ପାଇବାକୁ ଗଣିତ ଲଗାଇଥିଲେ । ୨୦୨୫ରେ ହିଁ ଆମେରିକା ଟାରିଫ କାରଣରୁ ୨୦୦ ବିଲିୟନ ଡଲାର ରାଜସ୍ବ ପାଇଥିଲା । ହେଲେ ସୁପ୍ରିମକୋର୍ଟ ଟ୍ରମ୍ପଙ୍କ ଏହି ଗଣିତକୁ ବିଗାଡି ଦେଲେ । ଆମେରିକା ଚାମ୍ବର ଅଫ୍ କମର୍ସ ଶୁକ୍ରବାର ଟାରିଫ ରିଫଣ୍ଡକୁ ନେଇ କହିଛି, ସୁପ୍ରିମକୋର୍ଟ ଟ୍ରମ୍ପ ଟାରିଫ ରଦ୍ଦ କରିବା ପରେ ଭାରତ ଓ ବ୍ରାଜିଲରୁ ଆସୁଥିବା କିଛି ସାମଗ୍ରୀ ଉପରେ ଲାଗିଥିବା ଟାରିଫ ରିଫଣ୍ଡ କରାଯିବ । ବିଜନେସ ଚାମ୍ବର ଅନୁସାରେ, ଆମେରିକା ଆମଦାନୀକାରୀ ଯେଉଁମାନେ ସିଧାସଳଖ ଟାରିଫ ପ୍ରଦାନ କରିଛନ୍ତି କିମ୍ବା କଷ୍ଟମ୍ସ କ୍ଲିୟରାନ୍ସ ପରେ ସାମଗ୍ରୀର ମାଲିକାନା ହାସଲ କରିଛନ୍ତି, ସେମାନେ ଟାରିଫ ରିଫଣ୍ଡ ପାଇବାକୁ ଯୋଗ୍ୟ ।
କାହାକୁ ମିଳିବନି ରିଫଣ୍ଡ ?
ଚାମ୍ବର ପକ୍ଷରୁ ସ୍ପଷ୍ଟ କରାଯାଇଛି, ଯେଉଁ ବ୍ୟବସାୟୀମାନେ ଟାରିଫ ପ୍ରଦାନ କରିନାହାନ୍ତି, ସେମାନଙ୍କୁ ରିଫଣ୍ଡ ମିଳିବ ନାହିଁ । କାରଣ IEEPA ଅନୁସାରେ ଯାହା ଉପରେ ଟାରିଫ ଲାଗିଛି ସେଥିରେ ରିଫଣ୍ଡର ବ୍ୟବସ୍ଥା ରହିଛି ।
